شرقية الهوى

13

#شرقية_الهوى
#طيبة الربيعي
~البارت الثالث عشر~

عقلي ميشيل الي سمعتة.. معقولة ثامر طلگني؟ وبأي ذنب؟ شنو الغلط الي بدر مني؟؟؟؟؟ تعرفون هذا الأحساس من تنصدمون بشغلة او بشخص بعد متگدرون تتحركون ومتحسون بدموعكم تنزل لأنكم مو مستوعبين انو هل شي صار.. مو مستوعبين هذا حقيقة او حلم..

گعدت عالسرير مصدومة.. مصحيت من صدمتي بس حسيت كرامتي هاي هية متسمحلي اتوسل بي.. هو الغلطان وهو الحاسب نفسة الصح والكل بالكل.. هو غلطي من البداية..

لميت الي اگدر عليه.. گلبي انقبض اذكرت گلي عوفي ملوكة.. باوعتلهة نايمة مثل الملاك.. نزلت عليهة اخذتهة بين احضاني متت بچي فقدت عليهة.. بوستهة وشميتهة گعدت تبچي..

اسفة يا ماما يا روح جوري انتي.. شسوي اذا ابوچ يريد يفرقنة عن بعض.. صعدت عمتي

ام ثامر: يا ساتر استر شبيچ ولچ، شبيكم ذاكة الخبل شبي

رجعت ملوكة وباوعتلهة اشهگ بالبچي'طيبة_الربيعي'

جوري: مادري سألي ليش طلگني
شهگت: شنوووو
جوري: هية هاي جزاتي يا عمة؟؟ مو حرام عليه هسه شأگل لأهلي واني الي كذبتهم وصدگتة
تقدمت علية: شنو عمة تخبلتو شنو الطلاگ لعبة يعني هيچ علة غفلة بلا سبب طلگچ وانتي توچ جاية من بيت اهلچ
جوري: ماعرف والله ماعرف هستوني اجيت كلشي ممفتهمة
ام ثامر: خاف مسوية شي معصبتة، ترة هذا مصيبة من يتعصب يگوم ميعرف يتصرف
جوري: خاف انكسرت مرة هسه تحطمت بعد مالي رجعة وياه وياريت ادزين باقي غراضي بعدين
ام ثامر: هسه اني احچي وياه مو لعب هو، گعدي وسكتي لطلعين
جوري: عمة شتحچين وياه هو رمة علية يمين الطلاگ بعد ميفيد

عفتهة ونزلت.. چانت رقية واگفة وتبتسم بخبث.. اجاوزتهة وطلعت چان هو گاعد بالسيارة.. صعدت ليگدام وبحضني جنطتي.. شغل السيارة وطلع..

اريد اسكت ماكو بس ابچي واشهگ مدري شجاني.. اريد اعرف ليش طلگني بس كرامتي متسمحلي اسألة..

من وصلنة البيتنة چان بابا واگف بالباب وعبالك يعرف بجيتي.. نزلت وطبيت بدون سلام وضعي ميسمحلي احچي..'طيبة_الربيعي'

تلگتني امي تحچي علية وتغلط علة ثامر.. شدراهم ذولة هاي شبسرعة خبرهم.. گمت ابچي ماريد احچي شي مقهووووورة.. خاف اطلگت مرة صارن مرتين الناس مراح تگول الغلط من الرجال اكيد هسه الحچي يطلع علية..

ام جوري: هو هذا الخبصتيني بي هو هذااا حسبي الله ونعم الوكيل بيك، مو وجه نعمة والله، گتلچ خيولي هذا يريدچ عالمصلحة دشوفي شصار بحالچ هسه