🍥رفقا على قلبي 🍥 [باللهجة الجزائرية ]

🎀بارت 17🎀 ما قبل النهاية

أسيل : شادخل كاميليا فهاد الشي
رانية : بون عبالك بلي هاد ليامات لخرين مين كنت دايمن نخرج باه نشوف اخبار تع طيارة و نتي تروحي تخدمي خطرة كتت كرهانة لانو عفسة مخبت تصدق رحت بان ناكل حتى جات قعدت قدامي هديك كاميليا انا برك شفتها زبل طلعلي جيت رح نخبطها حتى بدات تبكي و تقولي سمحيلي غلطت معاكم و منعرف واش و قالت بلي حبت تطلب منك سماح و من وسيم اوسي انا مالقيت ما نهدر كانت تهدر بطريقة تقطع لقلب و كلي ندمانة تع صح انا قلتلها خلاص ممبعد نشوف حل هي فرحت و حلفت تخلصلي كاس جو المشحاحةانا قلت اوك راحت طلبت و جابتهم انا برك شربتو بديت نحس بدوخة و كلش بدا يدور .... و ملتم معباليش وش صرا حتى نضت و صبت روحي راقدة فهديك طابلة ونادل يحلل فيا باه نوض مكنت عارفة والو حتى قالي لي كانت معاك راحت و قاتلك مغسي علمعلومات انا مفهمت والو و رحت فطريقي حتى ليل باه تفكرت وش صرا و عرفت بلي كاميليا دارتلي كاش حاجة و انا رحت هدرت كلش قاع وش قتلك دكا حكيتهولها لخطرش هي وراتلي تصويرة و انا رحت نحكي و نبكي  و ملتم عرفت كلش و بما انو كانت مختفية هاد ليامات كما قلتيلي صافيك راحت قالت كلش لشهاب و قلبتها بطريقتها الخاصة و خويا لبهلول امنها 😞
انا لتم طحت فلرض و بديت نبكي بهستيرية بأعلى صوت عندي تحطمت خلاص كون نموت فهاد دقيقة و نتهنى من كلش
أسيل : نتي!!  نتي برك لي كنت دايرة فيك كونفيونس كدبتي عليا نتي يرك علاش هكا يا رانيا علااااش😭😭😭😭😭
جات عندي رانيا و بدات تعنق فيا و تبكي
رانية : سمحيلي والله نتي ختي و شر نحبو يجي فيا و مش فيك نتي و خبينا عليك الشي هدا لمصلحتك برك لخطرش الاصابة تاعك كانت خطيرة و مكناش حايبين نقلقوك برك...
انا قاعدة غير نبكي حتى راسي بدا يوجع فيا سواسوة كما نهار شفت تصاور دوك عند شهاب و بداو يجوني صور ملماضي كي كنت نرسم كي كان يضربني بابا و تفكرت وجهو كي داير و كلش صور مخلطة لمليح و لي مشي مليح بدا يجي قاع على ضربة بين عينيا و اصواتهم قاع في وذنيا يتعاودو صوت جداتي صوت بكاء صوت ضحكات عياط ضرب كلش
وقفت و شديتراسي و بديت نزير عليه ماتيش قادرة نتحمل و بديت نعيط حتى رجعت نشوف كلش كحل....
*بعد مرور خمسة ساعات*
نضت فتحت عينيا بسيف كان كلش مش واضح حتى جازت مدة باه رجعت صورة واضحة لقيت طبيب قدامي
الطبيب : اه انسة فقتي؟؟وش راكي تحسي
اسيل : راسي راه يوجعني
الطبيب : معليه دك مدة صغيرة و يروح لوجع هادو الاعراض
اسيل : اعراض وش؟
الطبيب : ههه مبروك راهي رجعتلك اذاكرة تعك على اكمل وجه... باش نحذرك برك متضغطيش على روحك سينون يصرالك كما ليوم ...
اسيل : اوك صحا 😃 ... جات معايا طفلة؟؟
الطبيب : ايه ملي جيتو و هي تبكي و مقلقة
اسيل : تقدر تدخل دك ؟
الطبيب : يب تقدر راكي مليحة دك
اسيل : صحا ...
