جنة فؤادي

جنة فؤادي الجزء الثاني

جنة فؤادي…  الجزء الثاني

#zainab_alnajar

لا يكفي ان تكون على قيد الحياة .. يجب ان تكون على قيد الامل .. ثق بأن لكل شيء بحياتك سبب ونتيجة .. وبأن الله يأخذ منك ويبعد الشر ويقدم لك الخير

مرت ايام زبيدة كئيبة بين الشغل والبيت وبين الناس الصارت تضهر حقيقتهم بعد ما عرفوا بطلاقها ومواقفهم المختلفة
زبيدة عمرها 33 عام جمالها هادئ عربي اصيل بارز عيون  سود واسعة ورموش كثيفة بشرتها بيضاء صافية وخدود وردية وجها مدور  عدها غمازه بخدها اليسار طويلة وجسمها ممتلئ بترتيب .. شعرها اسود طويل وماتحب تغير لونه  وأكيد محجبه جذابة كلش وصاحبه ضحكة تدخل للقلب وشخصية قوية ماتضهر انكسارها وضعفها وبنفس الوقت رقيقة وطيبة وتعرفون قصة طلاقها .. اما حارث
عمرة 26 سنة طويل اكثر من زبيدة  وجهه حنطاوي عيون بلون غريب بين الاخضر والازرق شعرة بني ومسوي بطريقة كلش حلو ولايگة لملامحه وعنده خصله من شعرة الامام لونها ابيض أشيب  لحية خفيفة جوزية جسمه مو،سمين تقريباً ضعيف لان يعشق الطوبة وجان يلعب بأحد النوادي المحلية حالياً ما يلعب بس مرات ويه اصدقائه انيق جداً ومرتب الي يشوفه يحسه مغرور بس هو انسان بسيط #متزوج من بنت خالة الجميلة جداً سبحان الخالقها كانها حورية جنة عدهم لون العيون متوارث بالعائلة دينا زوجته كانت لون عيونها ازرق صافي بلون السماء وبياضها ناصع وشعرها اشقر بطبيعته اي شخص يشوفها يحسده عليها برغم هو ايضاً جميل بس جمالها طاغي .. لكن محد يعرف خلف هذا الجمال شنو تخبي دينا
زبيدة عدها اخوان اثنين حسان متزوج وبيته بغير منطقة عن اهله وحسام گاعد بيت  اهله والدتها توفت قبل سنتين ووالدها عايش بس مريض وهي ترعاه وعدها اختها نيفين متزوجة و حاليا بكنده طلعوا لجوء بسبب الوضع وطبعا كلهم عدهم اطفال بس هي حضها المسكينة ولحكمة رب العالمين
وحارث اخواته 3 كلهن متزوجات من اولاد اعمامه بس مو بغداد..   بالكوت ومرتاحات  واخوه الكبير كرار  متزوج وگاعد بغير بيت والده متوفي وامه عايشه وهو گاعد بيت اهله
_ حارث شبيك اليوم ابد مو طبيعي
_ والله مريض زبيدة جسمي منحول واحس حرارتي مرتفعة يمكن بداية انفلونزا الليل كله هيج اني
_ ليش ما اخذت علاج جان دينا سوتلك كمادات
_ دينا 😏 ماتدري بيه اصلا بايته بيت اهلها
_ يالله مايخالف شمدريها بيك مريض جان خابرتها وهسه تجيك ركض
_ والله خابرتها گالتي تدلع مابيك شي وما اتصلت بعد
_ لا تصير حساس عاد .. هسه دقايق واجي من رخصتك
راحت زبيدة صيدلية قريبة على الشركة جابتله علاج ومن الكافتريا اخذتله نسكافي لأن الجو جان بارد .. كلش انقهرت عليه شافته راسه على الميز ومابي يتحرك او يسوي شئ حسته طفلها او اخوها الصغير
