ضي (مكتمله)

/٦/

اوس
ضي (فتحت باب غرفته): اوس هاي نايم اوس
اوس (جان غافي على المكتب وحس من فتحت الباب): ها ضي
ضي : لَيـش نايم هنا يتاذه ظهرك موزين
اوس : غفيت مادري بروحي
ضي : اذا تعبان مو اله تروح للعياده
اوس : لالا شلون والناس الدينتظروني لازم اروح
ضي : اوك راح انتظرك جوه
اوس : اوك
ضي (نزلت)
اوس (وكف ورفع شعره بايديه وهو يفكر): يالله يعني حتى بنومي اشوفها ومن مويمي افكر بيها ومن كدامي بس اباوعلها يعني لَيـش كلشي متعلق بيها (غسل وبدل ملابسه على السريع وفتح المجر اخذ شلغه وطلع لكاها كاعده بالسياره تنتظره)
ضي : ها شبيك صافن يله خل نروح
اوس (انطاها البيده): هاي تعويض عن التاخير(حرك بالسياره)
ضي (اخذت النستله وابتسمت بفرح وباوعتله): يله مقبوله من عندك شسوي اتحمل
اوس (باوعلها شويه نوب خربط شعرها): لج فوك ما تذكرتج وفكرت اجيبلج شي
ضي (تعدل بشعرها): يوووو اوس شوكت تبطل هالعاده والله ضوجتني
اوس : من تبطلين تباوعيلي هيج
ضي : شلون يعني
اوس : يله يله اكليها لاتموع وتوصخين السياره
ضي : لك شنو اني طفله
اوس : ونص بدون نقاش خلص اكليها لان راح اخذها الي
ضي (فتحتها واكلت منها وهي تحجي بصوت ناصي): عابت فوك مامتاخر نوب يريد ياخذها
اوس : شكلتي
ضي (ابتسمت): مكلت شي
اوس : اي عبالي
(وصلوا ودخلوا ومن خلصوا ورادوا يطلعون)
سما : اوس بس ممكن احجي وياك لحظـه
ضي (ضاجت شافتهم يباوعولها حست لازم تطلع): اني راح اكعد بالسياره (طلعت)
اوس : تفضلي كولي
سما : اعتقد اني مافد يوم قصرت بالشغل صح؟؟
اوس : اي طبعاً ملتزمه وشاطره بشغلج وفاهمه شتسوين يعني بين قوسين ذكيه وعندج طموح تردين توصليله
سما (ابتسمت برضا عن نفسها): بما انو تعرف هالشي اني اسفه بس ماحس الي مكان هنا يعني اكو من اخذ مكاني هنا واكثر حتى شغل ماكو اسوي احس مراح استفاد شي ببقائي هنا اكثر من هيج
اوس : اني مستعد اعوضج حتى اذا تردين ماخلي ضي تجي بعد حتى تركز بدراستها ويرجع كلشي مـ...
