احبك ولكن ... هل ساتحبنى عندما ترانى

1

احبك ولكن ... هل ساتحبنى عندما ترانى 💫💑

الحلقه الاوله .....

امها .... ياسمين ... ياسمين ... اطلعى ووتى القهوه وطقى على خوك ومديهاله ... ونقصى من لسانك خير ماتجيه قصه باهيه

وفجاه فتحت ياسمين الباب وشبحت لامها وقالتلها ....
ياسمين .... << مع تبحليقه لامها >> شفتى الغزال المصور الا شفتتتتتته ؟؟؟
امها ... ااااااااااه ؟؟ شن تخترفى انتى يافرخه ؟؟ نهارررررك اسود وفاتحه حتى روشن ... ان شالله خوك يشوفك بس تى والله الاما يشتقك ....
ياسمين .... << فاقت انا هيا تكلم فى امها >> ههههه تى نبصر ياما انى نقصد على بطل مسلسل تركى .. اما انتى قداش يمشى تفكيرك بعيد ..
امها .... اه نحسابه .. خلاص مالا برى حطى القهوه على نار ووتى صفره ... وشوى وطقى على خوك من برا ومديهاله ..
ياسمين .. حاضر ماما <3 <3
مشت ياسمين للمطبخ وحطت القهوه على نار ... وبمجرد ماخشت للمطبخ وبدت تطيب فى القهوه وهيا تتخايل فيه وتغنى وترقص ...
ياسمين ..... انا قلبى دليلى قلى حاتحبى .. يحكيلى واصدق انا قلبى دليلى دليلى دليلى ....
وهنا خشت امها وشافتها وقالتلها ..
امها ... لطف ياربى خيرك ؟؟ شن هبلتى ولا شنى ؟؟
ياسمين .. ياما انى قررت قرار .. قرار مهم فى حياتى واول مره نقراره ..
امها ... ان شالله خير .... افحمينا شوووى ترا ... تى هاااااااا القهوه فاجت يامجنوهه ... ااااااه ياربى يامعباك على بن ضو قعدتى هجاله من تو ... حولى حولى مافيك تمره ..
ياسمين ... ياما ماسألتنيش شنى ؟؟
امها ... خير ياطير ؟؟
ياسمين ... نبى نضعف خلاص وقررت بندير ريجيم .. وبنمشى لدكتور ...
امها .... رووووووووووووووى واخيررررررا بنتى بدى عندها عقل زى باقى بنات وبدت تفكر ... يالله خلاص ابدى وانى معاك ..
ياسمين ... خلاص وتوا تشوفى من اليوم .. لا لا من اللحظه هيا مافيش اكل .. وفى رياضه بس .. لكن مشكله ماعنديش الالات رياضيه ...
امها ... ولايهمك يابنتى .. انتى غير قولى لخوك تبى تتريضى .. وهوا اصلا قلبه عليك غليل ... تى والله مايطلق عليك الا الكلب متعه الا ورا جنان .. وعاد انتى خوديها كل يوم 10 لفات فى جنان واجرى بجهد عاد ليكرش فيك ..
ياسمين ... تتسهوكى انتى ياما ؟؟
امها .. ههههههههههه ياهى شن بنديرلك يابنتى ؟؟
ياسمبين ... نبى سير ؟؟ مادخنيش نبى سير .. خير بنت خالتى نجلاء امها مدايرتلها واحد ...
امها .... هديكا بوها عنيده يابنتى قادر يجيبلها الاخضر واليابس .. لكن انتى الله غالب بوك مات وماخلنا الا الفقر والديون الا مغرقين شوشتنا .. وحتى خوك حاله واقف وايد قدام وايد تالى .... يالله دوريلك انتى خدمه بدل تقعميزة هالحوش ونشاف انتى وخوك زى ناقر ونقير ... واصرفى على روحك وساعدى ميمتك ..
ياسمين .... يامااااااااااااااا ياماااااااااااا توا الا يسمع انى رح نخدم يقول خدمه مقطعه بعضها .... قداش لفيت ودوت ومالقيتش حد يخدمنى ..... علاش لانى سمينه ... كان ضعيفه ومتكمه ومطلعه هديكا القصه ومدايره روج تلاته كيلو ومستكه والكعب تقول زليزه .. راهو حصلت خدمه من قبل مانتخرج .. ونبى ماتفكرنيش ترا ونحلف مانى ضاعفتها .. راهو قلبى معبى ...
امها .... لا لا سلم بنيتى ... اضعفى ونخطبى وشوفى نصيبك راكم والله حمل تقيل عليا وانى بروحى والعمر الا مشى منه اكتر من الا قاعد .. ومانبيش نموت وقبرى يقعد مشقوق عليك ..
