احبك ولكن ... هل ساتحبنى عندما ترانى

7

احبك ولكن .. هل ستحبنى عندما ترانى💫💑

الحلقه السابعه...

ياسمين .. بجددددددد حى عليا حى شن درت << ورجعت تبكى >> انى غبيه .. ااااااااااااااااااااااه شن بندير ... استنى استنى منى مصدووووووومه .. ترا قولى من خش عليا انتظار ...
منى ... منى ؟؟ قوووووولى ؟؟ ماتقوليش خوك احمد ؟؟
ياسمين ... منى ياريت .... تراق ولى منو ؟؟
منى ..... اختصرى يادراه ..... درهتيلى كبدى ....

ياسمين .... اميييييير حى عليا شكله فتح تلفون ولقى مكالمات منى وبيتصل وبيمسح بيا ....
منى ..... خليك خليك توا لما يلاقاك انتظار توا يقول عندك واحد اكيد ويفوتك ...
ياسمين ... حقاااااا ...
منى ..... ااااااااااااااااه رصيدى يسفر خلاص بيتسكر .. وجهك نحس يابنت ..
وتسكر الخط ... وعاود امير الاتصال ......
وهنا شبحت للتلفون شوى وبعدين فتحت الخط وقالتله ...
ياسمين ..... ايوا .... ممكن نقولك شى وبعدين تكلم ...
امير .... انى الا بنقولك شى وبعدين بنتفجر عليك .... انتى ومنى كنتى انتظار توااا ؟؟
ياسمين .... نعم ؟؟ وانت شن ليك علاقه ؟؟
امير .... دخلى ودخلى ... تلفونك من الليله نلاقاه انتظار ... نبعتلك فايروس ونريحك منه مره وحده .... هدا مامازال .... نسافر اسبوع ونجى نلاقاى تلفونك انتظار .... مالا كانا نسافر اسبوعين شن نلقى مطلقتينى ؟؟
ياسمين ..... هههههههههههههههههههههه انت مهبوووول ؟؟
امير ... ههههههه تقدرى تقولى بصوتك مهبول <3 واعتبرنى ملاك الا نزلك من سمى <3
ياسمين .... انت شن تعرف عليا .. افرض شينه ؟؟؟ افرض مش حلوه ؟؟ افرض سمينه ووزنى 110 ؟؟
امير .... ههههههههههه انى راضى بيك ههههههه وصوت الا زى صوتك اكييييييد عندى ليه صوره فى خيالى وخيالى مايخيبش ..... ممكن طلب ....
ياسمين ..... نعم ؟
امير ...... وصلونى مجموعة رسائل توا ... لانى كنت مسكر تلفونى طول اسبوع ... وتوا كيف فتحته واتصلت بيك طول ... مش تعرفى الكبيده بس ههههههههههه <3 شووووى بس نشوف رسائل ونجيك ....
ياسمين ..... لااااااااااااااااااااااااااااااا لحظه ماتشوفش رسائل خليك .. بنقول شى
امير .... اهااااا الحمد لله واخيرا اعطيتنى وجه ... شن تبى تقولى ؟
وطبعا ياسمين ماتبى تقول شى بس كان غرضها تلهيه وتنسيه فى رسائل ومايشوفش 15 مكالمه الا عزقتهم عليه فى مره وحده <3 <3 وهنا قالتله ....
ياسمين ..... شوف انت ولد ماشالله عليك ... بس انى مانصلحش بيك وانت ماتصلحش بيا ...
امير .... اها ..... باهى ترا احلفى فى هالاسبوع مافكرتيش فيا ؟؟
ياسمين .... ههههههههههه وعلاش نفكر فيك اصلا ... انت منى يعنى ؟؟ ولا حتى خطرت فى بالى ...
امير ..... غير تواضعى علينا يااميره بس .... والله حتى تواضع يشكرو فيه ....
ياسمين ..... باهى نقولك شى انى اسمن وحده فى دنيا وشينه لادرجه انت ماتتخيلهاش شن رايك ؟؟
امير .... وانى هدا طلبى من زمان ههههههههه ياسبحان الله .... اسمعى نقولك شى ... والله انى اول مره تصير معاى لقطه هيا ... بس اول مره تصير معاى حاجه زى هكى ... ياسبحان الله حاجه شدتنى لصوتك .. حسيت انى نعرفك ... ووالله كل يوم وانى مسافر خطرتى فى بالى ... وكل مانتفكرك نقعد نبتسم ... وعلى عموم انى اسمى امير <3 وعمرى 28 سنه ونخدم مهندس فى شركة استيراد وتصدير كبيره ... والحمد لله مستوره .... وياسيدى خلينا صدقاء من اليوم شن رأيك ؟؟ مهم نسمع صوتك ونكلمك وهدا يكفينى ... ومش ظرورى تتصلى <3 امتى ماانى نستاحشك نكلمك شن رايك ؟؟
