🍥رفقا على قلبي 🍥 [باللهجة الجزائرية ]

🎤بارت 03🎤

برك شفتو قلبي بدا يخبط و جاني وجع فكرشي تقوشي رح نجوز لباك معليش اسيل اتشجعي هادي فرصتك ايا رحت عند و برك وصلت شفت حاجة مكنتش قاع نستنا فيها ..... برك قربت من هداك شعاب عادي كان معاه مرأة و راجل ايا انا برك رحت باه زعما نلقي هليهم التحية شفت وجه هديك المرأة.... بلاك راكي غالطة أسيل متتسرعيش ... هاد الجملة قاعدة غير نعاود فيها فراسي حتى نطقت و هدرت مع شهاب و سمعت صوتها هما كانو مزال مشافونيش .... هي عبالي كون تشوفني تعرفني ....
هي برك هدرت تأكدت بلي هي المرأة لي راي تدور فراسي .... عينيا تعمرو بالدموع.... الدموع لي راني شايدتهم عندي بزااف
بلا مانفيق على روحي رميت قاع وش كان ف يدي و رحت نجري ليها اول عفسة درتها هي سوطيت باه نلحق لشعرها هي قد الزرافة زوج مترات و ككمتها من شعرها و بديت نتشنتشف فيها شهاب دور راسو بلخلعة و قعد يخزر مشوكي و لباقي قاع كي حالتو كلش حبس بعد ماكان الضجيج و اصوات الكاميرات و الهدرة رجع السيلووونس غير صوتي انا نعيط
أسيل : يالكلببببة والله متحشمي ليوم تموتي على يدي اااه زعما هربتي يابنت الكلبة والله نقتلك ليوم تخلاص عليك مال
طيحتها فالارض و بديت نعطي بلكفوف و هي مافاهمة والو و مقدرتش تبهدني كنت قوية بزاف عليها و اصلا حمدالله مغلطتش و توشاتني باغسك نرميها مالتاقة انا شوية مريضة
لمهم شهاب هداك راح ديراكت عبز وحد القفلة كانت فالحيط جاو الامن يجرو
بسييييييف باه بعدوني عليها كنت كي المتوحشة فوقها ايا مين بعدوني هي راححت ترمات عند داك لبغل شهاب تبكي و تتمسكن يايماااا لي يشوفها يقول ناش ملاح و عمرها ما تخدع ولا تأدي عبد و انا رفدوني ديراكت لمكتب الامن بخصوني تبخاص و انا غير اسكتة لانو ون نهدر نطرطق عليهم نقتلهم و ندخل لحبس في جرتهم كنت نستنا غي يكملو باه نعاود نطلع نتفلها شعرها مليح ايا و هما يبخصو حتى يدخل السيد شهاب دخل و كان يخزر فيا خزرة تع موت و تشناف ... هما برك شافوه قاع بعدو وخافوه حتى الشاف تع الامن ناض من مكتبو و راح قعد شهاب في بلاصتو .. حاسب روحو ميخراش واقيل هدا

شهاب : عندك غرامة مالية على الخسائر لي درتيهومالنا فصال التصوير + باه تداوي كاميليا روحها

انا لتم مقدرتش نشد روحي و طرطقتلو بالضحك... ههههههههه وقيل هبل هدا انا ني نلم قدراهم و هو يقولي نمدهم باه تداوي ديك الحيوانة روحها كنت حا نسبو بصح جاتني في راسي تصويرة نير والله يسلخني و يشويني كون يحاوزوني صافيك كالميت روحي

أسيل : سمحلي بصح صال التصوير مدرتلو والو انا هجمت عليها برك و هي عبالها و انا عبالي

شهاب : مدخلنيش عندك ساعة فيك الدراهم يكونو هنا سينون تموتي فالحبس

انا لتم حسيت بلي لازم نبدا نستعمل قدراتي اييه خسارة كنت مخبيتهم لليامات لوخرين مكنتش عارفة بلي حا نبداها بمصيبات الله يعطيني ضربة بقرة

و لتم تشوفو الانسة أسيل بدات تبكي ... ايييه بديت نبكي انا ممثلة رائعة.... رجعت نبكي بالشهقة و لعياط و رميت روحي فالارض و بديت نهدر بالدزيرية باه منشوكيش لوخرين عبالي هو يفهمني بصح ندير روحي معباليش