#ظلموني_ولكن.....
الجزء الثامن...
ليث:طبعا راح احجيلكم اساس المشكلة شلون بدت مثل متعرفون كعدت اني وشفق وحجتلي ع البيت وكلشي وجنت ناوي اوضع حد لهالتسيب الي بالبيت وفعلا رجعت للبيت وكعدت وية امي وصارت لغوة بيناتنة وامي كامت تحجي ع شفق ونكرت كل الحجي وموصلت لنتيجة وياها بالتخير هددتهة اوصل الحجي لابوية وجدي وهو مجرد تهديد بس ردتهة تخاف وتفك شوية عن البنية،ورحت لغرفتي سبحت وصليت و وراها رحت اشرب جاي يم جدي،بس الكارثة الكبرى مجنت متوقع امي هالكد ظالمة لكيتهة مشتكية لجدي ع ان شفق تأثر علية وتعبي حجي براسي وان اكثر من مرة تجيني للغرفة بدون حجاب اني نكرت ومرضيت ع امي وجدي كلهة اذا كلامج جذب مالج كعدة بيتي بعد وابوية هم رد كال اذا صدك مرتكبة ع هاليتيمة ميشرفني هيج وحدة تبقى ع ذمتي اني هنا تخبلت صرت بين نارين،اذا ظليت انكر معناها امي تطلك واحنة عدنة عيب الطلاك بهيج عمر والنوب خواتي منو يفكر بيهن بعد شفت امي مدنكة وتبجي اندارت علية سوي الي يرضيك يا ابن بطني عافتني وكامت اضطريت ان اسكت،
جدي:ها ليث اشو سكتت???جنك ممتأكد???
ليث:هااااا هو بس هذا الي سمعتهة،طبعا ترزلت ان شلون انطي بأمي وخواتي ومجنت ادري امي عدهة اضافات بالحجي ولهذا من جدي جاب طاري رشا تخبلت بس مكدرت احجي لان اذا كذبت امي كدامهم معناها هجمت البيت فظليت ساكت بس كل نضرة من شفق تشكه لكلبي نصين والله تمنيت لو ميت ولااصير بهيج موقف وياها ومن طلعت شفت نضرة منهة عمري كله ما انساها نضرة انسانة مطعونة ومخذولة من اقرب الناس الهة...كرهت روحي والدنيا شغلت السيارة وطلعتبلكت ارتاح شوية النوب، ظليت الوب ياربي اني غلطت وظلمت انسانة بريئة مستحيل لازم اصلح كلشي وخل تتأذى امي حتى توب كله ولا الظلم رجعت للبيت باليل ردت اروح لجدي اكله بس كلت خل اروح الهة بالاول،صعدت لغرفتهة ودكيت الباب سمعت صوت مخنوك من البجي وبيه بحة...
شفق:جنت كاعدة بالغرفة ابد منزلت حتى متعشيت بس اكلت نساتل2وشربت عصير علمود السكر ظليت بس ابجي واشكي رب العالمين وسمعت الباب تندك كلت تفضل وشلت السجادة وظليت بحجاب الصلاة دخل ليث بس مبين خجلان ومتردد:تفضل ليث شرايد???وفتحت الباب ع وسعهة تفضل لاتخاف الباب مفتوحة وهاي لابسة حجاب كامل مال صلاة يعني مالي اي تأثير عليك..
ليث:تخبلت من حجت هيج وياية ايست ان تتقبلني بعد،سمعي شفق عاطت بية:ديربالك تجيب اسمي ع لسانك فاهم لو لا???اني ثولة الي كدرت امن بيك،ليش بس اريد افهم شنو الي سويته???شنو ذنبي اذا ابوية حب امي وازوجهة اني شنو ذنبي اتحمل عواقب سنين حقدكم ع اهلي???بس كلهة بجفة وموقفك اليوم بجفة جانت ضربة صحتني ع زماني وهمزين هسة بينت،،،
ليث:بس اسمعيني الي صار والله خارج عن ارادتي والله العظيم مقصدي انطي بيج،،ولج اني تعاركت وية امي علمودج...
شفق:عطت بيه كافي كذب كافي تعاركت وشنو الفايدة هاااا كلي شنو الفايدة وانت...وانت...كعدت بالكاع ابجي متحملت،انت جنت املي الوحيد هنا وسندي من بعد الله حسيت كلشي بيه ارتاحلك واطمئن الك،ليش هيج كسرت كلشي بداخلي????
ليث:متحملت حجيهة كعدت يمهة بالكاع حاولت اتقرب منهة بس هي نفرت مني،عرفت صعبة بعد ترجع مثل قبل وياية،بس اسمعيني للاخير وصدكيني وعد مني بعد لا ادخل ولا اتعرضلج بشي بس اسمعيني...
شفق:تفضل احجي..كول...شعندك بعد???
