قادم من الموت

البارت الثامن

منتظر :- گعدت الصبح كلش نشيط يمكن لأن نمت مرتاح الليله الفاتت
أول شي سويته فتحت الموبايل وباوعت لصور براء لأن حسيت نفسي حيل مشتاقلها بعدها گمت من فراشي غسلت ونزلت أتريگ وي أهلي بالصاله
خلصت ريوگ وطلعت للمحل وبطريقي عبرت على محل يبيع موبايلات ف أجه أبالي أشتري موبايل لبراء حتى أگدر أتواصل وياها بس خفت أهلها ما يقبلون
أتصلت على أبوي وحاچيته حتى يسأل عمي أبو مصطفى إذا يقبل أو لا ف گالي راح أتصله وأشوفه
بعد ربع ساعه تقريباً أتصل عليه والدي وگالي عمك أبو مصطفى ما عنده إعتراض وگال هذا الشي من حقه
ف من رجعت من المحل للبيت مريت على محل الموبايلات وأخذتلها موبايل وأكسسواراته وياه ورحت للبيت والعصر أمي أتصلت على خاله أم مصطفى وگالتلها نريد نجي يمكم بالليل
رجعت المغرب من المحل صليت وتعشينا ورحنا لبيت عمو أبو مصطفى وأخذت الموبايل وياي دگينا الباب طلعلنا عمي أبو مصطفى سلمنا عليه ودخلنا للصاله گعدنا أجت خاله أم مصطفى سلمت علينا وأنه عيوني يسرقن نظرات لكل مكان أريد أشوف براء لأن حيل مشتاقلها بس ما شفتها
شوي ودخلت براء للصاله شايله كاسات الماي وسلمت علينا وگعدت يم أمها
بقو أهلي يسألونها شلونها وهي تجاوبهم شوي وگال عمي أبو مصطفى...

أبو مصطفى :- منتظر

منتظر :- نعم عمي

أبو مصطفى :- أخذ مريتك وروحو گعدو بالغرفه سولفو براحتكم

منتظر :- لا عمو خلينا وياكم

أبو مصطفى :- أحنه كبار وسوالفنا كلها قديمه وكل يوم نعيدها نفسها لو نحچي على السياسه وأمهاتكم يسولفن على السوگ أكيد

الكل :- ههههههه

أبو مصطفى :- أنتم شباب وأبداية حياتكم روحو أحچو براحتكم

أبو منتظر :- أي يابه روح أنت ومريتك للغرفه گعدو سولفو

أم مصطفى :- هسه عليمن مستحين شو گومو وياي

منتظر :- سحبتنا خاله أم مصطفى من أدينا وأخذتنا لغرفة براء فوگ وگالت سولفو براحتكم وسدت الباب علينا وراحت
لزمت أيد براء وأخذتها گعدنا على الچربايه وسألتها..
شلونچ؟

براء :- الحمد لله زينه
أنت شلونك؟

منتظر :- الحمد لله زين بشوفتچ
من گلتلها هيچ خجلت ونزلت راسها بس شلون طالعه وهي خجلانه تگول گمر
اخذت الموبايل وگلت لبراء..
هذا جبته الچ

براء :- باوعت بأستغراب لمنتظر وسألته..
شنو هذا

منتظر :- هذا موبايل جبته ألچ حتى أگدر اسأل عنچ وأعرف أخبارچ

براء :- فرحت حيل لأن راح اگدر اتواصل وي منتظر واسأل عنه شوكت ما أشتاقله بس خفت خاف أهلي ما يقبلون أخذه ف گلت لمنتظر..
خاف أهلي ما يقبلون؟

منتظر :- ههههه لا تخافين أنه أخذت موافقة عمي قبل لا أشتري الموبايل ألچ وگال ما عندي مانع