#مـنـحـرف_وأحـبـبـتـه
الـحـلـقـة (43)
گـتـابـتـي #Koka_Saleh
"""""""""""""""""""""""""""""""""""
اسيل قعدت تبكي وطلعت تجري ومروة جت بتلحقها بس معاذ منعها
رؤوف كان جاي بيزور رويدة بعد امه حكتله اللي صار
وهو خش للمستشفى بسيارته طلعت قدامه وحدة وكان قريب يخبطها وعلي اخر لحظة وقف السيارة ونزل بيشوف لو صارلها شيئ
رؤوف نزل:معليش ياانسة والله طلعتي قدامي فجأة ان شاءلله بس ماانكون عوقتك
أسيل كانت تبكي بحرقة ورفعت راسها وشافت الرؤوف
وهنا رؤوف جاته الجمدة وقعد ايشوف الاسيل ومصدوم
"""""""""""
سراج وسندس كملو الغداء وجو بيطلعو
مع جية رسالة السراج ولما فتحها لقاها من رقم وكان مكتوب فيها(أفتح النت واستقبل اللي ايجيك عشان تعرف الهانم مراتك في شنو ادير من وراك)
سراج ارتبك مالرسالة وفتح النت وهنا كانت الصدمة
جنه قريب خمس صور السندس من رقم غريب وفي النهاية كاتبله (هذي مراتك الحلوة اللي انت اتحبها وادلع فيها وهي تستغفل فيك ودايرة علاقة معايا وادزلي في صورها ولو مش مصدقني اكتب الرقم عندها وحتطلع مسجلته دودي والله مسكين واجعني انت بس تعرف مراتك طررررف ياعوينك بيها)
سراج بعصبية:من ولد الكلب هذا
سندس بصدمة:شن فيه سراج😳
سراج:هي اطلعي
سندس:شن صاير كنك معصب
سراج بعصببة وصوت عالي:قتلك هيا اطلعي
سندس معش فهمت شن صاير وطلعت معاه وركبو في السيارة وسراج معصب عالاخر وماحكش شيئ وولع السيارة وكان في سرعة جنونية وسندس مش فاهمة شيئ وكل اللي جا في بالها انها ممكن اتكون مشكلة في الشغل
وصلو للفيلا وسراج درس السيارة تدريسة غريبة ونزل وخبط باب السيارة بقوة وسندس اتشوفله ومش فاهمة شيئ
سراج بعصبية;هيا انزلي في شن ترجي
سندس مستغربة من تصرفات سراج ومش فاهمة شيئ ونزلت وخشو للحوش
سندس:تقدر اتفهمني كنك وليش تصرف هكي
سراج:وين تليفونك
سندس:في الشنطة بس شن دخل فوني عليش تسأل شن صاير
سراج:توا نفهمو توا شن صاير وكر منها شنطتها وفتحها وطلع الفون (وزي ماقلنا سندس مااديرش في باسورد الفونها ابدا)المهم مسك فونها وفونه وكتب الرقم عندها وفعلا طلع مسجل #دودي 😳
سراج بعصبية:تقدري يامدام اتفهميني الرقم هذا رقم من
سندس شافت للفون:مانعرفش
سراج:يعني مش رقم رويدة صاحبتك
سندس:لا مش رقمها
سراج بعصبية:وكيف مسجل الرقم عندك وباسم صاحبتك
سندس:الرقم مش انا مسجلته
سراج بعصبية:كيف مش انتي واهو مسجل عندك وبرقم صاحبتك
سندس:انا لما انسجل رقم ضروري ماانحط جنبه سمايل وهذا مافيش جنبه شيئ معناها مش انا
سراج:ياسلام تضحكي علي فرخ صغير انتي
سندس عصبت:جو للمشكلة ماعنديش بتحكي شن فيه ولا لا
سراج:وعندك عين بعد اللي درتيه اتعصبي واتهزبي اخرى
سندس لفت ايديها علي بعضهن;وشن درت ان شاءلله
سراج;توا انوريك يامدام يامحترمة ياللي ماتحكيش الا عالاخلاق
سندس:بلا هزوة وقول اللي عندك
سراج فتح عالرسائل والصور ومدلها الفون
سراج بعصبية:اهو يامدام هذينا صورك وهذا الرقم اللي دازهن مخزن عندك انكري انك تعرفيه توا(وكانن صورتين في الجامعة وثلاث صور في فرح رويدة)
سندس بصدمة:من هذا وكيف وشن طبب صوري عنده
سراج:لا يا زيدي مثلي وديري روحك ماعندكش العلم
سندس:والله مانندري ولا نعرف هذا من
سراج بعصبية وصوت عالي:لما بتكذبي اكذبي علي غيري مش انا الطروح هذينا كلهن حافظهن وباصمهن بصم
سندس بعصبية:اي طروح سراج انت عارف كويس اني انا مانكذبش
سراج:شنو نبي عشان ماتكذبيش
سندس:لا مش نبي بس هذا طبعي وتهيالي انك عاشرتني وعرفتني كويس وعارف اني ماعمري كذبت عليك
سراج ضحك بهزوة:صح عمرك ماكذبتي
سندس بعصبية:بتبطل حركاتك المستفزة هذينا وبتفهم ان ماليش علاقة بالموضوع ولا لا
سراج بعصبية:فهميني كيف مالكيش علاقة والرقم اللي جايات منه الصور مسجل عندك ليش تخدعي فيا انا شن درتلك هذا جزات الانسان اللي حبك اتخونيه بالطريقة البشعة هذي
سندس بصدمة:اي خيانة هذي انا وحق ربي ماعندي فكرة بالموضوع بكل
سراج بعصبية:ماعندكش فكرة باهي شن جاب الرقم عندك وكيف مسجل اذا مش انتي مسجلتيه من يقرب فيه تليفونك خاطيك انتي
سندس:انا معاك فوني ديما عندي وماحدش ياخذ فيه بس والله ماعندي فكرة شن جاب الرقم عندي وانا والله ماانسجل في الارقام هكي اكيدة في سوء فهم
سراج بعصبية:مافيش سوء فهم الرقم تعرفيه وحد اتحبيه ودازتيله صورك
سندس بصدمة:سراج شن اتقول انت
سراج بعصبية:انا عارف انك ماحبيتينيش بس ماكنتش عارف ان السبب لانك اتحبي واحد اخرى ياريتك حكيتي مالاول عشان ماحبيتكش وتغيرت عشانك
سندس:سراج والله مافيه حد في حياتي انا عمري ماكانلي علاقة بحد قبلك
سراج بعصبية:وهذا اللي كنت فاهمة انا وفاهمينه هلي وهلك بس طلعنا غلطانين ومخدوعين فيك لكن جا الوقت كلهم يعرفوك علي حقيقتك
سندس بخوف:شن قصدك سراج
سراج:توا بنكلم باتي وباتك ونحكيلهم كل اللي صار وانوريهم حقيقتك وهما بطريقتهم ينهو كل حاجة بينا وطلع وهو معصب وغامتله عالاخر
سندس قعدت اتناديله سراج سراج بس سراج طلع وماردش عليها
قمعزت عالكنبة وهي مش فاهمة شيئ ومش قادرة تستوعب اللي صار ولا قادرة اتفكر في من دار هكي وشن غرضه كل اللي كانت اتفكر فيه الفكرة الغلط اللي خذاها سراج عليها واكثر شيئ شغل بالها رد باتها واللي حيصير فيه لو شاف حاجة كيف هذي حتى وهي عارفة ان واثق فيها بس حتكونله صدمة قوية وبذات لما اتجيه من سراج وعارفة سراج بعد ايعصب معش يعرف يحكي خافت سراج ايقول الباتها حاجة اتزعله وايصيرله شيئ من وراها خذت فونها وقعدت اترن علي سراج بتقوله ايرد ايتفاهمو يوصلو الحل بس سراج قعد ايديرلها في مشغول وبعدها قفل فونه
سندس هنا قلبها وقف وتمنت الموت ولا باتها ايصيرله شيئ من وراها وكملتها في الحوش تبرم وقاعدة علي اعصابها وهي مش فاهمة شن بيصير
""""""""""""""""""""""""""""""""""""
#عند_رؤوف
رؤوف مازال مصدوم وايشوف الاسيل اللي تبكي بحرقة وقهر
رؤوف مصدوم:مستحييييل
أسيل شافتله وادموعها كانن ينزلن علي خدودها تلقائي
رؤوف:انتي هي نفس البنت وبنفس الموقف
اسيل مش فاهمة شيئ واتشوفله وادموعها مازال علي خدها
رؤوف:من انتي وكنك تبكي
أسيل هنا ماتحملش كلمة كنك(زي اي شخص ايكون موجوع وحد ايقوله كنك دغري ينهار😭💔)
