#مـنـحـرف_وأحـبـبـتـه
الـحـلـقـة (3)
گـتـابـتـي #Koka_Saleh
""""""""""""""""""""""""""""""""""""
عند رويدة الساعة 10 روحو هل سندس لان باتها عنده شغل وبيوعى بدري اما هل رانيا كملو باقي سهرتهم معاهم الرجالة في المربوعه يلعبو في كارطة والصبايا ايخرفن وايخططن للمشية للمصيف مع خشت رؤوف
رؤوف:السلام عليكم
كلهم وعليكم السلام
رؤوف:كيف حالك عمتي سمية
سمية ام رانيا:الحمدلله بخير كيف حالك انت
رؤوف:الحمدلله
عالية ام رويدة:ونحن مافيش كيف حالكم ولا عشان هذي ام رنوشة وتغمز السمية
رؤوف يضحك:وحدة اليوم بيان ولدها اكيد حالها مية المية
عالية:في هذي صدقت فرحانة من وسط قلبي العقبة نفرح بيك حتى انت عشان انتريح
رانيا:وتفرحي بدودي واتفكينا من هرجتها😂
رويدة:مغير نفتك منك انتي ورؤوف قبل وانا هي الساهلة
رؤوف رفع حاجة:شكلك مصوقرة واحد اتقولي انا هي الساهلة
رويدة فنصت عيونها:ووووه علي تفكيرك مش هكي قصدي انا بنفتك منكم وخلاص
عالية تضحك:زرك زرة سمحة
رويدة:زعميتني اندير في حاجة عشان ايزرني الحمدلله صفحتي بيضا
رؤوف:هابا منك انتي
رانيا:هابتين وهابا وتضحك
سمية:خطوها دودي كنكم استلمتوها والله مافي منها بكل ياريت عندي وليد بس والله ماانفرط فيها
رانيا:اشي اشي عالدلع حتى انا ماحصلته هالكلام
رويدة:صقع عليك وخطينا بلا حسد بس
عالية:وين عصام حتى العشاء ماحضره
رؤوف:عصام اليوم عريس من بدري وهو تشليط علي اصله كسب شركة ليبيانا اليوم😂 وبعدها جوه اصحابه خذوه
عالية تضحك:باهي ربي يسعده ديما
رويدة:خطرها عندي لكي خبر ايهبل
رؤوف:عساس ايجن من وراك اخبار سمحة لكن قوليه وخلاص
رويدة:هههه بارد اخسارة فيك انقولك لكن بنقولها عشان سمح جديات يوم الخميس ماشيين للمصيف وبايتين كلنا نحن وهل سندس وهل رانيا
رؤوف:مش قتلك مستحيل اتقولي خبر سمح مش عارفين اني بادي في امتحاناتي واول امتحان يوم السبت
عالية:يعني ماتبي تمشي معانا
رؤوف:انقوللكم امتحانات نهائية كيف بنمشي عدو انتو غيرو جوكم كاني عديت
رويدة بحتت في رانيا وعرفتها تعقدت
رويد:بلا جو شين امشي معانا وغير جو وغمزتله وشيرت براسها علي رانيا
رؤوف:والله خاطري انغير جو معاكم لكن امتحانات شن بندير
رانيا غمتلها صبت ولمت تباسي الفواكه اللي قدامهم ومشت للمطبخ ولحقتها رويدة
رانيا:شفتيه خوك البارد يحرق الدم
رويدة:باهي عذره مقبول حرام امتحانات
رانيا:يقدر يقرا اليوم وبكرا ويمشي حتى الخميس وايروح في الليل لكن مش ايدير هكي وبذات عمرنا مازردنا مع بعضنا مايفهمش في الجو بكل
رويدة:غير وسعي بالك مرات ايغير رأيه
رانيا:خوك وعارفتيه بعد ايقول كلمة معش ايرد فيها بكل
مع خشت رؤوف يبي امية وطبعا هذي سبلة
رؤوف:معليش رنوشة عطيني امية
رانيا غامتلها:عطيه دودي يدي مش فاضية نغسل
رويدة صبتله امية ومدتها له:اشرب وانا بنجيب باقي التباسي(وكانت بتفضيلهم الجو)
رؤوف:كنه السمح راقيله
رانيا;-?
