جنة فؤادي

الجزء 24

#جنة_فؤادي
الجزء 24
#zainab_alnajar

صوتوا please  😁
غلسوا على الاخطاء الاملائية كتبت بسرعة
ونشرت بدون مراجعه
راح اقرأ وياكم شكاتبه 😅😅
---------------

الآن سأخرج منتصرة .. لست ضحية
ولا انا من ينتظر كلمات العطف ونظرات الشفقة
خسرت الكثير لكن ربحت أكثر
عدوي ربح الكثير وخسر أكثر
لست انا من يُضعغني الحب
طالما آمنت ان لا حب بدون كرامة
من يحبني يحترمني ويصون كرامتي اولا
ربما تفكيري مغلق
لكن هكذا انا
لا ارضى ان اكون نصف .. فأنا كل
لست مغرورة او عنيدة
انما اختلف بأحترام ذاتي
فأنا لا أُذل ولا أُهان
************************************
زبيدة
---------
اليوم گعدت من وكت .. لبست احلى شئ عندي .. فستاني زيتوني مطعم بذهبي .. مكياجي بسيط بس كحل برز عيوني العسلية وحمرة بيجي طبيعية .. حذائي عالي احبه برغم طويلة .. واني ضعفانه بعد كل الضيم الشفته
اليوم اول يوم اداوم وره ما خلصت عدة طلاقي .. اخذت اجازة بدون راتب .. بقيت بيها بيت حسان ما رحت لبابا بس هو يجي .. ماشفت بيت عمي بعد
اخذت السويج وطلعت اسوق افتر بالشوارع بعد وكت .. واتذكر  قبل يوم جلسة طلاقي حارث جابلي الجهال وراح .. يبوسون بيه والضاهر موصيهم يأثرون علية .. كالوا احنه نريدج تبقين ماما .. ماما دينا مو مثلج عصبية وتصيح علينه من نريد منها شي وماتقرينا .. گلتلهم بعد كبرتوا انتم اعتمدوا على نفسكم وخلي بابا يقريكم .. اني بعد ما ارجع ماما دينا هي امكم .. دلو حبيبتي تگول ماما سامحيني جنت ما اعرف وهم يعلموني.بس من رحتي عرفت
حبيبتي دلو اني ما ازعل منج .. بيومها اخذتهم وطلعنا اني ومرت حسان وجهالهم هم .. لعبتهن بالالعاب ورجعنا للمول جان بيومها عيد ميلاد حسوني سويناله عيد ميلاد واخذتلهم هدايا .. من اجه ابوهم عليهم حضنتهن بكل قوتي .. من صدگ انقهرت عليهم ذوله ضحية وراح يدفعون ثمن اخطاء اهلهم .. هم يبجون خصوصاً حسوني .. وحمادة يبوسني ودلو .. حاولت ما ابجي بس بجيت من كل گلبي قهر عليهم
وثاني يوم بالمحكمة حارث گدام القاضي گال ما اطلگ اني احبها واريدها وجنت تحت تأثير السحر  وحاول يعاند
_ بس انت مطلگني اصلا
حجه القاضي .، گله كل شيء ضدك متعرضه للعنف وحقها تنفصل
حكم بالطلاگ جان بابا وياية من طلعت صاحني
_ زبيدة .. اليوم صرت يتيم مرة ثانية..
