احبك ولكن ... هل ساتحبنى عندما ترانى

8

احبك ولكن هل ستحبنى عندما ترانى💫💑

الحلقه التامنه..

احمد ... ياسمين .. فى منى تكلمى ؟؟
ياسمن .. شن دخلك انت ؟؟ نكلم فى منى ... فى شى ؟؟
احمد .. هاتى تلفونك شوى بنبعتله شوية حاجات قبل ماندير سفت وير للجهاز ...
ياسمين ... نبيه ... ومش فاضيه ...
احمد ... تى هاتى عمه الجهاز وانتى كحته << وخدى الجهاز فى ايده وفى لحظه هيا اتصل امير ...
احمد .... اها فى حد يتصل بيك ... شن مكتوووووب ؟ حتى انجليزيتك مكعفصه ...
ياسمين .. هات تلفون هاااااااااات .... دقيقه بس منى
احمد ..... منى هادى اااا ميررره ... من اميره هادى ؟؟
ياسمين ... هات تلفون انت الا جاهل وتفك فى خط ... يمااااااا قوليله يجيب التلفون ....
استمرت العركه بين ياسمين واحمد ... واحمد كان غرضه يستفزها ويحرق دمها مش اكتر ... اما ياسمين فكان قلبها قريب يوقف منها برغم انا كانت مسجلاته بالانجليزى اميره ... الا انا خافت خوها البارد يفتح الخط وتنفضح من كل نواحى ..... وبس الا صار .... انا ياسمين خدت منه تلفون وقاللها ...
احمد .... ردى ؟؟ وخيرك متزوغبه هكى وراكبك ميتين عفريت من اول ماشرين تلفون .... ررررررردى والا قسما بالله نرد انى ....

وهنا شافتله ياسمين شوى وايديها يرعشو والدم يتخبط فيهم وبعدين شافت لتلفون وفتحت الخط وقالت ....
ياسمين .... الوو
امير ..... ايوااااااا
ياسمين ... اهلين ... اهلين ... اميره .. خوى توا جنبى نكلمك بعدين ... سلام ... << وسكرة >>
احمد .... هاتى تلفون نبى نسمع صوتها ... هااااااااااااااااااااااتى ..
ياسمين ..... بنت سكرت وتحشمت منك ... والله انت ماتتحشم الله ....
احمد .... تى قسما بالله لو ماتتصلى توا وتسمعينى صوتها الا مانقتلك اليوم ....
وهنا فجاه شرين تلفون احمد ... فاسكت شوى وقعد يشبحلها وبعدين طلع تلفون من جيبه ولقى امير يتصل ... فاقالله....
احمد ..... تى وحق ربى مارحمك الا صاحبى ... دقيقه بس نشوف شن يبى ونوليلك ... << وفتح الخط وقال >>
احمد ... اه امير ... شن اخبارك ؟؟ تبنى توا ؟؟ تى كيف ياراجل عيب ...10 دقايق وتكون فم الحوش ... باهى باهى نغير حوايجى وتلاقانى فم الباب ... << وسكر >>
احمد ... تى وحق ربى مارحمك الا صاحبى بس .... وفى الليل رح نرجعلك ومش رح نفوته موضوع ..
ياسمين ... باااااااااااااااااااه اعلى مافى خيلك ارقاه ... برا طير لصاحبك توا هيا ... ايوا منى ...
وهنا شبحلها شبحت توا تشوفى بعدين وقربع الباب برجله وطلع ..
ياسمين ... اااااااااااااااااااااااااااااه قلبى طاح يااااااااامنى ... عطينى شوية كسبر ...
منى ..... حى علييييييييك قسما بالله انى هنا قلبى يرعش .. وانتى تديرى فى خير ... بس نبى نقولك شى ... علاش امير توا بدات اتصل بيه ؟؟
ياسمين .... مش عارفه .. ربك شورا بعته للموقف فى وقت مناسب ...
منى ..... والله للحظه حسيت انا عرفك انك اخت احمد ...
ياسمين .. مصحك انتى منين بيعرف غبااااااااااااااااااااااء .....
منى .... اى صح واصلا منين بيخطرله .. يالله مهم خودى رقمه وكل رسائله امسحيهم ... وسجلى على رقمى انى اميره ... باش كان قالك اتصلى بيه رقم .. نرد عليك انى <3
ياسمين .... هههههههههههه ياشيطانه والله الا طلعتى خبره ...
منى ... هههههههههه من العمد ه الا عندى خلانى خبره فى كل مواقف ...