رؤوف:حبي بلا جو شين ردي عليا نحكيلك عارفك زاعلة
رانيا:وانت عارفني نزعل عليش ماتبيش تمشي
رؤوف:قراية ياحبي قدري ظروفي رنوشة
رانيا:باهي اقرا اليوم وبكرا وامشي معانا الخميس وروح في الليل وقدامك الجمعة كلها اقرا فيه
رؤوف:ماايصرش منها انتي عارفة الطب منهج واجد والله مانقدر انكمله تي انا هكي وعارف ان الوقت اشوي مش حنلحق انكمل فيه قراية
رانيا:هالطب اللي قطعتنا بيه
رؤوف:شن بندير رنوشة والله خاطري نمشي لكن مش بيدي شيئ
رانيا لوت بوزها:كان راشقتلك فيها راك مشيت
رؤوف غمتله وبصوت عالي:شن اتحقي فيا كان عليا نبيها لكن قدري الظروف اشوي من بدري انراضي فيك ومازال اتعاودي في نفس الكلام عليك حالة وخلاص
رانيا انصدمت من تصرفه وزعلت:مش داعي اتعلي صوتك عليا انا بس كان خاطري نمشو مع بعضنا وانا اللي خططتها عشانك لكن براحتك وان شاءلله بالنجاح وطلعت وقمعزت جنب امها معش تحركت رن عليها رؤوف ودزلها كم رسالة يبي يحكي معاها مابتش اترد وبعدها باتها قال هي وروحت ورن عليها بعد روحت ومازال مسكر راسه مايبيش يمشي تعاركت معاه وسكرو
""
عند سندس وفي حوشهم الامن مستتب وكلهم مرقدين
""
سراج وفيصل هياجة في الشقة وحياه واضحة ومنسجمين مع اللبنانيات عالاخر
""
جا يوم الاربعاء وكان يوم عادي جدا البنات خذن محاظراتهن وروحن وهلهن ايوتو للزردة وكانو كلهم يبوها بحكم العيلات كانو منسجمين واجد مع بعضهم
في الليل روح فرج بات سندس للحوش وحطو العشاء وقعدو ايتعشو
فرج:راه انا بكرا مانقدر نمشي معاكم
سعاد امها;عليش شن صار
فرج:الاسمينتو اللي داز عليه من برا وصل لكن مسكوه في الجمرك قال اوراق ناقصات وهكي لازم بكرا انسافر وعارفة انتي جمركنا امدرعنى امتى قصته اتفض
سعاد:خلاص معناها حتى نحن نقعدو ماعندنا مانبو وانت مش معانا
سندس:بس انا خاطري في المشية
فرج:عارفك يابابا وحكيت مبدري مع عمك خالد(بات رانيا)وقالي هو ايجي ياخذكن في الصبح
سعاد:كان تسمعي كلامي باتك مش ماشي ماعندنا مانبو
فرج:لا عادي تبي صحباتها مانحرموها منها خلاص اتفقت معاه وبنعطيه سيارتي عشان كبيرة واتشيلكم كلكم
سعاد:باهي دبينكم متفقين براحتكم والحق حتي انا نبيها المشية لنا زمان عالبحر
فرج;وانا كان روحت وانتو مازلتو في البحر انجيكم غادي
سندس:ياريت بابا اتكمل بسرعة صح انا نبي المشية بس لما نمشي وانت مش معانا بتقعد ناقصة بلاك
فرج;حاظر يابابا انحاول انكمل بسرعة
كملو عشاهم وهدرزو اشوية وبعدين باتها وامها خشو رقدو وهي خشت الدارها وهي فرحانة ووتت دبشها اللي بتاخذه معاها خذت شنطة صغيرة وحطت فيها(بلوزة طويلة سمائي هادي واسترتش ابيض ووشاح كحلي وحطت فستان طويل ابيض مخصر مالنص بسير اخضر وعليه جاكة خضرا وبيجامة استرتش اسود وعليه بدي طويل دمي وحطت عطرها ومستلزماتها)ورقدت
