احبك ولكن ... هل ساتحبنى عندما ترانى

4

احبك ولكن .. هل ستحبنى عندما ترانى💫💑

الحلقه الرابعه..

نزلت ياسمين بسرعه وبدت تسخن فى العشى .. وبعدها بشوى خش احمد ورفع العشى .... وفى اللحظه هيا ... كان شيطان يوز فى راسها .. وكيف تضرب فى وجهها كفوف وماتبيش ... بس لاارديا ... قادها عقلها مجنون ... وطلعت لجنان وخدت قردل الميه ووقفت عليه وكبهت على روشن .... باش تشوف امير وردت فعله على عشى .... واوال ماركبت من روشن وقامت عينها عليهم لقتهم يتعشو ويضحكو ... وامير فى عز ضحكته جت عينها فى عينه .. فاقعد يشوفلها شوى بعدين غمزلها بعينه وابتسم ونزل عينه وكمل ماكلته .... وهنا ياسمين حمر وجهها ونزلت من فوق قردل لانها معاش حست حتى برجليها انا حاملينها ... وخشت بسرعه تجرى لغرفتها ... وقعمزة على سريرها ... ومعاش عرفت تضحك ولاتبكى .. تفرح ولاتخاف ... هل هوا هزى عليها .. او هوا مبادلها شعور .. او تفكيرها الباطن يوحيلها ورح ترجع وتوقف على كلام صاحبتها منى ... وهنا فكرت شوى ورنت لصاحبتها منى ... وكالعاده منى عاودتلها بس المره هادى على الارضى لانها كانت حاسه انا ياسمين عندها شن تحكى والموضوع طويل ... وسبب انا ياسمين ماترتاحش لين تختم موضوع بصدمه كبيره ليها .. بس ياترى هل هالموضوع رح ينتهى زى زى موضوع الا قبله وقبله ؟؟ اكيد رح نعرفو القدام ....
ياسمين ... الو ..
منى ... خيره صوتك هكى ؟؟ فى شى ؟؟
ياسمين ... نبى نقولك شى لكن ماتتعفلقيش لانى مش ناقصنى ...
منى .... ياسمين احكى لانى عندى احساس اتجاهك مشؤم .. شن فى ؟؟
ياسمين ... صبح كلمت امير فى تلفون ..
منى .. كيف يعنى ؟؟
ياسمين .. خديت رقمه من خوى وكلمته .. بس ماعرفش انى ياسمين .. درت روحى غالطه وخلاص
منى ... باه وشن صار ؟؟
ياسمين .. بعتلى بعدها رساله وقالى فيها لقيتى ملاك ولاندور معاك ..
منى .. منى ملاك وشن جيب ملاك فى نص .. فهمينى موضوع من الاول ...
ياسمين .. اوك ..
وبدت ياسمين تحكى لمنى شن صار معاها لحد لما كلمت احمد على خدمه معاه لحد موقف مبكرى ... وردت فعل منى كانت ..
ياسمين ... خيرك ساكته ؟؟ تكلمى ؟؟
منى .. شن تبنى نقولك ياسمين ؟؟ انتى اصلا لا شاورتنى ولامعدله على كلامى .. والباقى كل الا درتيه غلط فى غلط .. امعى حبيبتى .. مابنيا على باطل فاهو باطل ... وانتى الا ديرى فيه مجرد انك تأدى فى نفسك بس .. وصدقينى كلما تقربى منه اكتر تأدى فى نفسك اكتر ... والباين انا حتى هوا مش هوين .. ومافيش بنت تزرق من ايده ... انى ننصحك بعدى عليه وفوتيه .. وحتى خدمه فوتيها ... لانا الولد باين عليه والله ماهو هوين ..
ياسمين ... انتى علاش تدوى عليه هكى .. بالعكس الولد محترم وكويس وباين عليه ولد ناس ..
منى ... للاسف انا الولد واضح ملعب ومتع بنات .. ويعشم فيك ... بشبحات .. وحتى لما درتى روحك غلطتى فى تلفون مازرقتيش منه .. وباين عليه لسانه ينقط عسل وهدا نوع من الولاد والله وراسك الا خبررررررره وعارف شن يبى بزبط ..
ياسمين ... شن الحل يعنى ؟؟
منى .. فوتيه .. وحتى يبعتلك رساله معاش تردى عليه .. ومعاش تخليه يشوفك لما يجى لخوك ... ياسمين .. بعدى على امير .. الولد فلوس وجميل .. واى بنت تتمناه .. وباين عليه مش سهل ... والله والله فات فيك وحبيته وتعلقتى بيه مش رح تعرفى ترجعي ورح تندمى هلبه وتقولى ياريتنى سمعت كلام صاحبتى ..
