جنة فؤادي

الجزء السادس عشر

#جنة_فؤادي
الجزء السادس عشر
#zainab_alnajar

ٲجيتك
مستحي من الله
ونمت يم دگت متونـك

ٲثاريه العــشـگ شبگات
مـــا ينحمل بــ شلونــك

وصارت السبعه
لبست ثوب احمر مخصر على جسمي كلش حلو
عزمت كرايبي خالتي بعيدة حبيبتي وتعنت واجتني وعمتي حاولت ماتجي الضاهر ماخذه على خاطرها من عمتي بيوم الي جابوا الريوك ..وبيت عمي هم اجوي .. وامه هم عازمه اختها وزوجه اخوها وبنتها ام دينا يعني وبعد من اقاربهم ماعرفتهم واخواته ثلاثتهم موجودات بس ماسون شي حارث موصي على كل شيء جاهز يجوز بس يسوون جاي
ولأن حارث مشتري كل شيء جانت الهدايا كلها ذهب .. هواية لبسوني .. عمتي ام حارث ومرت اخوها يباوعن بغل ويتبسبسن سلامها ويه اقاربي جانت مجبوره لان حارث گلها ماراح اطلع لما يجون واريد اشوف شلون ماتستقبليهم
تغدوا وبنات عمتي فتحوا سمعات واغاني گالوا نسويلج حفله نوب هي قابل يومية ..
كانت مرت خاله گاعده وجامعه حبايبهم وجيرانهم وعمتي ام حارث وياهم فتت من يمهم اريد اربط السماعات سمعتها تگولهم دشوفوها العجيزة هاي الهجمت بيت بنتي طلع عنده علاقة وياها وطلگ دينا هم زين الله عوضها تاج راسه وتزوجت ليش عباله تبقى بدون زواج
واير السماعه بأيدي گتلها _ شنوو شتحجين انتي
گامت وگفت وبصوت عالي گدام الكل عادت كلامها _ اي انتي ام الزلم خليتي يطلگها ويتزوجج هجمتي بيتها بس هم ماخسرت وتزوجت اغاته
جامده بمكاني فاكه حلگي عليها والكل ساكت يمكن ينتظرون رد فعلي اباوع على عمتي ساكته وتباوعلي بنظرات استهزاء وابتسامة صفره
شويه وانفتح باب الاستقبال دخل حارث بنص النسوان .. باوع عليه _ لج انتي ليش ساكته .. ليش مارديتيها
_ گلت انتظر ام البيت تجاوبها واحترم وجودها ،، باوعت على امه گامت تتبلعم
اندار على مرت خاله
_ تحبين احجي ليش طلگتها .. تريد الحقيقة وافضحكم !!
گامت تگلب الوان وساكته
_ سمعت كل كلامج وصدگيني هذا ماراح اعدي .. امشي اطلعي بره بيتي ومره ثانية اذا المحج جاية ماتلومين غير نفسج .. اني الي اخذت تاج راسها لبنتج .. برررره…
لبست عبايتها واخذت بنتها وطلعت بسرعة .. وأمه باهته ماحجت اشرلها وطلع يعني تعالي
طلعت وراه .. واني من كمية الاحراج الي انحطيت بيها والكل يباوعلي .. شأگول لگرايبي يارب شورطت روحي .. مستحيل راح يعوفوني..  هاي اولها لعد تاليها شلون
******