أسيل في اللحظة هذي انهارت بكى ومافطنتش الا وهي مرتمية في حظن رؤوف وتبكي ورؤوف هنا ماعرفش كيف يصرف الا ان يحظنها وايحاول ايهديها
أسيل من كثر وجعها وانها من زمان فاقدة شعور ان حد ايحس بيها او يسألها كنك ماركزتش عاللي داراته
بعد حوالي 5 دقايق وهي في حظن رؤوف وتبكي انتبهت الروحها وبعدت بسرعه وقعدت تمسح في دموعها
رؤوف:شن صاير معاك
أسيل:شيئ واسفة عاللي صار وجت بتمشي
رؤوف طبس راسه;شكله حتى انتي متعبك الحب
أسيل صبت ولفت عليه:مش شرط الحب ايكون سبب اوجاعنا مرات فراقنا من احبابنا ومرات احساسنا بالذنب تجاه الناس اللي اذيناهم
رؤوف:من فارقتي
أسيل:فارقت أغلى انسانة عندي وتوأم روحي اختي اللي ماعنديش الا هي في الدنيا ونزلو دموعها
رؤوف:غريبة هالدنيا انتي سبب وجعك فراق اختك وانا سبب مأساتي في الدنيا خويا
أسيل مسحت دموعها:اسمحلي انا تأخرت ولازم نمشي ولفت وبتمشي
رؤوف:أنا حالم بيك
أسيل لفت عليه وشافتله وهي مصدومة;كيف حالم بيا
رؤوف:والله جيتي في حلمي كم مرة وبنفس اللقطة اللي توا الدرجة اني مش عارف توا انا في حلم ولا حقيقة
أسيل مازال مش مستوعبة الكلام اللي قاعدة تسمع فيه
رؤوف:انا متاكد ان اللي قاعد ايصير مش صدفة فيه شيئ مش طبيعي
اسيل:صح فيه شيئ مش طبيعي عشان حتى انا برغم اني عمري ماشفتك بس حاسة روحي نعرفك من زمان
رؤوف:فيه اسئلة واجد ايدورن في راسي ونبي اجوبتهن
أسيل:شن هنا
رؤوف:انتي من وشن اسمك وبنت من وليش شفتك بنفس الوضع اللي انشوف فيه في حلمي
أسيل:توا مش حنقدر انقول شيئ الواحد اول مرة انشوفه بس لو الصدفة تكررت وشفتك مرة اخرى نوعدك نحكيلك كل حاجة عني لان في اللحظة هذي حيكون للقدر كلمته
رؤوف:بس انا هكي مش حنتريح لازم نعرفك من
أسيل:خليها زي ماقتلك احسن
رؤوف:ماشي اللي اتريحك
أسيل:سلام توا ومشت
ورؤوف قعد ايتبع فيها بعيونه لين ركبت في سيارتها ومشت وهو رقى الرويدة وهو الف سؤال في راسه ومش قادر يستوعب اللي صار
""""""""""""""
رانيا كيف خشت للحوش ولقت باتها وامها ورنا مقمعزين في الصالة ويرجو فيه عشان ايتغدو
رانيا:خير
الكل:خير
رنا:باهي اللي جيتي عشان انتغدو بابا سكر راسه ماناكلو لين اتجي
رانيا:نجيلي بابا ياربي
سمية:وين طولتي اليوم
رانيا:اليوم مغيرين المشرف وكنا انورو فيه في الشغل اللي فات
سمية:باهي خشي غيري ادبشك علي ماحطيت الغداء وانتي يارنا الحقيني عشان اتوتي معايا
رانيا:حاظر وجت بتخش الدارها عشان اتغير دبشها ورن فونها وكانت سندس
رانيا:اهلين ياحبي
سندس:اهلين رنوشة
رانيا:شن جوك
سندس:مش تمام بكككل
رانيا بخوف:شن فيه شن صاير معاك
سندس:رنوشة محتاجتلك بكل كان تقدري اتجي تعالي نبيك
رانيا:حاظر ياقلبي بس انتي وين قاعدة
سندس:انا في حوشي
رانيا:خلاص اشوية وانكون عندك وسكرت
رانيا:بابا بناخذ سيارتك ونمشي الدوسة مش عارف شن صاير معاها وتبيني توا ضروري
بات رانيا:باهي يابابا خوذيها بس مش كان اتغدي قبل رانيا:لا يابابا نمشي انشوف كنها قبل
بات رانيا:باهي بس طمنينا عليها وحاولي مااتخأخريش
رانيا:حاظر وخذت المفتاح من باتها وبتطلع بسرعه
سمية جت جايبة الصفرة
سمية;تي وين ماشية اخرى تعالي تغدي
رانيا:توا يحكيلك بابا وطلعت بسرعة
سمية:شن فيه البنت كنها
بات رانيا:كلمتها سندس وقالتلها نبيك ضروري
سمية:غريبة ان شاءلله خير
بات رانيا:ان شاءلله
جت رنا جايبة صفرة المشروب وقمعزو ايتغدو
"'''''''''""""'""""""""""""
رانيا في 10 دقايق كانت مدرسة قدام حوش سندس ودقت وسندس فتحتلها
رانيا بخوف:كنك شن صاير معاك خوفتيني عليك
سندس بحزن:ياما صار يارنوشة
رانيا:تي شن فيه كنك خوفتيني
سندس:خشي وانفهمك جوا
وخشن البنات وقمعزن في الصالة
رانيا:ها احكي شن صاير
سندس بدت تحكيلها في اللي صار في المطعم وبعد ماروحو للحوش وحكتلها كلام سراج كله
رانيا مصدومة:ومن الحقير اللي دار هكي وشن غرضه
سندس:مش عارفة ومازال مش فاهمة شيئ من جهة انفكر الشخص هذا منين جاب صوري ومن جهة ثانية وهذي اللي محيرتني شن سجل الرقم في فوني وبأسم دودي
رانيا:والله قصة غريبة
سندس:بككل
رانيا:ترا الرقم انشوفه في فوني بالك يقعد مسجل عندي
سندس:اهو ومدتلها الفون ورانيا كتباته عندها وماطلعش
رانيا:انا حنشوفه الرقم وحنمشي للشركة ونعرفه تبع من
سندس بحزن:ياريت نقدر نعرفه من اللي بيخرب حياتي هكي
رانيا:ماتزعليش ياقلبي كل شيئ وله حل
سندس:اي حل وسراج ماعطانيش حتى فرصة اندافع علي نفسي وتوا ماشي البابا وانا خايفة بابا بعد ايشوف الصور اتصيرله حاجة
رانيا: مااتخافيش انتي مش دايرة شيئ وبعدين عمو فرج واثق فيك ومش حيصدق اللي حيقوله سراج
سندس:صح بابا واثق فيا بس واعرة لما ايجيه راجلي وايوريه صور جاياته وايقوله هذي بنتك وقدام عمو محمد اخرى والله تقهر شن بيكون رد فعله
رانيا:يانا علي ياقلبي والبارد سراج هذا مافهمش ان القصة باينة لعبة
سندس:مافهمش ولا عطاني فرصة انفهمه بس مرات انقول معاه حق راجل وواحد دزله صور مراته
رانيا:بس هو المفروض عاشرك وعارفك كويس انك مستحيل اديري حاجة هكي
سندس:هيتي من ايفهمة توا بس اللي قاهرتني ان من غير اي تفكير بيمشي البابا لو خلاها بينا وحتى لو بينفصل عني عادي بس بابا لا
رانيا:جديات لو قرر تنفصلو اتوافقي
سندس بعصبية:شن بندير لو هو فاهم اني خنته ويبي ينفصل واصلا اكيدة حيقرر ننفصلو لان قالها ليا و ماشي البابا عشان هكي
رانيا:باهي خلاص حبي وسعي بالك وحتى لو انفصلتو المهم انتي عارفة روحك شنو وهو الخاسر في الاخير
سندس:بس انا الكلام هذا انقول فيه من ورا قلبي انا انحبه يارانيا ومانبيش ننفصل عنه وقعدت تبكي
رانيا انصدمت من بكى دوسة اللي عمرها ماتخيلت ان ممكن اتحب في يوم الدرجة تبكي لانها ماتبيش اتسيب سراج
رانيا حظنتها:بطلي بكى ياحبي وسراج اكيدة بعد يهدى حيفهم ان فيه غلط في الموضوع وحيحاول يفهم سراج مش غبي ومستحيل علي سبة واحد او وحدة قاعد واضح ان بيخرب عليكم ينفصل عليك وهو ايحبك وتغير عشانك مش حيسبك غير حامق بس ولما يهدى حيجي يحكي معاك بهدوء ويفهم منك
سندس تبكي:انتي مش عارفة سراج زي ماانا عارفته لما ايحط حاجة في عقله مستحيل حد ايغيرها له
رانيا:باهي ياقلبي حاولي لما ايروح تحكيله انك اتحبيه للدرجة هذي مرات بعد يعرف ايغير رايه