""
جا صباح الخميس العيلات كلهن وعن بدري وايجهزو للرحلة وركبو الدبش كله في السيارات وكانو متواصلين مع بعضهم بالفون بالنسبة الهل رويدة طلعو هما الاولين وطبعا رؤوف مازال مسكر راسه ومامشش واما عصام ماايحبش الجو هذا بكل
بالنسبة الهل رانيا طلعو وتكو علي هل سندس بدلو السيارات وركبت معاهم سندس وامها وطلعو
(انقوللكن البنات شن لبسن سندس لبست بلوزة قصيرة علي نص الفخذ لونها كحلي ولابسة استرتش اسود ووشاح وردي خفيفي ورانيا لابسة فستان طويل اخضر ولابسة عليه وشاح بيج ورويدة لابسة بلوزة طويلة سودة وعليها استرتش كحلي ووشاح كحلي)
اما بات سندس سافر زي ماقاللهم
""
فيصل في حوشهم ايركب في دبشهم في السيارة
فيصل:بطلي ياروان حقيتك دفيتيها
روان:انا مادفيت حد هي ماتعرفش تمشي وديما تطيح
ريان;وحق الله دفتني هالدبة هذي
روان:قوليها الروحك ياارقيقة ياعود وقيد 😂
فيصل يضحك:ينعن جد السانك اسكتن بلا مناقرة راه معش فيه مشي
ريان:خلاص انا سكتت
فيصل:عارفك ياريونة شاطرة
روان:كملها وقول روان لا
فيصل:مش داعي انكمل انتي عارفة بروحك
روان:باهي وين سراج مش قلت بيمشي معانا
ريان:ييي علينا فكونا منه هالبارد
روان:انتي اللي باردة احسن واحد في الدنيا سراج
ريان:عشان ديما ايجيبلك في هدايا وحاجات هذا عليش اتحبيه خزي متاع مصالح
روان:كذابة من زمان وانا انحبه
فيصل:ينعن جد انحبه تحشمن عن مرض راجل اللي قدامكن
روان:باهي ياراجل سراج بيمشي معانا ولا لا
فيصل:توا انرن انشوفه توا ورن عليه
طبعا سراج كالعادة الصبح ماايشوفش فيه بكل وراقد
رن فيصل قريب 5مكالمات وفي الاخير سراج رد
فيصل:كان ران علي ميت راه واعي
سراج:عليك ازعاج وثقالة صبح يامتخلف من ايرن علي حد في الصبح
فيصل:الناس كلها اتمارس في حياتها الطبيعية في الصبح ووايرنو علي بعضهم
سراج:ومن قالك انا كيف الناس المهم لخص شن تبي يابارد
فيصل:وتي روحك انتكي عليك تمشي معانا للبحر
سراج:لنقنك فوتني ماعنديش جو بكل
فيصل:بلا حركات هي والله حتى روان ساكنتلي تبيك تمشي
سراج:والله بالجو بنرقد بعدين نلحقك كان تمى عندي جو
فيصل:عارفك كذاب وتنبال مش حتلحقني هي صبي دوش وانتكي عليك كرت منه روان الفون
روان:باهي سراج هيا معانا
سراج:والله يادبة ماعندي جو
روان تباعدت منهم:باهي باهي عشان خاطري بنقهر ريان ماتبيكش تمشي معانا
سراج:يعني تبينا نمكروها
روان:ايوا اصلا هي وفيصل متفقين عليا
سراج:لالا كله الا ريونتي خلاص عشانك نمشي معاكم
روان:ايييي انت احسن واحد في الدنيا
