#ظلموني_ولكن...
الجزء الربع عشر.......
مشت الايام طبيعي ماعدا سهام شدت وياية اكثر من الاول خلصت السنة الدراسية والحمدلله نجحت بمعدل عالي ورحت للثاني متوسط،المفروض ثالث بس سنة راحت علية من صار حادث اهلي....
اما ليث سوة العملية ونجحت الحمدلله ورجع يمشي طبيعي وسوينة حفلة وعزايم ع سلامته..
وبدت العطلة الصيفية وكعدنة بالبيت ونويت احجي وية جدي يخليني اتصل بأهلي(اهل امي)،وطبعا اني وليث قوت علاقتنة يعني سوالف،شقى،وبس محجينة ع مشاعرنة لبعض وجانت مرت عمي تتخبل لان علاقتنة اطورت وحاولت بكل جهدهة تخرب بينة لان جدي كام مينطيهة مجال.....
سهام:هااااااا خاتونة شعندج تسولفين وية الورد??لاعبالج راح تنولين الي ابالج ولاتحاولين تباوعين فوك هواية لان بالاخير راح تنكسر ركبتج...
شفق:عمة ليش انتي هيج دائما وياية اني بشنو اذيتج ???
سهام:اشششش..انجبي ولا كلمة عمة اليعميج ان شاءالله واخلص منج كولي امييين...
وعافتني ومشت كعدت بالحديقة وظليت صافنة،الى متى راح اظل هيج شوكت اخلص تعبت مليت ياربي ماعندي غيرك تشكيله همي وتعبي حتى دموع مظلت عندي ظليت صافنة..
ليث:كعدت العصر من النوم ضايج وروحي طافرة،سمر سويلي جاي و وياه كليجة وجيبيهن للحديقة طلعت شفت شفق كاعدة ع الحشيش وصافنة تقربت يمهة وحجيت وياها بس فزت من شافتني...
شبيج وين صافنة???
شفق:هيج ماكو شي،كمت نفضت ايدي وهدومي وردت اطب جوة...لزم ايدي ليث...
ليث:وين تعالي شربي وياية جاي...
شفق:ما اريد بالعافية...
ليث:شكو شبيج ضايجة??
شفق:كتلك مابيه بس اريد اطب..
ليث:تعالي شكو وفوكاها تصيحين،فوك ممتحمل الضيم من وراج..
شفق:من وراية???لا والله،ترى محد جابرك زين لو لا،موزين اني اصلا زيادة مني احجي وياك لان الي داشوفه من امك كافي وتالي تجي تمن علية بلة شنو متحمل ضيم من وراية،وصوتي كام يعلى،كافي حرام عليكم منا انت ومنا امك يعني شنو ذنبي اني فهموني...
ليث:اششش ولا نفس الظاهر اني نطيتج اكبر من حجمج وكبرت راسج وخليتج هيج تحجين،ولا عبالج لان احبج اخليج هيج تتكبرين علية وتتصرفين بهالطريقة وشغلة ثانية ديري بالج تجيبين طاري امي ع السانج زين???
شفق:ظليت صافنة ع ليث وهو يحجي هيج وياية ما اكذب بداخلي حيل انقهرت وضجت بس مبينتله،...
شفق:ماشي ليث اني كبر راسي بحجيك وتصرفك اتجاهي تسلم رحمة الله والديك مقصرت،ردت امشي صاحني...
ليث:اذا مشيتي ياشفق صدكي تكون اخر حجاية بيني وبينج...
شفق:انداريت علية،ما اتوقع بعد اكو داعي يصير حجي بيناتنة..وعفته ومشيت.
ليث:تخبلت من حجت هيج والنوب عافتني وراحت صرت اعصاب شلت تليفوني والسويج وطلعت...
سمر:ليث وين هذا جايك،يووه هذا شبيه هيج معصب شلت الصينية سمعت وليد صاحني..
وليد:سمسم....
سمر:هااا وليد،
وليد:شلونج،،ان شاءالله بخير.
سمر:الحمدلله بخير،انت شلونك?
وليد:الحمدلله بخير،اكلج ترى حجيت وية ابوية يفاتح ابوج وجدي ونسوي الخطبة رسمي و وياها عقد...
سمر:الفرحة مواسعتني بس دنكت راسي خجلت ليشوف الفرحة بعيني ويكول ممصدكة،هاااا اي،قصدي الي يشوفه ابوية...
وليد:ولج شنو الي يشوفه ابوج يعني اذا سألج موافقة لو لا شتكولين???