سندس تبكي:سراج لما ايجي اكيدة حيكون معاه بابا وعمو محمد وايكون مقرر ومتفق معاهم عالانفصال وبابا حيجي معاه عشان ياخذني وانا لما ايكون مقرر هكي مانقدرش نحكيله مانقدرش انزل كرامتي ونطلب منه ماننفصلوش
رانيا:الحب مافيش كرامة
سندس;انتي عارفة ان عندي انا كرامتي فوق من كل شيئ حتى الحب مش حنقدر نطلب منه نقعد معاه وهو امقرر ايسيبني مانقدرش
رانيا:انا شفت سراج يوم الحفلة وشفته كيف باين ان ايحبك بكككل وانسان ايحب هكي مستحيل ايسيب الشخص اللي ايحبه مهما كان السبب وعندي احساس كبير ان مش حيحكي الحد عاللي صار
سندس:تحكي سراج حاس روحه انهان بالحركة هذي وكل حاجة اتهون عنده الا اهانته
رانيا;باهي توا انتي مقررة لو روح سراج ومعاه باته وعمو فرج مش حتحكيله انك اتحبيه صح
سندس تبكي:اها حنخليه يفهم اللي يفهمه وبعدين بعد يعرف اني مظلومة حيندم عاللي داره كله
رانيا:لكن لو صار زي ماانا قلت وماحكش الحد معناها هكي سراج ايحبك وانتي لازم تعترفيله بحبك له بالك يهدى وتلقو حل
سندس:بس انا عارفة ان اكيدة توا حكالهم
رانيا:ارجي لين ايروح وتوا نعرفو بس والله عندي احساس كبير ان مش حيحكي عشان هو لما حكى هكي كان معصب وبعد يهدى حيفكر في الموضوع بعقله وتوا يعرف انها لعبة من حد يبي ايفرقكم
سندس تبكي:ياريت يارنوشة يفهم زي ماقلتي بس مشكلتي عارفته وفاهمة كيف ايفكر
رانيا قعدت معاها قريب ساعة واتحاول اتهديها واطمنها وبعدها روحت وقعدت سندس في الحوش ترجى في رحمة ربي وترجى امتى ايجي سراج ومعاه باتها عشان ياخذها وفي نفس الوقت خايفة علي باتها اتصيرله حاجة لما سراج يحكيله
""""""""""""""""""""""'"
#عند_رويدة
طلعوها مالمستشفى لانه حالتها قعدت اكويسة واول ما روحو للحوش وجو بيخشو
معاذ:حبيبي قبل مااتخشي بنشيلك المكان
ام معاذ:مراتك مازال تاعبة وين بتاخذها
معاذ:بناخذها انوريها حاجة عشان تطمن
رويدة:وين مكان بعيد يعني
معاذ:لالا اهو خطوتين
رويدة:باهي
معاذ مسكها من يدها وشالها الحوشه هو ولينا وفتح الباب رويدة كانت خايفة ومش عارفة شن بتشوف
معاذ:هي خشي ورويدة خشت معاه
ولقت صور وكتب واوراق وهدايا وحاجات عرم محطوطات في علب وشكاير
معاذ:شفتي حبيبي اني كنت مختارك انتي وكنت بنمحى كل الماضي
رويدة:شفت
معاذ قرب منها ومسك ايديها:حبي انا نبيك اتكوني انتي بس حاظري وماضيي ومستقبلي وكل شيئ في دنيتي
رويدة نزلو دموعها:انحبك معاذ
معاذ:وانا وحق ربي انموت فيك وعشاني معش تبكي وقعد يمسحلها في دموعها وبعدها حظنها زيين 😍وريدة دفنت راسها في صدره وزادت حظناته
بعد اشوي معاذ بعدها
معاذ مع ابتسامه عريضه علي وجه;هي حبيبي عشان اتريحي في سريرك
رويدة ابتسمت:هي حبيبي وطلعو ومشو الجناحهم
"""""""""""""""""""""""""""
#عند_رانيا
روحت الحوشهم ولما هلها سألوها علي دوسة قالت انها كانت مريضة اشوي وقعدت معاها وبعد قعدت كويسة روحت وشربت قهوتها مع هلها وبعدها خشت الدارها بتريح من يومها المتعب
واول ماخشت للدار وغيرت دبشها وجت تمددت علي سريرها واول ماحطت راسها علي مخدتها دغري جا في بالها فيصل وقعدت اتفكر ليش دار هكي هل لان زعل منها ومعش بيشوفها هل هذا رد فعله لانها رفضاته وهل هو كرهها مية تفكير جا في راسها وفي لحظة قمعزت فجأة ومسكت فونها وقررت اترن عليه وتعرف ليش سيب الشغل حطت علي رقمه واتصلت بس الصدمة الها كان مقفل استغربت واجد وفتحت نت بتشوفه ممكن فاتح ولما شافاته لقاته اخر ظهور امس الصبح قلقت واجد ومعش عرفت وينه او ليش ايدير هكي وحطت راسها عالمخدة وهي كل تفكيرها في فيصل
""""""""""""""""
#الساعة 8 في الليل
سندس قاعدة علي اعصابها ومش قادرة تصرف او ادير شيئ فكرت اترن علي باتها واتجس النبض اذا عارف او لا وبعدها خافت ولغت الفكرة وجتها فكرة تتصل بامها عساس تطمن عليهم ولو سمعو اكيدة امها عارفة ومسكت فونها واتصلت وسعاد ردت
سعاد:اهلين دوسة شن اخبارك
سندس:تمام ياماما شن اخبارك انتي واخبار بابا
سعاد:كويسين الحمدلله اهو قاعدة انوتي في العشاء باتك طالب عصبان شن رايك اتجو انتي وسراج اتعشو معانا
سندس:لالا صحة سراج عنده شغل مش قاعد
سعاد:خلاص توا انعقبلك قرعتكم بكرا وانتو مروحين تعالو خوذوها
فرج:مازال هالعصبان اللي شعفتينا عليه
سندس:بابا قاعد في الحوش
سعاد:قاعد اليوم ماطلعش بكل قال تاعب اشوي
سندس بخوف:كنه ياماما
سعاد:ماكنه شيئ مااتخافيش غير راسه صداع كلمت الدكتور فؤاد جارنا جا قاسله الضغط لقاه مرتفع اشوي وقاله اليوم تريح
سندس:ليش ماكلمتيني قلتيلي
سعاد:عليش بنكلمك قتلك كويس
سندس:اليوم كان روح سراج بدري انجيكم وكان هذا بكرا مالصبح تلقوني عندكم
سعاد:والله يادوسة مااتعبي روحك راهو كويس غير اليوم تريح عشان نطمن عليه بس
سندس:اللي هي لازم انجي انشوفه
سعاد:ييي اخر مرة عاد انقولك حاجة والله باتك لو يعلم اني قتلك وفجعتك هكي ايتعارك معايا اصلا من بدري ايقولي ماتحكيش الدوسة توا تنشغل لكن انا كيف امتاع بلح جليانه ماتندس في فمي حاجة
سندس:وكان ماقلتولي بنتكم الوحيدة المن بتقولو
سعاد:المهم بعد اتجي مااتقوليش الباتك انا حكيتلك
سندس:باهي
سعاد:خلاص انا بنسكر خير ماباتك ايتركب فيا علي هالعصبان
سندس:باهي ماما سلام
سعاد:سلام وسكرت
سندس لما سكرت تأكدت ان سراج ماحكش شيئ الباتها بس كان السؤال هو وين لعند توا وليش ماحكش الهلها زعمك زي كلام رانيا لان ايحبها ولما ايروح حيتفاهم معاها ويوصلو الحل
قعدت في حوشها وهي الف تفكير وتفكير في راسها
وعالساعة 10 روح سراج وخش للحوش ولقى سندس مقمعزة في الصالة ماقالش حتى خير ودغري رقى الداره
سندس اضايقت من تصرفه بس بعدها قررت اتصبي وتحكي معاه واتقوله كل حاجة في قلبها لانها تعبت من تخبايها الحب سراج صبت ورقت فوق وخش للدار لقت سراج ايلم في دبشه مالدار
سندس:في شنو ادير
سراج:شوفة عينك انلم في دبشي 😒
سندس:عليش هكي
سراج لف عليها:يعني مش عارفة اللي درتيه حظرتك
سندس:سراج انا والله مادرت حاجة والله اللي داز الصور غرضه بس ايفرقنا
سراج:باهي من هذا وليش بيفرقنا
سندس; مش عارفه بس خلينا انفكرو مع بعضنا اكيدة حنعرفو
سراج:مافيش شيئ نعرفوه والرقم مسجل عندك لنفرض ان حد جايب صورك من اي مكان او باي وسيلة باهي كيف الرقم اسجل عندك