جاها فيصل وخذا منها الفون
فيصل:قصدك وافقت وبتمشي
سراج:اها تكي عليا ونمشي معاكم
فيصل:تي كيف قدرت تقنعك هالمفعوصة بس
سراج:مش شورك اسرار بينا هي وجك بنصبي اندوش وانوتي ادبشي وسكر
خش سراج دوش وبعدها طلع خذا شنطة صغيرة وحط فيها(تيشرت اخضر وعليه شرت راب بيج وحط شورت اسود وعليه تيشرت احمر وحط شورتين نص ازرق واسود عشان العوامة وحط بيجامة للنوم وحط عطره ونظارات علي كل لبسة وطاقية عشان الشمس)سراج لبس شورت ازرق وعليه تيشرت ابيض وكاويش ابيض ولبس ساعة وبخ عطر وخذا نظاراته وفونه وشنطته وطلع يرجى في فيصل اشوي وجاه فيصل وخذاه امعاه
""
وصلن البنات وهلهن للمصيف ونزلو خذو مفتاح الشاليه منهم وخشو للشاليه وقعدو اينزلو في دبشهم وبعد كملو التنزيل
رويدة:هيا بنات هجوم عالبحر مرايفة عليه بنزقب دغري
سندس:وانا شر منك ليا سنتين عالبحر بناخذه بالاحضان😂
رانيا:في عينك اتعومن وانا لا
رويدة:ومن ماسكك وكنك مااتعومي
رانيا:مرضت اليوم في الصبح بختي اسود مالقت امتى اتجي
سندس تضحك:انا ريتك لابسة فستان مش عابية عالعوم
رانيا تضحك:اها لما مرضت قلت انسقم منظري وانبان كيوت😂
رويدة تضحك:مفتكة من رؤوف وبتصيعي لكن انا قاعدة اي تصرف انقوله له
سندس:خزي بصاصة😒
رانيا تضحك:نشواله اخرى خلاص هيا كان بتمشن ومشن للبحر وكانت فيه مسافة بين البحر والشاليه
""
وصلو سراج وفيصل للمصيف وخذو الشاليه وكان نفس المصيف اللي فيه البنات ومن حظهم النزيك الشاليهات جنب بعضهن قعدو اينزلو في الدبش
روان:انا بنمشي للبحر
فيصل:اصبري انكملو التنزيل ونمشو مع بعضنا المسافة بعيدة
روان:لالا انتو مازلتو وانا نبي البحر توا
فيصل;روان بلا سكنان قتلك انكمل ونمشو
روان لوت بوزها وزعلت
سراج;والله ماتزعل ريونة هيا انشيلك انا
فيصل:تي تعال نزل معايا ونمشو مع بعضنا
سراج: فوتني مليت دبشكم واجد معش كمل
فيصل:تنبال من يوم يومك خلاص خوذهن اشوي ونلحقك
ريان;انا مانبيش نمشي معاك بنرجي فيصل ايكمل
روان:عنك مامشيتي حتي هو مايبي وجك الاسود
سراج يضحك:بووووم قصصصف جبهات لنقنك صقع ريونة هيا نمشو
وطلعو هو وياها ومشو للبحر اشوي ولحقهم فيصل وريان
فيصل:ياخوان اتخليها كلها عليا
سراج:نزلت معاك لكن مليت امك جايبة حوشكم كله معاكم
فيصل يضحك:امي ديما ادير في احتياطتاها مااتحبش تنسى شيء وبعدين سادك غير دبش روان تحسابنا بنقعدو سنة حاطة دبشها كله
سراج يضحك:مطرشقة بحت كيف اتعوم
فيصل:ريتها تضرب في اختها
فيصل بصوت عالي:تي اركحي ياروان وسيبي اختك راه انجيك
سراج:ترا صبيلها وبعدها والله انصبيلك
فيصل;تي والله انت خربتها وخليتها جالطة هكي
سراج:خليها احسن عشان تاخذ حقها
