#مـنـحـرف_وأحـبـبـتـه
الـحـلـقـة (15)
گـتـابـتـي #Koka_Saleh
""""""""""""""""""""""""""""""""""""
سراج بصدمة:هذي انتي 😳
سندس بصدمة:هذا انت 😡
روان ربعت ايديها علي بعضهن:ماهذا اللي كنت بنقوله لكي 😒
سندس بعصبية:انت شن جابك هنا
سراج بعصبية:شن جابني تهيالي هكي انا العريس
رانيا ورويدة شافنه وانصدمن ووقعدت كل وحدة اتخبط في يدها علي خدها بشويش
سندس بصوت عالي:انزل من هنا انزل مستحيل نجوز واحد زيك
سراج بصوت عالي:عساس انا ميت عليك لو عارف انك انتي العروس ماكنتش وافقت ولا جيت اصلا
سندس:ههه صدقتك تحسابني هبلة انصدق انك مش عارف
صوت الفرقة كان عالي والناس ماسمعوش صوتهم بس حسو ان فيه حاجة صايرة بين العرسان وقعدو ايبحتو زين رويدة ورانيا جنها يبن ايهدنها وجت عفاف حتى هي بتشوف كنهم
سندس:رانيا هيتي فوني بنرن علي بابا توا ايجي ياخذني
سراج:مافيش داعي اترني انا حنوديك لعنده لاني مش ميت علي وجك
عفاف:اس ياسراج تحشم وفهموني كنكم وعليش معصبين هكي
رانيا;دوسة حبي وسعي بالك مااتجيش تطلعي قدام الناس شن بيقولو عليك توا
سندس بعصبية:مش هامني حد انا بنروح توا قتلك هيتي فوني
سراج:عطيها اترن علي باتها ايفكني من وجها
سندس:انت سكر فمك مادخلكش
سراج قرب منها وامه مسكاته
سراج بعصبية:قوليلها تسكت خير ماانخربلها وجها قدام الناس
سندس:هه بعد تقعد راجل
سراج ايعض علي سنونه ومايبيش يضربها قدام الناس:سكتيها توا
عفاف ترعش:فهموني كنكم شن فيه
رويدة:مافيش ياعمتي هما بينهم مشاكل من قبل ولانهم اجوزو من غير ماايشوفو بعضهم كل واحد طب في الشخص اللي يكرهه
سندس:هو عارف وملاحقني له كم
سراج:انتي كذابة مستحيل نلحق وحدة قليلة ادب زيك
عفاف:تحشم ياسراج والله ياسندس هو ماهو عارف انتي من والله ايربحكم مشو هالليلة علي خير قدام الناس وبكرا انكلم باتك وباته وايحلو المشكلة
سندس:لالا انا بنكلم بابا ايجي ياخذني توا
عفاف مسكت يد سندس:عديني امك وطلبت منك طلب الله ايربحك اليوم مشيها وبكرا انتفاهمو انا عشانكم انتو الاثنين الناس شن بتقول انتي بحتي كيف كلهم مصبيين وايبحتو بيعرفو شن فيه
سندس:انا نبي ماما لازم انروح
عفاف:عشان خاطري اليوم وبكرا مالصبح انكلمو هلك وانحلو القصة مشيها اليوم عشاني
سراج:عليش تجدي في وحدة زيها انتي كندرتك اغلى من مية وحدة كيفها
عفاف:سراج انت سكر فمك الكلام مش شورك
رويدة:دوسة عمتك معاها حق مشي الليلة وبكرا عمو فرج ايحل القصة
رانيا:حبي انتي عاقلة وعارفة لما عروس اتروح يوم فرحها شن معناها وبعدين عمو فرج كان كلمناه توا ينفجع وايصيرله حاجة
سندس:انتن شايفات كلامه المستفز انا نكرهه
سراج بيرد عفاف فنصت فيه
عفاف:مشي الليلة بس وانا انخليكم كل واحد في دار ونوعدك مش حيضايقك بكلامه تحملي لعند بكرا عشان خاطري بس
سندس سكتت اشوي وقعدت اتفكر صح لو روحت اليوم بتكثر الدوة والاشاعات وحاجة صارت وحاجة ماصارت ومعش اتفض وفي نفس الوقت خافت علي باتها لو اتكلمه توا واتقوله بتروح اكيد حتصيرله حاجة
سندس:خلاص اعميمة عشان خاطرك بس لكن من بكرا الصبح اتجيبولي بابا وماما