سندس:والله مش عارفة بس اكيدة كيف ماوصل الصوري وصل الفوني وسجل الرقم
سراج بعصبية;سندس انا مش فرخ تحكيلي هكي وتكذبي عليا
سندس:سراج انا والله مانكذب عليك ولا عمري كذبت بكل وانت عارفني
سراج بهزوة:عارفك بكككل😒
سندس:بلاش حركات مستفزة انت لازم اتصدقني
سراج:وليش لازم انصدقك ان شاءلله
سندس:لاني انا مانكذبش
سراج بعصبية وصوت عالي;انتي تكذبي واكبر دليل ان لما حاولت انقرب قلتي انك مريضة وانا من اول يوم اكتشفت انك تكذبي وشفتك اتصلي بس ماحبيت نحكي ولا نضغط عليك وخليتك براحتك قلت ممكن خايفة او مازال ماحبتني بس توا عرفت انك درتي هكي عشان اتحبي واحد اخرى
سندس انصدمت لما عرفت ان سراج عرف كذبتها
سراج بعصبية:انكري انك درتي هكي
سندس: مش ناكرة بس والله هذي كانت اول كذبة نكذبها عليك والله درت هكي بنتأكد من حبك والله حياتي مافيها غيرك
سراج بعصبية:اللي كذب مرة يكذب عشرة بس ماتخيلتش انك ترفضيني عشان اتحبي غيري واهو باعك ليش درتي هكي ياسندس انا حطيتك في مكانه مافيش بنت وصلتلها معايا تي انا عشانك تغيرت عشان بس انكون نستحقك لاني اكتشفت ان فيه بنت شريفة وفيه بنت صاينة نفسها وروحها غالية عندها وعمرها مارخصتها حبيتك وحبيت ادبك واخ
حترامك وانتي اتفاجئني بانك رخيصة زيك زي كل البنات يااخسارة ياسندس
سندس انصدمت من كلام سراج
سندس بعصبية:انت كيف تحكي عليا هكي انت عارف كويس انا شنو انا عمري ماكنت رخيصة ولا نرضى انكون هكي
سراج بعصبية:لا انتي هكي طلعتي كيفك كيفهن مافيش فرق كلكن زي بعضكن يااخسارة حبي لكي
سندس بعصبية:انا مانسمحلكش اتقول هكي واتهيني انا سكتتلك واجد بس لعند هنا واستوب صح فرحت لما عرفت ماحكيت شيئ الحد بس بعد كلامك هذا انا اللي مستحيل عاد نقعدلك فيها وجت بتمشي وسراج مسك يدها
سراج ماسك يدها بقوة:لا ياحلوة مش بجوك تطلعي من حياتي هكي قبل مانعرف الشخص اللي تعرفيه وفلضلتيه عليا هذا من
سندس اتحاول اتفك يده لانها وجعها
سندس بعصبية:اعرفه بروحك انا معش قاعدة معاك هنا
سراج بعصبية وزاد ضغط علي يدها:تي مافيش طلاق ولا فيه طلعوع من هنا لين نعرفه مش انا اللي ننخان بسهولة انا البنات ايموت ويقضن ليلة معايا والبنت اللي تعرفني اتحرم بعدي اتعاشر راجل وجاية انتي اللي عطيتك قلبي وكل حبي اتخونيني هكي وتبي تطلعي بالساهل لا مش انا اللي انديرها وهنا كلمتين تبي تطلعي من هنا حنحكي كل حاجة الهلي والهلك وكل الناس وحنقول انك رفضتي انقرب منك ونحكي عالصور والرقم اللي مخزن عندك وانقوللهم ان هذا كله عشان حبيبها وبرضو مافيش طلاق لين انا نعرفه وناخذ حقي منك ومن هلك ثالث ومثلث وبعد كل هالكلام حنشوفو باتك وامك شن حيصير فيهم بعد يسمعو علي بنتهم الوحيدة الكلام هذا لكن لو قعدتي لين نعرف هذا من وناخذ حقي منه نوعدك مانحكي الحد شيئ وانطلقك بس الفرق الطلاق حيكون بكل هدوء بحجة ماتفاهمنش بس لازم نعرف من اللي فضلتيه عليا قبل
سندس بالم:والله مافيه واحد وحق ربي مانعرف حد
سراج:خلاص لو واثقة مافيش حد خليني انتأكد بروحي وبعدها انطلقك عشان انا بروحي قرفت منك ومعش نبيك
سندس لما سمعت هكي حست بألم قلبها اكثر من الم ايديها اللي ضاغط عليها سراج بس حاولت ماتضعفش قدامه واتبان قوية
سندس:ماشي سراج موافقة بس مش لاني خايفة ماللي بتحكيه لاني بنثبتلك اني مانعرفش حد وان كله ظلم بس بعد اتأكد حنطلق لان بعد كلامك هذا مستحيل نقعد معاك
سراج سيب يدها:ولا انا عاد نبيك خلاص كرهتك كرهتك وقعدتي كيفك كيف غيرك
سندس بعصبية:ماحد كيف حد ولا انا عمري قعدت كيف الرخاص اللي تعرفهم انا اشرف منك ومنهن كلهن
سراج بهزوة:واضح بكل بأمارة الصور
سندس بعصبية:لو خذيت ادبشك اطلع معش عندي نية لا نسمعك ولا انشوفك
سراج:وبالك انا اللي عندي نية انشوفك او نسمعك مسيبها لكي كلها اقعدي فيها وطلع مالدار وطلع مالحوش كله
سندس اول ماطلع سراج خبطت الباب وراه وقمعزت وقعدت تبكي وتبكي بكل الم وحرقة مش مستوعبة كلام سراج معقولة الحب اللي كان ايحبه الها تحول فجاة الكره معقولة سراج ايصدق شيئ زي هذا عليها كانن ادموعها حارة وقلبها مجروح وتمددت علي سريرها وقعدت تبكي لين تعبت من كثر البكى ورقدت
"""""""""""""""""
صباح يوم جديد
وعت سندس وهي عيونها منتفخات من كثر البكى صبت خذت دوش وطلعت لبست وبعدها طرحت الصلاية وقعدت اتصلي في الصبح ودعت واجد ان ربي ايفرجها عليها وايريح قلبها
وبعد كملت صلاتها صبت عالمراية وحاولت ادير ميك اب خفيف يخفي اثار البكى وطلعت مالدار ومشت الدار سراج عساس بتوعيه الشغله بس تفاجئت ان مش في الدار وان السرير مازال ملموم زي ماكان امس يعني سراج مش بايت فيه نزلت دوراته لوطه مالقاتش ولا لقتله اثر في اي مكان ان راقد فيه فعرفت ان مابتش في الحوش بكل تنهدت تنهيدة من وسط قلبها وخشت ادير في قهوة اتصحصحها لان راسها مازال مصدع من بكى امس
وتت قهوتها وخذتها وطلعت مالمطبخ وخشت الدار المعيشة وقعدت تشرب فيها مع دقت الباب صبت بتفتح تحسابه سراج ولما فتحت لقتها عفوفة
عفاف:صباح الخير دوسة
سندس:صباح الخير اعميمة
عفاف:توا غير وعيتي
سندس:من نص ساعة هكي
عفاف;باهي وتيتي ادبشك
سندس:اي دبش
عفاف:كيف اي دبش ماهو بنمشو للمزرعة توا كيف ماحكالك سراج
سندس:لالا محكاليش
عفاف:غريبة هو صاحب الفكرة ان نمشو للمزوعة منها جو ومنها اتشوفها تولي واتشوف الطبيعة نحسابه متفق معاك
سندس:لالا سراج ماحكالي شيئ
عفاف:عادي اكيدة انسي اصلا مالصبح طالع ايجهز للمشية
سندس:اها تمام
عفاف:دبينك مازال ماوتيتي ادبشك هيا انساعدك بيش انكملو بسرعه
سندس:لالا اعميمة انا ماعنديش جو للمشية
عفاف:الستر ليش ماتبي تمشي معانا
سندس:حاسة روحي تاعبة ومانقدر نمشي
عفاف:لا وراسي عندك تمشي ولو مامشيتي انتي معانا والله ماني ماشية
سندس:راسك غالي عندي اعميمة بس والله تاعبة ومش قادرة
عفاف:انا حلفت كان ماتمشي ماني قاصتها
سندس بقلة حيلة:حاظر اعميمة حنمشي معاكم
عفاف:معناها هي سلم بنيتي انوتو ادبشك عشان انكملو بسرعة
سندس:هي ومشت مع عمتها وهي قلبها موجوع وواجعتها ان سراج بدى يستكرد فيها هكي وماكان في خاطرها تمشي بس عمتها اصرت عليها وماتبي اتزعلها
