قادم من الموت

البارت السابع

براء :- دخلت للأستقبال أول ما شافني بدت الهلاهل والصلاة على محمد وأنه لو يذبحوني ما يلگون بيه قطرة دم من المستحه والخوف والأرتباك اللي چنت بي
هاي هيچ يم النسوان چا شلون لو منتظر موجود يمكن تصير بيه سكته دماغيه لو شلل رباعي😂
اخذتني خاله أم منتظر من أيدي ومشتني لخالات منتظر وعماته سلمت عليهن وعرفتني عليهن كلهن چانن حبابات حيل بس اكو بنات سلمن عليه من ورا خشومهن ويباوعلي ويتشاورن عليه ويأشرن حسيت نفسي بيه شي نشاز لو طالعه مو حلوه
گعدت على الكرسي وكلها تباوعلي وبدت الأغاني والصفگات وگامن يرگصن البنات وحتى النسوان الكبار لأن كلها تحب منتظر وأهله وهو بس هل واحد ف كلها فرحانتله
شوي وفتحن جنط النيشان وبدت تطلع بي مره چبيره بالعمر لأن عادتهم يتبركون بالكبار ويعتبرونه فال زين وجابتلي الحلقه لبستنياها ولبستني الساعه وانطتني القرأن بسته وخليته بأيدي وبعدين طلعت الشغلات البقيه والملابس راوتهم ورجعت ضمتهم بالجنط
بعدها صورتني خاله أم منتظر وما قبلت أي أحد ثاني يصورني لأن منتظر منبه عليهن ما يصورن أبد
قدمت ماما الكيك والعصير الهم وبقو سوالف وضحك للساعه ١٠ ونص بالليل بعدين ترخصو وراحو

منتظر :- بعد ما طلعو من البيت شوي وسمعت صوت الهلاهل ويصفگون تمنيت أگدر أشوف براء شطالعه اليوم
بقو هناك للساعه ١٠ ونص بعدها سمعت هوسه عرفت المهرجان رجع للبيت دقايق وصاحتلي أمي أنزل للصاله
نزلت تلگتني كلها تسولف على براء ما فهمت شي منهن رحت گعدت يم أبوي اجتلي أمي تسولف..

أم منتظر :- الله يهنيك يمه شطالعه براء بس تگول للگمر غیب وآگعد بمكانك
اللهم صل على محمد وآل محمد بدر تضوي وصورتها الك بالموبايل حتى تشوفها
شوف ذني الصور (واخذت موبايلها تريد تفتحه تطلع الصور)

منتظر :- على بختچ يوم أجاي تسوين

أم منتظر :- خير وليدي
اريد اراويك صور براء الأخذتهن الها اليوم حتى تشوفها

منتظر :- لا ما يصير هسه أشوفها حرام لأن لسه ما صارت مرتي هي هسه بس خطيبتي وحرام عليه أباوعلها بدون حجاب وبملابس مو مستوره
أنه شايفها زين قبل ومن تصير مرتي بشرع الله بذاك الوقت أباوعلها براحتي

أبو منتظر :- الله يوفقك بنيي وينطيك على گد نيتك
ما راحت تربيتي الك ابلاش
أنت رفعة راس الي واتباهه بيك گدام العالم لأن ما ترضى تسوي شي حرام ومو بشرع الله

أم منتظر :- بعد عمري اليفهم بالأصول وما يرضى بالغلط
الله يرضى عليك ييمه مثل ما راضين عليك أحنه

أبو منتظر :- يابه منتظر شنو رأيك نعقد عقد شيخ بعد يومين؟

منتظر :- بكيفك يابه اللي تشوفه أنت وأمي

أبو منتظر :- چا أروح أتصل على أبو مصطفى وأبلغهم وأشوف رأيهم خاف ما يگدرون

منتظر :- ماشي يابه
راح أبوي من يمنا لغرفته حتى يتصل على عمي أبو مصطفى ويگوله
بقى فتره بتدين طلع من غرفته وأجه يمنا