_ الله يوفقك .. روح كمل حياتك ويه دينا .. دير بالك على الاطفال
ما انكر اكو ثورة بداخلي وهذا الهدوء جان مجرد صورة ساعتها
بس اول خطوة خارج المحكمة گلبت صفحة حارث .. مثل صفحة طارق قبله .، سواء هو ضحية او لا .. خلاص انتهى
وصلت للشركة خليت السيارة بالگراج رفعت راسي باوعت للشباك..  راح ارجع لنفس الغرفة .. هزيت راسي يمين ويسار ومشيت .. وين ما افوت اسلم وابتسم واعديهم .. وفاء من شافتني حضنتني حبيبتي .. گالت قدمي نقل يمي بالغرفة .. اشوف موضفات تتهامس وعيون تحاول تركز وتشوف زبيدة مكسورة ؟
_ لا وفاء اني مو ضعيفة .. بعدين قسمج غير اختصاصي حبي
رحت لغرفة المدير نطيته علم بدوامي سجلت مباشرة وطلعت.. وصلت للغرفة جريت نفس ورسمت ابتسامة ودخلت
جان مدنگ جاي يكتب .. على فتحة الباب رفع راسة وفتح عيونه
موضفة جديدة يبين عمرها اربعينية
_ صباح الخير
_ صباح النور..  صباح النور
رحت على الموضفة الجديدة گلتلها اني زبيدة الي جنت مجازة .. عرفتني على نفسها كالت سهاد اسمي ام احمد .. هملته كأن ماكو احد غيرنا بالغرفه
گام فتح الشباك ومثل عادته يدخن .. بس حسيت بعيونه من يباوعلي .. ضعفان كلش ومو ذلك الترتيب والاناقة الي جان عليه قبل شعره خفيف مسوي
المهم ما يهمني بشئ بعد
بالگوه كمل اليوم بتوتر ونظرات العيون المريضة ..
من رجعت للبيت لگيت بابا موجود وعمي وأحمد
تغدينه سوه
اجه للمطبخ بابا گال .. _ بابا كافي عاد بغداد قدمي نقل لديالى وبيتج شيلنه المؤجر منه .. انقلي حتى اي وياج بالبيت هم انتي تستقرين وهم اني اخذ راحتي احسن من بيت عمج ولو مامحسسيني بس فرق بعد واحد من بيته
والله بابا خوش فكره .. باجر اقدم نقل
رجعنه يم عمي واحمد .. عمي گال _ زبيدة عمي شنو رأيج اقدملج ماجستير ويه مسرة هالسنة تقدم .. هي قانون وانتي ادارة واقتصاد بالجامعة مالتنا ..
_ باوعت لبابا ابتسمت
_ ها عمي شو ابتسمتي
_ عمي الحمدلله عندي اهل مثلكم . حتى تفكير فكرتوا بدالي ورتبتوا حياتي من جديد..  اليوم داومت وجنت ابد ما مرتاحة
اقتراحاتكم وگفت الدوامة الي براسي
احمد _ عندي صاحبي بوزارتكم يداوم بلكي يعجل بطلب النقل .. انقلي هناك يمنه بدائرة تابعة للوزارة مالتكم وقدمي اجازة دراسية
_ تعيش ابو وسام
_ تعيشين بعز بت عمي .. نظرات احمد فد شي ماينوصف..  شايف واحد من يشوفك فد شي كبير او مقدس !! هو هيج جان ..
وفعلاً..  صار كل شيء انقلت بأقل من شهر وهسه جبت ملابسي بغرفة مسرة باجر نطلع اخذ اثاث للبيت
البيت جان جبير وبي حديقة وگراج ورائد ابن عمي خطية صابغة جديد من شايلين المؤجرين منه
رحنه اني وبابا واجه عمي ويانه لان يعرف معارض الاثاث اختارينا كل شيء يومين نرتب بي ودخلنا الكل انذار ويانه ههههه جنت حيل مرتاحة .. كلهم ايدهم بأيدنا حتى مرت عمي تجي تساعدني وترجع .. . شگد فقيرة وحبابة .. عمتي سميرة وبناتها وماجد ابنها .، اباوعلهم وفرحانه كلش بهاي اللمة
اني ليش تزوجت .. الحياة حلوه مو الا رجال ..
داومت بمكاني الجديد .. وكل شي جديد ومحد يعرف عني غير بنت الاستاذ ابو احمد
وقدمت على الماجستير ..
هسة ارتاحينه اني وبابا اداوم وبابا بالشغل بس استحي اروح البيت عمي هواية .. اغلب شي صاروا هم ينجمعون يمنا
بيوم جتي مسرة يمي دمعتها بعيونها
_ شبيج حبي ليش الدموع
_ زبيدة .. حسين رايح لأحمد اليوم وهم رافضة گوليلي شأسوي هسه
_ ليش رافضة ..
