تاني يوم الصباح لما نزلنا المطبخ طوالي سألنا خالتي عشة الحصل شنو امس ..قالت لينا ( اول شئ دايرة اقول كتر خيركم وبارك الله فيكم...والبركة انو نجوى سمعت كلامكم ...امس عيسى ولدي ساق العيال وداهم لاهلهم و قال جدهم وحبوبتهم ديل كانوا ما مصدقين و بكوا بكاء شديد ...لكن قال الروح دي ردت فيهم بعد شافوا العيال و يشيلوا ويشكروا في نجوى ....)
عادل عاين لي وابتسم من غير كلام
بعد مشينا الجامعة ولما جيت مكتبه في البريك و بعد فطرت عايزة اقوم امشي قال لي ( لو ما عندك حاجة ضرورية راجعة ليها ..اقعدي خلصي البريك بتاعتك هنا ....انا اصلا بعد نص ساعة عندي محاضرة..)
طبعا انا ما صدقت و بابتسامة عريضة قعدت تاني و قضينا باقي البريك نتونس مع بعض..
واستمرينا على كدة باقي ايام الكورس ...بقيت بقضي ساعة البريك كلها مع عادل نتكلم ونتونس في الدراسة ..في احوال البيت ..في حاجات عامة ..انا لقيت نفسي منفتحة معاه بحكي ليه عن احلامي و امالي وتطلعاتي ..وهو لقيته برضه بتكلم معاي و بتناقش معاي في اموره ...و بياخد رأي في حاجات كتيرة وشعرت انه بقيم رأي جدا ..
عادل وراني انه مفروض ناس الجامعة يبتعثوه يحضر الدكتوراة في بريطانيا في جامعة في مدينة اسمها يورك..قال انه جهز الاطروحة و جاه قبول من جامعة يورك لكن عنده سنتين مفروض يقضيهم مع ناس الجامعة هنا حتى بعد داك يبتعثوه... وقال لي ( ابوي قال لي حقو تدفع قروش البعثة براك وتمشي بريطانيا عشان تكسب الزمن ..لكن انا قلت مادام ناس الجامعة هنا ح يبعثوني مافي داعي داعي للاستعجال...انتي رأيك شنو؟)
انا قلت ليه ( انا برضه مع رأيك ..مافي داعي تضيع قروشك مادام الجامعة ح تديك منحة ...استفيد من القروش في حاجة تانية..وبرضه السنتين ديل تكون اخدت خبرة هنا تنفعك هناك كمان) ..
بعد داك فعلا عادل قرر انه ينتظر السنتين هنا في الجامعة لغاية وقت البعثة ما يجي. حتى يسافر بريطانيا بعد داك.
خلال فترة الكورس دي حسيت اننا انا وعادل بقينا قراب لبعض بدرجة كبيرة ..زي لما اول ما جينا بيتهم وانا كنت صغيرة وعادل احتواني ورعاني... وحسيت اني بقيت حاجة مهمة في حياته زي ما هو حاجة مهمة في حياتي.
حتى في البيت قعدة الصباح للشاي و قعدات بعد المغرب بقت بالنسبة لي مختلفة ..حاسة بانه في شئ رابط بيني و عادل رغم ان الونسة غالب الاحيان بتكون عامة مع باقي ناس البيت... لكن بحس بانو انا وعادل بقت عندنا حاجاتنا الخاصة بيننا نحن برانا ومرات بتكون في ونسة جانبية بيننا نحن الاتنين بس.
انا خلاص حسيت نفسي غرقانة للاخر في حب عادل ..و ريدتي و عشقي ليه ماشة زايدة لو ممكن تزيد ..بقيت خلاص بس بشوف.. و بسمع.. وبتنفس عادل....ما كان بنغص علي حياتي الا لما تجي شاهيناز في المكتب تتكلم وتتبسم مع عادل ....اقعد اسأل نفسي يا ربي لسة مواصلين علاقتهم ؟ يا ربي لسة بطلعوا مع بعض؟ لكن ما قادرة اصل لاجابات لاسئلتي دي.
