جنة فؤادي

الجزء 22

#جنة_فؤادي
الجزء 22

#zainab_alnajar

تصويت please ☺👇

طشت..!
اسنين المحبة
ومن بگاياهن شلم..؟

مرة تغفه جروحي بيه
ومره احن وانلچم..!

حارث **
رجعت من برة امي بالحديقة…  گالت
_ لك لشوكت غشيم تضل
_ شكو يمه شبيج ياستار
_ هاي العاقر مقشمرتك وماخذتك على  عمه عيونك
_ شبيها عاد يمه شسوتلج
_ سوتلك الك يا اغم .. لك سمعتها تحجي بالتلفون ويه طليقها وتتواعد وياه ..
_ يمه كافي تتبلين عليها لخاطر ربج كافي
_ طلعت اني اتبله دروح دور موبايلها وتعرف
صعدت فاير دمي سويت الدرج خطوتين ..
وصلت للباب سمعتها تحجي ..
افتح لي كاميرا خلي اشوفك مشتاقتلك
عقل ماضل براسي ..
دخلت عليها وصار الي صار ..
…
ضليت مثل واحد القاتلي على النص ..
معقولة اني مخدوع بيها الهلحد ..
هيج اني غشيم
كل هذا كانت تمثل علية المثالية مالتها وتطلع شريفة !!
صارت ساعة 2 بالليل ما اتحملت حسيت البيت يخنگني ماخليت شي بالغرفة صاحي كسرتها وماحسيت بنفسي
اخذت السويج وطلعت ما ادري وين اروح الشوارع سيارات قليلة طلعت حرگة گلبي بالسيارة .. اسوق سريع وماحسيت على نفسي الا لايت سيارة وصوت هورن عالي .. وخلاص ما اعرف شي بعد

احمد **
گاعد يم عمي صرت أگعد يمه دائمًا ما اريده يحس بوحدة اتصلت زبيدة بي .. فاتح سبيكر تحاجي .. سويت نفسي اكتب واگلب بالأوراق.. 
بس بالحقيقة مركز ويه صوتها .. اخ يا أميرة گلبي
صوتها دافي وحنين وتحجي بهدوء على كيفها
تگوله لعمي مشتاقتلك .. تمنيت بيوم اسمع كلمة الي تخصني بيها منها .. متزوجة ومايصير افكر بيج يابت عمي حرام علية .. بس والله مامفكر اكثر من اشوف عيونج وضحكتج واستمع لكلامج الحلو .. ما اريد حتى المسج .. تبقين طاهرة ونقية ماصرتي نصيبي بالدنيا اطلبج من الله بالآخرة
شوية وسمعت صوت صراخها وهذا الكلب يضربها ويغلط عليها .. خطية عمي يصيح يحجي ماكو حتى الصورة راحت نسمع بس الصوت .. انجنيت واشوف نفسي عاجز من انقطع الاتصال وراها نتصل يطلع مغلق .. واني اريد اطلع بذلك الوكت صارت ب 12 بالليل وامي وابوية لازميني من ايدي
عمي اتصل بحسان گله زبيدة يمي تطمنه شوية بس عمي ارتفع ضغطه اضطرينا ناخذه للمستشفى..  و رجعنا ماقبل ينام گال بس تصبح الدنيا اروح .. اني جنت ناوي اروح وياه بس المشكلة امتحان طلاب كورس ومهم والاسئلة يمي گلتله بس انطيهم الاسئلة  واجي والله كل ضربه ضربها الها يدفع ثمنها غالي..  بت گلبي هاي
نطيت الاسئلة الجماعتي وطلعت اسوق سريع وصلت بيت حسان بس للأسف طلع الافندي مسوي حادث وحالته خطره ..