وتت الدبش هي وعفوفة ولبست (جينز ازرق وعليه بلوزة بيضة وجاكة جينز ازرق وكاويش ابيض ووشاح ملون وشنطة بيج)وطلعت مع عمتها بس لما طلعت شافت سراج مروح وجايب معاه حاجات الرحلة بس الصدمة ان كانو هو وتالين طالعين مع بعضهم بيجيبو الحاجات في اللحظة هذي حست بإهانة كبيرة بس ماحبت اتبين ولا تحكي قدام حد وتعاملت مع الوضع كأنها ماشافاتش بكل 💔
وبعد اشوي ركبو كل حاجة في السيارات وطلعو وجت سندس ركبت مع سراج من قدام وسراج لما جا للسيارة ولقاها قلب وجه 😒
سراج;تولي مكانك معايا هنا راه
تاالين:عارفة سيرجو اهو جاية وجت وركبت معاهم من لاورة
وعمو محمد ومعاه عفوفة مشو في سيارتهم
سندس طبعا ماعجبتها اللقطة اللي دارها سراج بس لانها متعاركة معاه اضطرت تسكت وخلاص
وطبعا سراج كان طول الطريق تشفيط واتهدريز هو وتالين ولا كانه سندس موجودة وسندس كانت تحرق وتغلي من جوا مقهورة ومش قادرة اتبين وماتبيش سراج يعرف ضعفها وحبها له لان كرامتها عندها اهم مالحب 💔
"""'''"''""""""""
#وصلو_للمزرعة
ونزلو الكل وبدو الخدم اللي في المزرعة اينزلو في الحاجات اللي جايبينهن
عفاف:دوسة وتولي تعالن انوري كل وحدة فيكن دارها عشان اتحطن دبشكن فيهن
ومشن معاها وكانت فيه دار فيها سرير شخصين وكبيرة هذي عطتها الدوسة وسراج وخلت سندس اتنظم في دبشها فيها واما الدار لخرى كانت التالين وبدت حتى هي اترتب في دبشها فيها وكانن الديار جنب بعضهن
اما دار عفوقة وعمو محمد فكانت في الطابق الارضي ومشت حتى هي انتظم في دبشها ودبش راجلها فيها
وبعد حوالي ريع ساعة طلعن البنات وعفوفة من جوا لقن سراج وعمو محمد مقمعزين مع بعضهم
تالين لما نظمت دبشها لبست(بلوزة سودة كم بس من عند المرفق والصدر مشبكة ولابسة عليها جينز ازرق وكاويش اسود وطبعا ماكانت متحجبة فكانت طالقة شعرها الذهبي وكان قصير ومدايرتله مساكة علي هيئة وردة صغيرة في شعرها مالجنب وكانت حلوة واللون الاسود عاكس عليها بككل😍)
سراج اول ماطلعت تالين شافلها وابتسم
سراج غمزلها:وين عالطرحات تولي
تالين تمايلت وحطت يدها علي خسرها:شن رايك سيرجو
سراج:لنقنك طرف أطلع طووول
سندس في اللحظة هذي اضايقت بس مابتش تضعف ومابتش اتعدل عليه بس كانت نار في قلبها
سندس:عمو مش فيه خيول هنا بنمشي انشوفهن
محمد:اهو سراج بيمشيلهن توا ياخذك معاه
سندس;لا عمو بنمشي معاك انت اصلا بابا حاكيلي انك احسن واحد يركب عالخيل
محمد ضحك;الكلام هذا زمان توا كبرنا
سندس:اي كبرت والله اللي ايشوفك ايقول عمرك 30سنة
محمد يضحك:سراج علمك الطروح شكله
سندس:لا عمو معقولة والله نحكي في الصدق
محمد:انبصر ياهبله هي انتي وعفوفة وتالين انوريكن الركوب عالخيل شن شكله
سراج:لا تالين خلوها بتمشي معايا انا بس مش توا مازال بنهدرزو اشوي وبعدها نمشو
عفاف اتفنص في سراج وتبيه ايتحشم
سراج ماعدلش بكل وقاعد ايهدرز مع تولي
محمد:باهي براحتكم هي يادوسة ومشو
وعفاف قعدت اشوي وخذت سراج علي جنب
عفاف:شنو الحركات اللي ادير فيهن قدام مراتك
سراج:وشن درت
عفاف;هذا كله وشن درت ماتسمعش في كلامك مع تالين ومغازلتك الها قدامها ولا توا اتقول بنقعدو انا وتالين انهدرزو شنو الحركات هذينا انت كنك شن صايرلك
سراج;ماصايرلي شيئ وبعدين تالين زي اختي وكلكم عارفين وحتى هي عارفة وشفتيها بروحك مش متكلمة ولا معدله عالموضوع
محمد بصوت عالي:عفاف هي كان بتمشي معانا
عفاف:هي جايتكم وانت ياسراج حسابك معايا بعدين ومشت وسيباته
سراج رد وقمعز مع تولي وماعدلش علي كلام عفوفة بكل وكملها هو وتولي اتهدريز وضحك والحياة حلوة
""""
وصلو دوسة وعفوفة وعمو محمد المكان الخيول ووراهن عمو محمد الحصان امتاعه وطلعه وركب عليه وسندس كانت اتحب الخيول فكانت منسجمة مع الوضع وعفوفة تحكيلها علي عمو محمد ايام شبابه وكيف كان احسن واحد يركب خيل
بعد اشوي جا عمو محمد وركب سندس معاه وكانت فرحانة ومنسجمة لانها كانت اول مرة تركب
بعد اشوي جا سراج ومعاه تالين وطلع الحصان متاعه وركب تالين وركب وراها وقعدو يدهورو بالحصان وتالين فرحانة وتضحك وسراج منسجم عالاخر وهذا كله كان قدام سندس واتشوف فيهم واضايقت
سندس:عمو انا بننزل
محمد:حاظر انزلك وانركب عفاف كان بت
سندس:توا نقنعها انا
محمد وقف ونزل بينزلها لكن النزله كان فيها صعوبة ولما نزلت علق كراعها في عدة الحصان وطاحت محمد دغري نزل بيشوف كراعها وعفاف جتها من غادي تجري واتعيط
سراج قعد ايشولها من بعيد وخلاص
تالين:انزل شوف شن صارلها
سراج:لالا فوتي مايبي ايصيرلها شيئ
عفاف:حي عليا وريني شن صارلك
سندس:ساهلة اعميمة
محمد:شنو ساهلة اهي ركبتك ادمم
سندس:والله جرح سطحي وبسيط توا نمشي للمزرعة وانديرله مطهر وانحط عليه لسقه يقعد تمام
عفاف:باهي هيتي يدك عشان انوصلك
محمد:لالا غير قمعزيها هنا اشوية توا انجيب السيارة وانوصلها بيها للمزرعة ماتمشيش هكي
سندس:عمو والله ساهلة ماتستحقش هذا كله
محمد:خلاص بنجيب السيارة كلمة وقلتها وعدى عمو محمد ايجيب في السيارة
وسندس ساعدتها عفوفة لين صبت وقمعزتها علي كرسي مع جية تالين
تالين:شن صار عمتو سندس كنها
عفاف:طاحت مالحصان
تالين:سلامتك ان شاءلله ساهلة
سندس بدون نفس:لا ساهلة 😒
تالين:تبي مني حاجة عمتو انساعدكم في حاجة
عفاف:سلامتك تولي
تالين مشت السراج بس هالمرة كان نازل مالحصان ومشو ايتفرجو علي باقي الخيل في الاسطبلات
عفاف:دوسة عارفة مش وقتها بس انتي وسراج باين انكم متعاركين صح
سندس:اها
عفاف:انا مانبيش ندخل وانقولكم كنكم بس انتي لو حابة تحكيلي احكيلي ومرات نلقالكم حل يرضيكم انتو الاثنين
سندس:معليش اعميمة انا توا مش قادرة نحكي شيئ
عفاف:براحتك لكن امتى ماتبي تحكيلي انا نسمعك في اي وقت وديما حتلقيني واقفة في صفك مش صف سراج
سندس:والله عارفتك اعميمة
مع جية عمو محمد جايب السيارة وروح بيها وسيبو سراج وتالين مع الخيول وروحو للمزرعة
سندس داوتلها عمتها الجرح ووريحتها علي كرسي برا وماخلتهش اتحرك بكل وشربو القهوة مع بعضهم وبعد اشوي بدا عمو محمد ايجهز للشوايات وفي اثناء التجهيزات جا سراج وتالين وبدو ايجهزو معاه وسندس وعفوفة مقمعزات وايخرفن بس دوسة كان عقلها كله مع سراج وتصرفاته مع تالين اللي كانن يقتلن فيها ومش قادرة اتبين واللي واجعها اكثر ان سراج شافها بعد ماطاحت وشافها وهي توا كراعها مش قادرة اتحركها وماجاها ولا سأل علي حالتها ومش مصدقة ان سراج وصل بيه الكره للدرجة هذي وكأنه شخص ثاني مش زي اللي عرفاته بكل ومصدومة فيه لان حتى ايام وهما ماايحبوش بعضهم ويتناقرو كان معاها احسن من هكي وكان يزعل لو صارلها شيئ
