شرقية الهوى

12

#شرقية_الهوى
#طيبة الربيعي
~البارت الثاني عشر~

عگدت حاجبي: مو چنتي يمهم گبل چم يوم
جوري: توديني لو اخابر هيثم يجيني
جريت نفس: استغفرالله ربي واتوب اليه، مال تروحين زعلانة ماخليچ، الصار سوء تفاهم
جوري: وحضرة جنابك كل ميصير سوء تفاهم تجي تكسرني، بعد ماريد الگعدة يمك خليني اخذ ملاك يمي انتة ترتاح واني ارتاح
گمت: هو شنو ترتاحين واني ارتاح، جوري لسوين هيچ اعتذرت منچ يابة متنعاد شلون اوگع علة رجلچ وابوسهة
جوري: لا تبوسني ولا ابوسك وديني لأهلي اريد ارتاح تعبت

تقربت منهة لزمت اچتافهة: جوري مالومچ والله اني الغلطان حقچ علية بس مو مال تروحين لأهلچ زعلانة
ابتعدت وقاطعتني: اريد اروح ثامر وديني
تنهدت: بدلي اسبح واخذچ

طبيت سبحت وضليت افكر.. خل احاول وياهة واذا اصرت اخذهة هم هية ترتاح وهم اني افكر براحة.. بس كون متحچي لأحد خاف يتشمتون بينة.. واولهم قصي الچنه مخدوع بي وبصداقتة..

طلعت بالمنشفة لگيتهة تلم بغراضهة ماباوعتلي.. تقربت من يمهة وتعمدت من اطلع ملابس اطخ بيهة بس هم مفاد.. وخرت بسرعة ولا عبرتني.. شمرت الاهدوم عالچرباية'طيبة_الربيعي'

وجريتهة لحضني تفاجئت وشلون تباوعلي بعيونهة الكبار الچنهن جنة.. بعدت خصلة من شعرهة وغمضت اريد ابوسهة بعدتني

جوري: شنو تصرفاتك هاية، ياريت بعد متعيدهة

وطلعت وطبگت الباب.. اووووف اووف شلون بيهة هاي ام راس اليااابس.. لبست وفتحت الباب گاعدة وبحضنهة جوري

ثامر: يعني مصرة تروحين
جوري: مصرة
ثامر: انتظرچ جوة

جوري... تصرفاتة عجيبة.. صح حبيت اهتمامة الية وميريدني اروح لاهلي رغم گتلة اخذ ملوكة وياية يعني مو علمود اداريهة يريد يبقيني.. بس من طلع من الحمام وتحارش بية وراد يبوسني اذكرت السواه بية مو سهل..

بعدتة وطلعت.. اريد اصفي بالي بالأول حتة اعرف علاقتنة بيا طريق.. وشلون اتصرف وية ثامر ومزاجة المتقلب.. مچان هيچ حيل متغير هذا المخبلني..

وداني لأهلي وقبل لا انزل انطاني مصرف.. اخذتة بدون نقاش لان ماريد اطلب من اهلي ويحچون عليه علة انو زوجچ مابي خير ينطيچ خاصة ماما.. ماعرف اذا راح تعتقني ومتستجوبني..

چنت بحاجة اللمتنة الحلوة بس قصي مسلم علية ولا حچة وياية.. وهذا الي اذاني.. ولك اختك اني صارلك شگد معقولة محنيت نسيت اني وياك انحملنة بنفس البطن واثنينة من نفس الدم؟؟؟'طيبة_الربيعي'

بليل نومت ملوكة وگلت الشهلاء لطب اريد احچي وياه.. من رجع من الشغل وتعشة رحتلة للغرفة وسديت الباب