احبك ولكن ... هل ساتحبنى عندما ترانى

2

احبك ولكن .. هل ساتحبنى عندما تراني💫💑

الحلقه التانيه...

والنتيجه من هالشى .. امير اسمع بمبلة غاز طاحت فاطلع يجرى وفتح الباب ... واول ماشاف ياسمين
مبزوقه على ظهرها وتحك فى مكان الطيحه وتشبحله ووعلامات صدمه كلهم فوق وجهها ... قاللها ....
امير .... << قعد يشبحلها ومصدوم بعدين نزل عيونه وقاللها >> ياساتر ياساترياأختى ... ان شالله غير ماصارلك شى بس ..
ياسمين << بصوت رقيق >> لا لا ماصارلى شى اصلا كنت نمسح فى غبره بس ... <3 <3
امير ... ههههههه تمسحى فى غبره <3 ان شالله غير كملتى مسح <3
ياسمين .... ماهو انى نحب نظافه وخوى احمد يكرهها <3 فانمسح بدرقه عليه لما يبدا طالع <3 ومانندريش انا فى حد فى دار <3 سامحنى وبنمشى قبل مايجى <3 يالاسلام <3
ووناضت بسرعه ومشت .. ووهيا كيف بتمشى قاللها ...
امير ... تشرفنا <3 وانى اسمى امير .. وانتى ؟؟
وهنا ياسمين شبحتله بسرعه وضحكت وخشت تجرى لما سمعت باب الخارجى تصكر <3 وابتدت قصة الحب من هالطيحه <3 بس هل ياترى حب من طرف واحد ولا من طرفين ؟؟؟ اكيد رح نعرفو القدام <3

احمد .... امير خيرك واقف برا ؟؟ ان شالله خير ؟؟
امير ... لا لا غير سمعت رزمه برا .. .. يالاخلاص بنمشى انى توا وخلى بيناتنا الو ..
احمد ... تى شن تقول ياراجل .. والله اقل شى الاماتشرب القهوه قبل عندنا ..
امير ... ماشى خلاص .. غير بسرعه
احمد ... دقيقه بس .. نخش نجيب القهوه ونجى .. هيا تفضل للمربوعه
خش احمد للحوش يجرى واول ماخش لوح البشكوطى فى مطبخ وقال ...
احمد ... ياسسسسسسسمين ... اااااانتى يادباااااااابه تعااااااالى هنا .. تى وحق ربى الا مانقتلك غير يروح الولد بس ..
ياسمين ..<< فى داخلها >> حى عليا ... اكيد قااااااله .. نهاااااارى الاحرف انى غير شن درت انى بس .. << وبعدين قالتله << تقتتتتتتل عينك ياجرو ... تحسابها سايبه .. يومك وتانى مداير روحك راجل عليا .. بسبب وبدون سبب
احمد .... شووووفتيهاااا ياما البقررره هيا ....
امه .... هاك صفره ياوليدى واطلع بالله عليك ياسرنا من المشاكل ....
احمد .... قولها يطلع الولد بس ....
طلع احمد للولد وهوا عارف ومتيقن انا ياسمين هيا سبب ورا تبرزيمه الا سمعها امير .. لانا مش اول مره تقيد حوال صحابه ويشدها بجرم المشهود ...
بينما طلعت ياسمين من دارها بسرعه وعيونها ترقص من الفرحه <3 واول ماطلعت من دار قعمزة جنب امها وقالتلها ..
ياسمين ... يما .. نبى نطلب منك طلب <3
امها .. خير ياطير ؟؟ انتى اصلا ماتجى من تالاك وتزغرط ... ياسر خوك كيف كان مداير عرس بلا دربوكه بسببك ... انى اصلا مانموت الا مجلوطه فى جرة دعاويكم .. ولا انتى تبى تكبرى ولاهوا يبى يجط عقلها فى راسه ...
ياسمين ... نبع الحنان نبى نطلب منك طلب <3
امها .. خلصى شن فى .. ؟؟
ياسمين ..... مش خالتى نعيمه القرجه .. هديكا ام لسان طويل ..
امها .. والله مافى اطول من لسانك .. اختصرى خيرها ..
ياسمين ... <3 <3 مش مره سلفتيها 30 جنى ومعاش بت تردهملك ؟؟
امها ... وشن مطلوب ؟؟
ياسمين ... نبى نمشى توا ناخدهم منها ...
امها ... هههههههه كانش تاخدلك هيا لسانك طويل هوا ممكن .. اما انها ترجعهملك فا فى شك ..
ياسمين ... خلاص خليها عليا انتى بس <3 وخلينى نطلق العنان ونمشيلها توا ...
