على شفا نبضه بقلم شيماءجواد الناشربارق العراقي

البارت الثالث عشر

#على_شفا_نبضه
#البارت_الثالث_عشر
#بقلم_شيماء_جواد_Shaimaajawad
#الناشربارق_العراقي

شوان الصبح من مشت لينا فجأة ورة محجت كلامها الغريب بقة يفكر مذهول من تحولها ، هو كان متأكد انو هي تحس بالي يحسه تجاهه خصوصاً من تباوع عليه عيونها الي بيهن لمعة الحب وخجلها من يباوع بعيونها ، رجفتها من يلمسها حتى لو بالصدفة كل ذني اكدن لشوان انجذابها اله بس هي دتقاوم هالكيمياء الي بيهم شوان متأكد من هالشي خصوصاً بآخر لقاء توقع انو حتكون علاقتهم غير.. بس بعد هاللقاء كُلشي تغير لينا تغيرت حتى نظراتها تغيرت مكان الاعجاب صار إتهام وهو مصر انو لازم يعرف شنو الي تغير توقع انو هو اثبت حبه الها من تقدملها رسمي !! ليش هيج دتهمه لعد .
طلع من المطعم وهو فول اعصاب ساق السيارة بطريقة جنونية وبدأ يربط الاحداث ببعضها هو معجب بلينا وكان متأكد انو لينا معجبه بي ، دز اهله يخطبوله لينا ورة مراحوا لبيت اهلها بيبيته خنقته بالاعمال ، وتذكر اللحظة الي اخذت منه تلفونه من جانوا بالشركة وبالصدفة وگع منها ، معقولة يكون هالشي متعمد منها لان ورة دقائق جابلته تلفون ثاني وبي سيمكارت جديد يعني ممكن تكون بيبيته مخططة لهذا الشي ! رجع تذكر انو خطه القديم بقه بالجهاز ! احتمال !! احتمال احد استغل هالنقطة ممكن يستغلون رقمه و يتصلون ع لينا او يبعثولها مسجات سيئة بس منو اله مصلحة بهالشي ! عمته واوراس بالعراق بهذا الوقت بس بيبي باستراليا يمه ! شنو مصلحتها واصلا هو مضغط عليها بالعكس هي الي اقترحت عليه مسألة الخطوبة ! اوووو هواية افكار مخ شوان مديتحمل اكثر ساق بسرعة اكبر ولگه نفسه ديواجه نهر دجلة ركن سيارته ونزل يتنفس هوا صافن ع حركة الماء صارت عاصفة هوائية قوية بس هو مااهتم ورة نص ساعة رجع لسيارته بس متحرك بيها اكو اشياء غلط بدأ مخه يربطله صور واصوات مواضحة : +
" صحيح اني لسه مجمعت كل خيوط اللعبة الي دتلعبها ويه عائلتك وبشنو ضغطتوا على بابا او شنو عرضتوا عليه وخليتوا هيج يتحول ، لكن تأكد انو اني مو صيد سهل ولا فريسة سهلة ، لعبة الشيزوفيرينيا مو كُلش تمشي عليه .."
هايه كلمات لينا شتقصد بيها ؟ حط ايده ع جبهته وفركهه حيل :
" عبالكم حتشوشونه بتصرفاتكم المتناقضة ونتيه ، لا ياشوان القيسي غلطانين .. انت وبيبيتك غلطانين حيل . "

