الجزء الاخير♥️
ام وليد... مر كم يوم خليتهم ثنينهم تهدئ اعصابهم شوية بعدين اخذت علاوي ورحت لبيت سارة
ام سارة... هلو عيني ام وليد عاش من شافج يعني اذا اني ما اجي انتي متجين
ام وليد... لا والله مو هيج بس تعرفين ملتهية وياعلاوي ودراسته لعد سارة وين
ام سارة... اسكتي وخليها سارة مدري شجاها من ترجع من الدوام تفوت للغرفة لا اكل لا شرب وايدها هم اسم الله عليج مدري شبيها مزركة يمة روحي الطبيب متقبل وتون منها
ام وليد... ميخالف افوت اشوفها
ام سارة.... اي فوتي حبيبتي تفضلي
ام وليد... فتت للغرفة شفتها وجها اصفر ايدها شادتها انعل ابليسك ياوليد على هاي العملة... شونج سارة حبي
سارة... جنت متمددة وحيل دايخة اكلي حيل قليل صاير وايدي دتموتني ماشوف اله ام وليد فوك راسي.. هلو خالة تفضلي كعدي
ام سارة... شفتي شون وجها اصفر صاير
ام وليد... لا هسه تاكل ويايه دسويلنا جاي وعصرونية حتى ع اللمة كلنا ناكل...
ام سارة... تدللين ثواني والعصرونية تكون جاهزة
ام وليد... طلعت امها باوعت عليها... ليش هيج دسوين بروحج مدمرة نفسج ومدمرة ابني وياج
سارة... خالة انتي عرفتي شسوا بية
ام وليد.. عرفت وسمعت بس انتي تدرين بيه شكد يحبج ومستحيل ايأذيج
سارة... لا والله لعد هاي ايدي شنو من يصير عصبي يفقد اصلا محد طببه للسجن غير عصبيته ولسانه
ام وليد... بس كلبه طيب ويرضه بساع تراهنيني هسه بس دزيله رساله يجيج ركض وينسى الاول والتالي
سارة... وابوية شون
ام وليد... مالنا دخل بابوج
سارة... شووون فهميني منين حيطلبني ها
ام وليد...كله يدبر بس انتي وافقي انتي شعليج هو راضي يخلي ايده بأيد الي جان ناوي ينهي حياته علمودج بس مفكرتي هيج انتي
مدتشوفين شكد يحبج لعد
سارة.... صفنت بكلامها صدك اني ابد مشفتها هيج.. ما اعرف خالة اصلا هسه هو ميريدني بعد
ام وليد... جذاب يومية بيده تلفونج ويكلب بصورج اني شفته
سارة... ياصور ياتلفوني
ام وليد.... الي اخذه منج يوم الي خطفج بيه...
فكري بكلامي يمه وبراحتج بس لتضيعيه من ايدج
سارة... راحت ام وليد وبديت افكر بكلامها كله ذكرت نضراته الي كلامه راجعت نفسي هواية وبيوم امي وامه راحوا للطبيب سوية اني راسا بدلت وترتبت خليت عطر خفيف ورحت لبيتهم باوعت سيارته موجودة فتحت باب الكراج وفتت دكيت باب المطبخ محد رد فتحتها وفتت.... وليد... وليد مرد علية فتت للهول شفته نايم جان بس بالشورت باوعت على شسمه متشوه من التعذيب ظهره مدمر جيت ليمه مشيت ايدي على وجها فز... بسم الله لتفز اني سارة
وليد... سارة خير اكو شي بيج شي شون فتي
سارة... اذا انتوا متبطلون هاي العادة مالكم وابد متقفلون الباب صحت عليك ومرديت فتت
وليد....كمت ادور ع تيشرت مالتي اريد البسه ماريدها تشوف اثار التعذيب
سارة... شفته كام ديدور ع التيشرت اخذته اني... ددور على هذا
وليد... انطينياه سارة
سارة.....تقربت منه... تخجل مني
وليد.... ماريد تشوفيني هيج
سارة.. شون هيج اصلا المفروض تتباهى على هاي العضلات الي عندك
وليد... جريت التيشرت من ايدها حيل...
سارة من الاخير شتردين شكو جاية متخافين مني متخافين لا افوتج للسرداب
سارة... لا ما اكو احد يخاف من روحه
وليد... باوعت عليها شكد جنت شايل منها راسا صفيت بس كالتلي هيج بس مبينتها...
منو تقصدين
سارة...تقربت ليمة.. انت روحي وحياتي اني احبك
وليد... اعرف بيها جريئة بس اليوم عبرت كل الحدود جاية وحدها يمي وددكلي هيج... شنو الي تغير
سارة... مدا اكدر اعيش بدون ماشوفك واسمع صوتك فكرة انو اني ابتعد عنك مدا اتقبلها تعبت وليد من كلشي اريد اصير وياك
وليد... متأكدة
سارة... اي متأكدة بس عندي كم شرط
وليد... وتشرطين هم كولي خل اسمع
سارة... من حقي اشرط لو ما منحقي
وليد... من حقج ونص كلي اذان صاغية
سارة... لزمته من ايده وكعدنا... اول شي نكعد كلنا سوا اني وانت وامك وامي وعلاوي ونطلع من هاي المنطقة
وثاني شي الماضي والي صار ابد منذكره ابد لاشقة لاجديات ابد
وليد... وثالثا
سارة... تخابر بابا وتطلبني منه
وليد... لا انتي تخبلتي
سارة... مستحيل حيعرف اريد ازوج وميلتقي بيك ع الاقل خابره ولو مرة حتى هاهية ميجي ومتشوفه
وليد... صعبة سارة حيل صعبه
سارة... اسهل من ماتشوفه وجها لوجه
وليد... يصير خير خليني افكر بيها
سارة... يعني موافق
وليد... الله كريم
سارة... احبك
وليد... تقربت منها لزمت ايدها دا ابوسها شفتها زركة ومتأذية حيل.. هاي شنو شبيها ايدج
سارة... اسأل نفسك
وليد... اني هيج سويت والله
سارة... اي انت
وليد...كمت ابوس بايدها.. اسف حبيبي والله متتكرر بعد
سارة... واذا تعاركنا وصرت عصبي مني
وليد.. اعوف البيت واطلع ولا اسمعج كلمة...
بستها من راسها ووصلتها للبيت قبل لا امها ترجع....
خطبتها من امها رسمي واضطريت اخابر ابوها خطبتها منه جنت على اعصابي بس اني ماطول اختاريتها فمتوقع اتواجه وياه ولو مرة ع الاقل وسارة قنعته وقابل ومكدر يجي الحمد لله صحته متسمحله يصعد طيارة... بعنا البيتين مالتنا واخذنا بيت جبير بداخل ببغداد وسوينا عرس بسيط على كدنا حبيبتي جانت طالعة تخبل جنها لعابة.. عشنا ببساطة صح جانت تصير خلافات بينا بس نحلها بسرعة وعصبيتي خفت شوية بسس تعلمت اسكت حتى لو جان المفروض احجي حتى لا اوكع بنفس الي وكعت بيه قبل صار عدنا يزن وتمارا وزيد.. وعلاوي تخرج من السادس وطلع طبية مضاع تعبنا وياه وابوها ابد ملتقيت بيه بعد ولا سمعت صوته جانت تخابره من اني مموجود والحمد لله مشت حياتنا حالنا حال هاي العالم.
تمت....
#ريم العبيدي
تحياتي...
