انت عشقي (باللهجة العراقية)

23

مايا: ورا مخلص عرس غفران رجعنا للبيت اني كبل نمت بدون مااغير ملابسي نمت والدمعه بعيني بعدين فزيت الساعه 11 بالليل كمت بدلت ومسحت المكياج وغسلت وجهي حاولت انام بس مكدرت مخنوكة مدا يجيني نوم اتمنى اشوف ايار قبل لا أسافر باجر عطلة مراح اكدر اشوفه

ميته من القهر بس الله يعلم بحالي طلعت بالحديقة اشم شوي هوا مخنوكه مكدر اخذ نفس

طلعت اتمشى وافكر وسمعت صوت الباب يندك خفت حيل الساعه تقريبا ب12 منو يجي بهل وقت ردت اكعد بابا بس كلت اروح اجيب عودة واني افتح الباب

وكفت ورا الباب وصحت منو
ايار : مايا هذا اني افتحيلي الباب بس اريد احجي وياج دقايق واروح بس افتحي الباب

مايا : كل عقلك تحجي ايار روح منا لحد يشوفك يمعود روح والله تصيرلي مشاكل اذا تحبني روح اترجاك روح

ايار : خاب ظني عبالي اشوف مايا بس هيا مقبلت صعدت بسيارتي ورحت

مايا : راح ايار وانقهرت لان مكدرت اشوفة واحجي ويا

ضليت الليل كله كاعدة وافكر مقهورة علمود غفران اليوم مو وياي كل يوم ننام سوه اووف

كمت من فراشي الصبح وعيوني منفخة لان منايمة
اليوم مطلعت من البيت ماما عزمت كل كرايبنا واخواتها تودعهم قبل منروح لان عكب باجر راح نسافر

اجوي خالاتي ونسوان خوالي والبنات والولد ولتمينا كلنا
وخلص اليوم بين السوالف والوداع متت من التعب من البارحة منايمة

رحت نمت كعدت ثاني يوم ساعدت ماما بالشغل ولميت غراضي كلها العصر ستأذنت من بابا اروح ويا صديقاتي عازميني على العشا

بالبداية عارض وماقبل بس بعدين اقتنع وخلاني اطلع وياهن لان اخر مرة اتصلت على ايار هواي بس جهازة مغلق حرامات عبالي اشوفه ماعندي حظ والله

طلعت ويا رؤى واسراء وانوب بنات اعرفهن صديقاتي وميسم صديقت غفران هم عزمتها

طلعنا كلنا للمطعم بعدين كتلهم اني حسافر ويمكن بعد مااشوفهم خطية كلش انقهرن بس اباوع على رؤى ولا مهتمة ولا عبالك صديقتهة حتسافر

سلمت على البنات وودعتهن بعدين طلعت قبل لا أرجع للبيت اتصلت بأيار هواي بس محصلته عبالي اشوفة قبل ماارجع

رجعت للبيت مقهورة كلش اتصلت على غفران وسئلتهة شلونهة كالت مرتاحة وزينه فرحتلهة حبيبتي

اليوم الليل كله مكدرت انام باجر من الصبح راح نسافر من بغداد راح اعوف صديقاتي واختي غفران
وايار هم مااعرف ليش بس مدا اتصور انو اني بعد مراح اشوفه اكثر الوقت افكر بي عقلي وكلبي وكل شي بيه ميريد يفاركه

مااعرف اوصف احساسي يمكن حبيته وتعلقت بي اكثر من الكل شعور غريب حتى لما جنت ويا اسامة مجنت هيج احس بس ايار غير مشاعري كلها

الانسان الوحيد الي حسيته يختلف عن الكل مع العلم مجانت بدايتي ويا زينه كلها مشاكل بس هو الوحيد الي مدا اكدر امحي من عقلي

رتبت ملابسي وغراضي كلها بالجنط وطلعت ويا اهلي للمطار كالو هناك ينتظرونة ياسر وغفران

لما وصلنا للمطار احس كلبي انقبض يربي مااريد اغادر بغداد بس هيا هاي الدنيا تجمعنا وتفرقنا

سلمت على ياسر وغفران كامت تبجي مسحتلهة دموعهة وحظنتهة وبعدين كلت لماما وبابا يروحون كدامي اني هسة الحكهم

دا امشي واني اسحب جنطتي وسمعت صوت يصيحني ماياااا بس هذا الصوت مو غريب عليه هذا ايار انداريت علي لكيته واكف وراية
توقعت راح يجي يودعني بس شلون عرف

ايار : مايا همزين لحكت بيج شلون تريدين تسافرين ومتكليلي بله هاي شغلة تسويهة ولج كمت اركض بس علمود الحك بيج خابرت ياسر الصبح وهو كلي
انو انتو راح تسافرون شلون تروحين وتعوفيني مااكدر اعيش بدونج مايا متذكرتيني قبل لتروحين

مايا : بكلبي اريد احضنه وابقى ويا بس لازم اقاوم شعوري واصير اقوى من هيج رديت علي ليش متكدر تعيش بدوني وشنو يعني
ايار : مايا شبيج اني احبج

مايا : من سمعت كلمت احبج منه هز بدني كله مدري شصار بيه بلحظة ردت اضعف واكولة اني هم احبك ومااريد اعوفك اريد اضل وياك للموت بس لا ماكو فايدة مجرد اخلي يتأمل عالفاضي
كتله
( حاولت احبك بس مكدرت اعذرني اني قفلت كلبي وذبيت المفتاح وغلطتي مااكررها مرتين اسفة ايار سامحني )
خنكتني العبرة كمت ابجي واشهك كمت اركض بسرعه حتى ميشوفني سامحني والله حبيتك بس مو بيدي موقف كلش صعب انحطيت بي

ايار : مايا مايااا انتظري لتروحين اسمعيني ليش هيج تسوين بيه مو حبيتج هيج تجازيني ولج اسمعيني عالاقل ضليت اصيح وراها بس هيا صعدت وراحت حسيت حبي خلص راح ضيعت البنت الي حبيتهة انهاريت حتى دموعي كامت تنزل كعدت بالكاع وابجي شكد صادقت وشفت بنات بس مثل مايا مستحيل حبيت بحياتي وهيا حتى مسمعتني وعافتني وراحت

مايا : صعدت بالطيارة ودموعي تجري ابجي واشهك يمكن هاي اخر مرة اشوف ايار متمنيت هيج تكون نهايتنة حظنت ماما وضليت ابجي

ياسر : شفت ايار طلع من المطار عرفت بي جاي علمود مايا رحت علي شفته عيونه حمرة وجنة جان يبجي كتله ايار شبيك شصار

ايار : مصار شي خلص راحت خسرتهة
ياسر : كال هيج وراح صحت ورا بس مارد علية
رجعنا للبيت اني وغفران

وبالليل خابروني اهلة يسئلوني عنه يكولون اليوم ابد ماشافو ولا مر على البيت

اني كبل اتصلت علي بس الجهاز مغلق يربي هذا وين راح ساعة 12 ونص بالليل ...

ليش متصوتون صوتو حتى انزل التكملة
انشاالله عن قريب اكملهة
بس لتنسون التصويت ❤😻