سمر:جاوبته اي وركضت للبيت واني احس حرارة تطلع من جسمي...لزمت خدودي واضحك شافتني امي...
سهام:خير واكفة هنا شسوين وهاي شنو صينية الجاي??
سمر:جفلت وظليت امتمت...لا هاي لليث بس اشو عافني وطلع وجان كلش عصبي..
سهام:امشي ولي من كدامي ظلي هيج فاهية امشي ولي من كدامي...
سمر:ركضت ع شفق وجريتهة،ولج فوفة تعالي لزميني لان راح اطير،وافتر وادندن بالممر وشفق صافنة علية وتضحك..
شفق:شكو شبيج يامخبلة هيج طايرة عصافيرج???
سمر:لج وليد..وليد...
شفق:شبيه وليد النوب???
سمر:لزمت شفق من ايديهة لج هسة شفته وكلي حاجيت ابوية يحجي وية جدي وابوج ونسوي الخطوبة رسمي و وياها نعقد،لج ممصدكة الفرحة مواسعتني.
شفق:حضنتهة،الف مبروك حبيبتي ان شاءالله الله يتممهة عليكم بالخير،وطلعت مرت عمي من المطبخ..??
سهام:خير شعندج واكفة وية هاي المسمومة?الف مرة حاجية هاي محد يوصل يمهة،،كايلة لو لا??
سمر:اااي يمة ايدي وجعتني كافي،مسوت شي والله دنسولف،ماكو امي متسمع وشفت شفق صارت طماطة والدموع مجمعة بعينهة،بدون شعور نفضت ايد امي،كافي ماما الله يخليج كافي ترى عندج بنات خافي الله بيهة لتطلع بينة باجر عكبة،محسيت الا راشدي فر راسي كمت ابجي وجريت شفق ومشيت...
شفق:دخلنة لغرفة سمر جريتهة حضنتهة،ليش هيج حجيتي وياها ميصير مهما كان هاي امج ميصير تعلين صوتج بوجهة..
سمر:مسحت دموعي،لابربج بعد كل الي دسوي وياج لج اخاف باجر عكبة تندم بعد ميفوت الاوان،امي مدتحس بأحد بسبب حقدهة دتأذي كل الي حواليهة انتي،ليث،حتى احنة بناتهة نستنة كل همه صارت رشا يعني تاركتنة احنة وكله رشا ام بيت،رشا خوش بنية عبالك هي بتهة مو احنه،
شفق:ع كيفج حبيبتي ع كيفج وية نفسج،خرب ان هستوج جنج قرد تكمزين...ههههههههههه
سمر:جنت ابجي ومن حجت شفق وياية ضحكت وخطية ظلت تشاقيني،لج والله راشدي معدل راسي كام يوجعني.
شفق:اسم الله عليج يلة كومي غسلي وشربي شوية جاي.
سمر:كمت شفت وجهي شهكت،لج عزة باعي وجهي لج هاي شلون راح انزل هيج???ورجعت ابجي وسمعت صوت ليث يصيحني...لج شراح اكله اذا شافني والله يكلب الدنيا...
ليث:رحت لغرفة سمر ودكيت الباب،ودخلت شفت سمر وشفق واكفين بس عبالك اكو شي،شكو شبيج هيج متبسمرة
سمر:لا ماكو شي،شردت مني???
ليث:لاهيج،بس شو باعي بوجهي،شبيج??
سمر:جنت لازمة ايد شفق،ماكو شي شبيك وجريت شفق دنطلع،لزم ايدي..
ليث:سمر باعي علية،واحجي شكو،صاير شي???
رفعت راسهة وتخبلت لج هاي شنو وجهج ???انداريت ع شفق احجي انتي شكو???لج احجي منو مد ايده عليج???
سمر:كمت ابجي امي...
ليث:ليش شمسوية وهيج امي ضاربتج هالضربة???
سمر:ليث والله ممسوية شي بس شافتني واكفة يم شفق وظلت تحجي وتصيح ولوت ايدي حيل وامي.....وسكتت
ليث:اي وانتي شسويتي???
سمر:ليث والله متحملت من ظلت تحجي ع شفق وهي ممسوية شي بس كتله خافي الله بينة ليطلع حوبتهة بوحدة منه،يجوز تشوفه غلط ان احجي هيج وياها بس لازم واحد منه يصحي امي من الي هي بيه...قاطعني ليث...