ياسمين ... مش عارفه ... حاسه انى مرتاحتله .. ومعجبه بيه هلببه .. وبعدين انتى خيرك تتكلمى هكى .. علاش مايكونش من نصيبى .. انى فى شنى اقل من بنات ؟؟
منى .. شن يعنى يايسمين ؟؟
ياسمين ... مش حابه ننساه .. وحابه نكمل للاخير .. ومش رح نجى ولا نشكيلك بس بالله ماتتخليش عليا وماتزعليش منى .. وانى حابه نجرب فرصتى .. بالك يحبنى .. مرات يكون من نصيبى وانى متأكده لما يتعرف عليا فى تلفون ويحب شخصيتى .. رح يقدر يتجاوز شكلى .. وانى وعد منى ماهو يشوفنى لين انى نضعف و نولى خلال .. لانى مستحيل نخليه يشوفنى قبل سنه .. ونوعدك من بكرا رح ندير مستحيل انا نضعف .. وقبلها رح نخليه يحبنى بجنون .. وصدقينى رح نخليه يحبنى .. بس بالله عليك اوقفى معاى .. وماتحسسنيش انى ندير فى شى غلط ..
منى ... اوك ياسمين كملى .. بس تدكرى انى نصحتك .. وجربى حضك مرات على قولتك يكون من نصيبك بس حتى ولو كان من نصيبك فامش رح تحصليه بسهل صدقينى واحتمال تخسرى هلبه حاجات فى سبيل انه يكون ليك ..
ياسمين ... خلينى نجرب ... واول مانحس انا هوا مش ليا .. صدقينى رح نوخر ... بس ماتعكريش عليا فرحتى ..
منى ... ياسمين انتى متصله باش تبنى نسايرك ونقولك الا ديرى فيه صح .. اوك صح وانتى هكى تمام وان شالله يكون من نصيبك يارب ..
ياسمين ... منى خيرك انتى .. نقولك شى ماما تنادى فيا باش نغسل معايين نكلمك بعدين لما تروقى سلام ..
منى .. سلام ..
سكرت ياسمين سماعه ومشت للمطبخ وفتحت اغنية تامر حسنى << الله يباركلى فيها >> وبدت الاحلام ترتسم مع كل مشهد وكل لقطه .. وكل كلمه ... وكانت فى كل مشهد تتخيل فى نفسها مكان مى عزدين وامير فى مكان تامر حسنى .. على تقربيعات المعاين استمرة ياسمين فى دندين الاغنيه ..
<< سالت قلبى بيحبك اد ايه وقلى قلبى دا حب جديد عليك. الله يباركلى فيك يا اغلى من عنيا الله يخلينى ليك واجبلك الدنيا ديا الله الله يحميك حبيبى ياعمرى ويخليك ليا >>
وعلى خشت خوها احمد للمطبخ ...
احمد ... الله الله ... غير فهمينى بس شن قصتك يابنت .. تامر حسنى ووالله يباركلى فيك والجو الفايح ..
ياسمين .... ووووووووووووه ياعنى تلقو الواحد منكد تقولو وووه تلقوه سعيد تقولو وووه .. شن تبو يموووت .. مهم شن صار معاك .. ماتقوليش تعب الا تعبته مشى هباء منتورا هكى ...
احمد ... شن بنديرلك اصلا وجهك نحس ...
وهنا ياسمين حطت صونيه وتلفتتله .. وقالتله ..
ياسمين .... شن تقصد ؟؟ قصدك رفض ؟؟
احمد .... هههههههههههههه وافق ياغبيه وقال بعد بكرا تجى وتجيب ملفها معها وتخش على شؤن الموظفين وهوا يتملها وراقها وتستلم شغلها ...
ياسمين وامها .... روووووووووووووووووووووووووووووووووووووووووووووووووووووووووى .. امى واخيراااااا <3 واخير بنساعدك فى مصروف شوى .. والله فرحانه ياماما .. ربى يخليك ليا ياحمودى يااحلى اخ فى دنيا <3 <3
احمد ... خلاص خلاص بنبكى .. وانتى تعرفينى انى مانتحملش نشوفك بالرقه هيا ... ارجعى ارجعى زى قبل ياام لسان طويل ...
ياسمين ... هههههههههههههههههههههه شن العشى ؟؟
احمد .. ااااااه زى عسل سلم ايديك ... والله راجل كلى اكتر منى تقول عمره ماكلى ماكله .. وقالى قول للى طيب الاكل تسلم ايديه <3
ياسمين .... حقاااا قصدك هوا قالك الكلام هوا عليا انى <3 <3 والله فرحتنى هلببببببه << وبدو عيونها يالمعو زى رسوم متحركه <3
احمد .... وانتى علاش هامك موضوع هلبببببه ؟؟ شنى مالا تعرفيه الولد وانى مانعرفش ؟؟ امشى مشيتك ..