_ يالله اخذ العلاج هسه شوية وتنزل حرارتك وهاي النسكافي ادفيك شوية اشربها واخذ اجازة وارجع للبيت
_ لا ما أريد ارجع راح اتمدد على التخم شوية هنا
،، تمدد شويه وغفى وكملت شغلها وشغلة بهدوء دائمًا يتساعدون بيناتهم ،، بعد فترة صحى على صوت تلفونه دينا تتصل بي ماجاوب بالاول رجعت اتصلت مرة ثانية گالتله زبيدة شوف شلون ضل بالها عليك جاوبها خطية .. فتح خط وفتح سبيكر وأشر لزبيدة اسمعي
_ الوو هلو حارث
_ هلو دينا
_ أگولك راح اروح للصالون ويه زينة اختي اريد فلوس والعصر العرس مال سامر ابن خالي حتى نروح .. انت تجي مو ؟
_ لج يا عرس مو اتصلت بيج من الليل وگلتلج مريض
_ اي شدعوه هي شوية حرارتك مرتفعة اخذ علاج .. براحتك اذا ماتجي اروح ويه اخوية ها صدك يعني اليوم هم ابقى اكيد نرجع متأخر وتعبانين
،،، حارث ساكت ،،
_ شو سكتت
_ شتريدين اگولج بالتلفون .. تجين يمي واحاجيج
_ هسه عود الله كريم من اجي المهم راح اخذ من ماما فلوس هسه واروح وعود انت انطيها من تجي علية .. يالله باي
،، وسدته ،،
،، زبيدة مصدومة .. معقولة هذا اسلوبها ،،
_ سمعتيها ؟
_ احم .. اي سمعت بس مايخالف عرس ابن خالها يجوز ضايجة تريد تغير جو
_ العرس والصالون والطلعة كلهن اهم مني .. حتى اطفالها هاملتهم
_ طول بالك حارث شكو بيها خلي تروح للعرس انت اخذ علاجك وتصير زين .. يالله تعال ناكل جايبة غده ويايه شلون برياني فديتني هههههه
حس نفسة شويه حرارته احسن .. صاحت موضفة وياهم اسمها اسماء وگعدوا ياكلون ويسولفون ويضحكون نسه دينا شوية .. ومن كملوا طلعتله العلاج وجابتلة مي
_ يالله اخذ علاجك اليوم صاير طفل ويدلل ههههه عبالك حسام اخوية من جان صغير
،،، ابتسم حارث ومن صدك تمنى تكون زبيدة من عائلته وتهتم بي .. حارث برغم اهله بالبيت بس عايش بوحدة اخواته 3 متزوجات واخوه لاكبر من عندة متزوج وطالع من البيت ابوه متوفي وامه هم مشغوله واجبات وشغل البيت وهم تعبانة .. اما دينا. .. هاي مأساته
،، راحت زبيدة لغرفة المدير تودي اوراق ورجعت مو على بعضها متغير شي بيها متوترة ومرتبكة
_ شبيج ست زبيدة
_ حارث المدير..  سمعني كلام
_ شنو گال احجي اطيح حضه والله
_ ها لا ماكو شي يجوز فهمت غلط
_ احجي شبيج خايفة
_ لا ماخايفة بس يجوز متوهمه .. بقت صافنه وتتذكر كلمات المدير يلمحلها على علاقة وحاول يمسك ايدها .. هذا شبي ليش تغير .. معقوله لأن تطلقت !!
انتهى الدوام ورجعوا كل واحد لبيته
زبيدة وروتين حياتها تهتم بأبوها بس فرحانه تگضي وكتها وياه تتشاقة وتسولف وتأكل وتدعي من رب العالمين مايحرمها منه
وحارث دخل للبيت استقبلوا اطفاله داليا 4 سنوات  وحسن سنتين وامهم حامل بشهر الثامن  فرح من شافهم سأل على زوجته
_ ماما وين .. جاوبته والدته وهي تحضر الغده