ليث:سمر اشوف طولان السانج،بعدين شفق عدهة السان وتكدر تدافع عن نفسهة مو جاهلة هي وتحجين نيابة عنهة وشغلة ثانية عيب تتطاولين ع امج هيج،لزمت وجهة انقهرت عليهة وبداخلي كلت الله يسامج يمة ع هالضربة،خدهة صاير احمر فدنوب اثر طبع اصابعهة وزراك جوة عينهة،
شفق:كلش انقهرت من سمعت حجي ليث حزت بكلبي حجايتهة لان انضربت اخته بسببي،هسة بين ع حقيقته همزين بين هسة والله لو يموت بعد ماعندي اي حجاية وياه.
جدي:سهام...سهام....
سهام:نعم عمي..
جدي:ليث موجود??
سهام:اي بغرفته...
جدي:صيحي خل يجيني للديوان...
ليث:صاحتني امي وكالت جدك يريدك بالديوان،رحت لجدي سلمت عليه وكعدت خير جدي آمر...
جدي:شوف ليث ترى بنت عمك رادوهة مني صار 3خطابة يجوهة وانت تعرف اني رايدهة الك بس انت كول حتى نسويهة رسمي ونسد باب الخطابة هااا شتكول???
ليث:والله جدي هي يمك وانت تدري برأي من زمان...
جدي:هاي هي لعد توكلنة ع الله...
شفق:جنت كاعدة بالغرفة وطبت سهام علية مثل العاصفة باعي لج هسة راح يدز جدج عليج وراح يبلغج بخطوبتج انتي وليث الي اريده منج ان ترفضين لا قسم بالله تشوفين شي مشايفته بحياتج فهمتي لو لا باعيني ترى هذا اخر انذار الج...
شفق:الله يخليج اني شنو بيدي انتي تعرفين هنا ماعدكم بنية تكول لا وتعرفين هيج...هيج..جدي الي باله يتنفذ...
سهام:كتلج وانتي اذا سبعة خالفيني وياشفق اذا مالعبت بيج طوبة...
عافتني وطلعت ظليت ابجي حتى لطمت يعني شلون مراح اخلص ماكو نهاية للي ديصير..النوب جتني سمر وكالت جدي طالبج بالصالة...لبست حجابي ونزلت طبيت لكيت ليث هم كاعد سلمت وكعدت بس ابد مشلت عيني ع ليث..
جدي:هلة بنيتي شلونج اخبارج،ان شاءالله بخير???
شفق:بخير جدو مدامك بخير...
جدي:ان شاءالله دومج بخير،شوفي بنيتي مثل متعرفين انتي صرتي14وكبرتي والعالم كامت ادك بابي تريدج،ومثل متعرفين هنا مننطي للغريب بناتنة عزيزات مننطيهة الة للي يستاهلهة وصار هواية ناس تتطلبج مني واني سبق وحجيت انتي لليث واني قررت نسويلكم خطبة حتى الناس تكطع رجلهة...
شفق:بس جدو اني بعدني صغيرة ع الزواج وشغلة ثانية بعدني ادرس،واساسا ليث حاسبته مثل اخوية ما اكدر ارتبط بيه...
ليث:سمعت رد شفق ع جدي ثرت شنو اخوية شنو ما اكدر ارتبط بيه،لازم هسة صرت ما اعجب،هاي هي جدي سد الموضوع...
جدي:شنوووو???لازم زعطوط كاعد كبالكم واحد يكول لا والثاني يسد الموضوع بكيفه،،،،
ليث:لا مو هيج الحجي جدي....
شفق:لا والله جدو....
عاط جدي بكل صوته:كافي بصوت يرعد راح اسوي نفسي مسمعت الي كلتوه ثنينكم وانتي شفق اخوج،عادي باجر عكبة تتعلمين علية كزوج...
شفق:بس جدو بعدني صغيرة،،،،
جدي:كلت كافي وضرب بالعوجية مالتة ع الكاع حيل،اني ماعندي بنت تتشرط علية فهمتي لو لا،يلة روحي لغرفتج واياج مرة ثانية توكفين بوجهي هالوكفة...
شفق:كمت لحيلي وتقدمت ع جدي:اسفة جدو والله موقصدي لاتزعل مني حجايتك ع عيني وراسي والي تأمر بيه اني حاضرة،بست راسه ورحت....
تلكتني سهام من الباب وجرتني حيل:هاااا يالحية سويتي الي كتلج عليه???
شفق:رفضت وجدي عصب ومقبل حتى ليث حاول وياه ومقبل...
سهام:ولج يعني شنوووو،بعدين شنو ليث رفض يعني??