عفاف:حاظر والله نوعدك ماتفتحي عيونك الا هما قدامك
سراج غامتله عالاخر وفي عيونه الشر وامه اول مرة اتشوفه في الحالة هذي جت جنبه وبينها وبينه
سراج:عشان خاطري ماصدقتها وافقت مشي هالللية علي خير وبكرا انديرو حل
سراج:مانبيهش دبرو روسكم نكرهه
عفاف:حاظر غير مشي الليلة علي خاطري بس
سراج:تمام
عفاف:قمعزو توا 10دقايق قدام الناس بس
سراج وسندس في وقت واحد:مازال بنقمعزو اخرى
عفاف:تحملو هالدقايق مافيش داعي لزيادة الشهدرة اكثر من هكي
رانيا:مشوهن كيف مايمشن الناس اتبحت فيكم
قمعزو هما الاثنين وهما اينفخو وكل واحد لو يلقى يقتل لاخر
عفاف:ابتسمو للناس
سراج وسندس بحتو في بعضهم وفنصو في بعضهم وبعدها بحتو قدامهم وابتسمو ابتسامه مجاملة
سراج:تمام هكي ياعفوفة متريحة
عفاف:اي راحة بعد اللي صار عدت عفاف من جنبهم وقعدن جنب سندس رويدة ورانيا وجنب سراج روان طبعا😂
روان اتوشوشله:كنت بنقولك طلعت البنت اللي تعاركنا معاها في المصيف
سراج:ادبست ياريونة في هالمريضة
روان بخبث:شن رايك نضربوها وانخربولها مكياجها
سراج:لالا عندي خطة احسن
روان بفرحة:شنو
سراج:عدي ديري روحك بتسلمي عليها واقرصيها زييين في يدها وانزلي اجري مالمسرح
روان غمزتله وعدت شور سندس عساس بتسلم عليها
رويدة:سندس البنوتة بتسلم عليك
سندس مدتلها يدها بتسلم عليها وهي مش مركزة لان عقلها يشتغل في اللي صاير وهوب روان قرصتها قرصة ونزلت تجري
سندس:اييي يابنت الكلب وجت بتصبيلها مسكتها رانيا
رانيا:خلاص فرخة صغيرة الناس اتحق فيك ايقولو العروس هبله
سندس:الحيوانة الكلبة لكن عارفتها كله مالحيوان اللي جنبي ومدت يدها اليد سراج من تحت وهو كان مش منتبه ايبحت في روان وهي اتشيرله ان الخطة نجحت وقرصاته في يده
سراج:اي ينعن شكلك يامطرشقة يامعاقة
سندس:مافيش معاق وانت عايش
سراج:الناس اتحق فينا مانبيش انرد عليك قدامهم لكن توا نمشو للحوش وانحاسبك عليها هذي وهما ايتناقرو جتهم عفاف جايبة الدبل
عفاف:بتلبسو الدبل وتطلعو
سندس:اي دبل مستحيل نلبس من واحد زيه دبله
سراج:عساس انا اللي ميت عليك
عفاف:مافيش داعي للفضايح قدام الناس ولبسو الدبل زي اي عرسان وبعدها روحو ساد الخبر اللي صار كله
سندس:مستحيييييييل انوافق
عفاف:سلم بنيتي انتي وافقتي اتمشي هالليلة علي خير كملي بجميلك ولبسو الدبل مافيش داعي الناس اتشك اكثر من هكي احكن كلمة يابنات
رانيا:دوسة بلا عناد مشي هذي بس
سندس:اوووووف ياربي صبرك باهي وين البلاوات
عفاف:اهن هيا لبسوهن البعضكم
سراح:مااتمشيش كلامها عليا مش بجوها اتوافق تلبس ولا لا اصلا انا مش موافق لا انلبسها لا نلبس منها وقلب وجه
سندس حامقة:ها شفتن تي هذا انسان حقير
سراج:وانتي وحدة مريضة
عفاف;سراج بلا حركات عيال صغار ومشي هاللليلة عشان خاطري الصبايا من بدري يسألن كنكم لبسو الدبل واطلعو وخلو هالليلة تكمل
سراج:موافق ياعفوفة لكن راه عشان خاطرك انتي بس
عفاف:باهي غير هيا امسكو الدبل وصبو لبسوهن البعضكم
