#مـنـحـرف_وأحـبـبـتـه
الـحـلـقـة (33)
گـتـابـتـي Koka _Saleh
"""""""""""""""""""""""""
سندس طبعا كانت مصبية وتسمع وفهمت الكلام كله وكانت بتموت مالغيرة بس لما سكر رقت دغري للدار وقعدت اتفكر كيف تصرف صح هو له ايام يسهر بس اقل شيئ ماكانت عارفة لا مع من لا شيئ بس توا سمعت المكالمة والنار شاطت فيها قعدت اتفكر واتفكر
وبعدها قررت انها ادير اللي في راسها وتمشيله في المكان اللي يسهر فيه واتشوف البنات اللي ميت عليهن واتشوف كيف الوضع وشنو ايديرو كانت عارفة ان هالشيئ خطير وان حيفتحلها باب مشاكل كبير بس كان الفضول انها بتعرف اللي ايصير اكبر من خوفها مالمشكلة وغيرتها عليه كانت اكبر مالفضول والمشكلة مع بعضهن
لبست ورنت علي عمو عدنان عشان ايجيها بسرعة وماقالتلش شن تبي وهي طبعا كانت بتحلق سراج عشان تعرف وين بيسهر #Koka_Saleh
وصل عمو عدنان قبل ماسراج يطلع مالحوش فخلاته سندس ايدرس سيارته بعيد عشان سراج ماايشوفش وفعلا دار زي ماطلبت سراج بعد حوالي 5 دقايق من وصلة عمو عدنان طلع وسندس طلعت في جرته من غير مايفطن وركبت مع عمو عدنان ولحقوه بالسيارة وقعدو وراه لين وصل للعمارة
سندس أول مادرس سراج وشافت العمارة اذكرتها
سندس اتفكر:هذي نفس العمارة اللي مرة جيت فيها الهدى زعمك يلتقو مع البنات هنا هذا عليش هدى تعرف عليه معلومات وحكتلي عليه في الجامعة لان اتشوف فيه في عمارتهم #Koka_Saleh
عدنان:يابنتي سراج نزل شو بدك تنزلي وراه او شو
سندس;نبيك انت تنزل وراه بس بدون ماايشوفك وتعرف في اي شقة خش واتجي اتقولي
عدنان:حاظر ونزل وسندس قعدت في السيارة وتحرق مالغيرة
بعد حوالي 5دقايق جاها عمو عدنان وركب في السيارة
سندس:عرفته وين خش
عمو عدنان:فات عالشقة رقم 5
سندس بإستغراب:متأكد رقم 5
عمو عدنان:اي متأكد
سندس:غريبة #Koka_Saleh
عمو عدنان:هلأ شو بدك تعملي
سندس:تستناني هنا بنخش للشقة
عمو عدنان:تسمعي نصيحتي يابنتي بلاها
سندس:ليش
عمو عدنان;لانو ماراح تستفادي شيئ ولا حتغيري شيئ دائما الرجال هيك وراح ايضلو هيك
سندس:بس انا ياعمو نبيش انغيره انا بنشوف الوضع اللي جوا بس
عمو عدنان:انا نصحتك وانتي حرة يابنتي
سندس فتحت باب السيارة:اشوي وانجيك
سندس خشت للعمارة وهي قلبها ايدق ووصلت لعند باب الشقة وقعدت مصبية وحايرة مابين اديرها واتخش ولا لا وبعدها استجمعت قوتها وقررت اتنفذ اللي جاية عشانه ورنت الجرس #Koka_Saleh
سراج طبعا كاين هايم مع البنات وكانن ثلاث بنات أحلى وحدة فيهن مقمعزة علي رجل سراج وتشرب هي وياه وهايمين ضحك وحياة واضحة
لما رن الجرس طلع واحد مالشباب اللي جوا وفتح واسمه يوسف واول ماشاف سندس طبعا ماكان يعرفها فيحسابها زي البنات اللي يسهرو معاهن
يوسف:اهلا بالحلو انتي من مجايب من
سندس:نبي سراج
يوسف:سراج ديما ذوقه سمح وماايجيبش الا الصاروخ وقعد ايبحت فيها من فوق اللوطة
سندس اضايقت منه وسيباته وخشت وهو خش وراها بس انصدمت لما شافت سراج في الوضع هذا
سراج أول ماشافها انصدم وقعد ايشوفلها زين
فيصل كان جنبه وتعقد لما شافها لان ماكانش ببي القصة هذي اتسير عارفها مش في مصلحتهم
يوسف خش وراها #Koka_Saleh
يوسف:هذي جايبها سراج ياشباب
سراج صبى وبعصبية:انتي شن جابك هنا
سندس:جاية عشان انشوفك
سراج بعصبية:اطلعي من هنا توا وانتفاهمو بعدين
يوسف:وين تطلع خليها اتكسد معانا
فيصل:يوسف انت اطلع مالموضوع مش شورك
يوسف:ماقلت شيئ البنت وصلت وخلوها تسهر معانا
سراج بعصبية:هي أطلعي وروحي توا
سندس:هذا هو المكان اللي اتجيه كل يوم
سراج بصوت عالي:قتلك اطلعي
يوسف:سراج كان ماتبيهش تسهر معاك البنت عجبتني ونبيها الليلة