فيصل;واخذته ونص اخرى
فيصل:بس فيه درايق واجد هنا
سراج:يانا عليا مش غير كبدي ذابت غير ريت اللي ايعومن بس
فيصل:هي انخشو انعومو بالك انتعرفو علي طروف
سراج:انغير ادبشي وانجي انعوم
فيصل:خوذني معاك وصبو
""
سندس وريدة عامن وكملن عوم ورانيا مقمعزة عالشط اتفرج عليهن
رانيا بصوت عالي:هيا اطلعن رنو عليا يبونا نفطرو
سندس ورويدة:باهي وطلعن وماشيات شور الشاليه وكانت سندس في النص ورويدة عاليمين ورانيا عاليسار
سندس بخبث:عليك جو البحر هادي ماودك تطلع منه بكل واتبحت في رويدة
رويدة:مش وقت الفطور بكل المية اتهبل
رانيا:زيدن اقهرني باهي
رويدة وسندس قعدن يضحكن
فيصل:ناعلي مالضحك انا
سراج: ناعلي ضحكنا معاكن
رويدة:هيا سرعن بنات فكنا منهم
سندس:كان نبرم انهزبهم هزيبة سمحة
رانيا تضحك:زعما طرووف
سندس:لا هذي بتصيع بكل انا اللي بنرن علي رؤوف بروحي
رويدة;ماعليك غير نوصلو للشاليه وحياتك كله عند رؤوف
رانيا:هالبارد كان يبيني راه جا معانا
فيصل:الاسود بياخذ من جسمك حته(يحكي الرويدة)
سراج:تي وحق ربي اللي في النص هذا جسمه نااار
سندس عصبت ولفت عليه:النار انشاءلله تحرقك
سراج انصدم:انتي اخرى
فيصل انصدم:ماطحنا الا فيها
سندس انصدمت:لا هكي واجد دير روحك ماتلحقش فيا عاد
سراج:هي هي وانتي من عشان نلحقك لو كنت نحسابك انتي راه قطعت كرعي قبل مانمشي وراك
سندس:انت واحد حيوان وتافه ومهزب معش تلحقني يابارد
رانيا:تي هيا فكينا منه
سراج:راكي واخذة في روحك مقلب لو كنتي اخر بنت مانلحقك عدي بحتي في روحك عالمراية قبل توا تعرفي ماانبحت فيك لو وزعوك الاثنين بربع
فيصل:هيا فكنا من السانها
سندس:باهي دبيني شينة معش تلحقني يامهزب
سراج;هيا يانصي هذي وحدة مطرشقة خليها تخرط وزي ماايقولو ليس عالمريض حرج وعدى وسيبها
سندس قعدت معصبة وحست ان هالمرة فاز عليها بكلامه وقدر يستفزها اقعدن اشوي وبعدها مشن للشاليه ولقنهم يفطرو وقمعزن يفطرن معاهن
""
سراج خش للشاليه:تي هذي منين طلعتلي بس
فيصل;والله مانندري عليها ازح مطول السانها الفرخة
سراج:لنقنك اسمحلي يانصي مانقعدش انا والمتخلفة في مكان واحد بنروح
فيصل:بلا جو شين خليك هنا وفوتها لا اتجي شورها لا اتجي شورك وخلينا منسجمين
سراج:تي فكني منها هالباردة تي تحسابني لاحقها انا نلحق وحدة زيها عليك عباطة لنقني بنمشي
فيصل:توا كان مشيت تحسابك صح تلحق فيها وبعد هزباتك مشيت
سراج:بس انا مانلحقش فيها وانت عارف
فيصل:بس هي حتقول هكي لكن انت خليك وفوتها ولا كأنك شايفها توا تعرف انك مش لاحقها
سراج;قولك هكي
فيصل:هكي ونص ياطيري
سراج:وبعدين مش بحر بوها لين اتخليني نمشي وانسيبه