حارث دخلت من المطبخ اعرف خطار عدنه فرحتها وعزمت اقاربها شگد جنت خايف من امي بقيت بالبيت لحد ما اجوي وطلعت سلمت عليهم ووصيت سجى اي شيء يصير تتصل بيه .. تالي جيت اغسل وسمعت مرت خالي هيج تحجي .. والكتلني قهر ماسمعت صوت زبيدة ردتلها..  ولا امي اخذت حقها
بدون تفكير دخلت وصار الي صار من طردتها بس امي الي شعلت گلبي .. تعرف سبب طلاقي وضلت ساكته من اتهمت زبيده باطل
_ يمه ليش تسمحيلها تحجي هالحجي
_ هي خطار .. وشلون هيج طردتها بيبية جهالك
_ اگولج لا تفريها عليه .. جاوبيني ترضيها وحده من بناتج تنهان هيج !! زين تريدين هسه ادخل احجي للكل ليش طلگت صخامه دينا .. انتي ليش اطلعيني من طوري
طلعت من البيت كله .. يعني اريد مره ادخل للبيت وامي ماتسوي سالفه تغثنه بيها .. وهاي بعدنا عرسان على اساس
رحت على نزار حجيتله..  هذا صندوق اسراري واحجي كل شيء اله
_ حارث ليش ماتطلع بيت لوحدك وخلي كرار يجي بيت اهلك
_ ياريت عمي .. اذا هي حكم عدها .. لا تعوف بيتها ولا حارث يعوفها .. تگول مرت كرار ما احبها وهذيج هم ماتنطيها مجال مو مثل هاي الفاهيه مرتي .. لك عيني بعدني جم يوم وهيج راح انفجر .. والله ممقصره مهتمه بيه وجهالي وحتى البيت ماخالتها تسوي شي .. وهادئه وماتحجي والله اسمع امي تحجي عليها بأذني وهي ماتگولي ادري بيها تنقهر بس تسكت حتى لا تقهرني
_ ياخوية شأگولك الله يكون بعونك
****
راحوا المعازيم ضلينه نعزل البيت اني وسجى لان مها وضحى يم امهم بالغرفة بعد ما طلعوا..  اشتغل ودموعي تنزل .. شگد حاولت سجى تكولي لا تهتمين وتصبر بيه بس الموقف مو سهل .. خلصت شغلي جيت اخذ الجهال گالت خليهم ويه جهالي يلعبون روحي ارتاحي
صعدت سبحت وصليت وبس خليت راسي على المخده انطلقت دموعي اكثر .. حسيت نفسي بورطة من صدگ .. جان الوقت عصرية .. غفيت گلت من اگعد اگوله لحارث يوديني على بابا هسه يضل باله عليه .. هسه صحته زينه هو الحمدلله بس ما أگدر اذا ما اشوفه
حسيت من نومي على ايد حارث يبعد خصلات شعري عن وجهي ويتلمس بخدي .. ماحجه عباله ماحسيت راح غير ملابسه واجه يمي رفع الغطه وجا نام رفع ايدي ونام على صدري .. كل شيء عنده جان بالعكس ..  _ حبيبتي من ورايه نزلت دموعج .. ابد لا تهتمين مادام اني وياج .. ماخلي احد يأذيج .. بس شلون تسكتين عن حقج… عمري تعبان اريد ارتاح .. احس نفسي طفل بحضنج ريحيني
خليت ايدي على شعري تنهد وحضني من خصري حيل وره شوية غفه عرفت من صوت انفاسه المنتظمة
***
اليوم خلصت اجازتنا وصار لازم نرجع نداوم .. گعدت من وكت حضرت ريوگ وحمودي نايم غيرت حفوضته وداليا وحسوني هم .. دلو بعد كم يوم تبدي المدارس وتداوم وحسوني هم نسجله روضه تمهيدي
خلصت كل شيء تريگنه عمتي گاعده بالمطبخ ويانه ..
جنت مفوره مي لممه حماده خليته بالترمز .. گلتلها _ عمه هذا الميزهم مال حمودي اذا گعد علمود الممه
_ ليش وين تريدين تعوفيهم ؟
_ وين اوديهم عمه غير دنروح للدوام
_ والله حبيبتي هاي مشكلتج وين توديهم مو ردتي رجال وجهال .. تحملي مسؤوليتهم…  عافتنا ودخلت غرفتها وسدة الباب
واني وحارث واحد يباوع للثاني
هسه شلون حارث ؟
صافن خطية عجز ويه امه احس مستخسره عليه يعيش براحة شوية
رحت گعدت داليا وحسن وحمودي شلته من فراشه واخذت حليبه ونزلتهم .. يالله امشي
_ وين نوديهم شو گعديتهم .. خليهم هم يكعدون وتضطر تهتم بيهم
_ لا هي كلامها صحيح غير جهالي واحير بيهم .. امشي نخليهم يم سجى اليوم ومن باجر اسجلهم بروضات وحضانه