_ ما اجتي دزتهم ويه خالهم وهي رايحة للصالون
_ كل شي مو مهم عدها ست دينا المهم نفسها وكشختها واناقتها
_ ليش هي مو نطتك علم واليوم عرس ابن خالتها
_ اي بالتلفون يمه تدري بيه مريض وتگولي اليوم هم ابات بيت  أهلي
_ هسه غير عرس وحفله دخليها تريد تخنگها .. شبيك وياها
_ مابيه شي يمه يمكن هي بنتج مو اني ابنج وشوكت ما احجي تطبگين وياها .. لا مهتمه بيه ولا باطفالها لا نوب حامل مره لخ والمهم نفسها اقلها تجي تساعدج مو تعبانه انتي وواگفه تطبخين
_ اني ماشتكيت شعليك انت…   لو تفتر الدنيا ماتلگة بجمالها شو عبالك حورية بت اخوية
_ ضلي يمه هو بسبب كلامج شافت نفسها عليه وحجاية ما اكدر احجي وياها وخوش امها عدها لو تگولها موتي تموت .. شنو فايده جمالها بس گوليلي
دشوفي الجهال عبالك ملابسهم صارلها كم ما مامبدلين وحتى سبح مامسبحتهم…  بس هذا يعجبج عادي وعسل على گلبج
_ هسه شتريد جاي تتعارك تجي وعود حاجيها
يالله تعال تغده
_ ما اريد ماكل .. راح اخذ علاجي وانام الجهال خلي يتغدون ويجون يمي .. نام شويه واجوي الجهال يمه اخذهم سبحهم وغير ملابسهم ورتبهم وطلعهم وياه بالسيارة ضل يفتر وياهم ولعبهم وامهم حتى سؤال ما سألت عليهم .. وحارث هم قرر مايتصل بيها وشوكت ترجع خلي ترجع وما يروح يجيبها .. حس بدأت حرارته ترتفع رجع للبيت والاطفال وياه اخذهم ينومهم
مر الليل عليه ثگيل كلش هم مريض وهم مقهور من زوجته وحياته لمخربطه بسبب دينا
سمع صوت رسائل بتلفونه توقع رجعت من العرس وتتصل تسأل عن اطفالها او تگوله تعال بس…
_ السلام عليكم ابو داليا شلون صرت
_ هلو ست زبيدة .. والله هسه رجعت حرارتي ارتفعت بس الحمدلله احسن من الصبح
_ اخذ العلاج وان شاءالله مابيك الل العافية .. اعذرني ياخوية گلت اطمن عليك انت مثل اخوية اذا سببت ازعاج .. سلامي لأم داليا
_ اي ازعاج ماكو زبيدة شبيج هلگد رسميات وهي ام داليا وين لا اجتي ولا سألت وحتى الاطفال دازتهم
_ ما اريد تصرفاتي تنفهم خطأ حارث .. ما يخالف ملتهيه بالعرس قابل وين طالعه هي لا تصير هيج حساس باجر جيبها قبل لا اداوم
_ ما اجيبها خليها من تحب اخوها يرجعها ..
_ على راحتك .. تصبح على خير خوية .. اذا تگدر اشرب حليب دافي تصير زين
_ والله مابيه انزل اسوي .. بس ليش تروحين خلي نسولف شويه
_ نعسانه حارث وتعبانه
_ زبيدة شبيج مو طبيعية اكو شي مضوجج
_ لا ماكو شي لا تهتم..  اخذ راحتك .. نام شوية تصير زين ان شاءالله مع السلامة

اصمت ياقلب اصمت ما عاد للكلام بُد
حياة كصحراء قاحلة وانا تائهه وسط رمالها اغوص فيها .. وليس هناك احد تكلف عناء البحث عني وانتشالي

لا تنسون الضغط على نجمة 🌟 التصويت ان عجبتكم .. ورأيكم مهم يدعمني معنوياً للكتابة ☺