سراج عصب عالأخر من كلمته وهجم عليه وقعد يضرب فيه وفكوه منه فيصل وباقي الشباب وسندس مصبية بعيد ومعش عرفت كيف تصرف
فيصل ماسكه وايبعد فيه علي يوسف
فيصل:خلاص ياسراج روح توا
سراج ايهزب:اطلقني خليني نقتله #Koka_Saleh
فيصل:خلاص خذا نصيبه خوذها وروح هي
سراج فك روحه من فيصل وخذا سندس من يدها وطلع بيها وهو معصب عالآخر وماايشوفش قدامه بكل وركبو في السيارة وطلعو وكانت السيارة طايرة وفي سرعة غريبة وسندس كانت علي اعصابها واتعيط خايفته يقلبها
ووصلو للحوش ونزلو واول ماخشو للحوش سراج خبط الباب بالقوة
سندس:شنو التصرفات هذينا مش هكي التسكير مش ساد اللي درته في السيارة توا
سراج بعصبية:انتي مازال عندك وجه تحكي
سندس:اكيدة عندي وجه ونحكي مش انا اللي كنت ساهرة مع بنات
سراج بعصبية:انتي كيف اتجي للشقة
سندس:زي ماانت تمشيلها
سراج بصوت عالي:نحن مش واحد فيه فرق بينا انا راجل #Koka_Saleh
سندس:ياسلاااام لالا يابابا مافيش فرق وانا جيت بنشوف شنو المكان اللي مهم عندك ومش قادر اتسيبه
سراج:وجيتي وشفتيه وتريحتي وحرجتيني قدامهم كلهم
سندس:هه يعني هذا اللي هامك واجعتك نفسك اني حرجتك قدامهم
سراج قعد ايشوفلها وساكت
سندس:رد عليا #Koka_Saleh
سراج معصب:اها هذا اللي هامني انتي عارفة كويس مانبيش حد يعرف اني اجوزت
سندس:يااخسارة اكيدة حتى البرازيليات عرفن وضاعن من يدك #Koka_Saleh
سراج:وكله بسببك حرمتيني من احلى ليلة كنت بنعيشها(وكان قاصد يقهرها زي ماقهراته)
سندس انقهرت عالاخر من كلامه
سندس:وانا ماقتلك عرف عليا كنت درت روحك ماتعرفنيش لان انا بروحي ماايشرفنيش انعرف بواحد منحرف زيك
سراج:وانا منحرف ليش جاية اتبعي فيا
سندس:عشان انتقزز منك وانزيد نكرهك أكثر ماانا كارهتك ياريت كنت متت وماخذيت واحد فاشل وصايع زيك
سراج بعصبية:معش اتمثلي دور الاحترام أكثر من هكي مش ماشي معاك عشان حتى لو خدعتي الكل انا مش حتقدري تخدعيني لاني عرفت نيتك من يوم اللي بتمشي للجامعة من غير حجاب واليوم جايتني للشقة و وبايعة روحك
سندس بعصبية:أحترم نفسك واوزن كلامك واعرف في من اتكلم
سراج بعصبية:في من انكلم يعني في وحدة وسكت
سندس:وحدة شنو قول ليش سكتت
سراج بعصبية:كلكن ارخاص زي بعضكن
سندس:أنت اللي رخيص ونسونجي وصايع
سراج بعصبية:مالاخر انا مانبيش وحدة زيك تقعد علي ذمتي
سندس بعصبية:وبالك انا ميته عليك يامنحرف
سراج:من بكرا الصبح اتلمي ادبشك وانشيلك الهلك
سندس:مافيش داعي نرجو البكرا بنمشي الهلي توا لاني مش قادرة نقعد معاك ولا دقيقة زيادة
سراج:احسن اخرى اطلعي وتي ادبشك وانشيلك توا وطلع للسيارة #Koka_Saleh
سندس رقت وهي معصبة ولمت دبشها وشيتاتها وطلعت للسيارة وطلعو وكانو هما الأثنين ساكتين لعند لما وصلو الحوش هل سندس وسندس جت بتنزل
سراج:كلها كم يوم وورقتك توصلك ومعاها كل حقوقك
سندس:مانبيش منك شيئ الا اطلقني واتفكني منك
سراج:حنفكك ونفتك منك ومع هذا كله كل حقوقك حيجنك
سندس معش حبت تحكي معاه ونزلت وسيباته وخذت شنطتها ورنت علي جرس هلها وفتحلها باتها وخشت
وسراج بعد شافها خشت طلع بسيارته
فرج سلم علي سندس
فرج:وين سراج قاعد برا وجا بيطلع
سندس:لا مش برا يابابا روح
فرج بإستغراب:كنك جاية في الوقت هذا شن صاير
سندس معش عرفت شن تحكي مع طلعت امها وقعدت اتسلم عليها #Koka_Saleh
سعاد:وين هالمفاجئة السمحة
فرج:شكلها مش مفاجئة انا حاس فيه شيئ بس سندس مازال ماحكت
سعاد:شن فيه دوسة شن صاير ووين سراج ليش ماخش
سندس:سراج حطني وروح للحوش
فرج:انتو متعاركين ولا شنو
سندس كانت عارفة لو اتقول متعاركين حتظطر تحكي قصة مشيتها للشقة وعارفة ان باتها حيعصب من موضوع زي هذا فكانت مش عارفة ماتحكي