ليث:شوفي اقسملج بالله وجنت شايل قران حطيت ايدي علية اقسملج بالقرآن وعزة الله وجلاله كل كلمة راح احجيه هي صدك،وظليت حاط ايدي ع القران،شوفي انتي من طلبت منج تحجيلي ع الشغل وكلشي بالبيت لان جنت حاس بيج وبتعبج وانتي الله شاهد علية عزيزة علية ودخلتي كلبي وتعلقت بيج وما اتحمل اشوفج هيج وجنت ناوي ارجع من وكت واحجي كيل وية جدي حتى لاتحاول امي تسوي شي،صدكيني وكفت ضد امي لان غلطانةو من رجعت من الشغل صعدت لامي وتعاركنة اني وياها ونكرت كلشي،وطلعت من غرفتهة وجانت زعلانة مني بس الي مجنت متوقعة ان امي تروح لجدي وتحجيله بكلشي بس عكست الحجي وزيدت بيه طبعا ومن كعدت وية جدي وكام يحجي علية ظليت صافن شلون عرفوا ان اني شفتج بدون حجاب ومن وكفنة يم غرفتج كل التفاصيل وصلت لجدي تخبلت كلت لو احد شافنة لو انتي الي حجيتي،وجنت تريد احجي كلشي بس جدي وابوية صدموني بردة فعلهم،جدي كال يطرد امي وابوية يطلكهة وانتي متعرفين هنا الي تطلك من رجلهة بهيج عمر شنو الي يطلع عليهة وبعيد عن هذا خواتي محد راح يوصلهم لان امهم مطلكة وتعرفين جدي وسمعته صح اني ظلمتج ونكرت كلشي بس صدكي بوقتهة جنت تايه بس هسة عرفت غلطي وان شاءالله اصححه ميهمني منو يتأذة او لا المهم ما اسكت بعد اني عمري كله مظلمت بشر وهسة اجي اظلم الانسانة الي حبهة كلبي...
شفق:سمعت كل كلامه،ضحكت،كتله سامع ان الدنيا دولاب يفتر...
ليث:صفنت عليهة شنو قصدج???
شفق:قصدي ان حجيت او لا بعد ميهمني،وانت خلص بعد متهمني واني متأكدة ان راح يجي يوم ورب العالمين ياخذ حقي منكم واحد،واحد،وهاااا ياريت كل الكلام الي كلته تنساه وفعلا رشا كلش تناسبك...وانداريت.
ليث:ثرت وصرت اعصاب،انتي شدتحجين???
شفق:ياريت تطلع لان تعبانة واريد ترتاح...
ليث:فار دمي وصرت اعصاب،ماشي شفق براحتج،عفتهة وطلعت...
نزلت جوة لكيتهم كاعدين،دخلت بلا سلام ولاشي،اسمعوني للاخير كل الي حجته امي جان كذب وشفق بريئة من كل الي كالتهة واني سكتت لان بوقته ضعفت بسبب خواتي لان اذا طلكت امي شراح يكون مصيرهم بس اني مكدرت انام واني ادري ظلمت انسانة من دمي ولحمي وعرضي.
مصعب:صدك جذب وهسة جيت تحجي لك انت تدري بيه ما افرط بيكم جان مجرد تهديد حتى اذا امك جذيت تتراجع،تدري بعملتك هاي وكعت من عيني.
جدي:ليش هيج سويتي هيج سهام بيش اذتج???
ليث:جدي وابوية عصبوا ع امي وهي كامت تبجي وجدي راد يطردهة بس بيبيتي ادخلت وهدئتهم...
مصعب:باعي هسة ادز ع شفق تعتذرين منهة والشغل بالبيت يتقسم واي تصرف ثاني قسم بالله اتصرف غير تصرف..
بيبي:لا انت تخبلت فدنوب شنو تعتذر من وحدة بكد القندرة من تجي اني احجي....
شفق:جنت كاعدة واندكت الباب لبست حجابي وفتحت الباب شفت سمر تبجي،خير بعد اكو شي نسيتي تحجيه???
سمر:كمت ابجي اسفة والله مجنت ادري امي كالت انتي تحركين اخوية علينة وليث اجة وصيح وغلط عبالي صدك حجي امي،بس هسة بين الحجي وجدي وابوية يردوج...شفق سامحيني الله يخليج...
شفق:روحي واني انزل وراج وسديت الباب بوجهة،ياربي هسة شراح يطلعولي النوب استغفرالله باوعت بالمراية عدلت ملابسي ولفيت الحجاب زين ونزلت لكيتهم مجمعين بالصالة دخلت بدون سلام ولا كلام...
بيبي:شبيج متعرفين تردين السلام???
شفق:ظليت ساكتة مجاوبتهة،نعم جدي دزيت علية???
صفنوا علية..
جدي:اي بنتي صار سوء بالفهم بالموضوع وهسة عرفنة انتي مالج دخل بالموضوع انتي بنتنة ومنة وبينة والشغل منا وغاد البنات يساعدنج بيه.....