امها ... توااااااا ؟؟ نهارك اسود تبى خوك يقتلك امالا ... شن تبى فيهم 30 فى هالليل ...
ياسمين ... بنمشى لدكتور عبد القادر يشكرو فيه وقالو دكتور مشهور وممتاز .. متع ريجيم ...
امها ... هههههههه حلم جعان عيش ... انتى غير خشى فى سريب دكاتره وتوا تضعفى .. تى برى اربطى بطنك بشاربه وهاتى نقنطهالك وانتى تضعفى يابنتى .. وخودى الكلام صح منى وفكيك من سريب دكاتره الا ماهمهم غير يمصو فلوس سمين بس ..
ياسمين ... انى نبيهم يمصو فلوسى .. مهم نضعف ... ونبى ونبى خلينى نمشى والله مانعطل ..
امها .. برى وكانا تلاقيتى مع خوك انى مادخلنيش فيكم ... اصلا انتم خديتم على العار ... ناس قبل يقولو عيله وخالها ميلاد ... توا بيقولو عيله وبنتهم ياسمين ..
ياسمين .... ههههههه نبع الحنان <3 خمسه دقايق بس وصدقينى رح تلقى 30 فى جيبى <3 ادعيلى انتى بس <3 .. عبايتى وين ؟؟
امها .. هونى تلقيها منشوره على حبل ...
طلعت ياسمين تجرى بالبيجامه ... ولبست عبايتها وحطت شبشب زيكو فى رجلها .. وانطلقت ...
وصلت لحوش خالتها نعيمه .. وهيا تفكر .. شن يتقول شن يتقول ... وبعدها خطرتلها فى بالها فكره ... وشرينت على الباب .. واول مافتحتلها نعيمه .. قالتلها ...
جارتهم نعيمه .... منى ياسمين عصبانه .. اهلن اهلن .. خير ان شالله ؟؟
ياسمين ... << قالت فى داخلها عصبانه فى عينك ياقرجه >> خالتى نهى قاعده ؟؟
خالتها ... نهى مش فاضيه .. كانا فى قوليلى نقولهولها
ياسمين << فى داخلها اى اى مش منها من 6 ولاد الا تكلم فيهم >> ... اى اى غير جيت بنباركلها على خطبتها ..
نعيمه .. اما خطبه ؟؟
ياسمين .... خطيبها الا امس حطها بسيارته فى نص شارعنا ... مش خطيبها هدكا ؟؟ حى حى وانى هدرزت على خوى احمد وقولتله واكيد توا بيقولها لولدك حسام ..
نعيمه ... ياحليلى حىىىىىىىىىىىىىىى والله يانهى الاما نعضك بسنووووووونى غير نخش بس ...
ياسمين ... مالا نخليك خالتى تعضى نهى براحتك .. خلى نمشى نلحق احمد ونقوله مش خطيبها قبل مايقول لحسام ويقتلها ...
نعيمه .. بنيتى استنى .. بالله على رحمة ولديك كلمى احمد مايجيبش سيره لحسام .. ووالله مهبول ويقتلها ...
ياسمين ... << شبحة شيطانيه وتخنيسة سمونيه >> والله ياخالتى نحاول .. غير مش عارفه شن بنقولك قبل ماننسى .. والله موضوع نهى وسياره خدالى تفكيرى .. ايوااااااا امى قالتلك حصلتيهم 30 جنى ؟؟ غير محتاجتهم ..
نعيمه .. ااااه .. والله نصيبك ياعسوله كيف جتنى جمعيه اليوم .. اى اى دقيقه بس نجيبهملك ونجى ... << وخشت >>
ياسمين .. << تتمتم فى داخلها >> اى اى عسوله صدقتك .. مبكرى عصابنه وتوا عسوله .. ناس تخاف ماتختشيش ... 4 شهور مشيطه ريق امى على 30 جنى ياظالمه ووتوا نزل عليك مال قارون .. والله ماتبو الا هكى ...
خدت ياسمين الفلوس وروحت .. وكيف كانت قريبه من الحوش .. شافت امير يركب فى سيارته واحمد سكر الباب وخش .... فاقعدت تمشى وتشبحله ... وحاولت تسرع فى خطواتها باش يشوفها ويقوللها اى شى .. بس هوا شافها وركب سيارته ومشى بدون حتى مايعطيها اقل اهتمام ... واول ماوصلت فم الباب متعهم .. فتحت الباب وخشت ... وردت عبايتها فوق الحبل وخشت ... واول ماشافها احمد قاللها ...