ياسمين .... بس انت هكى بتسببلى ازعاج ؟؟ وانى مانحبش تلفونى يرن 24 ساعه ...
امير .... خلاص مره فى اليوم ورساله تمام ؟؟
ياسمين ... نفكر قبل ونرد عليك برساله وفى الاغلب رح يكون رفض ..
امير ... اوك بكرا صبح رح نبعتلك رساله ... انتى امتى تنوضى ؟؟
وهنا ياسمين فكرة شوى وتلخبطت ومعاش عرفت شن تقوله بعدين قالتله ..
ياسمين ... نقرا فى كورس صبح .. فانوض ساعه 7 صبح ..
امير ..... وانى نوض نفس الوقت .. رح نبعتلك رساله صبح ... لو رنيتلى معنها اعطيتنى فرصه لو لا معنها مش رح تشوفى منى اى شى تمام ؟؟
ياسمين ... اوك .. ت ع خ ..
امير .... استنى .. ماعرفتش اسمك ؟؟
ياسمين ... اسمى ياسمين ....
امير .... اها ياسمين .. اووووك يا ياسمين <3 تصبحى على الورد وامير اكيد <3
ياسمين .... ههههههههه وانت من اهل الخير ...
سكرت ياسمين تلفون ونست الا فات كله وبدت زى الفراشه باافكارها تطير وتطير وتطير .... ومشاعر الحب قايمه قلبها فوووووق ومخليته يرقص .... دارت تلفون هزاز
ووكيف نعسها نوم وصلتها رساله من امير تقول ...
امير <<< على اساس امير المزعج وبيزعجك 24 ساعه بالاتصال ... باهى غير خليتها 7 اتصالات مش 15 ياظالمه ههههه على عموم تبى ماتبيش رقمى بيطلعلك كل يوم وليك حرية الاختيار فى الاسم الا تحطيه وننصحك اكتبى متطفل <3
قرت ياسمين رساله وتحمرت وتصفرة ميتين مره وبعتتله رساله مكتوب فيها
ياسمين << لا مش هكى انت فاهم غلط وصبح لما تكلمنى توا نفهمك <3 >>
وبطريقه هيا ... وصلت ياسمين لامير المعلومه فى اكونها انها حابته يكلمها ويكون فى حياتها بس من غير ماتقوله هالشى <3 ومن هنا تبدا علاقة ياسمين وامير الاصليه بس كل واحد يتظاهر فيهم لتانى انه صديقه بس <3 وفعليا وجوهريا ... منى الا حاس انه بالفعل صديق تانى ومنى الا حاس انه حبيبه وكل حياته <3 رح نشوفو اكييييييد القدام <3
فاتت ليله على ياسمين وكانت من احلى الاحلام الوردي هالا شافتها فى هديكا الليله <3 واول حلمة ورديه شافتها فى احلامها كانت << الحسناء والوحش >> مع اختلاف الادوار <3 كونها لعبت دور الوحش وامير لعب دور الحسناء .. وهدا طبعا حسب اعتقادها وتفكيرها ونظرتها لنفسها ولى امير .... بس .. هل نهايه رح تكون نفس نهاية الحسناء والوحش ؟؟ بصراحه لاانى لحد توا عرفت ولاياسمين ... لانها بمجرد ماوصلت لنهاية الحلمه الورديه فاقت على احلى رساله وصلتها من اميرها <3 والا كانت فى مخيلتها زى الامير شار فى سندريلا اكيد <3
امير <<< صبح الورد والياسمين على ياسمينتى الحلوه <3 صحصحى وديرلى رنه <3 >>
بعدما ماقرت الرساله وابتسمت دارتله رنه باش تكلمه ... لانها بمجرد ماتنوض من سريرها وتنو ضخوها باش يخش بعدها لتوليت وامها تنوض باش توتى الفطور وتتسقد معاهم معاش رح تعرف تكلمه ...
ومافاتتش تانيه لين اتصل امير وقاللها ..
امير ... ايوااااااااااااااا صباح الورد
ياسمين << بصوت ناعس وهادى وحلو ورقيق >> صباح الورد ..
امير ... انى قولتلك بعد ماتفيقى كلمينى ... شكلك ماقريتيش الكلمه باهى <3
ياسمين << علاش ؟؟
امير .... لانا صوتك وانتى فايقه ويهبل فيا .. معناها صوتك وانتى كيف نايضه من نوم كيف بيكون ؟؟
وهنا حست ياسمين .. باانوتة العالم كلها فيها ... ولى اول مره حبت صوتها وكلامها واى شى خلى امير يكلم فيها بطريقه هيا ....