ياسمين .. ماتخافيش ياما كانا بتموتى كلمينى قبلها بس .. ههههه وانى ناخدلك دورة تك واندو .. وطق طق على شدوق احمد ... تى والله مانخليه الا زى هديكا اتر الحكيم تحت رجليا فى مسلسل نحن لانزرع شوك ..
امها .... هااااااد مامازال ... والله دنيا جابت ماعندها ... نحسابه بتقولى بعد عمر طويل ياما .. ربى يخليك لينا يماما... قالتلى كان بتموتى كلمينى قبلها ...
ياسمين .... خيرك تعفلقتى ؟؟ يالله مش مشكله كان ماعندكش رصيد حتى رنيلى وانى نعاودلك ... عاد كيف انتى نبع حنان .... ها شوفى رح نغنيلك ها ...
امها .... لا تربحى فى طولك فى عرضك لا .. الحوش يبى صيانه ومانبيش نموت وانى ناقصه عمر ...لما ينهد فوقنا
يايسمين .... ااااااااااااااااااااااااااااااااااااااااااااااااامى ترررررررراررررر تما ااااااااااااااامى لحد اخر يوم فى عمرررررررررررررررررررررررررررررررررررررررى ... اااااااااااااااااااااااااااااااااااااااامى ..
امها ... خلاااااص خلاص تربحى فى طولك عرفت انك بنتى وانى امك .. ولقيتنى فى مطبخ ... تربحى يابنتى نقصى صوتك وانتى تقول نجبتى فى ليلة الغاره .. فكينى سلم بنيتى .. توا يسمعك خوك ويدرلنا مشكله ..
ياسمين << استمخت فى الغناء >> بعد الا عملتييييييييه .. ترارتر اعمل ايه يوم فى الاوصلتنى ليييييييه << مع شبحت الخنس هديكا .. لانا تدكرت منها الفشايخ الا تأكل فيهم بس >>
وهنا على خشت احمد ....
احمد .... ياما من البقر الا بتنعر هنا ؟؟ شنى بقرة جيرنا نطلقت عندنا ...
ياسمين << تشبحله وتتمتم فى قلبها >> نتكلم لا ... نفنه .لا ... نعفس على رقبنه .. لا لا لا لا أميرررررررررررررررر <3
وهنا ياسمين انقلبت شبحتها بطريقه وديه لاحمد وقالتله ..
ياسمين ... احمد <3 <3 <3 بغض النظر على البقره الا بتنعر مبكرى ... انى نحببببك .. وانت احلى اخ فى دنيا .... << ترطب فى الجو >>
احمد ... تى حولى مرض وانتى حتى رقه مش ماشيه معاك .. ومن الاخير ماعنديش رصيد .. طيرى هيا ... اى يامام ديرى القهوه لبين مامشيت للمحل وجبت بشكوط ونجى ... توا معقوله القهوه بتنحط هكى جاف يابنبع الحنان ؟؟
امه ... الله غالب ياولدى والله ماعندنا حاجه فى الحوش والشهر فى نص .. وانت عارف معاش مايصبرش حتى لنص شهر....
احمد .... باهى باهى ياما ... انى اليوم اصلا رح نلمحله بالك نحصل عنده خدمه .. ونساعدك بيها فى مصروف الحوش .. وكيف نوكل البقره هيا .. الا قريب كانا جاعت تاكلنا ....
وهنا ياسمين طلعولها قرووووون .. وشبحتله شبحت كره وبغض واستحقار ... ولولا انها حاسبه للغزال المصور قدر لكان احمد توا فى عداد الاموات ....
طلع احمد للمحل .. وهيا طلعت للجنان ... واول ماطلعت خطرلها فكره فى دماغها مجنونه ... فاوقفت جنب روشن ... وخدت تلاته صناديق مشروب وحطتهم فوق بعض ... وركبت عليهم بشووووووووى .... باش تكبه عليه .... واول ماحطت ايدها على روشن وشافته منزل راسه ويبربش فى نقاله ... ومن كترة فرحه وصدمه والحب وكل مشاعر الا اختلطت عليها .... حطت تقلها كله على صندوق ونهتك بيها ونقلبت من فوق ...
والنتيجه من هالشى .. امير اسمع بمبلة غاز طاحت فاطلع يجرى وفتح الباب ... واول ماشاف ياسمين مبزوقه على ظهرها وتحك فى مكان الطيحه وتشبحله ووعلامات صدمه كلهم فوق وجهها ... قاللها ....
يتبع ....