ياسمين << وهنا تزرطت وقالتله>> تى خيرك انت نفسيتك سوس .. بس انى فرحانه انا فى حد نعجب بأكلى غيرك <3 بالك فى يوم من الايام نكون شيف <3
احمد .... اها شيف .. ان شالله ياياسمين ومايكونش الا فى بالى بس ..
ياسمين ... اوووووووف باهى باهى خلاص .. خلينى توا نغسل معاين لانى تعبانه هلبببببه ..
احمد .. حتى انى بنرقد هيا تصبحو على خير <3
امها.. خلاص كملى مطبخ سلم بنيتى واطفى ضى ... وارقدى ...
ياسمين ... اوك بس ماما بنقولك شى بكرا انى بنطلع انى ومنى ..
امها .. وين بتطلعى ؟؟
ياسمين ... بنتسلف منها 100 وبناخد لبستين نمشى بيهم للخدمه .. اكيد انتى تعرفى انا ماعنديش لبس ..
امها ... ديرى الا ريحك .. ت ع خ ..
كملت ياسمين المطبخ وكلمت منى واتفقت معاها .. وخشت رقدت <3 وفاتت الليله على ياسمين .. وتقريبا مارقدتش من تفكير ... وقعدت كل شوى تشوف للجهاز بالك توصل رساله من امير ومافيش اصعب من انتظار شخص هوا ممكن مايكونش حاطك فى باله ... وانت تستنى فيه وتعد توانى واللحظات باش تشوف منه مسج بس ولو حتى فاضى <3
ناضت ياسمين من نوم على صوت امها تنادى فيها على فطور ... وبعد مافطرت وضمت الحوش وطيبت الغدى وغسلت معايين ... بدلت حوايجها وخطمت عليها منى وطلعو <3 واول ماركبت للسياره منى قالتلها ....
منى .... شن اخبارك اليوم ؟؟
ياسمين ... ماشى امس مارقدتش كويس
منى .... كلامك امس ولابعتلك رساله ؟؟
ياسمين ... لا لا لاهدا ولاداك ...
منى ... اووك .. وين تبى تمشى ؟؟؟
ياسمين .. مش عارفه الحق .. ومانبيش نلود نلود زى كل مره ومانلقى شى .. ونروح نبكى .. لانى بجد محتاجه نشرى لبسه قنينه يشوفنى بيها ..
منى .. فى شارع اسمه 👇🏻منى .. فى شارع اسمه شارع الكويت فيه لبس حلو هلبه ويشكرو فيه .. هوا شارع تقريبا خاص بالسمان ..
ياسمين ... باهى ظرورى توقضينى انى سمينه خلاص ارفعينى طول ... لانى مانبيش نتأخر ...
مشت ياسمين ومنى لشارع الكويت ... واضطرت تاخد 300 بدل 100 من منى نظرا انا لبس سمان اغلى من لبس نيكول كدمن بحد داتها ... وانك تاخدى لبسه قنينه وتلتبس .. يعنى تحطى قريشاتك كاملات بكل احترامك <3 وبعد ماكملو .. عزمتها منى على بيتزا هاوس .. وتعشو وروحو ... واول ماوصلو للحوش وورت لامها لبسه ....... امها قالتلها ...
امها ... ماشالله يابنتى والله اللبسه مرشوقه عليك رشق ... بس نحس فيها غاليه ... قداش خديتى من صاحبتك ؟؟
ياسمين .... خديت منها 100 ورح نردهالها بعون الله <3 مهم خلاص انى توا بنرقد وبكرا بالله عليك نوضينى لما بتمشى للمدرسه باش احمد يحطنى ..
امها ... ماشى ماشى وانتى عدلى منبه ووتى ملفك ... وصلى العشى بنيتى قبل ماترقدى حتى ربى يفتحها عليك ..
ياسمين .. اكيد ياما انى من عندى بعد ربى غيره .. بس انتى ادعيلى بس ..
امها .... يارررررب يابنيتى ربى يفتحها فى وجهك ويطيحك فى ولد الحلال ياررررب <3
ياسمين ... ياررررب وبدات دعوه الاخيره هيا بقوه اطلبيها يما ونبى ههههههه <3 هيا تصبحى على خير <3
امها ... هههههه وانتى من اهلو ...
خشت ياسمين لدار وبدلت حوايجها وحطت لبستها على كرسى .. وصلت العشى وطفت ضى وحطت تلفونها تحت مخدتها ورقدت .... ومع ساعه 12فى الليل تحديدا حست ياسمين بهزة تلفونها تحت المخده .. فاخدت تلفونها وهيا شارده بنوم وفتحت الخط وعيونها مغمضات وبدون ماتشوف حتى لتلفون وقالت
ياسمين << بصوت هادى وناعس >> الووووو

يتبع ...

استنونا في الحلقه الخامسه 🙈🤚🏻