شفق:ماشي،من رخصتك اكو شي ثاني لو اكدر اروح???
جدي:لاهاي هي ......
ليث:دخلت شفق علينة ومحجت ولاحرف حتى مسلمت حسيت بحركة كلبهة وكرهة النة،والنوب بيبيتي ذبتلهة حجي وماكو اي ردة فعل وجدي حجة وياها وكلهة محد يتعرضلج وهم ظلت ساكتة ورادت تطلع اني وكفت وصحت عليهة وكلهم يباوعون علية:من رخصتك جدي بما ان الدوام راح يبدي شنو رأيك انسجل شفق وية البنات???
شفق:انصدمت بعرض ليث،وباوعت ع جدي ومنتظرة رده،
جدي:هاي هي ماشي باجر اخذهة وروح وسوي اللازم.
ليث:ماشي جدي ان شاءالله،ابتسمت بوجه شفق،بس هي ماكو عافتني ومشت،اختنكت كلش من تصرفهة صعدت لغرفتي طبيت سبحت وظليت جوة الدوش ومخنوك لان اول مرة بحياتي هيج اتصرف واسكت عن الحق واظلم بشر لا ومو اي وحدة الانسانة الوحيدة الي نبض كلبي لخاطرهة كملت توضيت وصليت ركعتين استغفار وظليت استغفر الي ان نمت ومحسيت ع روحي......
شفق:كعدت ثاني يوم ب8الصبح شبعانة نوم ومرتاحة ولاعجنت ولا خبزت كلت شيسون خل يسون غسلت وبدلت ونزلت لكيتهم كاعدين بالصالة صبحت عليهم بيبيتي كالت:خيرج يمسعدة جان بعد وكت???
جدي:احنة شكلنة صفية مكافي سكتت ع الي صار شفق بعد محد اله دخل بيهة منا وجاي عدهة دوام ودراسة روحي بوية حضري نفسج ليث ينتظرج بالحديقة.
شفق:ماشي عفتهم وطلعت للحديقة تنهدت تنهيدة طويلة: صباح الخير..
ليث:جنت كاعد بالحديقة صافن ضايج من الي صار البارحة انتبهت ع صوت شفق جريت حسرة:صباح النور...
شفق:جدو كال ليث ينتظرج اذا عندك شغل او شي...
ليث:لا ماعندي بس اتريك ونطلع...تريكتي???
شفق:هسة راح اتريك.
ليث:تهالي نتريك سوة.
شفق:لا شكرا اخذ راحتك،عفته ومشيت،جابت سارة الريوك شربت بس الجاي وطلعت انتظرهة بالسيارة،شوية وطلعت لابسة فستان مال محجبات طويل نيلي وبيه ورد بيجي وشال بيجي وجوة الحجاب هذا الي يلبسهة جوة الحجاب(كاب)نيلي وجنطة وحذاء بيجي طالعة تخبل ظليت صافن محسيت الا هي يمي اندارت علية...
شفق:شفته صافن علية بلا وعي حتى محس بيه من صعدت،احم...تنتظر احد بعد???
ليث:هااااا...لا...لا...شغلت السيارة وطلعت رحنة للمدرسة وسجلتهة صح جانت مارة عليهة دروس بس كالت عادي ان شاءالله ادبرهة و وضحت الظروف للمديرة وشافت شهايدهة عرفت ان هي متفوقة بالدراسة استلمت كتب وكالت للمديرة ان شاءالله باجر ابلش لان ملبست الزي معبالي اداوم بنفس اليوم...
المديرة:ماشي بنتي،بس اهم شي الزي والالتزام وانتي مبينة شاطرة وسباعية ومينخاف عليج،انت اخوهة رجلهة???وضحكت
ليث:هااا ضحكت لا ابن عمهة...
المديرة:ضحكت الله يخليكم لبعض بس ما اريد شي يأثر ع دراستج هاااا???
شفق:ضحكت وصرت طماطة من الخجل لان كلهة ابن عمي وهنا معروف البنية لابن عمهة،فهي عبالهة بيني وبينه شي،سلمنة عليهة وطلعنة وصعدت للسيارة ودرت وجهي حتى ليحاول يفتح اي موضوع وياية....
ليث:وصلتهة للبيت وطلعت للشغل واني روحي طافرة من الدنيا خابرتني امي:نعم..
سهام:هيج يا ابن بطني هيج تسوي بيه،ع العموم بيت خالتك سهيلة يمنة ع الغدة تعال عيب تعال ع الاقل لتفشلني كدام اختي وجدك كال اني افهمهم واكلهم غلط صار شفق مالهة دخل ...
ليث:الله كريم...
سهام:مو تفشلني كافي الي صار...
ليث:ماشي....ماشي...وسديت التليفون وشمرته ع المكتب.
---
