.بعد دخلت الصالة اتلفت اشوف ايناس قاعدة وين... لقيتها ومشيت عليها اول ما وصلتها قالت لي ( انا كلمت امي اول بالحصل... وبعد داك مشينا الاتنين لخالتي سمية كلمناها...مع اني ما كنت عايزة الخمها في اللحظات دي ....لكن قلت احسن ننتهي من الموضوع دة حار حار...)
قلت ليها (امي قالت شنو؟...)
قالت لي ( بعد ماكلمتها بعلاقاته و بالكلام القاله ليك الليلة دة اتخلعت شديد ما كانت متخيلة يطلع منه كلام زي دة... اتأثرت لانها حست انها كانت ضاغطة عليك..)
انا طوالي قلبي انقطع على امي.. ومشينا عليها انا وايناس.. كانت قاعدة معاها خالتي نفيسة..وكانت متمحنة.. انا طوالي مشيت عليها وانا مبتسمة ..لما شافتني قعدت تعاين لي بتعابير مختلطة ..شفقة و حنية ...وخالتي نفيسة طوالي قالت ليها ( شايفة ياهو دي ايمان كويسة ...ما عليها اي حاجة ...)
شفت امي عيونها دمعت مشيت حضنتها علي، وهي قالت لي ( كر.علي...دة كله مني انا ...ضغطت عليك وجننتك...)
قلت ليها( يا امي ما ضغطتي علي ولاحاجة..انا وافقت بارادتي على فترة التجربة دي، و انتي اهو صبرتي معاي قريب السنة ...)
قالت لي ( انا لو عارفاه كدة كنت جبرتك؟...دة كله يطلع منك يا خالد؟...)
خالتي قالت ليها (خلاص البركة العرفناه ونحن على البر...انا بكرة بمشي لام سلمة واقعدها في الواطة واوريها الكلام دة كله ...واقول ليها ما عايزين شوشرة كل زول من طريق ويادار ما دخلك شر...)
ايناس قالت ليها ( انا ذاتي بمشي معاك ...)
امها قالت ليها ( تمشي معاي وين ؟ الدخلك شنو في كلام الناس الكبار؟)
ايناس قالت ليها ( انا الشاهدة و لو عايزين بجيب مناهل ذاتها تشهد معاي...)
خالتي قالت ليها ( يعني ام سلمة ماشة تكضبني؟ هي زولة فاهمة ...سبحان الله ولدها دة ما عارفة الجبده منو؟...) قعدت مع ناس امي و خالتي وايناس و تاني ما جابوا سيرة الموضوع دة.. دايرين يوروني انه الموضوع عادي وخلاص انتهى وما عايزني اتحسس.
تاني يوم ام سلمة ضربت لامي وقعدت تعتذر من عملة ولدها و قالت يقشوها ليها في وشها ،
امي هدتها وورتها انه مافي مشكلة و نحن ما زعلانين وما شايلين منهم حاجة..وقالت ليها دة كله طيش شباب ساكت وقالت ليها ربنا يهديه خالد و يلقى بت الحلال..
امي حنكتها كويس غايتو!!!!..
تاني يوم طبعا كانت دخلة انور و كان يوم ظريف انور اصحابه تاني هججوا فيه زي يوم امس..
اليوم البعده عبير كانت مقيلة معانا ..وامي خلاص ورتهم كلهم انه موضوعي مع خالد انتهى..عمي علي اخد الموضوع عادي ، لكن عبير ساقتني اوضتي وقعدت حققت معاي لغاية ما كلمتها بالحاصل كله ، انه خالد عامل علاقة مع واحدة تانية ويمكن اكتر من واحدة... لكن طبعا ما كلمتها بالكلام القاله فيني انا وعادل..