راح الطبيب بعدما زاد عطاني شوية نصائح كان يوصي و يعاود باه منضغطش على روحي ... انا قاعدة غير نخمم فشي هداك و مشوكية وش هاد الصدف و القدر ... حتى يقاطعني صوت لباب و  شفت رانيا داخلة و عينيها منفخين ... برك وصلت خزرت فيها و قتلها بكل الم
أسيل : حبيت نرجعو لدزاير
خزرت فيا مشوكية
رانية : متقلقيش روحك نرجعو ... بصح عندي خدمة نديرها قبل مانرجعو
أسيل : .....
رانية : اسيل انا عمري ماكنت مع اي واحد انا دابمن كنت معاك و نحبلك مصلحتك كنت حا نقلك بصح كي يجمي لوقت و لابخوف كون مكنتش حاباتك تعرقي منخليكش تجي لهنا بأي طريقة
انا لتم مقدرتش نشد و طرطقت بلبكا
رانية : اوووه خلاص اسيل والله ندمو راه خويا بصح ندمو و تشوفي
و جات عنقتني حتى سكت بعدت عليا
اسيل : كيفاش تندميه
و لتم ضحكت راتية ديك ضحكة تاعها لي تخوف و قاتلي بكل ثقة
رانية : دك تشوفي هه😏😏😏
انا تبسمتلها ابخي هي راحت تفري اوراق الخروج و جات و رحنا كيف كيف وصلتني للدار و هي راحت. انا ديراكت رقدت كنت ميتة بلعيا ...
******* رانية تحكي*******
بعد ما حطين اسيل انا رحت مع سلاحي السري لي هما الافكار لي راهم فراسي ولي مستر شهاب تعماو عينيه عليهم مالقري راهم بلينين كي الشمس مي بون خويا و نعرفه يصلح فكلشي و باش تحشيهالو ولا تخدعيه في أحلامك بصح الوتر الحساس تاعو هو ماضيه
رحت ليه للدار  كنت عبالي بلي نصيبو لتم رحت و فتحت لباب دخلت و كي عادتو يخلي لبيبان مفتوحين حاسب روحو في مكة ولا سور تالمون راه فرحان .... مهم خلينا دخلت طلعت دروج ياجدكم دار قصر اييه تحلبت يا شهاب يالخرا *حشاكم*
مهم وصلت قابلني صالون قد دنيا وكان قاعد فيه و قدامو قراعة تع شراب بصح كانت معمرة باينة مزال مشربش ... قاعدة نخزر فيه ... عمر كاس و جا حايشربو انا نطقت
رانية : مكنتش ضاناتك تبدلت لهاد درجة
خزر فيا ملفوق للتحت و ملامح وجهو تبدلت 180 درجة الغضب كان يخرج من عينيه ... انا باه نغزلو كثر بديت نمشي و رحت قعدت قدامو
شهاب : شكون نتي و وش جابك لداري بدون اذني ... عندك دقيقة متخرجيش نعيط لبيوليس
انا خزرت في عينيه و بديت نضحك و قتلو بكل ثقة
رانية : هههههه واش لازملي اذن باش ندخل لدار خويا ؟ زيد من وقتاش اللخ يشتكي على ختو للبوليس هههههههه
هو خزر فيا و مكان فاهم فيها والو و قالي بإستغراب
شهاب : من وقتاش رجعت خوك يا لالة؟
ممبعد انا رميت يدي باه نخمس معاه و قتلو
رانية : معاك إلهام بن *****
هو تخلع و قعد يخزر فيا مخلوع و انا كي شفتو مرناش يدو نحيت يدي و جبدت بطاقة تعريف تاعي الحقيقية و وريتهالو هو قعد يخزر ما فهم فيها والو
رانية : هههه وقيل حسبتلك راني نتمسخر
شهاب : بالتأكيد ههه مستحيل تكوني نتي الهام ... الهام طفلة عاقلة و طيبة
رانية : علاش راك تشوف فيا شيطان هههههه مهم
انا برك قلت هكاك جبدت شعري للكوتي و بديت نفتح فسنسلة تاعي و نحيتها و وريتهالو
رانية : و هادي ؟؟ هههه جوسباغ متكونش نسيتها و نسيت يمانا لي قالتنا ادا كاش نهار تبعدتو على بعضكم... تعرفو روحكم بهاد سنسلات هههه مسكينة تقوشي حست
و انا نهدر هكاك عينيه تعمرو بالدموع ابخي ناض و راح لمعلاباليش وين و بعد مدة رجع و جا عندي نحالي سنسلة من يدي قريب قطعها
رانية : اااااي بلعقل
مسمعليش قاع و جرب يطابق سنسلتي مع تاعو و خرجت مطابقة ...