احمد ... تعالى هنا ... وين كنتى ؟؟
ياسمين ... علااااااش تحقيق ؟؟ كنت نحط للكلب الماكله لعل يتمر فيه ومايطلعش زيك ....
احمد .... شن حسك قولتى ؟؟؟ ها يما شوفتتتتتتتى وبعدين قولى انى الا عقلى صغير .. تعالى تعالى اصلا انتى لحمك يأكل فيك ...
امه .... والله ماك ضاربها خلاص ... وانتى اقلبى وجهك وخشى لدار وريحونى .. خير والله مانلبس الا جبتى ونطلع من الحوش ونسيبهولكم ....
ياسمين .... انى قالبه وجهى لدار واقعدو فيها ...
خشت ياسمين لدار وسكرتها عليها وبعدين قامت تلفونها ودارت رنه لصاحبتها الانتم من ايام الابتدائى <3 منى <3 ومافاتتش خمسه دقايق لين عاودتلها ...
ياسمين ... اهلييين شن اخبارك <3 بنقولك على حاجه مهمه صارت اليوم  <3
منى ... وحتى انى بنقولك على شى زفت صار معاى اليوم ..بس قولى انتى قبل .. شن فى ؟؟
ياسمين ... واخيراااااااا يامنى لقيت فارس احلامى <3 واخيراااااا لقيت شخص الا طول عمرى حلمت بيه <3 والاحلى من هكى انا حتى هوا نحس فيه مبادلنى نفس الشعور ... ومعجب بيا ..
منى .. اها وكيف عرفتى ؟؟
وهنا ياسمين حكتلها كل الا صار والفرحه والحب كان موجود فى كل كلمه كانت تحسها ..
بس منى كسرتلها كل احلامها بكلمة ...
منى .. اها وبعدين كملتى ؟؟
ياسمين .. معقوله بعد الا قولتهولك بتقوليلى اها وبعدين ؟؟
منى .. وشن تبنى نقولك ياسمين ؟؟
ياسمين .. قوليلى الف مبروك .. قوليلى نحس رح يرجع لخوك ويتسبل فى اقرب وقت باش يكلمك .. مش تسكتى وخلاص
منى .. ياسمين .. بالله انى جوى خى ومانبيش ناخد معاك ونعطى فى الحكى لانا نعرف وانى جوى مش حلو .. اسلوبى دفش ..
ياسمن .. شن فى تكلمى ؟
منى ... بالله قداش مره يتعاود معاك هالسيناريو هوا .. وقداش مره حكينا فى موضوع هوا ..
ياسمين ... انتى علاش تقولى هكى ؟؟ انتى ماريتيشى كيف شبحلى ..
منى .... ياسمين ... انتى تختارى فى الحلول السهله الا تحبى تقنعى نفسك بيها بس ... برى بدل ماتعشمى نفسك بموضوع انتى بروحك عارفه نهايته .. برى 👇🏻برى بدل ماتعشمى نفسك بموضوع انتى بروحك عارفه نهايته .. برى اضعفى ... وصدقينى بعدها رح تلقى نفسك ... ورح تلقى وقتها بالفعل الشخص الا يحبك ...
ياسمين .... انى مانبيش نضعف ومانبيش ندير ريجيم ماااااشى انى نبى نقعد سمينه .. وانى عاجبتنى روحى وعندى تقه فى نفسى ... وطز فى الكل .. والا يبنى يرضى بيا زى ماانى ومش مستعده ننقص باش ينعجب بيا هوا ... ونقولك شى تفكيرك تافه .. علاش انتى متصوره انا كل الرجاله زى بعض ... فى رجاله يحبو شخصية مرأه وويجبو بنت سمينه .. وانى متأكد هانا امير واحد منهم .. ورح نتبتلك هالشى ..
منى ... ياسمين .. انى كلامى اصلا عمرك ماخديتى بيه وديما ماشيه براسك فالدلك معاش تطلبى منى اى نصيحه بالله عليك .. لانى مش رح نشوفك تغلطى ونسكت ...
وهنا ياسمين .. سكتت شوى وبعدين انهارات بالبكى ... لانا كانت عارفه فى صميم نفسها انها مهما حاولت تقنع نفسها انا شكل مش اهم شى عند راجل ... رح تحس انا هيا تكدب على نفسها وحتى لو قدرت تكدب على نفسها مش رح تقدر تكدب على صحتها .. الا مجرد ماتقعمز او توقف ... الم ركبت رجليها يدكرها هيا قداش سمينه ....
صاد صمت بين منى وياسمين ... وبعدين منى كسرت صمت هوا وقالتلها ...
