طلعنا في الساحة البرة الصالة وكانت فاضية وملانة شجر..مشيت مع خالد على جنبة و ايناس وقفت جنب الباب تعاين لينا من بعيد...قال لي ( اها ..انا ح انتظر لمتين يا ايمان؟ ...)
قلت ليه ( حسع دة ما وقت كلام زي دة ...و لا المكان المناسب كمان..)
قال لي بنرفزة كدة ( المشكلة شنو يعني؟ البيمنعك شنو توريني قرارك حسع و هنا؟)
انا خلاص زهجانة منو اصلي قلت ليه ( لو مصر تعرف خلاص...) وسكت شوية وقلت ليه ( معليش بس مافي نصيب...)
قال لي (يعني شنو مافي نصيب؟)
قلت ليه ( يعني ..انا بعتذر ليك مافي نصيب بيناتنا...يعني ربنا يوفقك مع واحدة غيري..)
سكت شوية كدة وقال براحة ( ممكن اعرف السبب شنو؟ ...)
قربت اقول ليه عشان اكتشفتك على حقيقتك... لكن قلت مافي داعي للمشاكل...قلت ليه (انا من الاول قلت ليك دي فترة نجرب فيها ونشوف الامور ح تمشي لقدام ولا لا ..وبصراحة انا استخرت و ما حاسة اننا ح ننفع مع بعض...)
الساعة الهب ليك فيني وقال( طيب بتمطوحي فيني من زمان ليه؟...حاسة اننا ما ح ننفع مع بعض و لا خلاص ود راجل امك المقرش جاء من بريطانيا وانا بقيت ما قدر المقام؟..)
انا اتخلعت بقيت اعاين ليه ما قادرة اتكلم و هو واصل ( لو قايلاه ح يعاين ليك بتحلمي...انت قايلة نفسك شنو؟.. لو ما قروش راجل امك دي قايلة في زول بعاين ليك؟..ما تحمدي الله انه انا جيت اتقدمت ليك؟ )
انا شعرت بجسمي دة برجف ودموعي جارية و ما قادرة اتكلم و شعرت بيدين حولي ..ما اتلفت لكن سمعت صوت ايناس بتقول لخالد ( دة شنو البتقول فيه دة؟ انت جنيت؟ ...)
قال ليها ( انا ما جنيت لكن عرفتها على حقيقتها..وح افضحها في الحلة كلها...)
طوالي ايناس قالت ليه( الاتعرف منو على حقيقته؟ ...وقت اصله هي الحكاية كدة خليني اوريك...نحن عارفين علاقتك مع زاهية بنت خالة مناهل جيراننا... وانك واعدها هي كمان بالزواج... و انا متأكدة انه في غيرها وغيرها لو مشينا سألنا ح نعرف...) خالد اتخلع و سكت بقى فاتح خشمه ويعاين لايناس .
ايناس زحت يديها مني ورفعت ليه اصبعها قدام وشه وهزته قالت ليه ( اسمع هنا.. قسما عظما تفتح سيرة الموضوع دة تاني ولا تجيب سيرة ايمان دي الا افضحك في الحلة كلها...ووالله اكلم اخواني بالبتعمل فيه وبالقلته حسع دة الا يطفشوك من البلد انت عارفهم.. )
في اللحظة دي سمعنا صوت خطوات بورانا ايناس و خالد التلفتوا يعاينوا ...وانا ما قادرة اعمل اي شي بس جسمي برجف ودموعي جارية..وسمعت صوت عادل ( في شنو؟ صوتكم طالع ليه؟)
انا ولا اتلفت ولا عاينت ليه ....ولما شاف حالتي كدة قال بانزعاج ( ايمان مالك؟ )
انا ما رديت قال ( يا اخواننا في شنو؟ ايناس ؟ خالد؟) سبحان الله انا في ضيقتي ديك قلت عادل عرف خالد من وين.. تاني قلت بكون عرفوه بيه في الحفلة...