رانية : علاش راك طابق هه ياخ هاد سنسلات من تصميم تع ماما و كاين زوج منهم فلعالم وحدة ليك و الاخرى ليا ...
بعدما قتلو هك ني سور صدقني لخطرش هاد لعفسة واحد ميعرفها من غيري انا و هو و ماما حتى بابا و معبالوش.... و هو هكاك طاحتلو دمعة من عينو ...حتى نشوفو جا عنقني بقوة قريب عصرني انا لتم مقدرتش نشد غلبوني مشاعري و طرطقت بلبكا مهما يكون كما قتلكم راه خويا بعد مدة بعدت عليه
شهاب : ااااه ليوم نهار مزهور لقيت أحلام *أسيل* و زدت لقيتك نتي خاي
انا لتم حبست بكا و نضت قابلتو و بديت نهدر معاه بزعاف
رانية : لقيت احلاااام؟؟؟ راك تقولي بلي هديك اللفعة كانيليا هي أحلام ههههع واقيل هبلت شهاب
شهاب : ....
رانية : يا خويا شهاب أحلام تع الصح عي الصحافية أسيل لي كانت معاك طول لمدة هادي و نتا مش فايقلها
شهاب : متتمسخريش و متجبديش هديك الكلبة هنا هي لي بعدتني على كاميليا و كانت تهدد فيها باه متقوليش
رانية : و وشنو هو دليلك على هاد شي يا سيد خويا ؟؟
شهاب : ....
رانية : الوغ انا عندي دليل... و دليل تاعي ساهل باين كي شمس نتا برك مفقتلوش
شهاب : تفضلي
رانية : الوغ تشفا اول يوم جات هنا اسيل و دخلت لهديك لبيت لي حاط فيها نتا تصاور تاعنا و كلش ... تصرعت و مرضت ... هادا دليل انو عندها علاقة بدوك التصاور ... ثاني شي نهار دخلتها للمصعد ... ياخ اسيل مصغرها عندها رهاب الاماكن الضيقة ولا نسيت ... و كاميليا عمرها ما بينت بلي عندها رهاب هدا حياتها قاع تدخل للمصعد نورمال .... ثالث شيء نتحداك تقول لكاميليا على اسمها الدوزيام و ادا قاتلك أحلام انا و اسيل نجو نعتاذرو منها ... و تان بعد ما جات وراتلك كاميليا تصاور رحت شفت تصاور تاوغك نتا اذا ناقسين ولا نن ... و اخر شي و الاهم عبالي بلي عندك كاميرات مراقبة فدارك روح شوفهم و ردلي بلخبر اوك
انا برك كملت شهاب قعد حاير و رجع وجهو صفر و هدر بسيف
شهاب : و نتي وش عرفك بلي أحلام هي نفسها أسيل
رانية : لخطرش مين كنت في فرنسا وسيم عيطلي و * حكاتلو قاع وش صرا لوسيم مع كاميليا و بلي هي لي دارت بالها على اسيل طول لمدة هادي*
شهاب قعد يخزر و مشوكي و فنفس لوقت عقلو كلو  مخربط .....انا بلا اي هدرة حطيتلو ألبوم فوق طابلة و جيت رايحة و قبل ما نخرج قتلو
رانية : راك لرطت فيها للمرة ثانية و هاد لمرة راك خسرتها و خسرتني ...ايه و مدابيك تقوللهم يخلونا نسافرو لمرات لي فاتو سكتت بصح هاد لمرة نقلب عليهم و عليك الدنيا
خليتو مبلوكي عبالي مكانش متوقع نكون عارفة كلش ... نمشي و دمعتي على خدي .... طريق كامل و انا نخمم ف وش راح يصرا في طريقي جزت على مكتب الطيران و حمدالله شهاب هدر معاهم و خلاص ليوم فليل نسافرو... وصلت للدار لقيت اسيل مزلت راقدة رحت نوضتها ناضت بسيف كانت حزينة بزاف اول مرة نشوفها هك و. انا محبيتش نزيد عليها ... حطيتلها تاكل مصباح مكلات والو و رحت نوجد لكابات تاعنا اسيل مين قتلها رح نسافرو ليوم حسيتها زعفت لكن بينتلي بلي راهي فرحانة ....