فيصل:تعجبني يانصي هيا خلينا انغيرة دبشنا ونمشو انعومو وانهيجو مع البنات اللي ايعومن
سراج:وانت قلتها
ولبس سراج شورت نص ازرق وتيشرت ابيض وطلع ولما وصل للبحر حول التيشرت وخش ايعوم وطبعا سيرجو كان جسمه ايهبل بكلل😍وخش امعاه فيصل اللي كان حتى هو طرف مالاخر وسحرو البنات بكلامهم وتعرفو علي كم وحدة وقعدو ايعومو معاهن
""
اما سندس ورانيا ورويدة بعد الفطور طلعن وقمعزن قدام الشاليه
رويدة:هي انردو انعومو
سندس:انا غيرت دبشي معش بنعوم
رويدة:بلا صماطة جاييين للبحر عشان انعومو
سندس:مانبيش انحق الحيوان اللي مبدري
رانيا:قصدك بتحرمي روحك مالبحر عشانه بالك بحر بوه هو
رويدة:بالك خافت منه وتغمز الرانيا
سندس:شنو شنو انا انخاف من واحد زيه تي اصلا هو مش راجل ولا خطمت عليه الرجولة حتى بالكذب
رانيا:معناها خلينا نمشو للشط
سندس:هيا نمشو زعميتا بحر بوه وصبن (وكانت هالمرة لابسة بلوزة طويلة سمائي هادي وعليها استرتش ابيض ووشاح كحلي) ومشن ووصلن للشط وخشت رويدة وسندس ايعومن ورانيا مسكينة اتفرج عليهن وخلاص
رويدة:تي شكله صاااااايع بكل حقي كيف ايدير مع البنت
سندس:فكيني منه مانبيش انحق وجه هو صاااايع والبنات خزي مرخصات ارواحهن له
رويدة:مصح وجها مش خايفة من هلها
سندس:معش ايعدلن لا علي هل لا شيء احتمال تلقيها جاية تسنكح بروحها
رويدة شهقت:معقولة😱
سندس:البنات توا معش ايتحشمن ايديرن اي حاجة
رويدة;طاح سعدهن
سندس:فكيني من سيرة هالزفت خلينا مستمعين بالمية والجو السمح هذا وقعدن ايعومن
""
فيصل:صاحبتك جت
سراج:تي فكني منها هالزفته
فيصل:غير بحت لابسة لبسة اطلع طووول
سراج:مانبيش انحق خلتقتها خلينا مع العسل هذا بس
فتون:سيرجو هيا علمني الغطس
سراج:ناعلي ذبت انا تي نعطيك عيوني مش بس انعلمك الغطس تعالي حبي تعالي (وهام معاها عاد الصايع😂)
"""
في المصيف كانو حاطين قدام الشط مجموعة طاولات و كراسي وشمسيات عشان ايقمعزو عليهن الناس وايتفرجو عالبحر وكانن كل اربع كراسي عليهن شمسية وكانن مجموعة كبيرة ومش بعيدات من بعضهن
سندس ورويدة عامن لين بطلن وطلعن وقعدن يمسحن في وجوهن بالمنشف وقمعزن عالطاولة اللي عليها رانيا
رانيا قريب تبكي:هالبخت لسود ماعرفت نمرض الا اليوم
رويدة تضحك:شكله رؤوف مش راضي علي مشيتك
رانيا:ترا معش تحكيلي عليه خوك هالبارد كان هذا بدل ماانتن اتعومن وانا مادة وجي بروحي راه قاعد معايا لكن والله انوريه عليها
سندس:بتسيبيه😍
رانيا:عينك شن انسيبه بنشعفه بس
رويدة:لنقنه يستحقها حتى انا دره كبدي
سندس بصوت عالي:مش هذكي معااااذ
رويدة:وينه وينه 😍
سندس:اللي طالع مالبحر توا
رانيا:هو هو