ياسمين ... انى بنكلمك قبل ماتنوض ماما بس ونبى نبررلك الا صار امس فى الليل هدا علاش ..
امير ... ااااااااااااااص .. مانبيش نسمع منك شى ... انى خلاص اعطيت لروحى تصريح انى نكلمك .. وخديت موافقه .. فامتغيريش رأيك توا .. خير ماانى فى سياره وبسببك ندير قول ...
ياسمين << فى دوشه فى سيارتك صوتك مش واضح >
امير ... اها لحظه بس ننقص ... سامحينى نسيت نفسى ..
ياسمين ... كأنى سمعتها الاغنيه ؟؟ كدبك حلو صح ؟؟
امير ... شكلك تحبيها زينى ... ولايهمك انى فنان فى كدب ههههههههه
ياسمين .. اها انت كداب وواخد ماستر معناها فى كدب ..
امير ... لا لا غير استهدى بالله والله نبصر <3 بس والله بجد الفنانه مياده بسيليس وبدات الاغنيه هيا توصل فيا لمشاعر وااااااااو وبدات لو نسمع فيها ونسمع فى احلى صوت بنوته فى دنيا  <3 ....
ياسمين ... هههههههه اوك خلاص نخليك تسوق ..
امير ... حاب نسمع صوتك لين نوصل للخدمه ممكن ؟؟
ياسمين ... << ماعندى شى نقولهولك ... انى مانحبش نحكى صبح
امير .... خلاص اسمعى لى رغى انى ... عمك امير اكبر رغاى فى عالم ... << وبدى يحكى >> وكان اغلب حكيه .. حكى شخص جوه حلو وواتق من نفسه وواخد دنيا بيومها .... والباين انا لما حكى على شغله ... انه فى شغل شخص تانى غير لما يكون برا شغل <3 .... مافاتتش رع ساع هالا وسكر .. وهيا ناضت بسرعه وخشت لتوليت ولبست حوايجها ولقت خواها احمد يسخن فى سياره ويستنى فيها فا مشت معاه ... واول ماخشت للمكتب .... وبعد ماخدت قهوتها ..... طلب منها امير ترفعله ورق ... فاطقت على مكتب وخشت .... واول ماخشت قالتله ....
ياسمين .... تفضل هادم الاورق الا طلبتهم من مكتبنا .... نستأدن منك .... وتلفت 👇🏻ياسمين .... تفضل هادم الاورق الا طلبتهم من مكتبنا .... نستأدن منك .... وتلفتت ومش وهوا كان منزل راسه ويوقع على بعض الاوراق .... واول ماوصلت فم الباب قاللها .....
امير ...... ياااسمين ...
وهنا نصمتت وقلبها وقف وقريب طاحت من مكانها .... وكل الا دارته غمضت عيونها من غير ماتتلفت وقالتله ...
ياسمين ..... نعم
امير ..... سلميلى على احمد ...<3
ياسمين ..... << تنهدت وخدت زفير خفيف وقالتله >> حاضر ....
وطلعت بسرعه من غير حتى ماتتلفت ....
واول ماوصلت لمكتبها بعتلها رساله وقاللها ...
امير ..... كملتى الكورس <3 نقدر نكلمك ؟؟
ياسمين .... لا لا مازال دكتور يشرح مانقدرش .... وماتقدرش تكلمنى فى اى وقت ... لما نفضى رح نديرلك رنه ....
امير ..... اوووك بتوفيق ....
حطت ياسمين تلفونها فى شنطه وبدت تتطبع فى شوى فاكسات نطلبو منها للشركه ..... ومابتش تطلع للوقت بيرك فاست عمدا ..... وروحت من الخدمه على رجليها بعد مازبطت طريق ... واول ملروحت لقت حيلها مهدود فا غيرت ملابسها وطحت على سرير ومشت فى نومه لحد ساعه 8 فى الليل ... ومع ساعه 8 فى الليل طلعت من دار ودارت سندوتش شعير وقعمزة جنب امها .... وهنا امها قالتلها ....
امها .... بنتى ناس عطيتهم موعد غضوه يجو .... باش يشوفوك ...
ياسمين ..... امى انتى شوارتينى ؟؟؟ من قالك انى نبى نتزوج توا ؟؟
امها ..... بنت ماليها الا حوش راجلها ... وانتى خديتى شهادتك وتخدمى .... خلاص مش ناقصك شى .... وبعدين انتى شوفيهم .... مرات الولد واهله ترتاحيلهم ويكون من نصيبك ...
ياسمين .... انتى اصلا ماتشوريش فيا .... انتى تعطى فيا علم بشى بس ... لانك خططتى ودرتى كل شى بروحك ... اعطينى تلفونك شوى بنكلم صاحبتى تعاودلى على الارضى ...
