الجزء الثاني عشر♥️
سارة... كعدنا الصبح وليد جان دينتظرني طلعنا ورحنا لبيت جدي هو جان بيت جبير ومقسم بيوت صغيرة واحد يم لاخ بس بيت مفتوح على بيت وصلنا وظليت بسيارة اخاف انزل
وليد... يله نزلي
سارة... ها اي هسه
وليد... شبيج لتخافين اني وياج
سارة... باوعت عليه عيوني مليانه دمع... ما اعرف شون حشوفها تعرف صار كم سنه مشايفتها
وليد... صيري قوية وهاي امج شمتسوين حتسامحج نزلي واني انتظرج هنا اي شي يصير دكيلي بس انزل راسأ
سارة... ماشي... نزلت وماحس برجلي ترجف من الخوف على خجل ما اعرف اي باب ادك اصلا دكيت باب الوسط طلعتي بنيه صغيرة.. هلو حياتي خلة وداد موجودة
البنية... منو انتي
سارة... كليلها سارة بنتج... فاتت البنية للبيت واني تجرأت وفتت وراها شفت امي طلعت ركض بالهول شون صايرة ضعفانه ومبين بوجها التعب ابتسمتلها وهي بدت دموعها تنزل ركضت عليها حضنتها وابوس براسها وايدها ونزلت على رجلها وهي جامده بس دموعها تنزل مبين عليها زعلانة مني حيل... يوم فدوة سامحيني والله عرفت غلطتي لوتدرين شصار بية وراج يوم... جوي نسوان خوالي وبدوا يغردون هاي لدكول شجابج وهاي لدكول طلعي برا وهاي الي دكول جتي بنت الحرامي
سارة... مالكم دخل اريد احجي ويا امي وحدنا
مرت خالي... انت مخبله شون تجين هنا ووحدج لج تدرين اذا خوالج دروا هسه يجون يمردوج هنا
سارة... يوم الله يخليج بس سمعيني مرة وحدة وبعدين شتقررين بكيفج
ام سارة... تعاي نفوت جوا
مرت خالي... انتي جنيتي وين مفوتتها لبيتي
ام سارة... مالج دخل بنتي واريد احجي وياها نسيتي اني هم عندي حصة بهذا البيت.. تعاي سارة
سارة.. فتت لغرفتها وحضنتني حيل مصدكت نفسي.. يوم يعني انتي مسامحتني
ام سارة... حبيبتي اني اصلا مزعلانة منج وين جنتي شصار وياج ظل بالي يمج حيل
سارة... يوم اني عفت بابا
ام سارة... شنو شون عفتيه
سارة... حجيتلها الي صار بس مكتلها منو خطفني ما اعرف مردتها تعرف لتحقد عليهم
ام سارة... انتي من كل عقلج خوالج محيخلوني اعوفهم
سارة... يوم انتي مرتاحة هنا
ام سارة... لا يايمة يومية اتحسب على ابوج من ذبني هنا خوالج صعبين ونسوانهم اصعب ومسويني خدامة ودادة للجهال
سارة... خلص تعاي ويايه يله
ام سارة... وحصتي بلبيت
سارة.. انعل ابو الحصة تنازلي عنها ملازم
ام سارة... ولج حيتبرون مني واحنا حنظل نسوان اكيد نحتاجهم ومنين حنصرف
سارة...اني بعشر زلم اني تغيرت حيل يمة وبالنسبة للصرف خابرت عمو سالم صديق بابا وتعرفين علاقاته ووعدني يوظفني وعن قريب
ام سارة... ما اعرف يمة ما اعرف
سارة... ماكو ما اعرف يله حظري غراضج وامشي ويايه لان خوالي محيخلوج تطلعين
ام سارة... ليلكونه وياذونه وبعدين انتي بعد مشتريتي بيت وين نكعد
سارة... بيت ام وليد مو كتلج هي اسبوع ونتحول يله يمة ماكو وكت كومي اخذي بس شغلاتج المهمة يله
ام سارة... اني هم تعبت اريد ارتاح بس خوالج
سارة... هم كلتلي خوالج كومي يمة يله
ام سارة... ماشي ماشي
سارة... اخذت امي شغلاتها المهمة وطلعنا من الغرفة ونسوان خوالي متخصرات وبدوا وين رايحة واخوتج محيعوفوج ومن هلحجي
سارة... يوم لتردين بحرف.. اسمعوني زين ليسال كلوله بنتها اخذتها وخلص واذا على حصتها بيت ابوها اقرب وكت حيوصللكم التنازل وتحتركون بيها ان شاء الله يله يمة نطلع
مرت خالي... روحوا الله لايردكم مجا من وراكم بس المشاكل
سارة... طلعنا وصعدنا بالسيارة وليد جان مستغرب حيل
سارة... شنو شبيك
وليد... ماكو شي بس صدك بنت ابوج
سارة... ابتسمت وعرفته على امي ورجعنا للبيت تعرفت على ام وليد وكعدوا يسولفون واني ايدي على كلبي لدكلها على شغلة خطفي اشرتلها تجي للمطبخ ووليد جان بالكراج اصلا ديشتغل بالسيارة... خالة فدوة ماريد امي تعرف شون عرفتكم اني كتلها انتوا الناس الي نقذتوني من انخطفت
وليد... حجت هيج ولزمني كلبي معرفت شرد عليها بس دنجت راسي حقها اذا عرفت شدكول كاعده بيت الي خطفها ابد مراهمة
ام وليد... ماشي بنتي مثل متحبين
سارة... انباع البيت الحمد لله واخذت البيت الي ورا بيت وليد وظلي شوية فلوس لان بيتي بمنطقة ارقى جان اثثت البيت كله وبقيت كم فلس جوا ايدي مر كم شهر وطلع تعيني الحمد لله واسطتي قوية جانت تعينت بمدرسة قريبة من البيت مدرسة انكلش لان اصلا بيتنا جان بلاطراف امي وام وليد علاقتهم قوت حيل واني ووليد هم وبابا يومية اخابره بالبداية جان زعلان مني بس اعرف بيه يحبني حيل ميكدر يزعل مني هواية وخوالي خابروا امي وبدوا يهددون بس من تنازلت عن الحصة عافوها بس شرطهم مترجعلهم ابد حياتنا جانت حلوه حيل ويا بيت ام وليد ناس تروح يم ناس دائما صار عندي اخ وخالة وعلاوي يومية ادرسه الى مابيوم تغير كلشي