صبو سراج وسندس وخذو الدبل وهم كل واحد شايل في قلبه حقد وكره كبييير للاخر مسك سراج يدها وبقوة لبسها الدبلة والمحبس وهي فنصت فيه وهو شافلها وابتسم ابتسامه خبيثة مسكت هي الدبلة متاعة ولبستها له بنفس القوة وابتسمتله نفس ابتسامه الخبث امتاعه بمعنى رديتها لكي
عفاف:بنات هيتن البرنوس متاعها عشان العرسان يطلعو
سندس سمعت الكلمة وقعد قلبها ايدق كيف بتروح مع اكثر شخص تكرهه معش عرفت كيف تصرف واصلا ماعندهش خيار الا هذا اما سراج بعد سمع الكلمة ارتبك بس ماحبش ايبين ارتباكه وبان طبيعي وماعدلش لبسنها صحباتها البرنوس امتاعها وطلعن معاها وايساعدن فيها عالفيلو اما هو كان بيطلع قبلها لكن امه جبراته يمشي جنبها عشان الناس وصلت هي وصحباتها لعند باب القاعة هو طلع وسيبهن وهي حظنت صحباتها وبكت رغم قوتها بس الموقف اللي انحطت فيه اكبر منها وكل شيئ صار كان غصبن عنها بعدتهن عفاف علي بعضهن ومسحتلها دموعها وكلمت سراج اللي كان مصبي قدام الباب تبيه ايطلعها للسيارة طلعت سندس وسراج فاتها بالرسمي ودارها بالمكر ومابش ايساعدها في الفيلو ونزل من دروج القاعة وركب في سيارته وخلاها اتكركر في فيلوها وتنزل بروحها مالدروج
سندس تنزل واتهزب:حقير واطي تافه ياربي ماطيحتني الا في هالمتخلف
فيصل كان بعيد وفطن الحركة سراج وجاه للسيارة وهو مصدوم
فيصل فتح بابا السيارة:تي كنك انت من جدك مسيب مراتك تنزل بروحها تي امشي نزلها قاعدة اتكركر توا اطيح
سراج:ان شاءلله اطيح واتكسر ونفتك منها
فيصل:تي صبي ساعدها كنك بارد هكي
سراج:اصلا كان تعرفها من راك ماقتلي ساعدها
فيصل:مراتك يعني من
سراج:هذي المريضة الجالطة
فيصل:كيف كيف مااتقولش طلعت هي ام السان
سراج غامتله:هي حق بختي المعفن من بين بنات الدنيا كلهن ماانطيح الا في هالمريضة
فيصل:باهي توا نحكو في الموضوع هذا بعدين صبي ساعدها توا عمي محمد قاعد ولو شافها تنزل بروحها ايعطب معيشتك
سراج:مانيش مساعدها واليوم هذا بنطلقها
فيصل:اي طلاق ياراجل شن بيحكو الناس توا غير وسع بالك توا تلقى حل فكر في الصفقة ماتقعدش هبل وبعدين مش هذي اللي كنت ادور فيها جت لعندك
سراج:كنت بنزل خشمها بس توا دبسوني فيها بنت الكلب
جد سراج وباته كانو قدام القاعة بس بعيد مالباب شافها بات سراج وهي تنزل بروحها وهو راكب في سيارته جاها وساعدها عالنزول وركبها في السيارة
محمد غامتله:اللقطة اللي درتها هذي حسابك عليها بعدين
سراج:حتى انا عندي موضوع معاك بعدين
محمد:روح توا وبعدين انتفاهمو
ولع سراج السيارة وطلع بسرعة غريبة وهو متضايق وغامتله عالاخر وعلا المسجل عالاخر عشان مايبيش يحكي معاها اي كلمة وصلو للفيلا وتحديدا للجناح متاعهم نزل وخش وسيبها تنزل بروحها نزلت سندس مالسيارة بعد معاناه واجدة مع الفيلو وخشت للفيلا وهي غامتلها من سراج عالاخر واتهزب وهو اول ماخش سلح جاكته وعزقها عالوطا وقمعز عالكنبة
سندس اتهزب:انت شن تحساب روحك مسيبني انعاني بروحي تخيل طحت
سراج:ياريتك اطيحي ولا حتى اتموتي بالك نفتك منك
سندس:دبينك كارهني للدرجة هذي ليش تلحق فيا كل هالوقت وليش تجوزني وانت عارف ومتأكد اني نكرهك