شفق:من شافني رافضة هو هم حاول يرفض بس جدي رزلنة ثنينة...
عفتهة ورحت لغرفتي ذبيت حجابي وتمددت ع الجرباية حاولت اهدأ شوية وابعد القلق،بس ماكو فايدة والنوب جنت رايدة احاجي اهلي وهسة جدي معصب مني...استغفر الله يارب،
ليث:ظليت صافن معقولة شفق رفضتني،جدي ليش جبرت شفق وغصبتهة ع الخطوبة???
جدي:ليث انت عود العاقل والي تفهم بنت عمك بعدهة صغيرة ومتفهم بهيج امور وشغلة ثانية تدري كلش زين سبب رفضهة هي امك تدري كلش زين وارها..وراها،،وتزن عليهة وكلنة نشوف تعاملهة الجاف وية شفق،وهي طفلة بعدهة متتحمل كل هذا،لهذا اني اريد احطهة تحت جناحك وانت عينك عليهة وانت ع كيفك وياها،يلة اني طالع لديوان ابو جبار هناك مسوي لمة يلة في امان الله..
ليث:الله وياك جدي تريد اوصلك???
جدي:لا بوية السايق موجود..
ليث:طلعت من الصالة وداصعد لغرفتي سمعت امي بالمطبخ رحت عليهة قبل لا ادخل سمعتهة تبسبس هي ورشا وترزلهة:انتي صوجج انتي فاهية هو شاب متعرفين شلون تجريه...
ليث:تخبلت معقولة امي توصل لهالدرجة تريد تورطني وية بنت اختهة كله في سبيل ازوجهة،عفتهم وصعدت صفنت ع غرفة شفق بدون وعي لكيت نفسي واكف ابابهة دكيت الباب
شفق:غفيت دقايق وحسيت الباب يندك كمت لحيلي والنوم بعيني فتحت الباب شفته ليث:تفضل محتاج شي???
ليث:فتحتلي الباب ومبين جانت نايمة ظليت صافن بملامحهة نسيت كل الحجي الي جنت ناوي احجي..
شفق:ليث...ليث...
ليث:اي،اكلج انتي صدك رافضة فكرة الزواج لو رافضتني???
شفق:صفنت شحجي بعدين قررت احجيله سبب رفضي،ليث امك متريدني اكون زوجتك وسبق وكالتلي اكثر من مرة بوجهي وهددتني قبل لا ادخل عليكم اذا وافقت تدمر حياتي وشغلة ثانية اني ممجبورة ارتبط بأنسان يعتبرني هم بحياته او مجبور يتحملني...
ليث:اولا مالج دخل بأمي اني مو زعطوط وتمشي كلمتهة علية وبعدين هاي حياتي المفروض اني اختار الانسانة الي تشاركني حياتي،والشغلة الثانية منو كلج اني مجبور عليج او مجبور اتحملج مشكلتج مدتعرفين شكد احبج وشكثر معزتج عندي...
شفق:ليث ولو كل الي كتله صح بس تبقى شغلة رفض امك ورانة افرض اذا ارتبطنة مراح تتركنة وحياتنة تنكلب جحيم ابسط شي اليوم ثنينة متحملنة كثر الضغط وانفجرنة بوجه بعض تعتقد وية هيج ضغوط راح نكدر نكمل???خلينة كلمن بدربه واني راح احاول احجي وية جدي من يهدأ..تخبل ليث وكام يصك ع سنونه حتى ليطلع صوته...
ليث:شوفي اذا انتي عندج عادي ازوج غيرج اني مستحيل اخليج تروحين لغيري انهي عليج واخليج كبالي لو اني لو لا فهمتي..عفتهة ومشيت طبيت لغرفتي شمرت كل الغراض الي ع الميز،اني الج الا اخذج غصب عنج برضاج اخذج هينة شفق تريدين تروحين لغيري هينة يابت كلبي هينة....
شفق:ظليت صافنة علية شلون اتعصب ويصك بسنونه خفت منه ومن راح سمعت صوت غراض تتكسر بغرفته،دخيلك ياربي شكد عصبي احسن شي اسكت وما احجي شي بس شلون ياربي اذا حجيت ما اخلص من لسان جدي والنوب ليث اسكت تجيني سهام،رفعت ايدي للسكف دخيلك ياربي ريحني.جريت حجابي ونزلت سمعت صوت البنات ملتمين جوة كعدت يمهم سوالف وضحك ورشا كل شوية متعيقلة بشغلة وسهام طايرة بيهة
---