ياسمين .... اى والله الا عندك يقول لشيطان حول وانى نقعمز مكانك ... هدا علاش انتى طالعه خبره .. من كترة ماتمقرستى على ايده ههههههههه
منى ....ههههههههه مهم كيف بديرى بكرا فى ناس الا بيجوك ؟؟
ياسمين .... مش عارفه الحق امى عالقه فيا بالعرض وقالتلى شوفيهم ... وانى والله حاليا مفى بالى لازواج ولا تنفقى لاكن ماعندى شن بنقولهم ... قرايه وخديت شهاده .... وخدمه ونخدم .. وشن مازال تانى ...
منى ..... اطلعيلهم ... والله مرات الولد وماليه يعجبوك ....
ياسمين .... انى بنطلع باش نسكت امى بس .. لكن يعجبنى او لا فاهدا شى انتى عرفتيه مسبقا .... اميرى تم اميرى وبس وباقى خس <3
منى ..... اااااااااااااااه ياربى ... انتى والله ماترتحى لين .. تاكلى على راسك ويضربك الحيط وبعدين تقولى اى صح وعندك الحق
ياسمين ... ااااااااااااااااااااااااه جعااااااااااااااااااااانه ...
منى .... هههههههههه مرض حسستنى انك خروف جعان ومطلوق ...
ياسمين ..... تعرفى المره هادى بجد باديه بقوه واندفاع وتوا تشوفى ...
منى .....هاتخسى يابكبوزه وهاتبقى موزه ههههههههههه + 99.9 مصاريف شحن ...
ياسمين ..... وووووووووووه مبردك ههههههههه برى برى بنخش نرقد قبل مايروح ماوكلى هدكا ....
منى ..... انتى قوليله منى بس تعرفى كيف يولى <3 روضيه بااسمى بس
ياسمين .... هههههههههه عندك تقه فى نفسك رهيبه جدا صراحه .... باااااااااااااى
منى ..... باى .....
تكت ياسمين على سرير .... وفجأه قعدت تفكر فى جملة منى شوى وبعدين بعتت لامير رساله وقالتله ...
ياسمين .... انت فاضى ؟؟
وهنا اتصل امير وقاللها
امير .... ايووووووا <3 شن اخبارك ؟؟ شنى كبسه مبكرى ؟؟
ياسمين ..... من جنبك توا ؟؟
امير .... وانتى كيف عرفتى ؟؟؟
ياسمين .... لا مجرد سؤال بس ...
امير .... اى معاى صاحبى ونزل يجيب فى قهوه ...
ياسمين ... اه .... وشن اسمه صاحبك ؟؟
امير ..... هههههههههه احمد اسمه <3 شن بديتى تغارى حتى من صحابى ولا شن ؟؟
ياسمين ... مصحك ... على اساس انت بالنسبالى شن يعنى ؟؟؟ قصدى انت صديق بالنسبه ليا علاش بنغار عليك ..
امير .... اهوا جى خلاص .. وانى قتلك مانحبش نكلم بنت قدام صحابى مش يادابك لو كانت ياسمينتى ...
ياسمين ..... اى اصلا انى عارفه ... هدا علاش اتصلت وانى مطمنه <3
امير ..... يابنت شن قصتك ؟؟ وشن الا خلاك تتأكدى انا جنبى ولد ؟؟
ياسمين .... << تزرطت وقالتله >> حى ماما تنادى توا سلاااام ..
امير .... استنى ... بعدين نقدر نتصل بيك ؟؟
ياسمين .... بعد ساعه 12 مانكلمش فى ولاد انى .... سلام ..
امير .... خلاص صبح استنى مكالمتى <3 سلام
وهنا .... خش احمد ولحق على جملته الاخيره فابناء عليه قاله ....
احمد ..... غير من هوا الا يستنى مكالمتك صبح بس ...
امير .... هههههههههههههه
احمد ..... شنى علقت صناره واخيرااااا
امير .... تحسابها سهله مالا ... بس بديت نرتاح شوى هههههههه <3
احمد ...... غير شن اسمها وامتى وكيف بالك عندها صاحبه تدبسنا فيها ...
امير ..... والله جابتها صدفه ... واسمها ..... حححححححححححى شوفته كيف خرط سياره << ونزل >>
ياحيوووووان ماتشوووووفش .... شنى عيونك نعمووووووو
وهنا نزل احمد وراه وقالله ...
احمد ..... خلاص خلاص ماصار شى ...
راجل .... شن حسك قولت ياطووووووووط ...
وخشت بعضها وخش ضرب والهبك والناس يحزو ....
وروح احمد ودماغه مدموغ ومحصل بونيه على عينه واول ماامه شافته قالتله ....
امه ..... حححححححححى عليا ... شن صار فيك ياوليدى ؟؟؟
احمد ..... تعاركت انى وولاد جو بيضربو صاحبى ...
ياسمين .... وانت تلقيت عليه ضرب ولاشنى هههههههههههه
احمد ... ها ها ها مبردك ... خشى لدار واقلبى وجهك ....
