قادم من الموت

البارت العشرون (الأخير)

منتظر :- گعدت وي اهلنا وسولفتلهم كلشي صار ويانا من يوم الأخذونا من معسكر التدريب لحد ما رجعت الهم والتقيت بيهم
انه اسولفلهم شلون چانو يضربوني ويعذبونا بالسجون وشلون چانو يقتلون الناس بدم بارد وما عدهم مخافة الله ولا مخلين الله بين عيونهم وچانو ظالمين الناس ظلم مو طبيعي يعني كلشي چانو يتعاملون وياه بالموت وما اعرف شلون طلعت من الموت هذا ورجعت لأهلي لأن ما چنت متوقع ارجعلهم ولا أشوفهم ومحسب حساب بأي لحظه اموت على اديهم مثل البقيه بس رب العالمين دخيل اسمه كتبلي عمر جديد وقسملي ارجع لأهلي وأنعم عليه بشوفتهم
طول المده الچنت احچيلهم بيها چانت أمي وخالتي وبراء يبچن ودموعهن ما وگفت ابد
خلصنا سوالف وأشوف اهلي وبيت عمي أبو مصطفى فرحانين حيل برجعتي الهم وانجمعو بيه بعد سنتين فراگ وعذاب
أبوي صار يترخص من عمي ونرجع لبيتنا...

أبو منتظر :- هسه نترخص

أبو مصطفى :- وين تريدون
ماكو طلعه منا ابد اليوم عشاكم يمنا

أبو منتظر :- لازم أحنه النعزمكم يمنا بمناسبة جية منتظر ورجعته النا بسلامه

أبو مصطفى :- ماكو فرق بيناتنا احنه اهل وبيت واحد

أبو منتظر :- واكثر من اهل يشهد الله

أم مصطفى :- منتظر گول يمه شمشتهي نسويلك عشه؟

منتظر :- كلشي يطلع من ايدچ خاله طيب
صار سنتين ما ماكل اكله طيبه وخاصة اخر ٦ اشهر كامو يجيبولنا خبز لو صمون يابس وتمر نلزم الصمون ننگعة بماي وناكله لأن ابد ما ينوكل يابس

أم منتظر :- سوده عليه يبعد عمري
الله لا ينطيهم العافيه ولا يوليهم ويسلطهم على عباده

أم مصطفى :- شنو الأكله اللي على بالك نسويها وناكلها كلنا سوه؟

منتظر :- إذا هيچ جاي علي بالي اكل تمن أبيض وباميه لأن كلش مشتهيهن وما ماكلهن صار سنين

أم مصطفى :- تدلل من عيوني

منتظر :- سالمات عيونچ خاله

براء :- گامت امي للمطبخ حتى تسوي العشه وراحت وراها عمه تساعدها
درت وجهي لگيت منتظر يباوعلي بس شافني باوعتله ابتسملي
ابتسمتله وگمت گعدت بالكرسي اليمه وبقيت بس اباوع بعيونه بدون ما احچي أي شي هو حاچاني وگالي...

منتظر :- لو تدرين شگد مشتاقلچ

براء :- والله أنه اكثر وگلبي طاگ عليك بودي تبقى هنا يمنا ما تروح للبيت وتعوفني

منتظر :- تعالي وياي لبيتنا باتي يمنا

براء :- هههههه شلون ابات يمكم؟ واهلي شأگلهم؟

منتظر :- ما بيها شي غير أنتي مرتي محد راح يمنعچ

براء :- حتى لو محد يمنعني بس استحي من عمو وخاله ومن اهلي وزحمه گدامهم
وأنه كل يوم اروح لبيتكم انظف واطبخ واساعد خاله بعدين ارجع لبيتنا