سعاد:احكي ياسندس شغلتينا
سندس:انا توا ناعسة وبكرا عندي امتحان بعد انروح من امتحاني نحكيلكم اللي صار
فرج:بس انتي شغلتينا احكي توا انتي عارفة مش حنقدر نرقد هكي #Koka_Saleh
سندس:بابا والله ناعسة وماعنديش خلوق نحكي توا وخشت
سعاد:خلاص هدي روحك بكرا حتحكيلنا كل حاجة
فرج:خايف اتكون حاجة كبيرة
سعاد:مااتخفش يافروجة بنتك معاندية والسانها طويل اكيدة متعاركين علي سبب تافه وقايلة حاجة السراج جارحته
فرج:ان شاءلله اتكون مشكلة بسيطة
سعاد:خش توا وبكرا حتحكي بروحها اللي صار دوسة عمرها مادست شيئ علينا
فرج سكت وخشو مع بعضهم
سندس طبعا خشت الدارها وطلعت شيتاتها قدامها ودارت روحها تقرا عشان عارفة امها حتخش بتعرف القصة
سعاد دقت باب الدار وخشت
سعاد:مازال تقري #Koka_Saleh
سندس:اها الامتحان صعب ومازال ماكملت قرايتي
سعاد:بكرا آخر امتحان
سندس:اها
سعاد:ان شاءلله بالنجاح
سندس:ان شاءلله
سعاد طلعت وسكرت الباب وراها وسندس عزقت الشيت وقعدت اتفكر شن بتحكي الهلها وشن بتقول سبب العركة ولانها عارفة كويس ان حيعتبروها هي الغالطة عشان تربيتهم الها ماتسمحش انها تمشي المكان زي هذا بس طبعا فهمت الكلام هذا متأخر فكرت وفكرت وبعدها تمددت في سريرها ورقدت
""
#عند_سراج
روح ودرس قدام الحوش وقعد ايشوفله وايفكر وكان مقرر الانفصال جديات لان اللي داراته سندس ثبتله ان هي زيها زي باقي البنات اللي يعرفهن بس كل اللي كان ايفكر فيه كيف ايتأقلم مع حياة هي مش فيها بعد تعود عليها وعلي السانها وعنادها وضحكها والأهم من هذا كله كيف ايطلع حبها من قلبه وفي لحظة حس روحه مخنوق ومش قادر ايخش للحوش وهي مش فيه ومشى الفيلة هله ورقى دغري الداره القديمة من غير ماحد يفطنله وخش فيها ورقد وهو ألف فكرة وفكرة في راسه
""
#عند_رؤوف
كان واعي وحاير مابين ايدير اللي قرره ويخطف رانيا أو لا بس ماكانش متحمل فكرة ان ممكن ياخذها غيره وكان بيموت مالقهر مالفكرة هذي فأصر علي قراره وقرر ان اينفذه #Koka_Saleh
""
#عند_فيصل
كان متضايق ماللي داراته سندس ومن اول ماطلع سراج مالشقة طلع حتى هو ومن وقتها وهو ايرن علي رانيا مااتردش ورن علي سراج واجد كان قافل فونه
حط فونه جنبه وقعد ايفكر شن ممكن ايكون صار بينهم مع رنت فونه وشافه لقاها رانيا ورد دغري
رانيا:اهلا فيصل
فيصل:اهلين تي وينك من بدري انرن مااترديش
رانيا:معليش كنت نقرا وحاطة فوني صامت مش فاطنتله
فيصل:باهي ان شاءلله بالنجاح #Koka_Saleh
رانيا:ان شاءلله بس قولي كنك شن صاير انشغلت لما شفت كل هالمكالمات
فيصل:اليوم سندس جت للشقة
رانيا شهقت:شنوووو😱 #Koka_Saleh
فيصل:يعني ماكلماتك وحكتلك اللي صار
رانيا:لالا مارنتش بس انت قولي اللي صار بزبط
فيصل قعد يحكيلها في اللي صار
رانيا:معقولة دوسة تصرف هكي نحسابها شالت الفكرة من راسها
فيصل:مش شايلتها وبتصرفها هذا اكيدة ردتنا النقطة الصفر
رانيا:مرات بعد اللي صار في الشقة خلت سراج ايغار اكثر وممكن ماايتعاركوش وتقعد في صالحنا
فيصل:انا اكثر واحد فاهم سراج وعارفه كيف ايفكر سراج توا كل اللي في عقله ان سندس طلعت زي باقي البنات اللي يعرفهن
رانيا:يعني معقولة بعد هالفترة كلها ماعرفهش كويس
فيصل:سراج عنده اي بنت اتخش للشقة رخيصة وسندس جتها بكرعيها
رانيا:انت معش حكيت مع سراج
فيصل:لا انرن من بدري مقفل وقاعد قالق وبنعرف شن صار معاهم #Koka_Saleh
رانيا:خايفة انرن عليها توا اتحس بحاجة
فيصل:لالا مااترنيش اكيدة بكرا حنعرفو اللي صار منهم
رانيا:اكيدة بكرا في الجامعة حتحكيلي
فيصل:وسراج بكرا حيحكيلي في الشركة وحنقولك اللي صار
رانيا:تمام وانا حنقولك اللي صار معايا