سراج خذا من عمو محمد الشوايات وقعد هو وتالين يشوو وضحكهم واصل للكل الدرجة حتى عمو محمد لاحظ ان فيه شيئ مش طبيعي ايصير ورقتله من سراج بكل وكيف ايدير هكي قدام سندس
وتن الشوايات وقمعزو الكل ياكلو مع بعضهم وسراج كان كل تصرف يقهر دوسة ايديره مرة ايوكل تالين ومرة ايغازلها وسندس كانت اتحاول اتمالك اعصابها وماتبيش اتبين غيرتها قدام سراج واتحاول تجاهل اللي قاعد ايصير قدامها كانن ملامحها عادية وباين عليهن الابتسامه اما قلبها من جوا والعة فيه النار🔥
بعد العشاء قمعزو ايخرفو كلهم وتالين كانت تحكي في مأساتها مع مرات باتها وباتها وخوتها اللي مش معتبرينها من عيلتهم بكل سندس حاولت اتعاطف معاها بس تصرفات سراج معاها وكيف مهتم بيها خلنها تكرهها بكككل
عالساعة 11 دوسة وعمو محمد وعفاف نعسو ومشو بيرقدو وطبعا سراج وتالين قعدو مع بعضهم لان سهرتهم مازالت مطولة سندس خشت الدارها وهي حامقة بككل من سراج ومش قادرة تمنعه من اللي ايدير فيه ولا قادرة اطفي نار الغيرة اللي في قلبها قعدت طول الليل مصبية في الروشن واتشوف السراج وتالين من غير ماايشوفوها واتشوف في ضحكة وبصارته مع تالين الشيئ اللي خلاها اتحس ان سراج عمره ماحبها وطول الوقت يكذب عليها قعدت طول الليل وهي مصبيه في الروشن واتشوفلهم عند لما خشو مع بعضهم جت وقمعزت في سريرها ترجى في سراج ايخش للدار وكانت مقررة تحكيه معاه واتوقفه عند حده في كل حاجة ايدير فيها قدامها استنت 10 دقايق ترجى في سراج ايخش بس سراج ماخشش وفي اللحظة هذي كل اللي جا في بالها ان سراج خش مع تالين الدارها😱طلعت تجري وبدون خبط لا شيئ فتحت الدار علي تالين وانصدمت لما لقت تالين مقمعزة في سريرها وماسكة اللابتوب وفي الدار بروحها
تالين بصدمة:شن فيه كنك
سندس:معليش فتحت الدار هكي كنت بنسألك علي سراج وين مشى
تالين:سراج سيبته تحت قال بيرقد في الدار اللي تحت
سندس:اها تمام وجت بتطلع
تالين:سندس انتو متعاركين
سندس بنظرة عالجنب😒:لا جونا تمام وطلعت وخبطت الباب وراها زين اول مرة اتحس انها في صراع مع بنت في حاجة اتخصها واول مرة اتحس ان فيه بنت انتصرت عليها
مشت الدارها وخشت السريرها ورقدت وهي دمعتها علي خدها 😢
"""""""""""""""""""""""""
صباح ثاني يوم
#عند_رانيا
جت الشغلها وكانت فيه بلا عقل حتى كل اللي كانت تشتغل عليه غلط لان عقلها ماكان معاها كان في مكان ثاني
هيثم:رانيا انتي كنك شغلك اليوم كله غلط شن صاير معاك
رانيا:معليش اليوم تعبانه اشوي
هيثم:خلاص عدي اليوم تريحي وبكرا تقعدي اكويسة اتجي
رانيا:بس شغل واجد مانقدرش انخليه عليك كله
هيثم:ماعليك معايا وسيم والمشرف مش حيقعد فيه ضغط وانتي تريحي وبعد تقعدي كويسة تعالي
رانيا:بجديات اليوم لازمني راحة شكرا هيثم
هيثم:العفو
كلمت رانيا السواق عشان ايروح بيها وجاها وركبت معاه وطول الطريق كانت اترن علي فيصل مقفل وامس كله كانت اترن عليه برضو مقفل ونت مش فاتح من يومين كانت مشغوله عليه بكل لان الجو هذا مش من عادته وفي اللحظة هذي قررت تمشي للشركة واتشوفه
رانيا:عمو شيلني الشركة-------عارف مكانها صح
السواق:اها عارفة حاظر توا انشيلك
وشالها ووصلها للشركة واول مانزلت وسألت علي فيصل قالولها ان واخذ اجازة مفتوحة خذت رقم حوشه مالشركة وطلعت اتصلت بالحوش وردت عليها ريان
ريان:ايوا من معايا
رانيا:هذا حوش فيصل
ريان:لا هذا حوش ماما فيصل مازال مادارش حوش😒
رانيا:باهي فيصل قاعد
ريان:لا فيصل له يومين ماايروحش هنا انتي من شن تعرفيه
رانيا:انا صديقته لما ايروح قوليله يتصل بيا حبيبتي
ريان:انتي متاع الكيكة صح 🤔
رانيا ضحكت:اها انا
ريان:انا نعرف اسمك انتي رانيا صح
رانيا:صح وانتي ريان ولا روان
ريان:انا ريان😒ولما ايجي فيصل انقوله ايكلمك
رانيا:باهي تمام شكرا ياحلوة 😘 وسكرت
ريان:طلع فيصل مش ساهل وعنده معجبات ايكلمن فيه وداير روحه مؤدب😒ومشت تحكي في اللي صار الروان😂
""""""""""""""
#في_المزرعة
وعو علي صوت واحد جاهم ماكانش متوقع بكل (سماكم من😂)
صالح ايعيط:سرااااااج سراااااااج
سراج فتح الروشن وعيونه مغمضات:يافتاح ياعليم شن تبي اتعيط مالصبح
صالح:منور يابرو انت وخالتي تدهورو من ورايا ليش ماكلمتوني مش قتلك بعد تمشو للمزرعة كلمني
سراج: هذا عليش اتعيط مالصبح انسيتك ازف
صالح:باهي اللي جيت للفيلا بالصدفة عشان نكتشف خيانتكم
مع طلعت عفوفة
عفاف:اهلا اهلا بصلوحة شن اخبارك
صالح:كويس لكن زاعل منك
عفاف بخوف:وليش يااصلوحة زاعل
صالح:قتلك انتي وسراج لما تمشو للمزرعة بنمشي معاكم وجيتو وفتوني
عفاف تضحك:حقك علي راسي وامس بس جينا ومازلنا قاعدين اهو لحقت علينا
صالح:وين خالو محمد راقد
محمد يضحك:اهو جيتك فيه واحد يسمع عياطك مالصبح ويرقد وسلم عليه
صالح:تي المفروض تفرحو اول مرة نوعى بدري وخطرتو في بالي جيتكم في الفيلا الامن قالي انكم هنا
محمد: واتقول فيها وفرحان اول مرة توعى بدري طيح والله سعدك انت وسراج فوله وانقسمت نصين
سراج طلع:توا شن دخلني مااهو قعدت نوعى بدري ودرتلك كل اللي تبيه عليش مازال تحكي عليا
محمد:مادرته لين قريب جلطتني
تالين طلعت:صباحو☺
صالح صفر:تي من الطرف هذا
محمد;صالح تحشم علي وجك وفكني من صياعتك هنا راه انلزك 😒
سندس طلعت:صباح الخير 😊
صالح:اه جا الصارووووخ لاخر قلبي الصغير لا يتحمل
سراج شافله بالجنب😒 وسكت
بعد هالجو والبصارة حطو الفطور وفطرو مع بعضهم واثناء الفطور رن فون سراج وكانت ام فيصل وسراج رد
سراج:خير ياسلملم(اسمها سالمة) شن اخبارك
ام فيصل:كويسة الحمدلله شن اخبارك انت
سراج:تمام كويس
ام فيصل:سروجه بنسألك علي فيصل له يومين ماروح للحوش مش معاك هو
سراج بإستغراب:لا مش معايا انا بروحي ليا يومين ماشفتش
ام فيصل:المشكلة ان قافل تليفونه وقلبي نار عليه ترا اسالي باتك بالك يقعد مسافر عشان الشغل ولا حاجة
سراج حاظر توا نساله
سراج:باتي مش داز فيصل في سفرة للشغل ولا حاجة