سراج;انا لو نعرف انك انتي العروس كنت مستعد ننتحر ولا ناخذك لكن دبسوني فيك
سندس:عساس انا ميتة عليك هذا بختي الاسود يعني معقولة من بين رجالة الدنيا كلهم نجوزك انت
سراج:وكني انا شن ناقصني ان شاءلله
سندس:ناقصتك كل حاجة مافيكش ولا ميزة انسان تافه ومش محترم
سراج ضحك;عساس الاحترام اللي عندك مقطع بعضه شوفي ردك وجلاطتك تي احمدي ربك صبح وليل انك قعدي حرم سراج
سندس ضحكت:نحمد ربي قول نستغفر من ربي لاني اكيدة دايرة ذنب كبير اللي طيحني فيك انت مش انسان انت حيوان وكل اللي اتفكر فيه قلة الادب وخلاص بعد رفضت فلوسك قلت نجوزها لكن مستحيل نرضى بالشي هذا ومن بكرا بنطلق منك مستحيل نقعد الواحد زيك
سراج وموجه صبعة تجاه سندس:اسمعي انتي وحطي هذي في راسك ماقبلتيش فلوسي لما عرضتهن عليك ودرتي روحك شريفة وماتنشريش بالفلوس وانتي طلعتي ارخص من هكي لان هلك هما اللي باعوك بالفلوس شن تحسابي باتك عليش عطاك ليا وانتي تكرهيني عشان باتي دفعله فلوس وشراك يعني القصة كلها صفقة
سندس بعصبية;سكر فمك واحترم نفسك انا لو نندري ان هو انت ماكنتش وافقت لو حتى متت
سراج:انا ولا غيري اهم حاجة تنباعي وتنشري كلكن هكي ارخاص واهم حاجة عندكن الفلوس
سندس بصوت عالي:انا مش زي حد وعمري ماكنت ننباع وننشرى ومستحيل انكون رخيصة عند بابا عشان ايبيعني انا وهلي احسن منك ومن عشرة امثالك
سراج:لا ياماما تواضعي وماتاخذيش مقلب في روحك واقبلي فكرة ان باتك باعك ليا بس كان المبلغ كبير وهذا اكبر مبلغ ندفعه في بنت ولو كنت عارفك ان هي انتي البنت مستحيل ندفعه المبلغ هذا كله لانك ارخص من هكي بواجد وطلع وسيبها
سندس قعدت اتهزب:انت واحد حقير وتافه وحيوان انا صقع عليك وعلي هلك كلهم وبعدها قعدت تبكي حست بان كلام سراج صح وان هو شراها بس بطريقة تختلف عالطريقة اللي عرضها عليها من قبل بكت واااجد وبعدها كركرت روحها وخشت للحمام اللي تحت سلحت الفيلو وخشت تحت الدوش كانن ادموعها نفس المية اللي تنزل علي جسمها حست انها ضعيفة الاول مرة وانها مش قادرة اترد علي كلامه بكت بكت وااجد وبعدها كملت دوشها ولبست الديشمبر اللي كان معلق في الحمام وتباوعت حست الجو هدوء وهو مش قاعد طلعت بسرعة ركبت للدور اللي فوق وفتحت الديار ولقت دار النوم اللي فيها دبشها خشتها وقفلت الدار عليها لبست بيجامة طويلة ولفت شعرها وقمعزت عالسرير وهي اتفكر في اللي قاعد ايصير فيها وكيف لقت روحها مع اكثر انسان تكرهه واكثر انسان حقير في نظرها وعارفة كويس الناس شن بيحكو عليها لو بكرا روحت مع هلها وطلبت الطلاق قعدت طول الليل مقمعزة عالسرير واتفكر وماقدرتش ترقد
أما سراج طلع بالسيارة لف واجد بسيارته في المدينة كلها وبعدها درس وقعد مقمعز فيها وايفكر في حل للمصيبة اللي لقى روحه فيها صح هو تبع سندس واجد وكان بيعرف معلومات عليها بس لان كان بينتقم منها مش محبة فيها وان يزوجها هذي ماكنتش في باله بكل وتوا قعدت مراته يعني فكرة الانتقام هكي هكي معش فيه منها فائدة ولو طلقها مش حيستفيد شي بالعكس هو اللي حيخسر كمل الليل وهو مقمعز في السيارة وايفكر شنو الحل اللي ممكن ايديره
