قادم من الموت

البارت السادس

براء :- بعد ما أجو بيت عمو أبو منتظر وحچو وي أهلي على سالفة خطوبتنا وأتفقو على كلشي وقررو تجي المشيه ثاني يوم
وفعلاً أجت المشيه ثاني يوم وجابو كومه ناس أهلهم وأعمامهم وشيوخ وساده وناس معروفين وسوو المشيه على أصولها وتمت على خير وأبوي أنطه كلمته وراحو الناس من يمنا راضين على أهلي

منتظر :- گعدت الصبح على صوت المنبه حتى أدرس لأن ما باقي شي على إمتحاناتي وهاي أخر سنه ألي ولازم أشد حيلي حتى أنجح وأخلص وأروح للجامعه
بديت أدرس وتعبت هواي بفترة المراجعه والتهيت حيل حتى للمحل ما صرت أروح أخلي الصانع يروح بدالي وأنه أبقه بالبيت بس أبد ما نسيت براء ولا راحت من بالي يوم ودوم أفكر بيها وأشوفها من تجي النا كل جمعه تساعد أمي بس هي أبد ما تباوعلي لأن تستحي مني حيل
بدت أمتحاناتي وبده الظيم والقهر والدراسه وكله جد بجد لأن بهذني الأيام راح يتحدد مصيري وراح يطلع ناتج دراسه دامت ١٢ سنه وبعد أقل من شهر كملت الإمتحانات وبقت بس النتيجه..

هاني :- هاا نظوري بشر شلونك بالفيزيا

منتظر :- والله جاوبت اللي أعرفله والباقي على الله

هاني :- أنت سچاچ ما ينخاف عليك

منتظر :- ولي ولك انتم بس تطردون عيون بهذا حچيكم

هاني :- هههههههه
وين راح تروح اليوم العصر؟

منتظر :- اليوم أريد أخلصها نوم لأن ميت تعب

هاني :- يعني ما تطلع

منتظر :- لا ما بيه حيل

هاني :- هاا ماشي
أنه أتصل عليك بعدين

منتظر :- خوش حچي
يلا نستودعكم

هاني :- مودع بتريله

منتظر :- تدوس على راسك والله

هاني :- ههههههه

منتظر :- رجعت للبيت سلمت على أمي وأبوي ورحت شمرت ملازمي وأخذت منشفتي ودخلت للحمام سبحت ولبست تراكي وصليت ونزلت أتغده وي أهلي..

أم منتظر :- يمه منتظر

منتظر :- هاا يوم

أم منتظر :- يمه ما دام كملت أمتحاناتك خلي ناخذلنا نيشان بسيط لمريتك نعقدلكم شيخ ومحكمه لأن عيب من أهلها صارلنا فوگ الشهر من مشينا عليهم

أبو منتظر :- أي يابه حتى كلشي يخلص وتصير مريتك على سنة الله ورسوله وتگدر تشوفها براحتك وتحچي وياها وتتفاهمون على حياتكم براحتكم وبدون ما واحد يحچي شي

منتظر :- وهو هذا العدل
شوكت ما تتفقون وي بيت عمي أنه وياكم ما عندي أي أعتراض

أبو منتظر :- إذا هيچ خلي اليوم أمك تتصل عليهم ويحددون يوم ياخذون النيشان الهم وأنه أحاچي عمك أبو مصطفى علمود عقد الشيخ والمحكمه