منى .. ياسمين .. حبيبتى ... والله والله انتى غزاله وتهبلى .. يعنى لو بس تضعفى .. والله مش امير زفت هوا .. تى اكبر ملك جمال واقدع ولد فيهم لما يقمزلك ركبه ونص ويطلب منك توافقى تتزوجيه بس ... ياسو .. انى والله خايفه عليك .. ياسيدى انى مستعده نوقف معاك .. والا تبيه انى فيه ..
ياسمين ... انى نبى نطلب منك طلب ..... نبيك بكرا ترفعينى لدكتور عبد القادرمتع تخسيس ..
منى .... اوك من عيونى ... بكرا من ساعه 9 صبح نكون فم حوشكم ماشى ... ايواااا هكى ياسمين صاحبتى انى ... مش تقنعى نفسك بالخزعبلات الزايده <3
ياسمين ... باهى خلاص فهمت وانتى علقتى ؟؟ ... وانتى خيرك شن صار معاك ؟؟
منى .... تعاركت انى ومقدام ....
ياسمين ..... اااااااااااااااااااااااااى درهتولى كبدى .... وماتقوليلش تعالى حلى مشكلتنا وخشى وسيط ...
منى .... هوا انى عندى غيرك ياسو ... نبيك تكلميه وتفهمى شياطينه خيرهم ؟؟
ياسمين .... خيرك شن فى مره هادى ؟؟
منى .. سبب كيف نخش عليك مرتين ونلاقاك انتظار .....
بدت منى تحكى لياسمين على مشاكلها .... ومنى كالعاده سكرت منها وكلمت مقدام وفهمت منه سبب وقنعاته .... وبعدها اتصلت بيها منى وبدت تحكيلها فى شوط الرضى والغزل والكلا الحلو الا يقوللها فيها .... وكانت منى تحكيلها من باب الصدقه وبكل برئه ... وماكنتش تعرف انا ياسمين تنجرح وتتألم ... لانها لطالما كانت تتمنى تعيش نفس احساسها ... وتتمنى تلقى شخص يهتم بزعلها ويغار عليها ويهبل لو لقى تلفونها مشغول او انتظار ويركبه ستين عفريت لو لقى تلفونها مقفل .... ببساطه كانت حاسه بفراغ فى حياتها كبير جداااااا ووكان الشى الا ممكن يملى هالفراغ هوا الحب ... الحب الا ياسمين كانت تبحت عليه مع اى شخص تنعجب بيه .... بس هالاعجب عمره ماكتمل بالحب ... ولو ابتدى رح يكون مجرد صداقه بس ...
سكرت ياسمين تلفون من منى وغمضت عيونها ورقدت ... وكان كل تفكيرها فى دكتور ... الا كانت حاسه وكأنه مارد سحرى ... الا بمجرد ماتخشله .... رح تطلع منه انجلينا جولى ..... رقدت ياسمين فى نوم عميق .... واول ماناضت استأدنت مع امها ومشت مع منى لدكتور ..... وأول مادرسو فم العياده .. حست بقلبها بيوقف منها وانها اقتربت من حلمها والا كانت تحلم بيه من وهيا فى الاعدادى ...
خشت لغرفة الانتظار وقعدت تستنى فى دورها لحد ماوصل فيها دور ... واول ماخشت كانت متوقعه انها رح تخش لدكتور ... كوكتيل ... دكتور تخسيس + دكتور نفسانى <3 + دكتور تجميل ... واول ماخشت وشافت لمكتبه ... ماكلفش نفسه يقيم عينه فى عينها وقعمزة وهنا قاللها ...
ياسمين ... اهلين دكتور .... انى جايتك وانتى املى الاخير وحابه نحكيل << وقاعده ماكملتش جملتها لين قاللها >>
دكتور .... اها اها الاسم والعمر وبعدها اوقفى على ميزان ....
وهنا ياسمين شبحتله شوى وبعدين قالتله ....
ياسمين .... اسمى ياسمين ... عمرى 22 سنه ...
<< وبعدها وقفت على ميزان وهنا السستر شافتلها وزنها وقالتله ...
سستر ..... 110 يادكتور ....
ياسمين ..... شن تقولى انتى ؟؟؟ كنت 95 انى لا لا اكيد ميزان فيه غلط ..
دكتور .... ياسمين ... فمك امتى بطل يأكل ؟؟ مافيش صح ؟؟ معناها مشكله فى فمك مش فى ميزان ... على عموم وزنك محتاج لعمليه جراحيه ... لانا وزنك يعتبر من الاوزان الكبيره ... بس على عموم رح نكتبلك ريجيم تمشى عليه وبعدين نشوفو ...