#أذن_الفجر سمعاته سندس استغفرت وصبت توضت ولبست ملاية الصلاة وصلت وبعد كملت قعدت مقمعزة عالصلاية وتدعي ان ربي ايحللها هالقصة علي خير وان ربي يبعد عنها سراج وشره قعدت تدعي وتدعي ان ربي ايسر امورها وايريحها ساد ماتعبت نفسيتها من اول ماوافقت عالزواج قعدت قاعدة عالصلاية وتدعي لين الضي طلع
سراج روح من برا ورقى للدور اللي فوق فتح دار النوم ولقاها مسكرة
سندس كانت مقمعزة عالصلاية وعرفاته روح وخافت لما حاول يفتح الباب
سراج دق عالباب:لو واعية اطلعي نبي نحكي معاك
سندس قعدت اتفكر وحايرة مابين تطلع ومابين لا لانها كانت خايفة منه
سراج:عارفك واعية اصلا مستحيل تقدري ترقدي بعد اللي صار وعلى فكرة مانبيش منك شيئ ولا حيصير بينا حاجة بكل وكل اللي نبيه توا بنحكي معاك كلام مهم
سندس صبت وفتحت الباب:شن فيه شن بتحكي
سراج شفاها بملاية الصلاة وعرف انها كانت اتصلي استك اشوي لان عمره ماركعها
سندس:انخش ماتبيش تحكي
سراج:الحقيني تحت بنحكي في الصالة
سندس:شنو هذي الحقيني كنك مغرور انت شن حاسب روحك
سراج:اسمعي راسي مصدع ومانبيش انرد عليك انزلي وانتي ساكتة اسمعي الكلام اللي بنحكيه عشان انقررو اللي بنديروه في هالحياة السودة اللي بدت ونزل
سندس:اوووووف ونزلت وراه
قمعز سراج عالكنبة وهي قمعزت مصادرته وقعدو ساكتين
سندس غمتلها مالسكوت:بتحكي ولا لا انا بنرقى انلم دبشي ونلبس اشوي وبابا ايكون هنا
سراج:انا عمري ماتخيلت ان ايجو يوم واتلمنا لحظة ونحكو فيها هكي
سندس بحتت فيه بالجنب عشان هي فاهمة ان هو كان عارفها ان هي وهو اللي يبي يجوزها
سراج:مااتبحتيش فيا هكي انا بجد ماكنتش عارف ان انتي هي البنت اللي بيجوزوها ليا لو عارف راه ماوافقتكش بكل واقتنعي ان كل مرة كنا انتلاقو فيها كانت بالصدفة ماننكرش اني مافكرتش فيكي لكن كان تفكيري اني ننتقم منك وخاصتا في شرفك
سندس انصدمت وبحتت فيه زين:فديش انت حيوان
سراج:بلا غلط احسنلك وخليني انكمل كلامي ومش متحشم ولا خايف منك انا صح كنت بنتقم في شرفك بس توا انتقامي وعدمه واحد لان توا مش حيضرك هكي هكي قعدتي مراتي والشي هذا بيجلطني انا في حياتي كلها مافكرتش نجوز او نقعد مسؤول عن ولية واسرة معايا الجو هذا مش ليا بكل وحتى لو فكرت في الزواج انتي اخر وحدة انفكر فيها حتى لو غصبوني عالزواج زي مادارلي باتي وماتوقعتكش انتي بكل ممكن لو كانت وحدة غيرك كانت مشت ليلة عادية زي اي زوجين بس انتي لا مستحيل بجد ومن كل قلبي انا نكرهك وكل اللي انفكر فيه اني ننتقم منك انذلك بس وتوا معش ينفع للاسف لانك شايلة اسمي واسم عيلتي
سندس اتشوفله بحقد:انا مش شايلة اسمك انا شايلة اسم بابا واسم عيلتي بابا اللي عمري ماكنت رخيصة عنده وعمره ماباعني انا بس خوفي عليه هو اللي خلاني انوافق ولو كنت عارفة انك انت اللي بنجوزه كنت انتحرت ومتت ولا خذيتك
سراج:يعني متفقين ان الكره متبادل بينا
سندس:انت اكثر انسان نكره في حياتي تعرف ليش لان تصرفاتك عمرهن مادلن انك انسان وكل اللي اتفكر فيه حاجات مش محترمة وقلة ادب انت كيف عايش حياتك هكي مش عارف ان الحاجات هذينا حرام
