#املكيني7
.
نزلت الشغل في الكوفير و كان دوام صباحي لحد المغرب صعب لكن قروشو كويسه اندمجت مع الشغل ست الكوفير اسمها رانيا زوله طيبه لكن جريئه شديد في لبسها و كلامها و صراح يعني الناس كانو بقولو عليها كلام ما تمان بس يشهدا الله ما شفت منها حاجه
الاء بدت اجرائات التسجيل و الحمدلله 😍انا معاي قروش
مشيت السوق اشتريت ليها ملابس جديده ولاب كوت و شنط و عطور😍وفرحانه ليها شديد و هي خايفه اول يوم ليها في الجامعه ما قدرت امشي معاها بس عشان الشغل لكن كنت متابعاها بالتلفونو و بدت دراسه
نزلت سمسترها الاول و هي جميله شديد ما شا الله و كل يوم معنوياتها ذايده
يلا يوم قلت ليها ماشه معك مش الليله الاحتفال حقكم قالت لالا و هي عندها محاضره و ماشه وين و بقت تتعذر لي يعني ظاهره انها ما دايرني امشي خجلت ما عارفاها مالا يلا انا مع شغل الكوفير و الوقفه و التعب بقيت نحيفه و لوني غتم و عيوني بقو هالات هالات و حتى مرتبي كلو بصرفو على الاء قلت عشان ما تحتاج لزول ولا تحس نفسها اقل بديها مصروف اليوم كتير و زياده اشتريت ليها لاب توب و موبايل جداد
و كنت بستغل براي في البيت للعروسات و الشباين يعني عندي قروش
و مبسوطه حتى قرايتي الاصليه نسيتها و بقيت بين الشغل و هدفي بس الاء تتم الجامعه
يلا الفتره ديك كلها ناس خالي عمر منقطعين مننا
لحد ما يوم جانا اتصل لامي من خالي عمر قال ليها فيو انو ولدو الكبير ( مهند )عايز يخطب و البت الدايره يخطبها زميتلو كانت معاهو هناك و الخطوبه بعد تلاته ايام واقعه الخميس طبعا اختي الاء سمعت طارت من الفرح 😍😍و قالت خلاص لازم نمشي و حتى قعدت تفكر في لبستها الح تلبسها امي عاينت لي قالت لي مالك قالت لي امشو قلت ليها انتو انا ما دايره قالت لي انتي عيب عليك دا خالك لازم تمشي المهم اصرت علي قلت الا اخد اذن من رانيا تاني يوم جيت اكلم رانيا قلت ليها انا يوم الخميس ما بقدر اجي قالت لي يوم الخميس ماف شغل انا برضو ما جايه عندنا مناسبه حسيت كانو القدر بقول لي امشي بس امشي
اها قررت امشي و لبست لي اسكيرتي اسود و قميص كحلي و طرحه لحميه
و شبط اسود
و الاء لبست فستان بيجي باسود و طرحه حلوه شديد و هي جميله طلعت قمر انا لمن حصنتها
طلعنا مشينا بيتهم الخطوبه كانت عندهم
اول ما وصلنا بيتهم حلو شديد الباب كبييير بالقزاز اول ما دخلنا كدا ذي جنينه و مدخل بيته باب خشب كان فاتح و الانوار ملونه و المكان رحتو حلوه و عطور من ماركات و الجو بارد بيتهم فيو صاله اماميه كدا كبيره في كراسي جلوس فخمه و مهند و خطيبتو لسه ما جو دخلنا لقينا ناس حبه بس الاهل يعني لمن شافو امي جو سلمو عليها كانو العداوه الكانت ديك كلها انتهت خالي عمر جا سلم علينا و على امي و سلمنا على مرتو
في ولد كدا طويل حلاااتو لونو اصفراني و عندو شيب قدام بشبه خالي شبه سبحان الله جا سلم علينا و عرف امي و الاء لانو لاقاهم بس ما عرفني امي قالت ليو دي امل بتي قال لي اتشرفنا😄و جا مؤايد 😒الكريه سلم علينا و بعاين لي و بضحك 🤣😂😂 شميتو قعدنا و بعدها مهند و خطيبتو جوا و الحفله بدت و قدمو مرطبات و عصاير و جو حلو شديد و صور قلت لالاء ارح معاي الحمام قالت لي ما قادره ياخ قمت مشيت براي و انا ماشه لقيت رانيا🤨
لفتها رانيا جاتني امل الجابك شنو قلت ليها انتي الجابك شنو😄قالت لي دي صحبتي ايام الجامعه قلت ليها و العريس ود خالي قعدت تضحك قالت لي ياريت لو عرفت كان جينا سوا عاينت لي من فوق قالت لي كان تشيل فستان من الكوفير لمن الحمام طار من راسي و استاذنتها ورجعت مكاني و قعدت و بقيت سرحانه بعد مسافه امي قالت لي الاء وين؟ قلت ليها بري
طلعت برا لقيتها واقفه مع مؤيد في الضلام 😳و هو ماسك يدها 😳😳قربت عليهم و ما شافيني هي تتضحك و تدنقر في راسها و هو بتكلم .....يتبع
#نسرين_عزالدين