محمد:لا والله امس في الصبح جا للشركة خذا اجازة مفتوحة وسألته عالسبب ماحكش وعطيتها له
سراج:قال باتي واخذ اجازة مفتوحة
ام فيصل:حي عليا العيل وين وشن صايرله شوفه ليا الله ايربحك ياسراج هو صاحبك واكيدة عارف وين يمشي
سراج:حاظر والله حنشوفه لكي وان شاءلله ماايجي الليل الا وانا عارف مكانه
ام فيصل:ان شاءلله واسمحلي علي هالاجعاز رانة عليك مالصبح
سراج:لا عادي لافي اجعاز لا شيئ فيصل خويا
ام فيصل:وانا عارفة هذا ليش كلمتك ومع السلامه توا وكلمني كان صار معاك حاجة
سراج:حاظر وسكر وقعد ايفكر في فيصل وين ايكون مغطس ومختفي وشن سبب هذا كله
وبعدها كملو الفطور وكل واحد قعد ايدير في حاجة
عمو محمد وعفوفة مشو بيدهورو في المزرعة
وسراج وتالين مقمعزين في سيارة سراج ويسمعو في الاغاني
وسندس حاطه سماعات في وذانها واتحاول تجاهل سراج واللي ايدير فيه
صالح مشى شور الخيل وبعدها روح
صالح:سيرجو تعال نلعبو كورة
سراج:ترا ملح ياعيل كورة صحيح
صالح:شن فيها الكورة نوع من انواع الرياضة ويلعبو فيها لاعبين كبار مش العيال يامتخلف
سراج:انا عندي يلعبوها الفروخ الصغار ومش لاعبها
صالح:بارد مافيكش جو بكل😒
وجا قمعز عالكرسي جنب سندس
صالح:في شنو يسمع الحلو
سندس حولت السماعات;شن قلت
صالح:قلت في شنو يسمع الحلو
سندس:مادخلكش😒وردت حطت السماعات في ذانها
صالح انصدم منها😳 وحس انها مالبنات الصعبات اللي الطريقة معاهن مش المغازلة والجو هذا وهو ايموت في النوعية المعصية هذي فحطها في راسه🤨
كانت سندس حاطة السماعات واتشوف السراج وتالين وكيف منسجمين وايبصرو مع بعضهم وفي لحظة نزلت تالين تجري مالسيارة وفي يدها فون سراج وسراج نزل يجري وراها ومسكها وقعد بياخذ منها الفون وهي قاعدة في حظنه
سندس نبضات قلبها زادو ودمعو عيونها وصبت بتمشي واتوقف هالمهزلة بس في صوت داخلها منعها
سندس:لا انا عمري ماانهين كرامتي عشان حد هو اختار الطريق هذي هو حر وهكي هكي نحن مش مكملين مع بعضنا لذلك مش داعي يعرف بحبي له خليني محتفظه بيه في قلبي بس والله نقهرك ياسراج زي ماقهرتني
سندس:صالح تمشي ندهورو في المزرعة
صالح وعيونه قلوب:اكيدة😍وطلعو من جنبهم وسراج كان مصدوم من لقطة سندس وكيف ماشية مع صالح ومبتسمة واتهدرز وقعد ايتبع فيها بعيونه لين اختفت من قدامه
سندس طبعا الابتسامه والتخريف كان بس لما خطمت من قدام سراج ومن اول مااختفو قالت الصالح معش تحكي معايا وعلقت السماعات في ذانها😂وفاتاته
بعد اشوي ردت سندس وصالح واول ماوصلو للمزرعة وشافت سراج وتالين دارت روحها تضحك معاه وتحكي الشيئ اللي خلى صالح يحسابها مطرشقة ومعش فهم شيئ🤔😂
مشى الوقت علي هالحال سندس قدام سراج دايرة روحه اتهدرز مع صالح عشان تقهره وسراج مش هامة الموضوع بكل وهايم مع تالين اما عمو محمد وعفاف مش عاجبهم اللي قاعد ايصير كله😡
مر اليوم بنفس الطريقة لعند الساعة 10 من بدري متعشيين وناهيين الموضوع
تالين:وقت نسكافيه صح
صالح:لنقنه وقته ومعاه حاجة حلوة
عفاف:توا نمشي انقوللهم جوا ايديروه
تالين صبت:لا عمتو بنمشي انديره انا
عفاف:مافيش داعي اتعبي روحك توا ايديروه الخدم جوا
سراج;مش حيديروه زي متاع تولي ياما شاربة منها بعد نقعدو في الفيلا بروحنا وغمزلها وقعدو يضحكو
سندس😒
صالح:ناماحقيت شي ذوقونا
تالين: توا انديره وعطوني رايكم فيه
الكل:باهي
سراج:ارجي تولي خوذيني معاك انساعدك فيه
تالين:باهي هي
سراج صبى ومسك تالين من يدها وخشو للمطبخ
هنا سندش معش تحملت كل اللي قاعد ايصير وصبت بتحكي مع سراج وبتوقف المهزلة هذي واللي بيصير ايصير وخشت وجتهم في المطبخ
سندس خشت ولقتهم بروحهم في المطبخ وايجهزو مع بعضهم وضحكهم واصل لعند برا
سندس:سراج معليش نبيك بروحك اشوي
تالين:خوذو راحتكم وطلعت
سراج:كنك شن تبي😒
سندس;شنو اللي قاعد ادير فيه هذا ليش مش محترمني بكل
سراج:نحترمك ليش انتي احترمتيني لما دزيتي اصورك
سندس بعصبية:قتلك مادزيت شيئ الحد كيف تفهم انت
سراج:صح انا مانفهمش وانتي مادزيتيش اصورك الحد بس شكلك عاجبك صالح واللي مادرتيش معايا ومع حبيبك لاخر بديريه مع صالح
سندس فهمت قصده وهوب جاه كف
سندس بعصبية:انت حقير وواطي وتفكيرك كله غلط ومشت وسيباته وهي حامقة عالاخر
سراج عصب من سندس الدرجة كسر فناجيل القهوة اللي عالطاولة كلهن وجاته تالين تجري وقعدت اتهدي فيه
بعد حوالي ربع ساعة جا سراج وتالين وجايبين النسكافيه ومعاه نوع حلو وكلهم خذو الا سندس مابتش ومقمعزة بروحها وجنبها صالح اللي ماصدق ضحكتله
بعد ساعة هكي خشو عمو محمد وعفاف بيرقدو وقعدو الشباب بروحهم
صالح:الحلو ليش زعلان
سندس بلا نفس:شيئ
صالح:انا نعرف كيف انرد ضحكة الحلوين اللي زيك وصبى من جنبها وعدى السيارته وجاب منها نوع شكولاطة من نوع راقي وفااااخر بكككل
صالح:هذي ارقى انواع الشكولاطات الارقى بنت شفتها
سراج كان عيونه علي صالح وسندس
سندس شافت السراج ولفت خذتها من صالح
سندس ابتسمت:شكرا 😊
صالح:مش قتلك نعرف اندرد ضحكة الحلوين
سراج صبى:تولي حبي هي الدارك عندي معاك موضوع طويل وغمزلها 😉
تالين شافتله زييين
سراج مسكها من يدها وصباها وخش بيها جوا ورقو فوق الدار تالين
"""""""""""""""""
#عند_سراج_وتالين في الدار
تالين بعصبية:سراج تهيالي زودتها واجد
سراج بعصبية:مازوددهش انتي شايفة مش معبرة الموضوع بكل قاعدة واضحة مااتحبنيش
تالين:انا وافقتك عالخطة وساعدتك فيها ودزيت الصور زي ماقتلي وكله عشان اتاكد من حبها لكي وتاكدت واضحة البنت اتحبك
سراج:مافيش شيئ ايدل علي حبها ليا بالعكس اهي قاعدة منسجمة مع صالح عالاخر
تالين:تي اي صالح انا شايفة كل نظراتها بعد نقعدو مع بعضنا الغيرة بتقتلها امس ماشفتش كيف فتحت عليا الباب تحسابك معايا حرام عليك الحركات هذينا يقهرن
سراج:وصالح اللي قريب نقتله وهو ايتقرب منها وهي راضية
تالين:مش راضية بس هي اتحاول تقهرك زي ماتقهر فيها وهذا اكبر دليل علي حبها لكي
سراج:باهي لو اتحبني ليش مااتجي اتقولها ليا
تالين:انت ماعطيتهش فرصة كل اشوي اتزيد تقهر فيها حرام والله حرام هكي عذبتها راه من ناحية كل اشوي تحكيلها علي قصة الصور ومن ناحية اخرى اتشوف في حبيبها منسجم مع غيرها والله بحركاتك هذينا اتخليها تكرهك
سراج بخوف:جديات تكرهني
تالين:اها تكرهك وحتحس انك تكذب عليها ومااتحبهش