امها ..... ربى يهديك يابنتى ... هونى فوق تلفزيون ...
خدت ياسمين تلفون واتصلت بى منى وقالتلها كلمينى على الارضى .... ودخلت تلفون لدارها وسكرت دار واول ماتتصلت منى .... قامت ياسمين سماعه وقالتلها ..... امس كلمنى وبدينا نتكلم وفى تلفون ... وبديت نشوغ فيه فى خدمه كل يوم ومش قادره نقوله انى نفسها الا تتكلم معا ك فى تلفون .... وامى جايبتلى عريس وتبنى نتزوج وانى مانبيشى ومانبيش نتزوج ومانتخيلش فى روحى الا لاامير بس ... قوليللللللللى شن ندير نقتل روحى ونرتاح ؟؟
منى ... تصورى انى الا نسمع فيك دهشت .. حبه حبه يابنتى ... امتى صار هداك كله .. وامتى لحقتى تكلميه ؟؟
وبدت منى تحكيلها الا صار من طق طق لسلام عليكم .... وهنا منى قالتلها ..
منى ... امتى بتفيقى لعمرك ؟؟ امير مش ليك ... ووالله الا ماتضيعى عمرك معاه وبس وواضح انه مش ليك .. وامك ماتبيلكش الا الخير .. فابرى شوفى العريش اقلها يندرو عليك سمينه مش امير الا راسملك صورة نيكول كدمن ..
ياسمين .. بس هوا قالى ان راضى بيا كيف مايكون ....
منى ... ياسمين ... الولد واضح انه يحسابك تتغلى عليه وتتطفشى فيه بس ... لانا اى بنت تشكر روحها فى تلفون تطلع ولد عمه واى بنت تدم روحها تطلع حلوه .. وهما الولاد بعتقادهم هكى موضوع ...
ياسمين .... منى انى امير رح نكمل معاه وعندى امل انا شخص هوا رح يكون من نصيبى .... وانى بديت فى ريجيم واليوم ماكليت شى ... وناس الا يبو يخطبو بكرا رح نشوفهم وبعدها نقرر ..
منى ... اووووك براحتك اهم شى تكونى انتى مقتنعه ياياسمين بس ..
ياسمين .. نبى نقولك شى ..
منى .. شنى ؟؟
ياسمين ... ضحكته .. صوته .. ابتسامته .. نبرت صوته وكيف يقول ياسمين .. وكيف يخفف فى دمه ... كل شى كل شى . يهبببببببببل .... انى مش صدقه انه يكلم فيا والله حاسه روحى نحلم ...
منى ... ومن الحب ماقتل ههههههههههه
ياسمين .... انتى ماسمعتيشى كيف اليوم صبح نوضنى وقالى صباح الورد .. حسيت روحى خاطرى نرقد تانى ههههههههه ... بس تعرفى شى رح نخليه يحبنى ويموت فيا .... ومش رح نتصل بيه ولا رح ندوره ...
منى ... من عطاك دوره من وراى ياحقيره ههههههههه
ياسمين ... من كترة مانشوف فى بنات كيف يتبتو فى الولاد وعلاقاتى فاشله خلتنى خبره حاليا فى تعامل مع الولد << ومش بعيد بنكتب كتاب عليهم وعنونه << عندما يحب الرجل >> هههههههههههههه
منى ... تخافى باب النجار مخلع ههههههههههه
ياسمين ... اهو حاليا يتصل على نقال بس فوتيه ههههههههههه مش يقولك راجل زى طابع البريد كل ماتفى فيه يلزق اكتر
منى ... هههههههههههههههههههههههههههههههه قويه ...
ياسمين .. طبعا مبكرى كلمنى ووزعته .. وتوا استنى خلى نتصل بى 121 باش يعطيه انتظار هههههههههه
منى ... قصدك لما تتصلى 121 يعطيك انتظار ؟؟
ياسمين .... على حسب مره انتظار ومره مشغول هههههههههه
منى ... والله نحس طيحتك سوده يابنت ....
وفجأه خش احمد عليها فى دار وهيا تلكمست وقاللها ....
احمد ... ياسمين .. فى منى تكلمى ؟؟
ياسمن .. شن دخلك انت ؟؟ نكلم فى منى ... فى شى ؟؟
احمد .. هاتى تلفونك شوى بنبعتله شوية حاجات قبل ماندير سفت وير للجهاز ...
ياسمين ... نبيه ... ومش فاضيه ...
احمد ... تى هاتى عمه الجهاز وانتى كحته << وخدى الجهاز فى ايده وفى لحظه هيا اتصل امير ....

يتبع...

استنونا في الحلقه التامنه🙈🤚🏻