ياسمين ... انى كنت راقده يابابا لولا عيطت امك وتقربيعة باب .... تصبحى على خير ماما ..
وخشت ياسمين وسكرت على روحها دار ووللت لفرشها .... وفى اللحظه هيا قعدت تفكر .. كيف تطمن على امير ... من غير ماتحسسه انها مهتمه بيه او تخليه يشك .. وفى نفس الوقت مستحيل تقدر تعرف شى من احمد وبدات بعد الموقف الاصار الصبح لانه رح يشك طول .... فاغطت وجهها وقررت ترقد .. والا ربى كاتب بيه بيصير ...
رقدت ياسمين وفاتت الليله عليها كلها كاوبيس واحلام مزعجه جداااااا .. بسبب موقف خوها والا صار مع امير واحمد ... والخطاب الا جايين اليوم .... وفاقت على صوت منبه تلفون .. .. واول مافاقت خدت تلفون طول .. وقعدت تقلب فيه على امل انا تلقى امير متصل بيها فى الليل او صبح بكرى ... بس مالقت منه اى شى .. قعدت تستنى فى اتصاله من ساعه 7 وبعدها 7وخمسه وبعدها 7 وعشره ... لحد ماجت ساعه 7 وربع .. وامير ماتصلش زى ماقاللها ... فاناضت ... وخشت لتواليت وبعدها لبست حوايجها وطلعت مع خوها ....
واول ماوصلت للخدمه قعمزة على هدكا مكتب ... وقعدت بين فرز وطباعه وترجمه لحد ساعه 12 ظهر ... وماوقفتش الا على اتصال من مكتب امير ... على مكتب صفاء ويقوللها ...
امير .... صفاء ... هاتى الفايل متع شركه تركيه الا امس قتلك جهزيهم وتعالى ..
صفاء ... حاضر باش مهندش امير ....
وخدت ملف ومشت ... وياسمين دمعه قريب نزلت من عينها ... لانا ماكلفش نفسه يتصل او يطمن عليها طول الليل .امير .... صفاء ... هاتى الفايل متع شركه تركيه الا امس قتلك جهزيهم وتعالى ..
صفاء ... حاضر باش مهندش امير ....
وخدت ملف ومشت ... وياسمين دمعه قريب نزلت من عينها ... لانا ماكلفش نفسه يتصل او يطمن عليها طول الليل ... وتوا نادى على صفاء .. وسألت نفسها علاش مش هيا ... علاش مانادش عليها هيا ... مش هيا الا من حقها تطمن عليه وتشوفه ... مش واعدها انا يتصل بيها ويكلمها صبح ... وبعدين فاقت لنفسها .. وانا لعبه هيا الا لعبتها مش هوا ... وهيا بس الا تعرف انا ياسمين الا فى تلفون هيا نفسها ياسمين الا مقعمزه هنا ... وناضت بسرعه من المكتب ومشت لاول مكان فاضى ... واتصلت بى منى ..
ياسمين ... منى انى مقهوره ..
منى .. خيرررررك .. صبح يافتاح قولى حتى صباح الخير ..
ياسمين ... تصورى اليوم نادى على صفاء .... وكان يقدر ينادى عليا بدل ماينادى عليها ؟؟ بس نادها هيا ... وانى الا من امس كنت نتمنى نطمن عليه وحتى من ليلتى دبه ومش زى ناس ... وفى الاخير نادا على صفاء اليوم ..
منى ... اولا انتى بتهبلنى يابنت ؟؟؟ تى الولد كيف بيعرف انك انتى نفس الياسمنتين هههههههههه ... وعلى اى اساس بينادى عليك ويخليك ستيك متيك على مكتبه ؟؟ من ناحية الخبره وشغل اكيد صفاء اقدم منك وادرى منك ... وبالنسبه لشى تانى .. فاانتى ادرى ياياسمين .. انى مش رح نقولك ... ونصيحتى ليك ماتكدبيش الكدبه وتصدقيها ...
ياسمين ... خيرك انتى كلامك دفش هكى ... انى لاكدبت ولا صدقت .. بس نار راكبتنى ومش عارفه كيف نتصرف وكيف نطمن عليه وخاصة بعدما شفت احمد امس كيف صار معاه ...
منى .... خيره شن صار ؟؟ مش كان معاه ؟؟ شن تعاركو ؟؟
ياسمين .. مانعرفش بس قال فى ولاد بيضربو صاحبى ودافعت عليه .. وبعدها معاش كلمنى امير .. وانى ماقدرتش نتصل بيه ... وهوا قالى من قبلها بنتصل بيك صبح ومااتصلش ...
