الجزء الرابع عشر♥️
وليد... فتحت عيني بالكوة عرفت اني بالمستشفى وبطني جانت حيل دتأذيني باوعت امي نايمة يمي باوعت يم ايدي نايمة سارة ابتسمت طالعة خصلة مثل السبرنك من الحجاب لزمتها حست علية
سارة... وليد كعدت حمد لله ع السلامة شون صرت
وليد... الحمد لله منو جابني هنا شصار
سارة... اني وخالة جبناك طلع عندك تسمم شكلت
وليد... الله يطيح حظه لصديقي حسيت الاكل مو نظيف وكلني بمطعم زبالة مثله
سارة... ههههههههه الحمد لله عدت سلامات
وليد... تكدرين تساعديني اريد افوت للحمام
سارة... يله الزم ايدي
وليد... خليت ايدي بايدها ومشتني شوية شوية للحمام... كملت فتحت الباب لكيتها منتظرتني باوعت عليها... ياترى استحق منج توكفيلي وتتعبيلي هيج بعد الي سويته بيج
سارة... تالي وياك مو كلنا ننسى الماضي تعال درجعك للفراش علما يجي الطبيب يشوفك وبلكي نطلعك للبيت
وليد... صحت امي خطية خوفتها علية وجا الطبيب جيكني وكتبلي على خروج رجعنا للبيت ام سارة جانت ويا علاوي ومباشرة من وصلنا سارة اخذت امها وطلعت ومشفتها بعد ادكلها ترد كلمتين وتسده مو عوايدها مر تقريبا اسبوعين وبعد ما اتحمل شتاقيتلها فديوم جنت راجع من الدوام شفت علاوي بالحديقة وامي جوا دسولف.. هلو علاوي
علاوي... هلو خالو تاخرت اليوم
وليد... شوية ازدحامات منو عدنا
علاوي... خالة ام سارة
وليد... وسارة هم
علاوي.... لا بس امها
وليد... خوش اني دطلع وهسه اجي زين دير بالك لتطلع برا
علاوي... ماشي
وليد... عرفتها وحدها بالبيت لان سيارتها برا دكيت الباب طلعتلي راسا فتت وسديت باب الكراج
وليد....ليش مدتردين علية شكو ليش مختفية
سارة... وليد امي مو بالبيت اطلع ما اكدر افوتك
وليد... اعرف امج عدنا لذلك اريد احجي وياج
سارة... ماكو شي تعبانه شويه وملتهية بالدوام
وليد... لو دتنهزمين مني لان عرفتي احبج
سارة... ظليت صافنة عليه اني توقعته مجان حاس
وليد... شو انصدمتي جنت واعي اني صح مدا اسيطر ع الكلام الي كلته بس اعرف شحجيت وممتندم اني صدك احبج
سارة... من شوكت نسيت اني بنت منو
وليد... لا منسيت بس مو بيدي حبيتج
سارة... انت شون فتت للسجن
وليد... حيييل هسه ذكرتي تسأليني
سارة... مجنت اريد افتح مواضيع قديمة قبل بس هسه اريد اعرف بابا شون اله دخل بسجنك
وليد... كعدنا ع الدجة مال مطبخ وبديت اسولفلها من اول مأخذوني الى اليوم الي قررت اخطفها بيه
سارة... معقولة بابا هيج يسوي زين ليش ماعندك ملف بالسجن
وليد... لان لو عندي ملف يعني اني موجود يعني اهلي ممكن يطلعوني بمحامي بواسطة باي شي بس هو مرادني اطلع من السجن اصلا
سارة.. وشون تريد تصير اي علاقة بيناتنا
وليد... انتي مو مثله مالج علاقة اني اريد ابدي حياة جديدة وياج
سارة... شون تبدي حياة جديدة ويا وحدة هي جزء من الماضي الي تريد تنساه اعذرني وليد اذا انت تكدر اني ما اكدر
وليد... مو انتي الي دائما تكليلي خلينا ننسى الي صار قبل
سارة... اي بس مو واحد يحب لاخ اسفة اني احترمك واعزك بس الي تريده مستحيل يصير ولازم تروح هسه لترجع امي وتشوفك هنا
وليد... اني رايح بس مرح افقد الامل... طلعت من يمها مخنوك كلامها صح بس اني اريدها مو بيدي حبيتها
سارة... طلع وموتت روحي من البجي اني هم حبيته واريده بس صعبة ما اكدر
