انت عشقي (باللهجة العراقية)

39 (الجزء الاخير )

أحببتك جداً ونسيت بأني بلا حظ🤷‍♀💖

هشام ; جنت شايلهة وخايف عليهة كلش خفت ليصيرها شي ووكتهة مااسامح نفسي لأن اني جنت السبب  بالصارلها اخذتهة للمستشفى بسرعة جنونية
فوتتهة وضليت انتظر برة خابرت على تبارك حتى اكوللهة علمود يجون بس ماردت عاد خابرت على صديقتهة رؤى

رؤى : رديت بخوف عبالي عرف اني دزيت الرسالة مالت الصور هلا هشام شعجب متصل

هشام : رؤى مايا صار وياهة حادث وحالتهة كلش خطرة هسة هيا بين الحياة والموت

رؤى: شنوووو اني دقايق واكون بالمستشفى
سديت الخط من هشام وطلعت بسرعة ماادري افرح لو ابجي لأن راح اخلص من مايا بس كلبي وجعني عليهة مهما يكون هيا صديقتي

كلت اكيد اهلهة ميدرون خابرت غفران وكتلهة وهيا كامت تصيح وتبجي من سمعتهة تبجي علمود مايا اني كبل دموعي نزلت متت من القهر ماجنت اتمنى هيج يصير وياهة كل الي ردتة ايار يصير الي وبس

وصلت للمستشفى لكيت الكل هناك
رحت لهشام بسرعة
رؤى: شصار
هشام : ماادري هسة يطلع الدكتور منتظري يطلع

لما طلع الدكتور كلنا رحنا نركض علي بس الخبر الي سمعنا صدم الكل

الدكتور: للأسف مكدرنا ننقذهة المريضة انطتكم عمرها
وهنا الكل كام يبجي
هشام : كعدت بالكاع وكمت ابجي مثل الاطفال هذا كله بسببي اني جنت السبب بموتهة مراح اسامح نفسي لييش رحتي يامايا

غفران : مكدرت استوعب الخبر ضليت اصيح وابجي دخلت بسرعة على الغرفة الي جانت بيهة مايا
مايا كومي لتعوفيني يلة كومي مايا
جان هذا اتعس يوم بحياتي ماتت حبيبتي اختي واخذت روحي وياهة جانت موبس اختي هيا روحي من الدنيا ضليت ابجي واصيح بس ماكو فايدة راحت مايا وبعد ماكو شي يرجعهة فقدتهة للأبد بعد مااكدر اشوفهة بحياتي هاي الفكرة وحدهة تخبلني

رؤى: ضليت واكفه يم باب الغرفة ابجي مألي عين افوت كدام الكل ورا الي سويته بيهة  اباوع على مايا وجهة متشوه بسبب الحادث كله اثر جروح حسيت كلبي حينفجر من كد الالم اعتبرت نفسي اني السبب بموتهة متوقعت راح انقهر هيج على مايا كمت ابجي واصيح حسيت بذنوبي وشكد غلطت بحقهة هيا حبت ايار وماتت قبل لا تصير أله هذا شي دائما يموتني من الالم واحس نفسي مو انسانة لما اتذكرة خسرت اعز واغلى صديقة ألي بسبب طمعي وانانيتي

غفران : صارت حياتي مثل الجحيم لما ماتت مايا ورا شهر من وفاتهة امي هم ماتت من القهر وهنا اني انهاريت اتمنى اموت واخلص جان ياسر دائما يصبرني بس ألم بروحي لا يطاق
ايار اختفه من لما ماتت مايا ومحد يدري وينه لحد هسة مااعرف اذا مات او بعدة عايش محد يعرف وين صارت بي الدنيا
ورؤى تزوجت واحد اخلاقة زفت ولاعب بيهة طوبة كلش معذبهة وحالها بالضيم تعاقبت على كل الي سوته

اني صرت حامل بس طرحت وهذا الشي أزم حالتي النفسية بعد اكثر

تبارك صديقت مايا رجعت للبصرة وماادري عن اخبارهة شي وهشام هم رجع وياهة
بعد 3 سنوات الله رزقني ببنية تخبل وتشبه خالتهة مايا نسخة طبق الاصل
هيا الي رجعتلي السعادة لحياتي
 

بعد سنوات طلبت من ياسر ياخذني لقبر مايا مشتاقتلهة وهناك ماما هم يمهة ازورهن اثنينهن
المهم ياسر اخذني لهناك لما وصلنا شفت من بعيد شخص كاعد يم قبر مايا لما اقتربنا
سئلة ياسر منو انته بس الصدمة لما اندار علينه جان ايار جان جايب باقت ورد احمر وكاعد يم القبر يبجي
انقهرت علي كلش خطية مايا وايار حبو بعضهم بس مامكتوبلهم ينجمعون

وانتهت القصة.

.

.

.

.

.

.

.

.

.

ههههه وجذبت عليكم
بسلا صدكتو مايا ماتت 😂😂
بنات هذا البارت مو جزء من القصة بس كتبته من الضوجة
يعني احداثة مو من ضمن القصة
بله شنو جان شعوركم وانتو تقرو ???
انقهرتو على مايا لولا
بالنسبة الي جذبت الجذبة وصدكتها رادت دموعي تنزل لما قريتهة 😂😂😂

لو جان هذا الجزء الاخير من صدك
حيعجبكم لو لا ??