ومرت ايامي..وشعرت اني عايشة زي الشبح ...نفسي طالعة من اي شئ...لا باكل كويس و لا بنوم كويس ...امي تعاين لي ساكت لكن ما قالت شئ...وانا بقيت ما قادرة ادس عليها.... و بقى ما فارق معاي ..خلاص اصلا هي عارفة شعوري شنو..
عبير وناجي جوا من شهر العسل و عبير اول ما شافتني قالت لي ( مالك ضعفتي كدة؟ ...اوعك تكوني هامة من نتيجة امتحان ولا كدة..يا بت البجيبه ربنا كله كويس..)
انا ضحكت ساكت و مشيت كلامها...بعد داك انشغلت برحول عبير لشقتها....وحمدت الله لاني لقيت حاجة تشغل وقتي ....بقيت ارتب معاها في الشقة لغاية ما استقروا وعملوا كرامة كبيرة...
تاني رجعت للبيت و لوحدتي و قلقي ..ما عندي شئ غير التلفون و الواتس مع ايناس و سهى ومنتظرين النتيجة ..سهى كم مرة قالت لي نتفق يوم نطلع سواء لكن ما كان عندي نفس لاي شئ..
عادل اخباره كانت عندي من ناس البيت....اتصل كم مرة في تلفون البيت كان بتكلم مع انور و امي و ابوه ...لكن ولا مرة ما قال عايز يتكلم معاي ..انا بكون واقفة اسمع فيهم بتكلموا معاه و في الاخر يقولوا لي عادل بسلم عليك...حتى صوته حرمني منه...
وجاء يوم اعلان نتيجة الشهادة و جبت 85% ...و ايناس ممتحنة علمي جابت 80% ...وسهى 83% ...ناس البيت كانوا فرحانين وانا ما قدرت اعرف نفسي فرحانة ولا لا ..كأنو احاسيسي و شعوري بقت متبلدة .....كنت مبتسمة وانا بسمع في التهاني و التبريكات لكن شاعرة بفراغ و خواء جواي....
العصر التلفون ضرب ورد عمي علي وسمعته قال ( عادل ...كيف ؟ ان شاء الله كويس ؟ ...)
انا كنت واقفة بسمع ..عمي علي سكت شوية يسمع وبعدين قال ( ايوة كلنا كويسين هنا الحمد لله ...ايوة الليلة كانت نتيجة الشهادة....ايمان الحمدلله جابت 85% ...)
وتاني سكت شوية قال ( ايوة ..اهي دي جنبي...)
واتلفت مد لي التلفون ( ايمان ..دة عادل عايز يبارك ليك...)
انا مسكت السماعة و حاسة يدي بترجف و قلبي بضرب قلت ( الو...)
مسافة كدة مافي رد افتكرت الخط قطع ..تاني قلت ( الو ..)
سمعت صوته اخد نفسه وقال براحة ( ايمان ...ازيك... مبروك...) انا لما سمعت صوته شعرت بشئ زي الكهرباء في جسمي و قلبي ضرب زيادة وحسيت صوتي طالع ضعيف( الله يبارك فيك ...)
سكتنا الاتنين لحظات و قال لي ( كيفك؟..عامل كيف؟...)
قلت ( الحمدلله كويسة ...انت كيف؟ ...)
قال لي ( انا كويس الحمدلله..بس مشتاق ليـ....ليكم...) انا سكت ما قلت شي وقلبي يضرب ..
بعد لحظات قال لي ( لو خالتي سمية جنبك اديني ليها ....) امي كانت جات وقفت مديت ليها السماعة من غير ما اتكلم و مشيت ..حاسة انو مشاعري و احاسيسي الكنت بحاول اكتمها الفترة الفاتت دي كلها ..جاية طالعة منفجرة...