رويدة:يانا عليا بندوووخ معقولة الصدفة هذي
سندس:انتي ماقلتيله بنمشو للبحر بالك راه لاحقك
رويدة:امس هدرزت معاه عالفيس بس ماقتلش لان هو مايسالش فيا شن بديري لاشيء اغلب حكايتنا عالقراية والجامعة وبس
رويدة:زعمك نمشي انسلم عليه
رانيا:اها عادي شن فيها
سندس:عينك تمشي هو بعيد منا توا ايقول ماصدقت حقتني
رويدة:وشن اندير بنمشيله 😭
سندس:اثقلي عن مرض اشوية وانصبو انديرو روحنا انتمشو وانخطمو عليه وعساس بالصدفة
رانيا:ايوا ياام التخطيط والافكار انتي 😂
سندس: مع اني مش راضية علي كل هالخبر لكن شن بندير صاحبتي مكبدة بنصبي معاها وخلاص
رويدة:نجك ليا ياقلبي 😘
""
سراج وفيصل ملو مالبنات وطلعو وقمعزو عالطاولة اللي جنب البنات من غير مايفطنو
سراج:ووووه دمها ثقيل اتقول سحلب مصقع
فيصل:بس سمحة البنت
سراج:سماحة بلا خفة دم مافيهش جو بكل
فيصل:صدقت والله
سراج:وووه عليا المريضة مقمعزة جنبنا
سندس:مبرد دمه قمعز جنبنا
سراج بصوت عالي:ياريتك يانصي اتعدي من جنبنا راك دراااه بكل ومزاط ومن برادتك شافط الاكسجين كله تي هوينا خلينا نستنشقو هوا مسقم
سندس بصوت عالي:والله يادودي مش بحر بوك هو وبعدين انتي اللي جيتي تدحنسي تالانا انتي هوينا
فيصل روانيا ورويدة يضحكو عليهم 😂😂
سراج بصوت عالي:ولا هو بحر بوك يانصي عشان اتلزني انا المكان هنا عاجبني ومش ماشي
سندس بصوت عالي:وانا المكان هنا عاجبني يادودي ومش متحركة قاعدة علي قلبك لين بالك اتموتي ونفتك منك
سراج بصوت عالي:ان شاءلله فيك يانصي
مع رنت ام فيصل عشان الغداء
فيصل:هي نمشو انتغدو الغداء واتي
سراج:مش متزحزح من هنا توا تحسابني سمعت كلامها جيبلنا انتغدو هنا بنقهرها لين تنتلف 😠
فيصل:تم يانصي انشوف اخر العناد هذا وين ايودينا
رانيا:بلا تسكير راس ماما قالت تعالن تغدن
سندس:قتلك مانبيش انتغدي توا يحسابني مشيت عشان هو قالي امشي بنقعد علي قلبه هنا لين ينتلف هو قبل😠
رويدة:خلاص رنوشة جيبلنا انتغدو هنا
سندس:ايوا جيبلنا هنا وخليهم ايكثرولي راه ميتة جوع
رانيا تضحك:دا حتى وانتي معصبة مانك ناسية الوكال
سندس:باهي بلا دوة زايدة وجيبيلنا الغداء
رانيا:دودي هيا معايا مانقدرش انشيله كله بروحي
رويدة:باهي هيا
وعدن البنات وعدى فيصل وقعدت ساحة المعركة فاضية السندس وسراج
#يتبع
قولكن شن حيصير بينهم هل حيكون فيه اعجاب ولا حيزيد الكره 😱💔
ومعاذ اللي جا زعمك شن ردة فعله لما ايشوف رويدة وهل جيته صدفة او مدبرة كله حنعرفوه في الحلقة الجاية ☺
اسفة عالتأخير توا غير كملت الحلقة 💕
ومعليش لو فيه لخبطة في الأسماء ☺
گـتـابـتـي Koka Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
