قادم من الموت

البارت الثاني عشر

منتظر :- مرت أيام أجازتي بسرعه ما حسيت بيها أبد خلصتها كلها وي براء أدرسها وأشجعها على الإمتحانات لأن هي ذكيه ما شاء الله بس هي دوم تضوج من أجيب طاري الدوام ورجعتي للقاعده.
خلصن ال ١٥ يوم وصار لازم ألتحق ف يومها عزمنا بيت عمي أبو مصطفى يتعشون يمنا بس براء أجت من وقت حتى تساعد أمي تخلص طبخ وتنظيف لأن وحدها بالبيت ومحد يعاونها بشي هي كله عليها.
أنه أستغليت الفرصه أتغزل بحبيبتي ونسولف ونضحك سوه قبل لا التحق بس أريد أطمنها شوي لأن أعرف بيها متوتره وخايفه وضايجه وكلشي بيها وأنه ما أريد أي شي يأثر على دراستها ومستقبلها وأريدها تحصل معدل زين...

براء :- خاله خلصت تنظيف البيت شسوي وياچ بعد؟

أم منتظر :- عاشت أيدچ يمه بس أرتاحي ورجعي درسي ما بقه لأمتحانچ وقت أنه ما عندي شي خلصت شغلي كله

براء :- اليوم ماخذه أجازه من الدراسه أريد أرتاح منها شوي ضجت حيل دوم أدرس

أم منتظر :- ماخذه أجازه من الدراسه لازم ترتاحين وتنامين وتاكلين وتسوين كلشي تريدي مو تجين على الطبخ والتنظيف والتعب وياي يعني فوگ ضيم دراستچ أزيدچ ضيم الشغل

براء :- قابل شمسويه ترا الشغل ما يموت أحد

أم منتظر :- الحاجه نور الوجه بس ميخالف أريدچ ترتاحين اليوم ومن تخلصين أمتحانات وتجين لبيتي عروس بعد العرس أخليچ تشتغلين شگد متريدين

براء :- هههههه صار من عيوني

منتظر :- هاا يوم من هسه جاي تقسمن شغل البيت

أم منتظر :- أي چا شلون حتى كل وحده تعرف شغلتها

براء :- لا بذاك الوقت أنتي ما راح تسوين شي
بس أجي أنه للبيت أنتي تطلعين تقاعد من كل الشعل وأنوب أنه اللي أستلم الشغل كله وأنتي تستلمين القياده وتنطين الأوامر وعليه أنفذ

منتظر :- ما دام وحده تنطي الأوامر و وحده تنفذ معناها أنه الأطير بيچن

الكل :- هههههه

منتظر :- مر الوقت وبراء تساعد أمي بالمطبخ علما كملن العشه وأنه أسولف وياهن ونضحك وفرحان بشوفة أغلى أثنين بحياتي گدام عيني وأحاول أشبع من شوفتهن ما أعرف ليش بس أكو أحساس بداخلي يخليمي أباوعلهن وما أريد أبعد عيوني عنهن لو بيدي أشيلهن وأفتح گلبي وأضمهن بي يجوز لأن باچر من الفجر راح ألتحق لتكريت ف أحس هذا الإحساس الغريب
صار المغرب وأجه أبوي چان طالع للسوگ وأجو بيت عمي أبو مصطفى ألنا علما أذن المغرب گمنا صلينا ورجعنا سولفنا شوي بعدها براء وأمي وخاله أم مصطفى فرشن السفره وشالن الأكل خلنه عليها

براء :- فرشنا السفره وبدينا نخلي الأكل عليها وچنه مسوين دجاج شوي وبرياني لحم وفواكه ورگي وبطيخ ولبن وعصير وخضره ومحلبي وطلعت سفره تجنن گعدنا كلنا أكلنا وسوالف وضحك
بعد ما خلصنا من العشه لمينا السفره وغسلنا المواعين أنه وأمي وخالتي بعدها حضرت الچاي ورحت صبيتلهم وگعدت يم منتظر نسولف أنه وياه وأمي وخاله يسولفن على جهه وأبوي وعمو يسولفون سوه على جهه
صارت الساعه ١٠ رحت للمطبخ وأجه منتظر وراي حضرنا البقلاوه بمواعين وكرزات وعصير وشاميه وأخذناه ألهم للصاله وگعدو يتعللون هناك ويسولفون ويضحكون بس بداخلي شي غريب أحس گلبي ينعصر وينمرد مرد كلما أجت عيني بعين منتظر بودي أبچي بس ما أعرف شنو سبب هذا الشعور اللي جاي أحس بي