رانية : معليش اسيل كلشي بلمكتوب
اسيل : هههه نو عادي اصلا لمهم خدمت خدمتي و خلاص اصلا من بكري زهري كلب
رانية : كملتي خدمتك
اسيل : ايه كملت و معبالي بحد انا ننشرها مخدمتش في باطل
رانية : نستعرف بيك
جاز لوقت و وصل وقت سفر تاعنا رفدنا لكابات تاعنا و كل و غلقنا دار و جينا رايحين .... وصلنا ركبنا و قبل ما تديماري رقدنا ....
*******شهاب يحكي********
للدك مميش مصدق بلي بعد هاد سنين شفت ختي... ختي لي راني متوحشها لدرجة متتوصفش ...لكن الشي لي قاتهولي فاجئني بزاف و ملقيتش وش ندير تبلوكيت تخربطت قاع اني فاهم والو بصح وش خسرت ادا جربت عالاقل باه نتأكد .... اول شي درتو رحت للبيت تع التصاور شفت الالبومات لقيتهم ناقصين صح ممبهد كي كملت رحت شفت لي فيديو تع كاميرات لمراقبة تع الايام لي فاتو حتى نشوف فواحد كاميليا داخلة لداري.... واحد معبالو بلي انا داير كامرات فكل جزء من الدار تاعي... وصلنا للفيديوهات تع بيت التصاور و كان شوك تع حياتي كي شفت كاميليا دهلت و قاعدك تقلب في الصناديق تاعي و تسرق فتصاور .... لتم تأكدت مشي لي قالتو الهام و لي هو كاميليا ماهيش احلام بصح كنت نكذب في روحي و نقول نن مزال مشفتش كلش بلاك راتس غالط ... كنت نصبر فروحي في باطل
رحت حكمت تلفوني و عيطت لكاميليا
شهاب : الو
كاميليا : هاي شهاب هههه والله راتي قدام دارك
شهاب : ااه صح اسه اجري نسحقك
كاميليا : اوك بب ههههه
ستنيت شوية ختى نضيبها قدامي جات عنقتني ممبعد رحنا قعدنا و باين كانت ميتة بلفرحة
شهاب : اسيل راهي رجعت لدزاير
كاميليا : اووه صح؟؟  والله هنيتني  😢 كانت معيشتني فلجحيم
شهاب : ايه خلينا ... مهم كاميليا ههههه تشفاي لليامات تع الصغر
كامي : ههههه و ميفاش ننساهم
شهاب : فكريني وش كنا نعيطولك ههه نسيت ...
كامي : اه...هههه والله  مام انا نسيت
شهاب : ايييه مزلكي تحبي تتمسخري ههههه كيفاش تنساي اسمك الدوزيام
كامي : اه....اسمي الدوزيام؟؟ ... م...معنديش
و لتم انا تأكدت بلي مش هي صح الزبل طلعلي للراس و بديت تقرب منها و نهدر بنبرة غضب
شهاب : وشنو هو اسمك الدوزيام
كامي : ااوه شهاب وشبيك راك تخوف فيا
شهاب : ههههههه اصلا انا لبهلول لي امنتك و راتي نسقسي فيك
و لتم حكمتها من رقبتها و بديت نعيط
شهاب : اعتارفي دك ولا تموتي بين يديا
كامي : اااه شهاب نو نو علاش راك ديرلي هكا
شهاب : عندك 3 ثواني متعتارفيش تموتي ....وااحد
كامي : نو بليييز
شهاب : زوووج
كامي : نو خلاص شهاب الله يعيشك
شهاب : ثلااا....
