ضَحِيَّةُ الذِّئاب البَشَرِيَّة 3/>

12) ماكاين ما احسن من الحلال

لاغدليه تقاديت مزيان لبست لحوايج الجداد الي شريت درت ماكياج خفيف و الشعر مصايب جيت كانحمق  .. بغيت نضربهوم على الشعا حيت حيت قلت مدرسة تالمهندسين ماغايكونش كايقرا فيها من والا .. ماخاصنيش نبان مبهدلة قدامهم .. وفعلا داكشي اللي كان ماكاين غي التيتيز و كلشي بطونوبيلتو دراري وبنات .. و تصدمت واحد الصدمة ما عمرها طاحت لي على البال .. واحد الأستاد مايقريني صدق واحد من هادوك اللي تحويت معاهم .. غي شفتو تمنيت الأرض تشق وتبلعني مابغيت تا حد تكون عندو عليا نظرة خايبة بغيت سمعتي تما تبقا مزيانة .. قال لينا نقدمو راسنا قدمت ليهم قلت ليهم سميتي و السن و نوع و النقطة تالباكالوريا وقلت ليهم مزوجة .. فاش كنت خارجة تبعني الأستاد سولني قال لي واش عندك شي ختك كاتشبه لك .. قلت ليه آه أنا وختي توام ولكن هي عايشا معا ماما و أنا عشت معا بابا حيت واليدينا مطلقين و ما عندناش معا بعضياتنا .. واش كاتعرفها ؟ .. قال لي لا سمحي لي غي تغالطتي لي واقيلة .. عرفت نكدب و تاق بيا خصوصا فاش قلت ليهم مزوجة يعني محال نكون كانفسد وعاد كنت مبدلة بزاف حيت صبغت شعري وقطعتو .. وجاب ربي ديك لوقيتة فاش كنت عاهرة ماكنتش كانقول ليهم سميتي الحقيقية .. لموهيم تأقلمت معا الجو تما و تانا درت راسي من الطبقة البرجوازية .. كانت عاجباني الشعبة اللي ختاريت و مرتاحة فيها .. درت الصحاب ولكن فحدود مابغيتش نتخور ويطرا لي بحال شحال هادي وليت حاضيا راسي حيت ماكاينا ثقة ..  كدبت عليهم قلت ليهم أنا مزوجة وراجلي فألمانيا بغيت حتا نكمل قرايتي فالمغرب عاد نمشي عندو و شاري ليا  آبارطومون فواحد الحي راقي وقلت ليهم بلي حاملة .. هاد لكدوب كامل باش فاش تكبر كرشي يعرفوني مزوجة ماشي جايباه من الزنقة .. كنت كانقرا مزيان كانجيب ديما أول نقطة .. وماكنتش مداسرا معا بنادم تما و حتا هوما كانو محتارميني كايقولو السيدة مزوجة ..  الحقيقة ديالي عارفاها غي أنا وختي ولمرا اللي كاريين عندها .. هي مرا كبيرة وضريفة الله يعمرها دار فتحت ليها قلبي و عاودت ليها و بقيت فيها بزاف .. قالت لي فاش تولدي أنا نقابل لك ولدك فاش تكوني قاريا .. دازت ليام ولفلوس بدات تقادا و خاصنا بزاف تالمصاريف الطرونسبور ديالنا أنا وختي .. لكرا و الما و الضو و ماناكلو ومانلبسو .. فكرت مزيان قلت خاصني منين نجيب لفلوس .. و طريق لحرام ماباغاش نرجع ليها حلفت ما نعاود نفسد .. طاحت عليا واحد الفكرة .. نجمع ولاد الحومة وندير ليهم المراجعة (كاين الي كايسميهم السوايع ) .. زعما الدروس الإضافية .. الناس ديال الحي كاملين فقراء و ماكايقدروش على المراجعة  باغيين يقراو و مالاقيين جهد حيت كايطلبو لهم أثمنة غاليا بزاف كاتوصل تال 400 درهم للمادة .. قلت غاندير ليهم بثمن رخيص و هاكا كلشي غايجي عندي .. فالأول جمعت 6 تالدراري كايقراو فالثاناوي درت معاهم 200 درهم للشهر فيها الرياضيات و الفزياء و العلوم عوض يمشيو لجهة أخرى ويديرو كل مادة بوحدها وتقام عليهم غاليا .. ماماين واحد من الدراري عطاتنا واحد البيت فالسطح عندها خاوي قالت لي ديري ليهم فيه المراجعة بشرط واحد من ولادها نقريه فابور .. جاتني مزيانة مالقيتش مشكل منبعد بديت كانتشهر فالحومة أو ولاو عندي الدراري بزاف من مستويات مختالفة ..