شنو من لعبة وليش بيبي بالموضوع !
شغل السيارة وتوجه للبيت بعده باله مشغول ودماغه يوجعه من الاستنباط الي وصله بس ممتاكد منه ، فتح باب البيت بهدوء و فات اصوات من الصالة هايه اكيد عمته واوراس ديتعاركن من جديد ، اقترب من الباب حتى يفوت ويسال عمته عن سوء الفهم الي هو بي بس الحديث الي بداخل الصالة جذب انتباهه و وگفه بالباب يسترق السمع :
- اني قررت
.. اكو شي بنبرة صوت عمته خله شوان يوكف ميفتح الباب !
- قبل لا اسمع قرارج ، جاوبيني خابرتي بيبي وافتهمتي شوان شلون راجع ؟
- يي خابرتها ، مستخدم جوازه الاسترالي ومسافر بي .
- كل هذا ع مود هايه السافلة لينا ... اه راح اطك راح انفجر بيبي ليش مدتتحرك ليش لسه عايفتها تسرح وتمرح بكيفها ها فهميني بيبي شنو الي بمخها !!
انصدم شوان من كلام اوراس ! وقرب من الباب اكثر حتى يسمع باقي الحديث
- لتستعجلين اني همين دافكر مثلج امي متكدر تسوي شي لذلك كتلك عندي قرار .
-وشنو هذا قرارج ؟
- كعدي واحجيلج .
شوية صمت وشوان اقترب اكثر واكثر من الباب يصغي :
- قررت انو اني الزم اللعبة .. الخيوط كلها بيدي ، اهدد عماد على حسب الخطة القديمة واورط لينا ،  واتخلص منهم ثنينهم بنفس الوقت ميبقى غير عقبة وحدة شوان !! وهذا محلولة شغلته نزوجه الج ويصير الورث كله بايدنا اني وياج فقط . شوان فتح حلگة من الصدمة !
- الله ماما خطة عبقرية ، بس بيبي مراح تسمح النا نشتغل من وراها .
- اذا اضطرت الامور نسوي بيها مثل الي سوته هي بخالتج .
- واو ماما .. رح توكع بيبي بشر اعمالها
شر اعمالها !! خالة اوراس يعني عمته هايه الي كالوا ماتت باحتراق بيتها شنو دخل بيبيته!
شوان انسحب بهدوء من المكان فتح الباب وسدها من دون ميجذب اي انتباه .
ركب بالسيارة وخابر لينا لان عرف اكو لعبة بالقصة وفهم انو اهله ديخدعونه ويخدعون اهل لينا ، اتصل عليها مردت عليه بقى يدُك يدُك ومترد اخر شي فتحت خط حاول شوان يفهمه الي صار بس هي مترد  عليه كان مبين عليها ممنتبهه ع كلامه شوية وسدت التلفون بوجهه ، شوان تخبل غير اتجاه السير وتوجه للشركة مال عماد لازم يعرف بشنو مهددينه عائلته لان لينا گالت هالجملة وهسه عمته همين كررتها .. لازم يواجه لينا وعماد على حد سواء .....
كان يمشي ١٨٠ وصل للشركة ونزل ومن گد مجان عصبي مغلق سيارته صعد لمكتب عماد كان ديجدح نار بس السكرتيرة بلغته انو عماد طالع عنده عمل نزل بعصبية وبسرعة لمكتب لينا لگاه فارغ شنو السالفة اليوم وينهم مختفين كلهم راح للاستعلامات سألهم الي گدر يعرفه انو لينا ع الاغلب راحت للبيت لان ماعدها اجتماع اليوم وعماد متوجه لاجتماع بغير مكان وميجي للعصر ..
طلع من الشركة دايخ بقى شوية واگف بباب الشركة من الخارج يباوع للفراغ ..
صفى افكاره وقرر يروح للينا .. للبيت بس واگفة مترهم طلع بالسيارة بقى يمشي بالشوارع بدون هدف
تذكر الحديث مال عمته گام طلع تلفونه واتصل ببيته تأخرت ماردت من راد يسد الخط فتحته هي :
- شلونج بيبي
- هلو حبيبي ، شلون هيج تعوفني وتروح معقولة هيج تسوي بيه ؟
- السبب مهم بيبي ومن تعرفي حتعذريني .
- شنو السبب ؟
- السبب هو خطوبتي المزعومة .. عموما مو هذا سبب اتصالي اريد اعرف شنو الشي الي حتوكعين بشر اعمالج بسببه شنو الشي الي سويتي لعمتي !
ارتبكت العجوز من هالاتهام :
- ياعمتك !
- عمتي الي ماتت محروقة !
- هي ماتت محروقة حادث .. حادث كسر قلبي ولسه جرحها بيه .
- يعني انتِ مالج اي علاقة بالي صارلها بذلك الوقت ؟
- عيب عليك شوان هذا الحجي ، زهور كانت بنتي اني الي ربيتها شتقصد بكلامك هذا مراح اسامحك طول عمري ع اتهامك اليه هذا
- مداتهمج بيبي اني داستفسر عن الشي الي سمعته
- منين سمعت هالحجي ؟
- من عمة
- اكيد انت فهمت الموضوع خطأ شوان ابني اهدأ هذا الشيطان ديوسولك اشياء
- اتمنى يكون كلامج صح بيبي. +
تستمر القصة أدناه