حبيبي دائما

الجزء 16

عديت 3 سنوات في الجامعة ... عبير ولدت بنت سمتها اسيل عمرها سنتين حسع... و انور شغله مشى كويس في الشركة الهندسية... و خطب واحدة زميلته مهندسة وعرسهم حددوه بعد سنة ..

اما عادل باقي ليه سنة واحدة ويخلص الدكتوراة ... وعرفنا انه ناس الجامعة في بريطانيا عرضوا عليه وظيفة معاهم لكن ما حدد لسة ح يقعد معاهم ولا ح يرجع السودان...

في اخر سنة تالتة دي كان عرس محاسن بنت خالتي نفيسة اخت ايناس الكبيرة.....طبعا مشينا انا وامي والتومات قبل العرس بكم يوم قعدنا معاهم للخدمة و التجهيزات...

في ايام العرس دي اتعرفت بخالد ..

خالد دة امه بت عم امي..اتخرج من الجامعة و شغال محاسب في شركة ....والايام القبل العرس دي كان بجي طوالي لناس خالتي بحكم القرابة والجيرة ..هو كان قيافة و طويل ..ولاحظت ليه مهتم بي و طوالي يجي يسلم علي و يقعد يحاول يفتح معاي المواضيع..

انا اصلا ما كنت مهتمة ..في غيره حاولوا معاي في الجامعة لكن ما قدرت اعتبر اي واحد فيهم اكتر من زميل او صديق ...الاخد قلبي و سكن فيه ما بتزحزح ولا بدي اي واحد غيره فرصة معاه.....المهم اني ما شجعت خالد و لا اديته وش ...

بعد خلص العرس ورجعنا البيت، يوم امي نادتني براي و قالت لي ( اتصلت علي ام سلمة بنت عمي ..قالت دايرنك لخالد ولدها ...شافوك في عرس محاسن و عجبتيهم...)

انا اتصدمت لاني ما اديت خالد اي وش.... بالعكس وضحت ليه باكتر من طريقة اني ما مهتمة....يقوم يمشي طوالي يختني امام الامر الواقع ..وحتى من غير يفاتحني في الموضوع؟

زعلت وقلت لامي( انا خالد دة ما بعرفه كويس ..كيف اقبل بواحد ما بعرفه؟...)

امي قالت لي ( اجي كمان داير ليه عرفة..امه بنت عمي و ابوه ذاته قريبنا..يعني ما ناس غرباء ,ولامحتاجين نسأل منهم ولا نعرفهم ...)

قلت ليها ( لكن يا امي انا ما عايزة اتزوج امه ولا ابوه ...انا هو شخصيا ما بعرفه ..انتي بتعرفي امه وابوه وباقي اهله كويس ...وهم ناس كويسين... لكن هو ما بالضرورة يكون زيهم ..دة زواج ..يعني حياتي كلها ...)

امي قالت لي ( و الخطوبة دي لشنو؟ ما عشان تعرفيه ...هم حسع ذاتهم ما قالوا دايرين عرس طوالي ... هو ذاته لسة ما جاهز ...بس دايرين يحجزوك ساكت ..)

زعلي زاد وقلت لامي( يحجزوني دة شنو؟.. انا اصلي شنو؟ بيت و لا دكان؟ بعدين هوكان اول ياخد رأي انا قبل ما يمشي يكلم اهله ويجوا يكلموك..)

امي قالت لي ( ماله يا بنتي ..جاي بالباب عديل ما بتاع لف ودوران و حركات اولاد الزمن دة...)

قلت ليها ( يا امي ...على الاقل يعرف مني.. يمكن اكون مخطوبة ..يمكن عندي زول تاني....) و طبعا ياهو دة ذاته الكلام الما عايزاه امي...كلمة اني عندي زول تاني...رغم اننا ما حصل اتكلمنا صراحة وجها لوجه ..هي عارفة انا عايزة منو و انا عارفة رأيها شنو في الموضوع ...