_ والله ما اعرف هو يگول السبب مو الطائفة لعد شنو
_ زين شعجب امه ما اجتي
_ امه اجتي اول مرة وماقابلة تجي بعد
_ زين زين احمد وين هسه
_ بالبيت نايم
_ اني احجي وياه
_ صدگ
_ ههههه اي والله..  بس شلون احاجي ما ادري ووين
_ هههه هاي اني ارتبها بس تعالي للبيت اليوم…  انتي ليش ماتجين
_ لج استحي خطية الولد ياخذون راحتهن .. دگومي نسوي بسبوسة حتى اجيبها واجي بالليل
_ زبيدة صدگ
_ ماتحنين على احمد عاد
_ ام لسان توني خلصانه .. عوفيني هسه ارتاح نفسيا .. بعد منو گلج هو يريد وحده تطلقت مرتين
_ لا يريدج
_ شمدريج هيج تخمين
_ لا هو اعترفلي
_ والناس راح تعوفني بحالي .. خليني هسه مسره .. شوف الله شكاتبلي
_ براحتج بس لاتفكرين بالناس
--------
احمد
--------
ارتاحيت كلش هسه من صارت گبال عيوني .. رحتلها فدوه لعيونها الحلوات لطولها الحلو .. الصوتها العذب .. الهدوئها لرزانتها
گلتلها المسرة تجس نبضها حتى اتقدملها .. واذا ماتقبل هالمرة بعد حتى هنا ما ابقى .. اسافر واخلص من هالعذاب
گالت مسرة هي مارفضت بس خايفة من الناس او يمكن تريد فترة ترتاح بيها
انتظرها والله بس بعدها تصير الي
بالليل بغرفتي وجتني مسرة .. گالت الضوه بغرفتي محروگ تعالي بدله
_ لج دشوفي رائد خلي يسوي
_ رائد طالع
جنت لابس بس البجامة مال التراكسود وبالفانيله الداخلية
باب غرفتها مفتوح شوية بس ضلمة .. فتحت الباب سمعت صوت شهگه..  لج مسرة وينج .. مسرة جيبيلي الكرسي شبيج گبيتي
_ احم .. احمد هاي اني زبيدة ،، خرب ببليسج مسرة گلتلج احاجي خوما هيج ،،
فتح ضوه الموبايل خلاه على الميز .. وتقرب مني
_ هلو زبيدة
_ هاي مسرة گلتلي اجيب گلوب حتى ابدل هذا المحروگ وراحت بعد ماجتي .. من رخصتك
جتي تطلع لزمتها من ايدها .. مسويه شعرها ضفيرة خالتها صفح .. مبينه من جوه الحجاب .. وجها مدور ابيض .. عيونها تلمع بالضلمة ورمشها طويل
_ وين تروحين شنو تخافين مني .. حجيتها بصوت مبحوح
_ تؤ .. اخاف من روحي وما اخاف منك ..
_ لعد ابقي
وگفت گبالي باوعت بعيونها .. والله ضعت بيهن .. يالله شگد احبها
_ احمد اريد احجي وياك بموضوع
_ اي احجي .. اني صافن على شفايفها من تحجي وصوتها ذوبني..  شنو بيها مو حلو .. لابسه دشداشة ماروني .. شگد مسترة  حسيتها گدامي احلى بنية بالكون
_ احمد
_ عيونه
نصت راسها .. رفعته من حنجها بطرف اصبعي والله اخاف المسها
_ اني بنت عمي ماتنصي راسها دوم مرفوع
_ احمد .، ليش ترفض حسين كل مايتقدم المسرة .. انت تعرف بيك تفكيرك مو طائفي
جر حسرة _ لأن ما اريدها تصير زبيدة ثانية وما اسمح احد يظلم الي يخصوني بعد .. هسه ما اريد افتح جروحج..  بس اكولج شي واحد .. اذا احد تقدملها وامه مغصوبه جتي ورايدتله كرايبها راح تقبلين
_ لا لا عفية ما اريدها تشوف الي شفته .. اكو اشياء اهم من الحب
_ وهو يحبها ورايدها وديقاتل علمودها..  بس عرفت من احد قريب عليهم امه ماتريدها ..