زبيدة
******
من سمعت نزار اتصل بحسان واني كل شيء بيه مخربط ..
اريد اوصف احساسي .. حزن .. لو خوف .. لو حب .. لو الدنيا نصفتني من ظلمني هو ....لا لا بعدني احبه .. اششش شنو،تحبي بس لا عنده اطفال
شلون اعرف اخبارة ومن منو حتى تلفون ماعندي وماحافظة رقم احد
يااارب يگوم بالسلامة .. برغم كل الي سواه بيه بس يمكن العشرة تشفعله او كم موقف قبل زواجنا او بزواجنا من جان يدافعلي گدام امه
مرات اگول لو اي واحد بمكانه يشوف زوجته هيج بتلفونها يسوي هيج .. بس هو يعرفني .. بعدين هو وياية بكل مكان ليش ما فكر شوكت اخونه واني ماتاركته .. وتلفوني كل يوم يفتشه ..
زين هاي الرسائل منين جتي وشوكت .. اني بالبيت وعمتي ماصعدت الغرفتي
ارجع اتذكر الجهال اذا صار علية شي منو يبقالهم وهم امهم تبيعهم وتتزوج مرة ثانية
ضليت ادعيلة الله ينجي لخاطرهم .. ياعيون امك حسوني .. بعد گلبي حمودي .. نور عيوني دلو .. والله اشتاقيت الهم اشتاقيت اضمهم واحسسهم بالامان شمدريني شلون حالهم هسه من سمعوا بأبوهم
المشكلة اليوم كلش مدا اكدر اتحرك للحمام سندني حسان ومرته خطية ..
وشنو يعني زبيدة تفكرين تروحيلة .. بعد كل الي سواه بيج !!
بس اتطمن علية ..
بقيت بغرفة اطفال حسان .. حاولوا يأخذوني للمستشفى بس ما قبلت ومابيه اتحرك
بابا جان كلش تعبان اخذه حسان يرتاح بغرفتهم .. تقريب ساعة 10 سمعت صوت احمد
يا الله شلون…  استحي احد يشوفني بهالمنظر والله
اسمع حسان يگوله سوه حادث هسه مو،مال نحاسبة واحمد عصبي يصير
اجت مرت حسان گالت_  يريد يشوفج
_ عفية ما،اريد شوفي منظري .. اعتذريلي منه الله يخليج حتى ما اگدر اگعد
اجه حسان گال هو مو،غريب بس خلي حجابج
_ دخل احمد نزلت الحجاب على وجهي حاولت اگوم  وأگعد عدل گلي
_ خليج مرتاحة بت عمي شلونج هسه
_ الحمدلله
_ من تحاجيني ارفعي راسج بت عمي ماتنصي راسها
وحق هو الله اخذ حگج من كلمن اذاج
گله لحسان_ العصر ناخذها للدكتور .. 
_ماتقبل تروح .. تگول مابيه
_ لا تروح وياية..  اني اعرف ليش ما تروح..  تعز عليها نفسها .. بس مايخالف تهون
جان بحجي وبالگوه كاتم غضبه ووجهه احمر يريد يتفجر
*
احمد .. والله من شفتها تمنيته گدامي حتى اشوفه شتجيب الامهات .. الكلب يستقوي عليها بس حظه مسوي حادث ومانعرف يطلع منه لو،لا
ماخلتني اشوفها زين بس لمحت اثار الضرب بوجها الحلو اني تخبلت ليش هيج عاجز .. ااااخ الله
گعدنا نتغده راح حسان حاول يجيبها بالصاله بالگوه تمشي الغالية
_ شنو يوجعج زبيدة
_ رجلي بابا وضهري
_ يابه نروح للدكتور ونثبت الاعتداء مالته حتى نعرف ناخذ حگج
_ يابه الي يهمني اريد اعرف منو كتب هالرسائل والي كتبهن متفق ويه طارق الحقير
حسان ماعرفت حالته شلونها
_ لا ما اتصلت .. خلي يولي
_ ادعوله يگوم لخاطر جهاله هذوله مظلومين ويه هيج ام
احمد .. حتى وهي موجوعة ومجروحة منه تفكر بجهاله !! نقية وگلبها ابيض
زوجة حسان گالت _ اني شاكة بشخص مساعدهم..  بس لازم اتأكد اول
_ منو
_ مرت حسام .. قبل فترة كنت يمهم وتلفونها دگ جان يمي قريب شفت الاسم ام كرار .. ارتبكت ولغت المكالمة گلتلها هاي منو ما اعرف عندج كرايب هالاسم
_ گال هاي كرايب امي
_ جان جاوبتيها
_ لا لا تحجي هواية يمعوده خلي نسولف
واني بوكتها ماشكيت ولا جا على بالي .. ويجوز اكون ظالمتها خلي نتأكد
_ والله اذا هي الا اخلي حسام يطلگها
_ زين هسه انتِ لاتحجين وتگولين زبيدة،يمنه ولا اي شي عن المشكلة لما نتأكد بس شلون
_ خلوها علية اني اروحلها للبيت واحاول اخذ التلفون واجيبه بس هالايام خلي تعدي حتى لاتشك
****
العصر رحنه لدكتور حسان يعرفه .. عرف اول ماشافها عنف اسري .. عدها رضوض وجروح بجسمها .. باوعت عليها الشال بس رادته گايدها حسان اكو ضربه بدايه رقبتها يم حنجها .. يعني ما اعرف بشنو .. جرح جبير وعبالك لحمها ممرود الله يكسر ايده عسى مشلول يكون
وجها كله ازرق وكدمات لونها ازرق وبنفسجي .. لعد جسمها شلونه !!
_ زبيدة
_ ها احمد
_ بيش ضربج
نصت راسها .. _ بالحزام
_ هينة يابه هينه
رجعنا للبيت بعد ماكتبلنا الدكتور تقرير بحالتها .. جان هو دكتور استشاري يداوم بالمستشفى صار التقرير رسمي گلتله لحسان احتفظ بي هذا التقرير مهم وتحتاجة
استحيت ابقى بيت حسان اكثر بيتهم على گدمهم واول وتالي وجودي حالياً مو مهم خلي نشوف شراح يصير بي ونتصرف
رجعت لديالى مجبور .. والله مابودي افارگها بس هي حتى بعيوني ماباوعت .. خجلانه يانور عيوني