طلعنه كلنا خليتهم يم سجى خطية گالت جيبوهم يومية عاد گلنالها لا بس حمودي يمج يبقى اذا تگدريله
وگلها لا تگولين لأمي سمعته همسلها
***
رحنا للدوام متأخرين عود عرسان ماحاسبونه اليوم .. تهاني وتبريكات نسيت هوسه البيت ويه وفاء فرحانه وطايرة اهلها موافقين على علي الاسبوع اليجي مهرها .. الله يسعدها
اما سمر .. قصة لوحدها .. اليوم بنطرونها راح ينفجر كن عليها  .. وياه بدي اسود نص ردان واكيد فتحة الصدر جبيره ..
وعيونها ماشالتها عن حارث نوب اني لبسته قميص جويتي وبنطرون ابيض وهو طبيعته يفتح اول دگم القميص وهاي صافنه على صدره ومامهتمه اصلا ههههه هو ماعبرها حتى ومشغول يسولف ويضحك ويه الولد ويباركولنا
اجه يمي
_ ها حبيبي شو بالبيت ماكو هالضحكة لعد
_ هههههه ليش تنكر شو تعصب منا واضحك وياك منا
_ ههههه اي والله فدوه الگلبها لحبيبتي .. اليوم مانرجع راح اگوله لكرار يروحون يم امي واحنه نطلع اليوم لليل يالله نرجع
_ اگولك شو هاي سمر بس صافنه عليك
_ ههههه شعليه بيها المهم حبيبتي تصفن عليه .. أگولج ماتنطيني بوسة
_ هههههه لا احد يسمعك عيب
_ ترى عادي مرتي مرتي اصيح بعد
_ هههه اعرف والله اعرف .. انطيك والله بس اسكت
_ يالله وينها بالبيت غير
_ ااخ منج تذليني وماتنطيني بوسة
_ ماعاش ليذلك ياروحي.. دروح هسه على مكتبك هلي راح تاكلنا
_ هههههه ماشي
خلص الدوام طلعنا گال_ نتغده بمطعم وشوف انتي وين تحبين نروح
_ نروح للزوراء
_ ههههه شنو حلمانه مشتاقة تشوفين لقروده
_ لا نروح نجيب الجهال وناخذهم ونروح .. خطية حارث والله محبوسين
_ اروح فدوه للحنينة .. تدرين امهم ما اتذكر بيوم فكرت بيهم .. كانت دائما تفكر بنفسها حتى من،تطلع ماتريد تاخذهم وياها.. الله يحبني ويحب جهالي وصرتي نصيبي ..
_ حارث ولو سؤالي فات وقته .. بس ممكن اعرف ليش طلقت دينا شنو السبب ؟
_ زبيدة اذا تحبيني لا تسأليني .. وطبعا مو لأن ماريد احجيلج السبب لا بس گولي ما اريد اتذكر الصار
بس بقت السالفة بداخلي بس اريد اعرف .. الحجي مال زوجة خاله وانتي السبب تگولي يعني شنو صدگ حارث من زمان يفكر بيه !!  بس لا هو گلها احجي الحقيقة يعني اكو غير سبب
رجعنا لبيت سجى جان زوجها موجود رحب بينا حاجيت حارث گلتله گوله خلي نطلع سوه حتى جهالهم هم يلعبون
اتفقنا وطلعنه جانت لمه حلوه وبصراحة ردت اجرجر سجى بلكي تحجيلي السبب ويرتاح فكري
الجهال يلعبون وحارث وزوج سجى راحوا يصعدوهم العاب بقينه اني وياها
_ سجى اريد اسألج وفدوه جاوبيني بصراحة
_ گولي حبي
_ شنو الكلام مال زوجة خالج اريد تفسير .. التفكير راح يدمرني
_ ولا تفكرين اصلا ما تستحق وكلنا نعرف كلامها كذب
_ منو كلكم .. الناس كلها جانوا مصدگيها .. زين اگدر اعرف سبب طلاقهم
اخذت حسره جبيره _ گالت راح احجيلج لان تستاهلين تتوضح الامور گدامج بس ما اريد بيوم تغلطين وتحسسي تعرفين السبب
_ هاي منتهين منها
_ دينا خانته .. والي خانته وياه هسه تزوجته..  صحيح ما لگاها بالفراش بس مكالمات فيديو ووو . ارجوج لاتحجين لاحد هاي سمعتنا .. هو حارث تكتم لخاطر خالي وهو هم لاتلمحيله ترى نفسيته تدمرت بوقتها
ديري بالج علية وطولي بالج على امي بلكي تعرف قيمتج بيوم من الايام
واني منو يعرف قيمتي .. ابقى اتحمل

مانعرف نعادي بشر
والي كرهنه انسامحه
ونطش عليه ضحكاتنه
ضلمه النوايا بلاضوه
بس احنه كلش نختلف
مثل الكمر نياتنه

شكراً شكراً شكراً يا احلى متابعين
لاتنسون التصويت ورأيكم مهم
احبكم ☺☺

هذا الي لحگت اكتبه اعذروني اذا قصير اعوضكم ان شاءالله 😉