_ زين اذا امه اجت مرة ثانية وخطبتها تقبل
_ ااي اقبل اكيد
_ زين ماشي هايهيه لعد .. ابتسمت وجتي تطلع
_ زبيدة
_ ها عيني
_ احبج
ليست كلمة من اربع حروف.. هي حياة بأكملها ..
مازالت واقفة تنتظر ولم تتعب .. ومازال فيها الأمل
… .
كلمة احبج جانت منه مختلفة .. شگد سمعتها بحياتي .. بس مو بهذا الاحساس الصادق .. بس اني مجبوره انتظر
لا الناس راح تعوفني واني هم خايفة من نفسي .. خايفة بعد كل الي مريت بي من ردات فعلي .. خلت خوف بداخلي من كل شيء برغم ادعي القوة ..
ابتسمت بوجهه ردت ابقي امل بداخله ويعرف اني مانافرته بس ماگلتها..
_ اصبر علية ابن عمي
_ اصبرلج طول العمر
اخذ ايدي وباس باطن كفي ..
_ شگد طيبة ريحتها
_ هههههه ترى لاعطر ولا شي ريحة بسبوسة بيها .. امشي نروح ناكل هسه خلصوها
انتبهت عليها تستحي تباوعلي
_ نروح بس شبيج خجلانه
_ احمد .. دروح البس قميصك عاد هههههه
اخذت ايدها وانهزمت
انتبهت شلابس .. ضحكت على ضحكتها .. هاي المرأة غريبة .. مرات احسها كاملة عقل ومرات احسها طفلة وهذا الخلاني اعشقها
*****
فرحانة ومرتاحة دنيا جديدة بعيدة عن كل الفات ..
صاروا عندي عائلة تسأل علية بعد الوحدة الجنه بيها اني وبابا..  حقه من اجه هنا .. هدوء وحنية وتواصل .. وصار عندي صديقات جديدات .. حجيتلهم عني كل شيء وما وحده بيهن حسستني اني بيه عيب او ممكن اكون خطر
يمكن الصوج بيه ماعرفت اختار صح .. والتجارب عرفتني منو ناسي
مسرة حجيت وياها .. احمد خايف ينعاد الصار وياية .، بس هي متمسكه بي وهو هم ما يقبل يتركها ..
المهم عرفت مسره من عنده امه راح تطلع زيارة لكربلاء
حجيت ويه عمتي سميرة گلتلها خلي نتقرب منها ونروح اني وياج للزيارة
عمتي جانت صديقة النا بس ماتقبل بالسالفة العوجة .. حبت الفكرة گلتلها البابا راح اروح للزيارة واخذ زبيدة .. وام حسين ماتعرفني ولا تعرف عمتي
والله ورهمت .. سجلنا هو من يمه دبرها وعلى اساس احنه غربه ورايحين وياهم
ميورة بت احمد گلتلي خاله اخذيني وياج
بالگوه قبل ابوها اخذها جانت ضايجة حبيبتي
اجينه نطلع جانت فجرية ويمرون علينا .. عمتي باتت يمنه بيتها مابعيد بس حتى سوه نطلع وميوره هم جبتها يمنه .. طلعت  اشوف اجوي لو،بعدهم جان احمد بحديقتهم يدخن احنه صرنا بيت بصف بيت
_ صباح الخير ☺
_ صباح النور..  طفه الجگارة تقرب گال افتحيلي الباب
_ مفتوحة .. شعجب گاعد 
_ يومية اكعد اصلي الفجر مرات اغفى ومرات لا .، واليوم بالي مشغول
_ ليش سلامتك
_ شلون تروحين وحدج
_ ههههه هاي مو عمتي وياية شايل همي ..