ياسمين .... اوك دكتور ..... بس نبى نقولك قبل انى فى حاجات مانحبش نأكلها ...
دكتور .... غير كانا سكتى .. موتى شهيده ... عارف عارف وكاتبلك كل شى ورا الورقه ....
ياسمين ... اوك ..... ممكن نسألك ... انى فى عاده عندى امساك ... وبعدين انى مانحبش نأكل كل يوم نفس الاكل ....
دكتور .... ياودى اعطى لنفسك وقت شوى تسكتى ... مش نقولك غير كان تسكتى تموتى شهيده ... اهو كيف كتبتلك على حبوب ... هادو حبوب وضيفتهم حرق دهون ويديروا مساك ... وبالنسبه للريجيم خليك عليه لمدة 3 اسابيع وتعالى ...
ياسمين .... بس دكتور انى << وقاعده ماكملتش جملتها لين قال >>
دكتور ..... بالله ياسستر سميه ناديلى على الحال الا بعدها .... الباين انا اليوم زحمه هلبه ... اها شن قولتى ياسمين ؟؟
ياسمين ... شى شى دكتور فى امان الله .....
طلعت ياسمين وخيبت الامل على ملامحها .... واول ماطلعت من الغرفه لاقتها منى بابتسامه عريضه .... وقالتلها ...
منى ..... شن صار معاك ؟؟
ياسمين .... دقيقه بس نخلص كشف ونجيك ....
وقفت ياسمين على ريسبشن وقالتلها ....
ياسمين ..... بكم الكشف اختى ؟؟
موظفه .... اول مره انت ؟؟
ياسمين .... اى ...
موظفه ...... 50 دينار .....
ياسمين ..... علاش 50 ؟؟؟؟ تى حتى الكلام خلاهولى فى رقبه وماكلمتاش ... انى ماعنديش الا 30 بس ..
وهنا جت منى تجرى وقالتلها ....
منى .... خلاص ياسمين ... انى نخلص باقى ... اركبى انتى فى سياره وتوا نلحقك ...
طلعت ياسمين من العياده وتتمتم وتقول ....
ياسمين .... علاش ياربى الناس سمان مهضوم حقهم ... مقاساتنا دبل سعر ... حتى علاجنا دبل سعر ... هوا احنا مكتوبلنا نعيشو طول عمرنا هكى .... علاش 50 .... وعلى اساس بنعطى 50 ... على وزنى الا طلعو هولى فى ميزانهم الخارب وقالك شنى 110 ....
منى .... خيرك تتمتمى بروحك ... شن فى ؟؟
ياسمين ...... بنعزمينى على سندوتش مقلوبه ولا لا ... اختصرى ...
منى ..... باهى لكن شن صار فى موضوع ريجيم ودكتور ومحاضره الا فلقتينى بيها صبح ...
ياسمين ..... خلااااااااص انى اقتنعت انى مش رح نضعف وربى كاتبلى نعيش هكى وانى راضيه بنصيبه .... ومعاش نبى نتزوج ونبى نأكل نأكل لين نمووووت ماشى .... ومعاش نبى حد يكلمنى فى هالموضوع ...
شبحت منى لياسمين وصدمه على وجهها وبعدين ولعت سيارتها ومشو ..... ووقفو على اول مطعم وفطرو منه وحطتها فى الحوش .....
وصلت ياسمين للحوش ورجل تالى ورجل القدام ..... وبعد ماانطفت نار الغضب حست بأاحساس الحيونه لانها ماقدرتش تتحكم فى غرائزها ... وفشلت زى كل مره فى انها تكون بنى ادمه وتعيش سنها زى اى بنت ....
خشت لدار نومها وتكت على سرير وقعدت تبكى تبكى لحد ماسمعت تلفون فى وسط الحوش يشرين ..... وهنا طلعت باش تشوف منى فالقت احمد ناسى تلفونه وطالع .... ولما شافت للرقم لقاته <3 امير <3 فا نقلب جوها 24 ساعه ... وقعدت تشوف لتلفون شى .... بعدين خشت لدار طول وخدت تلفونها وسجلت رقم ... وردت تلفون بسرعه وخشت دارها وسكرتها .... وبعدين قعدت تشوف لرقم شوى ... ومسحت دموعها .... وجتها رغبه قووووووويه جدا خلتها تقيم تلفون وتتصل .... ومافاقتش الا على تلفون يضبح .... واول ماجت بتسكر .... نفتح الخط وقال ...
امير <3 ..... الو ...
يتبع ....

استنونا في الحلقه التالته غدا انشاءلله 🙈🤚🏻