فيصل:باهي طمنيني عليك انتي كملتي قرايتك
رانيا:اها تمام ماليش واجد مكملة
فيصل:وانشاءلله كل حاجة فاهمتيها
رانيا:لا تمام والفضل لكي طبعا بجد مش عارفة كيف نشكرك عاللي درته معايا
فيصل:حتشكريني بطريقة وحدة انك تنجحي بس
رانيا:ان شاءلله
فيصل:خلاص انخليك اتريحي وترقدي عشان توعي الامتحانك بكرا وانتي مصحصحة
رانيا:تمام تصبح علي خير
فيصل:وانتي من اهله وسكرو
"""""
#صباح_ثاني_يوم
سندس وعت بدري غسلت وصلت الفجر وراجعت المادة وبعدها لبست وطلعت لقت امها اتوتي في الفطور صبحت عليها وقمعزت وبعد اشوي جا باتها وفطرو مع بعضهم وطلعت مع باتها ووصلها عالجامعة بس ماحكش معاها عالموضوع بكل كان يبيها تحكي بروحها ونزلت لقت رانيا ترجى فيها عند الباب
سندس:من امتى هنا #Koka_Saleh
رانيا:ليا قريب 10دقايق
سندس:وكنك جاية بدري قبل الشحاتة وبنتها
رانيا تضحك:اليوم انودع في سيارة بابا اصلا اليوم بيروح مالمغرب ومعش نقدر ناخذها واجد
سندس:المرة هذي طول واجد
رانيا:شغله واجد المرة هذي
سندس:اها خلاص خليه بعد ايروح ايديرلك سيارة
رانيا:هي هذي اصلا معش فيه حد ايقولي لا عالسيارة وتنهدت
سندس:خلاص ياقلبي انسي اللي فات مات وربي حيعوضك خير عاللي صار كله أنا متأكدة
رانيا:ان شاءلله
سندس:خلينا نمشو للقاعة الامتحان اشوي ويبدى
رانيا:تمام ومشن شور القاعة
""
سراج وعى وخش غسل وطلع لبس مالدبش اللي في داره ونزل لوطى وباته وامه بعد شافوه انصدمو
سراج:صباح الخير
محمد:صباح الخير
محمد:قصدك انت بايت هنا
سراج:اها بايت هنا
عفاف:وين سندس #Koka_Saleh
سراج:عند هلها
عفاف:لعند امس كلمتها عالمغرب نسأل علي قرايتها كانت في الحوش
محمد:مش هي اليوم اخر يوم في الامتحانات كيف تمشي الهلها
سراج:تعاركنا مع بعضنا
عفاف بعصبية:فيه واحد ايتعارك مع وحدة في امتحاناتها حرام عليك اكيدة معش عرفت تقرا بسببك
محمد:شنو سبب العركة اللي اتخليك اتشيلها الهلها
سراج:اسمعو كويس السبب بينا ومش داعي تعرفوه بس اللي نبيكم تعرفوه ان عيشتي مع البنت هذي مرة اخرى مستحيلة انا معش نبيها بكل
محمد بعصبية;مش بجوك تحكي هكي وبعدين السبب لازم نعرفه وعارفك ماتبيش تحكيه عشان انت الغالط
سراج بعصبية:انا طاوعتك ودرتلك اللي تبيها واجوزت غصبن عني بس توا معش نقدر انكمل امعاها ولازم تحترمو قراري وطلع
عفاف تبكي:انا متاكدة ان مزعلها زعلة كبيرة دوسة ماتغلطش عارفتها انا
محمد:بعدين امشيلهم واعرفي سبب المشكلة
عفاف:اليوم عندها فرح صاحبتها وبتمشيلها اكيدة مش حتقعد قاعدة
محمد:خلاص:بكرا امشيلها وانا حنحكي مع فرج ونفهم منه اكيدة سندس حاكيتله اللي صار
عفاف:باهي #Koka_Saleh
""
سراج طلع وركب في سيارته (وكان حتى هو زي سندس مايبيهمش يعرفو سبب المشكلة لان كان يسهر من ورا باته وهذا مش في صالحه ولو باته عرف حيحط الحق عليه مش عليها)ولع سيارته ومشى شور الشركة وأول ماخش المكتبه لقى فيصل فيه
فيصل:ها يانصي طمني شن صار
سراج:قول صباح الخير قبل
فيصل:صباح الخير طمني شن صار
سراج:ماصار شيئ
فيصل:يعني ماتعاركتوش
سراج قمعز ورا المكتب;بنطلقها
فيصل بصدمة:شنووو
سراج:اللي سمعته اصلا البنت هذي لا نصلح بيها ولا تصلح بيا
فيصل:بس الموضوع مايستحقش هكي
سراج بعصبية;البنت اتجي لعند الشقة واتقولي مش كبير تي هي طلعت كيفها كيف اي بنت نعرفوها
فيصل:لا ياسراج ماتضلمهش البنت مش زي اللي نعرفوهن #Koka_Saleh
سراج بعصبية:هي جت للشقة بكرعيها وانت عارف اللي ترضى علي روحها اتجي المكان هكي معناها رخيصة وبعدين هذا مش اول موقف من كم اسبوع وعتني في الصبح تبيني انشيلها للجامعة وكانت لابسة ضابط ومحولة الوشاح وقالت بتغير استايلها يعني البنت عاجبها الانحراف بس تبيني انشجعها #Koka_Saleh
