مرت الايام و تميت سنة تانية ثانوي وبقيت نازلة ثالثة... طبعا الناس كلها سألوني رغبتك شنو؟ ماشة علمي ولا ادبي؟ انا قررت امشي ادبي... لكن امي ما كانت مقتنعة بالادبي دة في البداية ..انا عارفة انها لسة شايلة همي..عايزاني ادخل كلية كويسة عشان بعدين اشتغل شغل كويس و اشيل نفسي ما اضطر اعتمد على زول ولا اكون تحت رحمته...
قالت لي (شوفيني انا حسع عشان ما قريت الجامعة ...كان ممكن اعمل شنو انا وانتي بعد وفاة ابوك و جدك؟ ...الواحدة احسن تتاهل كويس و تعتمد على نفسها ما تحتاج لاي زول مهما حصل ليها...)
المهم اتكلمت معاها وقلت ليها (يا امي في مجالات كتيرة كويسة في الادبي... و كمان فرصتي اني اجيب نسبة عالية في الادبي اكتر من العلمي.... وممكن كدة اخش كلية كويسة في جامعة كويسة واتفوق فيها كمان...)
امي قالت لي (كدي احسن نشوف رأي عادل ..هو حسع بدرس في الجامعة وبكون عارف احسن مننا...يورينا رأيه شنو)
ولما عادل جاء امي كلمته ( ايمان قالت عايزة تمشي ادبي...انا قلت ليها احسن ليك العلمي ..الكليات كويسة و بعدين الشغل مضمون..ولا رايك شنو؟.) ع
ادل عاين لي كدة وسألني ( انتي اكيد عندك فهم في الموضوع..اها شنو وريني؟)
انا كررت نفس كلامي القلته لامي انه الادبي فيه مجالات كتيرة كويسة... و في الاخر قلت ليهم ( ومن ناحية الشغل المضمون ..اصلا اي زول مكتوب ليه رزقه لو قرا علمي ولا ادبي ...ولا لو ما قرا كله كله ..ولا شنو؟)
عادل عاين لي مسافة كدة وضحك وقال ( تراكي ما هينة...افحمتينا..) وقال لامي( والله ايمان كلامها صحي...من اهم الحاجات البتخلي الزول ينجح هي الرغبة..والله لاقوني ناس كتار رغم انهم شاطرين واي حاجة لكن لانهم دخلوا كليات ما كانت رغبتهم ما نجحوا فيها زي ما كان متوقع من ناس في مستواهم.. و الانسان لو راغب الحاجة حتى لو كانت بسيطة ممكن يبدع فيها و يتميز شديد)
و اتلفت كدة وعاين لي وقال ( وما دام هي رغبتها كدة انا ما شايف في مشكلة... وكلامها القالته كله منطقي...)
امي طبعا اقتنعت بالكلام ...اما انا كلام عادل القالو و انه وافق رأي طبعا خلاني طايرة من السعادة... و اليوم داك كله كل ما اتذكر كيف عادل عاين باعجاب من كلامي القلته اقعد اتبسم براي
بعد يومين كدة عادل بعد جاء من الجامعة جاء قال لي ( شايف ناس الرابطة عندنا في الكلية عاملين كورس لطلاب الشهادة علمي و ادبي ....انا قبل ما اسجلك قلت اجي اشوف رأيك شنو؟ عندكم كورس في المدرسة ؟و لا عارفة ليك كورس كويس في مكان تاني؟.....)
كورس في كلية عادل؟؟ طبعا انا ما قادرة اصدق قلت ليه سريع ( لا ما عندنا في المدرسة...اصلو الوزارة وقفت الكورسات الصيفية في المدارس...) وانا بيني وبين نفسي حتى لو كنت عارفة مكان كورس تاني كنت لغيته عشان امشي الكورس بتاع كلية عادل...