قبل ما نكمل بدات تعيط و قاطعتني
كاميليا : مشي اما ايه مشي انا بليييز حبس اسيل هي طفلة لي تحبها مشي انا مشي انا
تهدر و ترعش كي لمهابل و انا لتم مرجعتش نشوف قدامي خلاص رفدت يدي و عطيتها كف جبتها فالارض رعفتها هي سييات تنوض و تهرب ...رحت ليها و رفدتها متريكو تاعها
شهاب : نسحقك تديسباري لخطرش كون نزيد نشوفك تموتي بين يديا و يجي لي يجي ميسلككش و برك كملت كحمتها مشعرها و بديت نكركر فيها و هي تعيط و تبكيو تترحى باه نخليها و انا كون نصيب نحكم موس و نذبحها
حبطتها حتى لتحت بهديك لحالة و رميتها و غلقت لباب و طلعت مدمر قاع للفوق رحت جبت قراعي تع شراب و حطيتهم كنت معول نقعد نشرب حتى نتصرع بصح شفت هداك الالبوم لي عطاتهولي الهام... رحت فتحتو و برك فتحتو عينيا تعمرو بدموع ...كان مرسوم قلب و مكتوب فيه
                    أسيل💖وسيم
بديت نفتح فيه و نشوف فتصاور كانو تصاور ت اسيل و وسيم نلي كانو صغار حتى كبرو و ظهر بلي صح يا أسيل نتي هي أحلام ....كيفاش مفقتش كيفاااااش وش لي عما عينيا عليك و نتي كنتي قدامي طول هاد لوقت و مع الاخير نعاملك بهاد طريقة انا كلب و منستهلش وحدة كيفك مكفاش وش درت كي كنا صغار ....
طحت فلرض و قاعد غير نشرب و دموعي يسيلو قرعة مور قرعة و كل لحظة نتفكر غبائي كلشي كان باين قدامي بصح انا مفقتش  هادي لي راهي قاهرتني ......شربت حتى خلاص حسيت راسي حا يترتق
*في الصباح*
نضت مع صباح راسي يوجع فيا الم ميتوصفش صبت روحي راقد فالارض و كلشي مرمي و قراعي شراب مكسرين ... و مكنت متفكر شي.... رحت نضت بسيف و غسلت وجهي و شربت قهوتي و دواء تع راس و رحت ندوش كنت نريح بالشراب...
بعدما كملت تدواش تفكرت كلش قلبي وجعني و قلت انو لازم عليا نصحح غلطتي ليوم...
رحت بدلت و رفدت مفاتحي و هداك الالبوم و جيت خارج للشركة ... رحت دخلت صبت الكل يخدم دخلت لمكتبي صبت دانيال قاعد
شهاب : سلام
دانيال : ....
شهاب : ياو قلنا سلام
دانيال : راح نستقيل
هو برك قال هكاك درت هزرت فيه مدة و قتلو
شهاب : واقيل هبلت
دانيال  : هادي اعقل عفسة راح نديرها فحياتي
شهاب : و وش السبب
دانيال : منخدمش مع واحد حقار  😊
انا لتم تحطمت لانو صح وش قال مشي كذب درت جبهتي بين يديا و خرجت نفس
شهاب : استقالتك غير مقبولة
دانيال : ههه تقول شي راك ميت عليا
شهاب : دانيال بليز متخلينيش فهاد لوقت نحتاجك بزاف
دانيال : بون شهاب انا راني عرفت كلش و وش صرا من عند اسيل قبل ما تروح... ايه راحت خلاص خسرناها .... عندك فرصة وحدة لي هي تطلب منها سماح و الا نستقيل و نروح لدزاير و ندير المستحيل باه تكون ليا وحدي ... بصح علاه نكذب على روحي و انا عبالي بلي هي تحبك نتا ... عندك فرصة وحدة برك
برك قال هكاك  راح  و خلاني مع افكاري المخلطة قاع كيفاش هادي راحت كيفاش ... بلا اي تفكير رحت ركبت طونوبيل و رحت لدار ‘ين تسكن قاعدة غير ندقدق حتى خرجولي ناس قالولي بلي راحو .... قعدت قدام لباب محطم قاع و عينيا تعمرو بدموع.... عندو لحق دانيال عندي فرصة وحدة برك .باه نسترجع احلام و فنفس لوقت اسيل...
********اسيل تحكي*******

STOOOOOOOP
عبالي بطيت متقتلونيش هههههه بصح راني فمستغانم و مكاش كونيكسيون و بسيف باه نكتب
هههههه وش رايكم فالخالوطة نيميرو زوج
نلتقي فالنهاية ان شاء الله