فيصل;سراج عيب الكلام هذا انت عارف ان البنت مش هكي
سراج:انا اللي عاشرتها مش انت وفهمتها كويس هي هكي غير انا كانن عيوني مغمضات باين ان اعجابي بيها بعدني عن حقيقتها
فيصل:ياسراج مش من اول مشكلة الواحد ايقول بنطلق وبذات انك معجب بيها وهذي اول مرة اتصيرلك
سراج:مش اول مرة انت عارفني كل بنت انشوفها تعجبني #Koka_Saleh
فيصل:بس اعجابك بيها يفرق اعجابك بسندس مش عشان اتقضي ليلة وخلاص زي اي بنت اعجابك بيها بدى ايتحول الحب
سراج بعصبية:لا حب لا شيئ وبعدين فكني ماالدوة الزايدة وعدي المكتبك عندي شغل
فيصل:تمام وطلع
سراج اسند براسه عالكرسي وتنهد وهو كل تفكيره في سندس
""
عند البنات في الجامعة طلعت سندس وبعدها بدقيقتين طلعت رانيا
سندس:ها شن صار فيك #Koka_Saleh
رانيا:الحمدلله حليت وهذي اخر مادة وتم الدعس عليها بس هاطمنيني انتي حليتي
سندس:الحمدلله حليت واخيرا بنتخرجو
رانيا:الحمدلله
سندس:اليوم مش حنقعد معاك بنروح بسرعة ناخذ دبشي ونمشي الدودي
رانيا دمعو عيونها:قاعدة بنموت لاني مش حنقدر نحظر الفرح
سندس:حنصورلك كل حاجة ولما اتكمل في الكوافير حنكلموك فيديو واتشوفيها
رانيا:باهي تمام نرجى في مكالمتكن
سندس مسكت فونها وبترن علي باتها عشان اتروح
سندس:قبل ماانروح بنحكيلك حاجة صارت
رانيا:شنو #Koka_Saleh
سندس:هذا امس بعد كملت قرايتي وقعدت تحكيلها في اللي صار كله
رانيا دارت روحها مصدومة;معقولة تمشي المكان زي هذا انا شن قتلك من قبل مش قتلك مااديريهش
سندس:اهو جت في راسي ودرتها
رانيا;وقصدك توا بتطلقو
سندس:اها خلاص
رانيا:بس يادوسة انتي اتحبيه كلميه واعتذري منه لان انتي الغالطة
سندس:اول حاجة هو مش حب اعجاب بس وبعد اللي شفته كرهته وبعدين انا ماغلطش اكثر منه انتي ماسمعتيش كلامه اللي قاله ليا يقهر
رانيا:اكيدة قالة لانه مقهور منك ماللي درتيه وبعدين مشيتك للشقة ادل انك زي اي بنت تمشيلها
سندس عصبت:رانيا انتي شن تحكي
رانيا:انا نحكيلك في تفكير اي راجل وبذات سراج #Koka_Saleh
سندس:بس مالنش مع بعضنا يوم او يومين لنا توا قريب ثلاث شهور يعني المفروض عرفني كويس
رانيا:هذا تفكير الرجالة
سندس:بس تعرفي انا مقتنعة بفكرة الطلاق انا وهو مانقدروش انكملو مع بعضنا هو ماشي في طريق وانا طريقي وحدة اخرى بكل يعني مانقدروش انتلاقو واحسن حل الطلاق من توا عشان ماانتعلقوش بحاجة تقعد مستحيلة
رانيا حاولت تحكيلها تقنعها اترن وتعتذر منه او اتشيل فكرة الطلاق من راسها بس سندس كانت مسكرة راسها ومقتنعة ان هذا احسن حل وبعد اشوي رنت علي باتها وشالها للحوش خذت دبشها اللي تبيه وخذت معاها امها ومشن الحوش هل رويدة
""'"""
#عند_معاذ
أم معاذ:مروى مروى
مروى:نعم ياماما
ام معاذ;ماشفتيش خوك وين
مروى:امس طلع الاصحابه بايت معاهم عشان تجهيزات اليوم والتحليق والجو هذا
ام معاذ:انيس صاحبه توا جا يسأل عليه قال امس رن علينا قاللنا عدو مش ماشي
مروى:غريبة بس هو مابتش في الحوش
ام معاذ تبكي:حي عليا خوك وين(وطبعا كان عندها القلب)
مروى بخوف:اهدي ياماما توا انرن عليه انشوفه اكيدة ناقصته حاجة وماشي ايجيب فيها
ام معاذ تبكي:من بدري انرن عليه قافل تليفونه ياربي كان ماتقعد صايرتله حاجة
مروى:خليك هنا واهدي متأكدة ان كويس ومافيه شيئ انتي بس مااتعبي روحك حنكلم الشباب اللي برا كلهن وانخليهم ايدوروه واشوي وحنعرفو وين
ام معاذ قمعزت عالصالون وقعدت تبكي والتمن عليها بناتها كلهن وكل وحدة فيهن كانت خايفة علي خيها الوحيد بس كلهن ايطمنن في امهن خايفات اتصيرلها حاجة #Koka_Saleh
""