_ اغار زبيدة .. نوب لابسة عباية تريدين تموتيني
_ احمد صدگ تحجي هههههه ترى كبرت شوف هاي عمري 35 سنة منو يباوعلي
_ هي هاي المصيبة كل ماتكبرين تحلين اكثر
_ احم احم راح اشيل خشمي
_ اي ليش لا يلوگلج
_ ههههه شنو هذا غزل يعني
_ لا تضحكين
_ لعد ابجي هههههه
_ لا .. سولفي اريد اشبع من صوتج
_ هههههه احمد شايفني ومخترع هواية احلى مني
_ وگلبي ماشاف ولا يشوف غيرج .. لا تنصين راسج .. باوعيني
ضلينه ساكتين بس عيونه تحجي
قرب ايده من وجهي .. بالابهام لمس خدي مسح عليه بحنان .. _ ديري بالج على نفسج .. وراح ابقى انتظر وما اجبرج على شي ما رايدته ..
_ زبيدة
_ ‏ها عيني
_ سالمة عيونج الحلوات..  ادعي لي هناك عند الائئمة
_ شتريد ادعيلك
_ الي تحبي الي .. وديري بالج على ميار

اجتي السيارة سلمت علية وصحت عمتي وطلعنا
صاير قربه يبعثرني .. يخليني ما اعرف افكر .. يا الله لمسه ايدة شگد حنينة ودافية
اش اسكتي زبيدة .. اعرفي شتريدين اول .. ومستعده لرجل بحياتج
---
مشت السيارة وصاروا النسوان يسولفون ووحده تتعرف على الثانية .. اندمجت وسولفت وضحكت وعمتي هم
عرفتها لأم حسين .. حولت مكاني صرت اقرب عليها
حجاية منا حجاية منا انطلقت وياية واني هم اسولف واضحك وياها
وصلنا لأرض كربلاء هواها غير شكل .. احس براحة نفسية واني بين الامامين .. منين ما اندار آل بيت الرسول
هنيال ساكنها
اخذنه ليلة بفندق وخليت ام حسين تصير ويانه
طلعنا للسوگ سوه .. گالت انتي متزوجة
_ اني منفصلة
_ ياا خطية بعدج صغيرة وحلوة
_ بس اني مامقهورة .. الحمدلله هيج احسن
علوية راح احجيلج قصتي وانتي شوفي انفصل احسن مو
بديت احجيلها كل المر بيه بالاخير گلتلها كل هذا لأن امه ما رايدتي..  دمرت حياة ابنها .. اكو ام تسوي سحر لأبنها ؟ .. ماخافت علية ؟
بس هاي بعد قسمتي من الدنيا..  مرات الانفصال احسن من استمر بحياة فاشلة واستگرب الدرب
هو جان ضعيف .. وجان ممكن كل شيء اسامح عنه الا ابني الي انتظره سنين .. تدرين شگد سمعت كلمة عقيم وعاقر .. ومن صار الحلم حقيقة اخذوا مني .، كل هذا لان رادت تمشي كلمتها ويرجع بت اخوها الي اختارتها هي
من كملت حجي رفعت راسي شفتها تمسح دموعها بشيلتها
_ ههههه علوية تبجين علية
_ ابجي عليج وابجي على ابني
_ شبي ابنج
_ يحب وحده .. واني ردتله بت خالته .، وعاندت وياه .. سودة علية .. بس ارجع اروح اخطبها اله نوب بلكي ينطوها
--------
وصارت واجتي خطبتها .، من شافتني ضحكت بس اكيد سويت نفسي متفاجأة هههههه قابل اغشكم 😉
احمد هالمرة قبل من زوجة عمي حجتله اسلوبها الحلو
قروا فاتحتهم وحفلة الخطوبة هالايام
*****
احياناً نشعر ان حياتنا توقفت
عند حدث معين
او،عند شخص معين
لكنها لا تتوقف .. ستستمر
شئنا ام ابينا
تستمر .. لكن بنكهه مختلفة… .

اضغطوا نجمة 🌟 التصويت please
رأيكم كلش يهمني
بعد بارت ونودع ابطال قصتنا