كان سمانة قد طارت كرساتها تيفاوين على دفتارها كتقرى وتكتب واي كلمة شافتها كتهجاها على الاقل ولات عارفة الحروف باتقان وكتكتب مقاد خاصها غي تدرب على القراءة ولات كتخرج بوحدها لكن حدها حد الحومة لي ساكنة فيها
كعادتها سدات دفتارها وبقات كتخمم فالبلاد فانور
تيفاوين : زعما ولاد البلاد ايكونو زوينين بحال هادو وخويا بعدا كيحمق يلا فهمت تيليلا علاش غي سايرة تخمم فيه اعلم الله حالتها بعدا راجلها مسايق خبار الله اخليها رجلة واخا يكون ميت هادا اودي الحكرة الحكرة واش ربي لي بغا لينا هادشي ولا حنا لي بغيناه الصبر الصبر وصافي
وقفات مشات الكوزينة هزات جوج دراهم والسوارت لبسات عباية كحلة مزوقة بالزرق ومزيرة من جهة اليدي قادات فولارها لبسات نضيضراتها وخرجات من الدار مبتاسمة كالعادة هبطات من الدروج بخطوات تقال تمشات كتشم الهواء الملوث ديال الدار البيضاء مشات عند مول الحانوت لي كتاخد ديما الخبز وعمرها فاتو
تيفاوين : السلام عليكم بغيت عفاك خبزة
مول الحانوت: مبقاش ابنيتي الخبز
خرجات من عندو وقفات حدا الباب معرفات مدير واش اتبقى بالجوع حتا يجي محمد ولا اشنو
دفعها واحد الراجل بغا ادوز كمل طريقو وهي تدخل عند مول الحانوت
تيفاوين : عفاك اعمي واش كاين شي حد كيبيع الخبز قريب من هنا
مول الحانوت : اه كاين خبز الدار را قريب لهنا مع الدورة من هنا سيري ديريكت اتلقايه
تيفاوين : واخا الله ارحم ليك الوالدين
خرجات من المحل ضربات الدورة كما قال ليها دخلات فوسط زنقة وتمشات نيشان كتقلب على مول الخبز
بعد خطوات كتلقاه مشات عندو خدات جوج خبزات بجوج دراهم فرحات ورجعات فنفس الطريق هزات عينيها حيدات النضاضر بغات تضربها الشميشة
الشخص : الزين مجاوش معاه النضاضر
ضارت تيفاوين جيهتو مباشرة بسرعة كانو جوج رجال واقفين حاضيين لي جاي وغادي
ضارت تيفاوين بغات تكمل طريقها وتبعها نفس الشاب وقف قدامها
الشخص : اودي عطينا من وقتك غي جوج دقايق
هزات يدها حطاتها على خدها ورفعات حجبانها كمشات فمها
تيفاوين : اويلي واش مكتحشمش نتا قد جدي قرانك خدامين على ولادهم ولا حفادهم ونتا حاضي لي غادة وجاية
ضار داك الراجل شاف فصاحبو مرضاش قدامو
شدها من يدها
الشخص: وانا نستاهل لي حاشيها لوحدة بحالك
تيفاوين : هي حيد يدك نتا ولا نغوت حيد يدك
داك الشخص معرف منين جاتو دقة كانت غتلوحو فالارض كون مشدش فراسو وقف شاف شكون لي ضربو لقاه انور باينة عليه علامات الغضب
انور: غنوريك كفاش تحط يدك على بنات الناس
ناض داك الراجل باغي اتقاتل وتيفاوين غي كاتشوف
فيهم زيرات بديك جوج خبزات لي شادة وكتخمم تضربها بشي جرية تدخل صاحب داك الراجل وقف وسطهم كيدفع فصاحبو كيرجعو لور انور كينقز عليه باغي اضرب
بقا داك السيد لي الوسط واحل ماحيلتو لانور ولا صاحبو لي بقات فيه الضربة لي كلاها ام انور فغي كيقول خليه غي خليه نوريه شاف السيد تا عيا مايشد فصاحبو
السيد : سمحلينا اصاحبي حنا لي غلطنا فحقها غي سير فحالك دي معاك هاد البنت
انور : غي طلق باش نعلمو امد يديه على بنات الناس
تيفاوين شافت تا عيات مشات عند انور
تيفاوين : عفاك عفاك يلا نمشي الله ارحم ليك الوالدين
راك زدتي فيه
شاف فيها مزيان تنهد
انور : اووووف
تمشا تبعاتو وهي كتشوف فداك الشخص كيتحلف خنزرات فيه وكملات طريقها
أنت تقرأ
قصة تيفاوين
Adventureالسلام عليكم، اليوم جيت و جبت معايا الجديد لي كنتمنى يعجبكم، هاد القصة قصيرة بالدارجة مغربية للكاتبة "سعاد الحجي". قراءة ممتعة.