مروى طلعت برا وحكت الضنى اعمامها كلهم اللي صار وكلهم انشغلو علي معاذ وقعدو ايديرو في اتصالاتهم وايدورو فيه وكان التدوير عليه صعب لان سيارته كانت قاعدة
مروى خشت بطمن أمها واتقوللها ان الشباب مشو ايدورو عليه بس وهي خاشه لقت أسيل مقمعزة في الجنان واستغربت انها طبيعية ومش خايفة علي معاذ زي الباقي وردت عليها
مروى:أسيل عارفة ان ماالقينش معاذ من امس طالع وماحد يعرف وينه
أسيل:اها عارفة
مروى:وكنك مش خايفة عليه
أسيل:وعليش بنخاف عليه هو قاعد في احسن حال وهذا فرحه شن يبي أكثر من هكي
مروى:أسيل انتي حاكية المعاذ علي لينا أمس
أسيل: انا ماحكيت مع حد وجت بتمشي
مروى مسكتها مع يدها وبعصبية:أنا نسأل فيك انتي حكيتي علي لينا صح #Koka_Saleh
أسيل تبكي:واذا حكيتله عساس بيتأثر اهو بيجوز وبيعيش حياته
مروى:انتي وحدة مريضة امتى بتقنعي ان لينا ماتت الله يرحمها ليش كل مااتشوفي معاذ اتذكريه بيها وانتي عارفة قديش قاهرة موتها
أسيل تبكي:لو قاهرة موتها راه ماحب وخطب واهو توا بيجوز
مروى:بيجوز لان هذي سنة الحياة مافيش حد ايعيش علي ذكرى واحد ميت لو لاقدر الله معاذ هو اللي ميت راه لينا اجوزت ولما تجوز نحن عمرنا مانزعلو لان هذي سنة الحياة #Koka_Saleh
لينا:لو صاير نفس ماقلتي لينا مستحيل تجوز خاطي معاذ اكثر وحدة عارفه لينا أنا
مروى:صدقيني غلطانة واللي اديري فيه هذا مش حيضرك الا انتي لازم اتعيشي كيف الناس واتأقلمي ان لينا ماتت مازال معذبة باتك وامك في جرتك وقاعدة اتعذبي في معاذ اللي قاعدة اديري فيه حرام
أسيل بعصبية;انتي مادخلكش بيا
مروى:وانا مش مدخلة فيك بس بنعرف شن حكيتي المعاذ
أسيل:مش قايلة وجت بتمشي
مروى:ياتحكي والا انكلم عبدالسلام خوك ونحكيله انك انتي سبب ان معاذ مش قاعد وان حكيتيله علي لينا وانتي عارفة كويس ان الف مرة نبهك انك معش تجيبي سيرة لينا قدام معاذ
أسيل كانت اتخاف من عبدالسلام لان كان ايعاقب فيها لما يعرف انها حكت المعاذ علي لينا عبدالسلام اكبر واحد في ضنى عم معاذ وايحب معاذ واجد زي خوه الصغير ومن موت لينا وهو اكثر واحد ينصح فيه ايعيش حياته وينسى اللي صار #Koka_Saleh
أسيل قعدت تحكي في اللي حكاته المعاذ طبعا مروى بعد كلام أسيل عرفت وين حتلقى معاذ ودغري مشت الحوشه هو ولينا وشافت المفتاح اللي كانو حاطينه تحت دواسة الحوش مالقتش عرفت ان معاذ جوا قعدت ادق واترن في الجرس معاذ ماردش قعدت اترن واترن
مروى:معاذ افتح عارفتك جوا افتح ماما مشغولة عليك وتبكي وانت عارف ان قلبها تاعب انا خايفة ايصيرلها شيئ ونقعدو بلاها وقعدت تبكي
معاذ صبى وفتحلها الباب وكاين وجه تاعب وباين ان مش راقد من أمس
معاذ بصوت مبحوح وحزين:خشي
مروى خشت:عاجبك اللي صاير في ماما بسببك
معاذ ساكت وماردش
مروى:معقولة هذا كله عشان كلمتين قالتهن أسيل انت عارف اكويس ان أسيل مريضة وقاعدة اتعالج كلها لان مش متقبلة فكرة موت لينا
معاذ:بس كلامها صح لينا لو مكاني عمرها مااتفكر تجوز وانا دغري فكرت نجوز #Koka_Saleh
مروى:اي دغري يامعاذ لينا توا الها قريب 8اسنين متوفية وانت السنة بس غير قررت تجوز مافيش راجل قعد علي ذكرى وحدة ميته كل هالسنين غيرك
معاذ:امس وانا هنا اذكرت كل الماضي معاها مش عارف كيف قررت قرار هكي بعد الحب الكبير اللي بينا
مروى:قررت هكي لانك حبيت من جديد رويدة انت اللي اخترتها ولو ماحبيتها ماكنت قلت اخطبوها ليا
معاذ سكت
مروى:اتحبها رويدة صح
معاذ:حبيتها بس مش الدرجة حبي اللينا
مروى:بس لينا ماتت وريدة هي اللي قاعدة وهي اتحبك واجد واتحبنا نحن ونحن حبيناها وتحترم فيك وفينا تقدر اتقولي شن ذنبها
معاذ:ماعندهش ذنب الا انها طاحت في شخص عنده ماضي مش قادر ينساه #Koka_Saleh
