فاقت على نهار جديد وعلى امل جديد لكن هاد الفرحة مغاديش طول حيت هوما فاواخر شهر تمانية وتسعود على الابواب والجو بدا كيبرد مزيان...وجدات فطورها...فطرات شربات مهاب الما ولكن المكلة مازال واحلة كيفاش حت هيا دوزها له...كيف العادة دارت دوى سدات على مهاب ومشات تعمر الما القريعات وبدات كتجمع الحطب حيت البرد كل نهار كيقسح...بقات غادية وكتستكشف المكان ولكن هاد المرة دات معها شبكة هزاها معاه مهاب فالعدة ديالو وعرفتها بيلا ديل صيد ديل الجوت حيت شافت واحد المرة مهاب كيصيد بيها...مشات الواد بقات فيه نص نهار يالله صيدات تلاتة ديل الحوتات ورجعات من نفس طريق كتجمع منها الحطب لجمعات فلول...وصلت العندو غير دخلت ترتاح حسات به بحالي تحرك فرحات ولكن ملي جات تقلب جرحة لقات دم وهيا تخلع...قلباتو دغية بنفس طريقة لولى وحلت الفاصمة ومسحات ليه ولكن فرحات وتنفسات ملي لقات الغراز مزال شادين فراسهم...بدلت ليه الفاصمة وكتحاول متبدلش ليه كل مرة باش يكفيها دوى...ناضت شعلت العافية وبدات كتشوي فدوك الحوتات ومعندها حت شي فكرة كيفاش توكل مهاب...رجعات قلباتو على ضهرو شرباتو الما...وملي كانت كتشربو طاحت ليها فكرة على راسها وقررات تجربها...
مشات جابت روز وبدات كتسلق فيه لحات فيه واحدة من دوك الحوتات لشوات وبقات كطيب فيه حت طاب مزيان...شدات ركنة كتحرك فداك روز لكيبرد وكتهضر مع مهاب...
اووووف واخة خايب ومتساوش ولكن توحشت نسمع غواتك...واخة كتشحطني دوك شحطات ولكن نتا معارفش شنو داز عليا...تمنيت فهاد لحضة نكون فحضن يما... ماندير والو غير نتخشا فيها ونعس ونعاود ليها على احلامي...توحشتها بزاف...الله يسامح الوليد هو لوصلني لهنا...ياريت احح شحال من حاجة حلمت نديرها ومنها نكمل قرايتي....بقات كتحدت ليه وكتنضر عليه حت بردات ديك المكلة....جابت العود دخلتو ليه حت الجوف...وهزات معلقة كلتها فمها وبدات كتمضغها حت رداتها ما وهيا دوزها مع العود بقات هكاك وهيا متاكدة بيلا هاد المرة المكلة كدوز ليه...حت وكلتو ديك سوب كاملة...عاد قلباتو على كرشو وطفات لامبا ونعسات.... معرفاتش راسها شحال نعسات ولكن ضربتها الفيقة على الحريق والوجع كيقطع فكرشها...بدات كتقلب فراسها وهيا تلقها لي غيكل لجاتها...شدها الوجع مجهد مع ديك البرودة وهيا تنوض كتكحز شعلات لامبا شافت مهاب لقاتو مزال فبلاصتو وكيتنفس جرات علبة الاسعافات وجبدات الكينة لعطها طبيب حيت كان عارف مزيان بيلا البلاصة لغتمشي ليها باردة وزيد حت تدريبات وتنكر ديالها مغاديش يخلها توجع على خطرها...غير شرباتها مدزتش مدة حت مشا الوجع فمرة وهادي الكينة خاص كيخدموها الجنود نساء فبحال هاد الحالات...مشات الصاكها حن هو جبدات منو اولويزا مخبياها فالقاع ميشوفها حد وعندها محسوبين دارت واحدة ورجعات تخشات فبلاصتها ....كتشوف فمهاب لي كان ناعس على كرشو ولكن وجهو كان كيشوف فجيهتها...بقات كتشوف فيه واحد لحضة مدات يديها وبقات كتقيس الملامح وجهو بحالي كتحفضهم وكتخطهم بيديها وديك الحركة عطات واحد شعور براحة خصوصا فاش تفكرات نهار لعتقها من داك العسكري لكان بغا يتعدى عليها واخة سمعات لي عمرها تنسا ولكن احساس بالامتنان جيهتو مفارقهاش حيت واخة خايب وقاسح ونفس مقطوعة فيه ولكن فيه داك الجانب ديل جناحو فوقك مهما كانت ضروف...دارت طفات لامبا وودعات...مشات سرح عجول الاخرة..