سراج غمتله:حرام حلال مالكش دعوة بيها هذي حياتي وانا هكي عايشها ومنسجم حياتي كلها سهور بنات شرب هكي بس انتريح والحياة اللي توا خشيتلها هذي مفروضة عليا فرض زي بزبط الظروف اللي خلنك اتوافقي
سندس:يعني اقتنعت ان بابا ماباعنيش
سراج:مش موضوعي باعوك او لا اصلا الموضوع واحد كلكن ارخاص بس كل وحدة تنشرى بطريقة
سندس غمتلها وصبت:حتى انا فاضية اللي نحكي مع واحد زيك وجت بتمشي
سراج بعصبية وبصوت عالي:قمعزي مازلت ما كملت كلامي
سندس:مافيش كلام نحكوه اشوي وايجو هلي وهلك ونطلعو من حياة بعضنا اللي خشيناها بالغلط لاني لو انموت مانقعدش مع واحد زيك ومشت
سراج:شن بتستفيدي لو اطلقتي الناس بيحكو عليك واحتمال كبير بعد تطلبي الطلاق من ثاني يوم باتك ايصيرله حاجة بعد يسمع كلام الناس عليك اما انا
سندس لفت عليه:انت مش حيصيرلك شي لانك راجل وانا اللي حننظر لاني بنت نفس التفكير المتخلف كل مرة
سراج:بزبط لان هذا مجتمعنا
سندس بعصبية:مجتمع متخلف ساذج
سراج:بس حتى انا زيي زيك لو اطلقنا اليوم حنكون خاسر
سندس ربعت ايديها علي بعضهن:وكيف هذي
سراج:زي ماقتلك مبدري انا مش متاع مسؤولية حياتي هياجة بنات شرب وبس مش حاط عقلي ابدا للزواج ولا اصلا نبي نجوز بس باتي هو اللي غصبني
سندس ضحكت:شكلك هكي مش شكل واحد ينغصب علي حاجة
سراج:انا جديات انغصبت عالزواج وتقدري تعتبري ان الزواج هذا كله صفقة بيني وبين باتي
سندس اتشوفله زين:كيف صفقة
سراج:باتي عطاني خيارين الاول ان يعطيني كل فلوسه مقابل اني نشتغل في الشركة وانسيب السهر والبنات ونجوز وهذا كله المدة سنة بس ولو رفضت الخيار الثاني حيكون ان يحرمني من كل حاجة وايتبرع بكل
امواله بعد فكرت فيها القيت ان الحل الوحيد اني انوافق عاللي يبيه وكلها سنة وناخذ كل الفلوس ونقعد حر التصرف لاني لو رفضت انا الخاسر اصلا بلا فلوسه لا نقدر نسهر ولا انهيج
سندس:معقولة انت واطي للدرجة هذي
سراج فنص فيها زين:مش داعي للغلط لاني ماعنديش جو انرد عليك وخلينا في موضوعنا
سندس:مافيش موضوع بينا واصلا مستحيل ايكون بينا مواضيع
سراج:القدر جمعنا وخلا بينا مواضيع وخلينا نستفيدو مالفرصة هذي وتقعد مكسب ليا ولكي
سندس:مكسب لكي انت بس انا ماعنديش فيها مكسب ولازم اني نطلق منك
سراج:بالعكس مكسبك اكثر مني تكسبي سمعتك وراحة هلك عليك وتضمني ان باتك مااتردش عليه الجلطة لو طلبتي الطلاق من ثاني يوم وفي نفس الوقت تضمني ان شغل باتك يمشي تمام لان اكيدة لو اطلقنا حنطلبو منكم الفلوس وبعدها انتو منين بتجيبوهن
سندس مصدومة من كلامه وقمعزت عالكنبة وسكتت
سراج:شفتي ان مكسبك اكثر مني وفوق من هذا لو وافقتي ان مانطلقوش وانكملو السنة هذي مع بعضنا الرقم اللي تطلبيه تاخذيه من مليون العشرة مليون يعني السنة اللي معايا مش حتمشي عالفاضي
سندس:انا مانبيش منك لا فلوس لا شيئ انا كل اللي نبيه ان بابا ماايصيرله شي بسببي وان يقعد متريح في شغله وايرد زي قبل هذا كل اللي نبيه اما الفلوس عمرهن ماعنلي شيئ