مروى:انت انسيته بس مأنبك ضميرك علي لينا من كلام أسيل أمس
معاذ دمعو عيونه:انا خايف نظلم رويدة معايا لاني مش قادر ننسى لينا
مروى:ليش تظلمها
معاذ:انا صح رويدة حبيتها ونبيها وكنت فرحان اني بنجوزها بس كلام أسيل امس ذكرني بحاجات واجد انسيتهن وعرفت اني مانقدرش انعيش مع وحدة خاطي لينا
مروى بخوف:شن قصدك
معاذ:انفكر انرن عليهم توا ونفسخ الخطبة عشان رويدة كويسة وماتستحقش نظلمها معايا
مروى صبت وبعصبية:وباللي بديره انت مش حتظلمها انسانة فرحانة بتاخذ الشخص اللي اتحبه وفي اخر لحظة تنهي كل حاجة احتمال تنهار او ايصيرلها شيئ وخاطي هكي شن بيقولو الناس عليها عمرك ماتخيلتك اناني بالدرجة هذي
معاذ:انا مش اناني انا عشان انحبها مانبيش نظلمها معايا
مروى:انت هكي تظلم فيها ولو درت هكي لا انا ولا البنات ولا امي حنسامحوك وطلعت ووصلت لعند الباب وبعدها ردت عليه #Koka_Saleh
مروى:على فكرة كان حاسب روحك خسرت لينا معناها خسرت الحب نبي انقولك لو خسرت رويدة حتخسر كل حاجة مش بس الحب عشان رويدة وحبها لكي اكبر بواجد من حب لينا صح لينا بنت عمي بس الحاجة اللي انت مش عارفها ان رويدة وطبعها احسن من لينا بواجد وفي فترة بسيطة كلنا حبيناها حتى معاملتها معانا تفرق بواجد عن معالمة لينا لنا وانت متذكر كويس لينا كيف كانت اتعامل فينا ونحن كنا ساكتين ومتحملين بس عشان عارفينك اتحبها بس عمرنا ماتريحنا انها اتكون مراتك وفكر في كلامي وكويس وفكر في رويدة وشن بيصيرلها وماما وشن بيصير فيها قبل ماتاخذ قرار اناني زي هذا وطلعت وسيباته ومعاذ تمدد عالكنبة وقعد ايفكر والدموع في عيونه
""""
عالساعة 12 رويدة وسندس شالهن بات رويدة للكوافير وسعاد قعدت مع عالية ام رويدة في الحوش ايوتن في حاجات الصالة عشان ايشيلوهن #Koka_Saleh
""'
عند رانيا قعدت مع بنات في الجامعة وبعدها رن عليها فيصل وقاللها بيجيها عشان يحكيلها اللي قاله له سراج بعد حوالي ربع ساعة جاها
فيصل:شن اخبارك وشن درتي في امتحانك
رانيا:الحمدلله حليته كله
فيصل:مشاءلله ان شاءلله بالنجاح
رانيا:ان شاءلله #Koka_Saleh
فيصل:ها قوليلي سندس شن حكتلك عالمشكلة
رانيا:انا وحلت فيها حاولت نقنعها تعتذر منه وهكي بس هي كانت مسكرة راسها عالطلاق اتقول هكي احسن
فيصل:حتى سراج حاولت نقنعه مسكر راسه وواخذ نفس الفكرة اللي قتلك عليها
رانيا:بجد انا تعبت منهن #Koka_Saleh
فيصل;والله حتي انا ردينا النقطة الصفر ومن وين مابدينا
رانيا:توا كيف بنصالحوهم علي بعضهم
فيصل;والله ماني عارف بس فيه حاجة اذكرتها وفكرت فيها من اول ماسكرت معاك انتي بس معش قدرت انرن عليك
رانيا:شن هي
فيصل:لما امس سندس جت للشقة كيف ماعرفت ان هي نفس الشقة اللي جتها من قبل لما سراج وهدى كانو متفقين عليها
رانيا:حي انا كيف ماخطرت عليا القصة هذي
فيصل:قصدك هي ماحكتلكش
رانيا:نحن حكينا في الموضوع بسرعة لانها كانت مستعجلة عشان تمشي الدودي فاختصرت في الكلام
فيصل:خايف تكتشف حاجة وتعرف الخطة اللي كانت بين هدى وسراج وتكتشف المعرفة اللي بينا وان نحن اللي ساعدناها #Koka_Saleh
(تعالو انردو اشوي المشية سندس للشقة طبعا يوم اللي جتها هدى وقالتلها بنحكي معاك بروحنا رانيا شكت في الموضوع ودزت وحدة صاحبتها وراهن وقمعزت صاحبة رانيا جنبهن وقعدت تسمع فيهن وبعد هدى قعدت تحكي في الموضوع السندس وعطتها العنوان البنت حفظاته وجت حكت كل حاجة الرانيا ورانيا كلمت فيصل وحكتله القصة وبعدها حللو الموضوع وعرفو ان هدى هي اللي واخذه الفون وان سراج يكذب علي فيصل لما قاله ان اللي يحكي معاها سندس ويوم اللي مشت سندس للشقة فيصل كان متفق مع واحد ومتفق مع المرا وعاطيهم فلوس عشان ايديرو الفيلم اللي صار قدام العمارة عشان سندس مااتخشش للعمارة وفعلا زي ماخططو زي ماصار وقدرو ينقذو سندس من شر سراج وهدى واخيرا عاد عرفتن اليد الخفية اللي ورا الموضوع 😂طيف فيكن💃)