صبح نهار جديد وفطرات حيدات المهاب حويجو واول مرة كديرها وكلها دايبة فحوايجها ولكن كان ضروري تمسح ليه باش ميترباوش ليه الميكروبات سخنت شوية ديل الما جهد غرفها وجابت ديك تشرطة ديل مهاب لتقطعات ومسحات ليه جنابو وضهرو ومور ودنيه وجهو مزيان وبدلت ليه الفاصمة دوزت ليه الما والمكلة ولكن عيفتها طريق ديل تمضغ المكلة ودوزها وقررت تفكر فشي طريقة خرى غير كملات ليه لبساتو تيشرطة لصبنات فالواد فنهار لفات وطلعات سنسلة ديل صاك وهزات شبكة والفردي والموس وقنبلة وسدات باب المدخل من بعد ما شطبات الكهف ومشات...
خرجات كيف العادة وروتين عمرات الما صيدات حوتات وجمعات الحطب ولكن هاد المرة قررت توجد الشتا حيت بان ليها مهاب باقي مطول.. ومغاديش يفيق دغيا...وصلت لعندو...قلباتو لقات نبض غادي وكيقوى وتنفس مزيان مشات بدلت حويجها لي عبارة عن تي شورطة دخلانية فقط وبدات كتوجد فالعشا...خرجات دخل الحطب وهيا تفكر راحة ديل البلاد وطحين ومشات كتقلب على شي حجرة فطحة...لقات جوج وتمت جايبهم وغير يالله غادي دخل مع المدخل ديل الكهف وبان ليها ديل لفعة تخلعات وتهزات ولكن دغية تفكرات مهاب وبلما تشعر جبدات موس وبدات كتقطع فداك ديل حت تمت اللفعة مخرجة راسها وهيا تنزل عليها بديك الحجرة الراس رداتو كلو فراتت وبقات كضرب كضرب وهيا مشاعرش حت حسات راسها سوفل مبقاش وهيا تحبس ردات ديك راس لفعى مسكينة كفتة...بقات كتسوط وكضحك.... ااححححح يا مهاب جيتني فنعاس لكون كونتي فايق كاع ماتغوت وتحل فمك عليا غير تهضر نرد لك راسك بحال هادي خيتي...جابك الله منك عشا ومنك فطور وغدا...هازة مع راسك....قطعات داك تفرتيت ديل راس لفعى ورماتو هو وزنطيط وهزات لبقا دخلتو الداخل ومشات كدور فالكهف لباقي شي حاجة وحمدات الله ملي مهاب مخشي كلو فصاك لمصنوع من برا من جلد ومن داخل من صوف ولواط...قلبت الكهف نقاتو دردرات دوى شعلت العواد جابت دوك جوج حجرات غسلتهم وعقماتهم وجلسات كضعق فيهم داك روز بشوية بشوية حت رداتو طحين عاد رداتو يطيب هو والحوت لجيبات اما لفعا غسلتها وطيرات جلد ديالها رماتو وقطعاتها وبدات كتشويها باش تحيد منها الما وتردها بحال قديد...حطات المكلة طيب وسدات المدخل حيت كاين البرد وجابت المقص وخيط والابرة وجلسات لداك جلد ديل دب قطعاتو طريفات صغار وبدات كتخيط فيه بحال المخيدات ومخليا ليهم فم منين تربطهم قد فم القرعة دشريب...تبلات بيه هاك بلاك كتخيط وفنفس الوقت كتهضر مع مهاب فخاوي وفعامر حت كملات حيدات المكلة وزادت شوية ديل العواد وبدات كتحرك فيها وكدعكها وكتبرد فيها حت حسات بيها مزيان ولات معلقة فمها ومعلق ففم مهاب..حت شبعات وكملات دكشي لبقا المهاب وشرباتو الما...وجبدات عليه نعسات...صبح نهار جديد هبطات الواد كيف العادة صيدات وعمرات كريبة من دوك الكريبات لي خيطات وطلعاتها معها وجمعات الحطب...ولى هادك هو روتينها ولكن الايام كدوز والمكلة بدات كتقضى حيت مكتعرفش تصيد ولكتصيدو غير الحوت وكتبقا نص نهار باش يالله تصيد تلاتة ولا ربعة ديل الحوتات...بدات كتخلع حيت شنايف تلج بدو كيطيحو...حاجة واحدة لكانت مرتاحة ليها هوما الما والحطب حيتهيا عمرات ستة من دوك الكريبات وحطاتهوم على جنب وسابعة هيا لكتحرك بيها...والحطب بقات كتجمع وتحط فواحد القنت من الكهف وملي كتجيبو بلا عجز عليها كتهرسو مزيان...بدات كدخلها رعدة ديل البرد ولكن مكانتش كتسوق حيت عقلها كلو مع برد شتا لجاي ومهاب لباقي مافاقش واخة كياكل مزيان وكيشرب مزيان ولحم تجمع ليه ولكن باقي مافاقش ودكشي خلعها ولكن مبغاتش تستسلم...