منى ... باهى اتصلى توا بيه ؟؟
ياسمين .... بطلى غباء .. وشن تبنى نقوله ؟؟
منى ..... قوليله صبح قتلى بنكلمك وماكلمتنيش وخفت تكون جاتك حمه بس ههههههههههههههه
ياسمين .... مبردك مش وقت برادتك .... توا يحسابنى غير راميه نفسى عليه وماصدقت ... .. لحظه لحظه .... منى انى مصدوووومه ..
منى ... خيررررك ؟؟
ياسمين ..... تصورى توا خطم من جنبى وماعبرنيش حتى حشره ولاقامنى من ارضى ... قصدى مصدوووومه ...
منى .... وشن متوقعه متلا <3 بيقولك ياسمينتى اهليييين تصوووررررر ى طالعه تهبببلى يوم <3 هههههههههه
ياسمين ..... بنبكى انى ... لهدرجه انى ماننشافش ؟؟ لو هوا مش قادرش يتقبلنى فى الواقع او حتى يعبرنى ... كيف رح نصارحه انى ؟؟
منى .... مش عارفه ياسمين ... لانى نصحتك من الاول ماتخشيش فى هالمهامع بس انتى ديرتيلى فيها قوية شكيمه ...
ياسمين ..... خلينى بالله عليك خلينى ... خلاص بنسكر انى توا ..حاسه روحى مخنوقه .... يالا سلام ....
رجعت ياسمين لمكتبها .... وكملت دوامها وماكمل لين قريب طلعت روحها .... وصممت انا المره هادى تروح على رجليها .... وبرغم انا مطر كانت تبشبش .... الا انها كان اصرارها انها تضعف اقوى من اى شى ... وبالمختصر كان هدفها من انها تروح على رجليها ... هوا املها فى انها تنقص وزن وتولى زى مايتخيل امير فيها <3
واول ماوصلت فم الباب الخارجى لشركه طلع امير قدامها .. وخطم من جنبها وركب سيارته وولعها وطلع ... ومن غير حتى مايشبحلها ... ووهيا كملت طريقها ... بملامح مبهمه .. لاقادره بيها تعاتب او تضايق او حتى تفهم شى .... وبس دموع ينزلو منها .. بدون اى شى يمنعهم ....
استمرت ياسمين .. بالمشى ... لحد ماوصلت نص طريق .. وفى لحظه الا وقفت فيها وتعبت شرين نقالها .... وهنا لقت امير يتصل ... وللحظه .. شافت لتلفونها شوى وبعدين سكرت عليه وحطاته فى شنطه وكملت طريقها ...
لحد ماوصلت للحوش ... واول ماوصلت للحوش فتحت الباب وخشت وهنا امها قالتلها ...
امها .... وصلتى تطيب فيك .... ساعه 4 ؟؟ وين كنتى وانتى طالعه من ساعه 3 ..
ياسمين ... جيت على رجليا .. بالك ربى ياخدى بسياره باهيه تمسحنى ونريحكم منى ... انى بنخش نرقد .. مانبى حد ينوضنى ..
امها ... شن تقولى انتى ؟؟ لا لا اكيد تنكتى ... تى وحق ربى كانا ماتخشيش للحمام وتديرى دوش .. وتواتى روحك وتجبدى شعرك لناس الا جاينك .. مانديرهالك الا عربيه ... ونادى عليك قدامهم هكى ...
ياسمين ..... والله يكون اريح .. بالك يتحشمو على وجههوهم ويروحو .. مبردهم زفت ..
امها ...خشى دوشى والبسى .... ناس ساعه تانيه ويكونو فم الحوش ....
ياسمين .... رح نطلع بس بعدين ماتلومنيش فى الا يصير ...
امها ... جربى تديرى هبالك .. تى والله حتى الخدم هالا نبطلك منها الله ....
خشت ياسمين لدار تسحن وتترد .. وبتموت من همها .. وكان لقت حد تانى غير امها راهى ردت فيه الغيظ ...
فتحت دولابها .. وطلعت قفطان بسيط نص ركبه اسود وشخشير لحمى وشبشب بسيط ونازك وحلو ... وخشت للحمام خدت دوش ... وجبدت شعرها .. وحطت شوى مي كاب ... ولبست حوايجها ... وماكملت كل شى وقعمزة على سرير لين شرين الحوش .... وفى نفس الوقت اتصل امير .... وكيف بترد عليه خشت امها لدار وقالتلها ...
امها .... ناس مقعمزين فى صالون .. فاحطى الشاهى على نار ووتى العصير
ياسمين ... اوك ماشى ..
طلعت امها من دار وياسمين خدت شهيق وزفير شوى .. بعدين شبحت لرقم امير كيف يتصل .. وتدكرت معاملته ليها مبكرى ... فاسكرت عليه تلفون ولوحته على سرير وطلعت وسكرت الباب وراها ...
يتبع ...

استنونا في الحلقه التاسعه🙈✋🏻