رانيا:هي صح لما خبطت المرا قدامها معش رقت للشقة بس هدى عطتها رقم الشقة ورقم العمارة معقولة سندس ماانتبهتش بس انا متأكدة ان اكيدة متذكرة حاجة زي هكي بس قولك ليش ماحكتش
فيصل:والله مش عارفة بس مافيش الا حل واحد لو حكتلك وسألاتك ديري روحك مستغربة وقوليلها ان ممكن هل هدى ايكونو باعو الشقة
رانيا:تمام فهمت #Koka_Saleh
فيصل:لازم اتخليك منتبهة الكلامك وردبالك تغلطي لان الغلطة بورطة ولو اكتشفو الاثنين ان نحن اللي وراهم ونبوهم ايحبو بعضهم حيكرهونا وحيكرهو بعضهم
رانيا:حنقعد حريصة اصلا عارفة تفكير الاثنين
فيصل:خلاص معناها توا روحي وتريحي اكيدة ناعسة وبعد توعي فكري شن تحكي معاها كويس
رانيا:تمام باهي حتى انا بنروح توا اصلا
فيصل:معناها هي اطلعي قدامي
رانيا:شنووو
فيصل:اللي سمعتيه بنطمن انك روحتي
رانيا معش حبت اترد ومشت وفيصل مشى وراها طلعت برا مالجامعة كانت سيارتها مدرسة في جيهة وسيارة فيصل في جيهة اخرى
رانيا وصلت السيارتها وماركزتش عالسيارة المضلمة اللي جنبها ومن فيها #Koka_Saleh
فتحت باب السيارة وجت بتركب نزل رؤوف وحط يده علي فمها وخشمها وكان ماسك منديل فيه منوم فدغري داخت وركبها في السيارة
كان في السيارة اللي جنبهم راجل كبير في العمر يرجى في بنته ولما شاف اللي صار نزل وحاول يفتح باب سيارة رؤوف بس كان مسكر ورؤوف طلع بالسيارة
الراجل بصوت عالي:ياهو ياناس البنت انخطبفت الحقوها ياهل الخير
الصوت قعد يعلى والناس قعدت تلتم وايعطو بان فيه بنت انخطفت وايقولو في نوع السيارة اللي خطفتها
فيصل لف وركز وسمع كلامهم وعرفهم يقصدو علي رانيا دغري ركب في سيارته وطلع بسرعة غريبة وشاف سيارة رؤوف من بعيد وقعد يلحق فيهم قعدو هما الاثنين في سرعة غريبة وقعد فيصل في جرت رؤوف وقعد فيصل ايضايق فيه في الطريق وايحاول يخبط سيارته من لاورة عشان ايوقف بس رؤوف كان كل مرة ايزيد السرعة وفيصل كان وراه #Koka_Saleh
رؤوف كان حاسب احساب الكل حاجة فكان مجهز صندوق فيه قزاز مكسر وااااجد وتباعد من سيارة فيصل اشوي وقعد ايكب فيه مالروشن عالطريق فيصل قعد ايحاول ايتفادى القزاز بس ماقدرش وفلقله العجل ولان السيارة في سرعة معش قدر ايتحكم فيها وقعدت اتلف منه ايمين وايسار وفجأة لفت منه وهووووووب خشت في شجرة وكانت الخبطة قوية بككككل
#يتبع
قولكن شن حيصير مع فيصل بعد الحادث العنيف هذا 💔
ورانيا اللي كان ممكن ايكون الها منقذ بس بعد اللي صار مع فيصل شن حيكون مصيرها مع رؤوف 😞
وأبطالنا شن حيصير فيهم وهل حيصالحو ولا حتكون هذي نهاية المشوار بينهم 💔
وشن حيكون موقف هلهم لو عرفو سبب المشكلة 😱
وشن حيكون تصرف سندس لو عرفت الخطة اللي بين هدى وسراج وشن حيكون موقفها من رانيا لو عرفت ان هي عارفة بحاجات هي مش عارفتهن وان هي تشتغل من وراها ودايرة اتفاق مع فيصل 🙁
وشن تصرف سراج مع فيصل لو عرف بإتفاقه مع رانيا😕
أما معاذ شن حيدير هل حينفذ قراره ويفسخ خطبته علي رويدة او حيفكر في كلام اخته وايرد في قراره
باهي اذا فسخ خطبته شن حيصير في رويدة وشن موقف هلها ماللي بيصير 🙁
كله حنعرفوه في الحلقة الجاية ☺
عرفتن الايدي الخفية اليوم اللي كلكن تسألن عليهن😂
وبأذن الله بكرا حتكون فيه حلقة أخرى كتعويض عالايام اللي فاتن 😍
❤
أسفة لو فيه لخبطة في الأسماء وأكيد رأيكن ايهمني😉
گـتـابـتـي #Koka_Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