سراج:وشنو اندير توا
تالين:انزل لوطة وبينلها ان ماانديروش في شيئ
سراج:باهي ونزل
'"""""""""""""""""""
سندس معش تحملت فكرة ان سراج مع تالين وقاعدين فوق وهي عارفة شنو ايديرو فقررت اتروح واتلم دبشها وتمشي الهلها وتحكيلهم كل حاجة واللي ايصير ايصير
سندس:صالح عادي ناخذ سيارتك
صالح:توا تبيها
سندس:اها ومعليش نبيها ضروري وحتلقاها في الفيلا غادي
صالح:تمام ماعنديش مشكلة اهو المفتاح ومده الها
خذت سندس المفتاح وركبت في سيارة صالح وطلعت وماشية شور الفيلا بتلم دبشها واتكلم باتها ايجي ياخذها
سراج نزل مالقش سندس رقى الدارها وفتح مالقهش ونزل بسرعة لوطى
سراج:صالح وين سندس
صالح:توا خذت سيارتي وقالت ماشية شور الفيلا
سراج بعصبية:كيف تعطيها سيارتك مازال ماتعرفش اتسوق اكويس
صالح:والله مانعرف انها مااتسوقش
سراج مشى يجري السيارته ركب فيها وطلع قعد في الطريق ايدور فيها بس مالقهش لانها كانت تجري بالسيارة
وصلت سندس لعند الفيلا ونزلت الحوشها وبدت اتلم في دبشها
سراج وصل ونزل وخش الدارها لقاها اتلم في دبشها
سراج بعصبية:انتي كيف اتجي لعند هنا في السيارة بروحك
سندس بعصبية:مادخلكش بيا
سراج:كيف مادخلنيش بيك مش حظرتك مراتي
سندس:لا مش مراتك وتوا نبيك اطلقني معش بنعيش معاك
سراج بعصبية:طلاق قتلك مافيش لين نعرف من اللي دازتيله الصور ولا تبي نحكي للكل وانفضح بيك
سندس:احكي اللي بتحكيه مش هامني شيئ خلاص انا تعبت منك ومن تصرفاتك
سراج:بالله عليك من اللي تعب من تصرفات لاخر
سندس بعصبية:ارحمني انا معش نبيك كرهتك طلقنيييي طلقنيي واتعيط بصوت عالي
سراج بعصبية:الكلمة هذي معش اتقوليها وطلاق لو اتموتي مش مطلقك
سندس بعصبية:عليش عشان تقهرني اكثر وتقتلني كل اشوية باللي ادير فيه مع تالين وبعدين انت كيف جيت وسيبتها مش طلعت معاها عشان وقعدت تبكي
سراج هنا انصدم اول مرة ايشوف سندس تبكي😳
سراج ارتبك:لو سمحتي معش تبكي اس دوسة الا انك تبكي
سندس تبكي:انا مانقدرش انشوفك مع غيري انموت كل ماانشوفك معاها والله انموت 😭
سراج من بكى سندس كانن الدموع في عيونه وجا قرب منها وحظنها
سراج:دوسة حلفتك بالله معش تبكي والله ماانتحملش انشوفك هكي والله قريب نبكي
سندس زادت حظناته زين:انحبك انحبك
سراج بعدها منه وبصدمة:شن قلتي😳
سندس تبكي:قتلك انحبك افهم انحبك
سراج شالها وقعد يبرم بيها وفرحان وبصوت عالي
سراج:انحبك انحبك انحبككككككك
وبعد اشوي نزلها
سندس تبكي:والله وحق ربي مادزيت صوري الواحد ولا فيه واحد في حياتي الا انت
سراج قعد يمسحلها في دموعها:عارف انك مادزيتي الحد شيئ
سندس بصدمة:كيف عرفت😳
سراج:نحكيلك بس اوعديني ماتزعليش
سندس;نوعدك
سراج:تذكري يوم اللي جيت بنقرب منك وقلتي مريضة اليوم هذكي طلعت وانسيت الفلوس رديت عشان ناخذ الفلوس ولما خشيت شفتك اتصلي عرفت انك كذبتي عليا وعرفت انك مااتحبينيش وقلت مش حنقرب منك لين انتي تطلبي بس بعدها قعدت فكرة انك مااتحبينيش مسيطرة عليا وقلت لازم انتأكد كنت انفكر في الطريقة هذي اني اندير ان فيه حد دازلي صورك وخذيت الصور وسجلت الرقم ثاني يوم الحفلة في الصبح لما كنتي ادوشي وانا اللي كلمت تالين وحكيتلها القصة كلها وقلتلها اتساعدني وجت من غادي عشان اتساعدني واندير ان بسبب قصة الصور تقربت من تالين ولو غرتي معناها اتحبني ولما اتغاري حتعترفي بحبك بس شكلي زودتها
سندس كانت مصدومة وماحكتش ولا كلمة
سراج:عارف انك تزعلي مني بس وحدة بوحدة انتي كذبتي عليا انك مريضة من دون مانعرف السبب وانا درت هكي عشان نعرف اذا اتحبيني او لا
سندس ساكته واتشوف السراج زين
سراج:انتي عليش كذبتي عليا
سندس:عشان كنت بنتأكد من حبك زين وان مااتحبنيش عشان اتقرب مني وخلاص وبنشوف اذا ماضيك يطلع في حياتنا من جديد او لا والله هكي بس
سراج:انا والله انحبك انحبك انتي مش لاني بنقرب منك والله الحاجة هذي مااتهمني حتى لو مادرناهش بكل خلاص اهم شيئ عرفت انك اتحبيني وعادي انعيش معاكي عالحب بس
سندس:بس انا واجعني كلامك ليا انت اتهمتني باني رخيصة وزي باقي البنات
سراج:سامحيني وحقك علي راسي والله كنت نحكي في الكلام هذا وناقم علي روحي بس قلته عشان ايبان الموضوع حقيقي وعشان انعصبك واطلعي اللي قي قلبك تجاهي وبعدين حتئ انتي ضربتيني كف وسبيتيني ولا ناسية
سندس انحرجت:اسفة بس عصبت من كلامك ووجعني
سراج:وانا مش زاعل منك مش ايقولو ضرب الحبيب زي اكل الزبيب
سندس ابتسمت
سراج:اه نجيلي الضحكة السمحة والله لما طحتي قلبي كان بيوقف عليك ومسكت روحي بالغصب اني ماانجيش وانشوفك
سندس ضرباته علي كته:والله زعلت منك لما فتتني هكي
سراج :ولا الحقير صالح الكلب اللي مستغل الفرصة وايهدرز معاك قريب قتلته😡وانتي منسجمة واتهدرزي لكن والله حسابه معايا بعدين الكلب
سندس ضحكت:والله كنت بنقهرك واسأله نحكي معاه بس وانت قاعد ولما انت تمشي نلوي وجي عليه ومعش نحكي معاه اكيدة يحسابني مطرشقة
سراج ضحك:احلى مطرشقة وحق ربي وباسها علي خدها
سندس ابتسمت وحطت يدها علي خد سراج وقعدت اتحرك فيها
سندس:انحبك
سراج:انموت فيك
سندس حطت يدها علي شفايف سراج وقعدت اتحرك في صبعها عليهن
سندس:سيراجو
سراج:عيونه😍
سندس:نبي انكون مراتك بجديات
سراج بفرحة:تحكي جد
سندس ابتسمت:والله جد
سراج عظ علي شفايفه:والله هذا حلم حياتي
سندس ضحكت
سراج:اه والله انحبك وقعد ايقرب منها بشويييييش لين وصل في شفايفها وبدا ايبوس فيها بكل حنية وحب وبعدها نزلها عالسرير وجا عليها
(طفينا الضي في شنو ترجو 😂 اصلا الباقي #مششششششششششفففففففففففففر 😂)
#يتبع
لولوولوووليييي واخيرا 😍 قعدو متزوجين بجديات😂ربي ايكمل عليهم هناهم😜
بس هل حدوم هكي ولا شن بيصير بعدها 😳
اما تالين ضلمتوها كلكم المسكينة وطلعت كويسة 😍
أما فيصل قولكن شن سبب اختفائه وهو وين توا وامتى حيرد وشن حيصير بعد ايرد 😔
أما رؤوف هل هذا حد لقائه مع اسيل ولا حيجمعهم القدر مرة اخرى ولو جمعهم هل اسيل حتوفي بوعدها له🤔
أما معاذ ورويدة فمها سمنة على عسل بس لو خليتهم هكي ديما عاد😜
كله حنعرفوه في الحلقة الجاية ☺
أسفة لو في لخبطة في الأسماء وأكيد رأيكم ايهمني 😉
گـتـابـتـي Koka Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