سما (قاطعته): لالا والله اني مداحجي حتى هيج تسوي بالعكس ما شاء الله ضي دتستفاد وكادره توفق بين الاثنين اتمنالها كل خير اني بَس تعرف يعني العياده بعيده وابويه ديصرف هوايه على السياره يوديني ويرجعني فقررت اوكف لحد ماشوف حل
اوس : لحظه تتذكرين سرمد
سما : سرمد نفسه الي جان ويانه بالكليه
اوس : ايي قبل كم يوم صارت مشكله بينه وبين ثائر فبقه وحده يعني اكيد يريد احد عنده خبره ويا تردين اشوفه الج ومكانه قريب على منطقتج
سما (فرحت): صدك
اوس : يي طبعاً
سما : شكراً والله ماعرف شلون اشكرك على تفهمك لموقفي ومساعدتك الي
اوس : عادي ماكو داعي للشكر لعد المن الاصدقاء موجودين ولايهمج اني احاجي واوديج للمكان
سما : اوك
اوس : يله تعالي خل نوصلج
سما : لا بابا اجه موجود ينتظرني شكراً تعبتك ويايه هوايه
اوس : ولو مسويت شي بالعكس اني اشكرج على وكفتج ويايه ومساعدتج الي بالبدايه ولحد اليوم
سما (ابتسمت ودك ابوها): يله تاخرت اعذرني
اوس : معذوره اختي الله وياج
(طلعوا)
ضي (كاعده تفور بالسياره وتهز رجلها بعصبيه لان تاخروا هوايه حجوا)
اوس (شافها عرف بيها كاعده على اعصابها ابتسم وراح ركب محجه شي وحرك وهو باقي يبتسم)
ضي (متحملت وره خمس دقايق انفجرت عليه): اي عيني كاعد تضحك شعندك قابل صارلك ساعه كاعد بالسياره
اوس : وليش معصبه
ضي : مو خطيه انت الي جنت تنتظر حضرة جناب الدكتور وحبيبته يسولفون ويكملون ويطلعون
اوس (مبتسم): واذا يعني انتظري شويه شيصير بس للعلم محد كال اني عندي حبيبه سما صديقتي من ايام الدراسه
ضي (معصبه): جذاب اني ذاك اليوم سمعتك وانت نايم تحجي وتكول حبيبتي حتى بالحلم تفكر بيها هيج ماخذه كل عقلك
اوس (ابتسم على روحه وتصرفاته هيج كلشي واضح وحتى بنومه يحجي بيها): هو بَـس عقلي لو بس روحي لو بس عمري لو بس قلبي (باوع بعيونها) والله كلهن اخذتهن
ضي (حست شي بداخلها انكسر دارت وجهها عنه وباوعت للطريق وكوه لازمه دموعها): خلص ماكو شي انسه
اوس (حس بيها افتهمت غلط): ضي
ضي : عفيه كافي بس اريد اوصل (نزلت دموعها)
اوس (وكف السياره)
ضي : لَيش وكفت امشي اريد اروح للبيت
اوس (دار وجهها عليه): ضي شبيج لَيش تبجين مو دنتشاقه مثل كل مره
ضي : لا كافي اهئ اهئ هذا موشقه اني بعد ماكدر اهئ
اوس : شكو زين المن تبجين
ضي : ماعرف والله ماعرف تاذيت حيل داحس بالم
اوس (قلق عليها): ضي شنو متاذيه وين شوكت
ضي (حطت ايدها جهت قلبها وبعدها تبجي): هنا داتاذه ومعدتي دتاذيني عفيه رجعني للبيت كافي
اوس (لزم ايديها): ضي حبيبتي باعيلي لاتسوين بروحج هيج
ضي (زاد بجيها وسحبت ايديها منه): خلص عوفني كافي ماكدر ابقه (شالت جنطتها ونزلت من السياره)
اوس (نزل وراها بسرعه): ضي
ضي (سرعت مشيها)
اوس (ركض ولزمها): ضي تخبلتي وين رايحه
ضي (حاولت تفلت منه): عوفني معليـ...
اوس (جرها اله وحضنها ومسح على راسها): كافي اهدي خلص ماكو شي من الي تفكرين بي تره سما بطلت متكدر تجي العياده بعيده عليها وكلتلها علمود تروح يم صديقي اقربلها اذا تريد وهذا كلشي اوك ماكو اكثر من هيج
ضي (حضنته وبجت): لَيش ما حجيت هيج من البدايه لَيـش مكلت
اوس (ابتسم على تصرفها): لان تصيرين حلوه من تغارين ومتعرفين شتسوين
ضي (دفعته): على شنو اغار اني ماغار من احد
اوس : اي مو شفتي شلون اني صارلي ساعه عصبي وابجي وعيوني صايرات حمر من الغيره
ضي (رجعت للسياره): يله رجاءً نرفع الزحمه رجعني للبيت
اوس (راح وراها): امرج عيني