سراج:تاخذي فلوس او ماتاخذيش هذي حاجة ترجعلك بس انا نضمنلك ان شغل باتك يمشي تمام ولو قعدتي معايا السنة هذي مافيش واحد فينا حيطلب 10قروش من باتك وبعد تكمل السنة انتي حرة وانا حر وحتى الفلوس اللي عند باتك مانبيهنش شن قلتي
سندس سكتت وقعدت اتفكر وقعدت قريب 5دقايق وهي ساكتة
سراج:ها شن قلتي
سندس:موافقة بس عندي شرط واحد
سراح:شنو شرطك
سندس:زواجنا ايكون علي ورق يعني مافيش حاجة اتصير بينا نهائي
سراج:موافق علي شرطك لاني انا عمري ماغصبت بنت انها ادير معايا حاجة ماتبيهش وبذات انتي لان بجد بجد ماعنديش اي نية اني انقرب منك لما كانت في عقلي الحاجة هذي كانت الغرض الانتقام وبس يعني لا اعجاب ولا اي شيئ
سندس:تمام لان انا بروحي كارهتك ومتقززة منك
سراج:نفس الشعور والله لكن خلينا نتفقو من توا جو امتاع اتقيدي حريتي غيرة حركات مانبيش يعني كل واحد فينا ايعيش حياته بجوه ماحدش يدخل في حد انتي عيشي حياتك كيف ماكنتي عايشتيها وانا انعيش حياتي كيف ماانا كنت عايشها بس قدامهم نحن تمام وحبينا بعضنا ومن وراهم كل واحد فينا حر بس اهم حاجة لا هلي ولا هلك يعلمو بحرف واحد ماللي قلناه ولا يعلمو بقصة سهوري والجو هذا كله وانا مش حنقيدك معايا يعني لو حتى انتي اتحبي واحد اخرى تقدري اتخلي علاقتك متواصله بيه ماتقطعيهش وعيشي حياتك طبيعي جدا معاه
سندس حست بحقارته لكن كانت مظطرة اتوافق لان طلاقها منه مش في مصلحتها ابدا
سندس:تمام موافقة لا انت تدخل فيا ولا انا ندخل فيك بس المشكلة في توا شن بنقولولهم بعد ايجو
سراج:ساهلة حلها عندي حنبانو قدامهم ان حلينا مشكلتنا ونوينا انكملو حياتنا مع بعضنا بس باني طبيعية قدامهم وبيني ان ليلتنا مشت طبيعية زي اي عرسان
سندس تنهدت:تمام
سراج:خلاص تقدري تطلعي ترقدي لعند لما ايجو
سندس هزت براسها ورقت فوق وخشت للدار وهي اتفكر هل اللي داراته صح او غلط
سراج لحقها في الدار خذا دبشه وطلع من غير مايحكي ولا حرف وعدى للدار لخرى وخش بيدير دوش وخش تحت الدوش وهو ايفكر زي تفكير سندس وهل اللي داره صح او غلط كمل الدوش وطلع لبس شور راب اسود وفيه خطين حمر وعليه تيشرت احمر وقعد اينشف في شعره سمع جرس الباب ايرن نزل بيشوفه ولما فتح لقاه باته وامه
عفاف ومحمد:صباح الخير
سراج:صباح النور
عفاف:وين العروسة
سراج:فوق في الدار
محمد:حكتلي عفاف عاللي صار في القاعة فهمني شنو القصة وانت منين تعرفها وشن صاير بينكم
سراج:توا نحكيلكم لكن قوليلي قبل حكيتو الهلها حاجة
محمد:مازال ماكلمتش فرج قلت نفهم منكم القصة قبل
سراج:باهي تمام احسن لانها مشكلة بسيطة وحليناها
محمد:بعد اللي صار هذا كله قدام الناس واتقولي مشكلة بسيطة وانحلت انا لازم انشوف سندس وتحكيلي
سراج:والله زي ماقتلك مشكلة بسيطة وانحلت مافيش داعي التكبير الموضوع الجو توا تمام
محمد:عدي كلم سندس توا بنسمع منها
سراج:تمام خشو قمعزو وتوا انكلمها وتحكيلكم بروحها
خشو عفاف ومحمد قمعزو وسراج رقى السندس ودق عالباب وسندس فتحت
سندس ربعت ايديها علي بعضهن:نعم شن جاي تبي توا
سراج:مش جاي عشان جمالك هلي لوطة وبيحكو معاك عاللي صار في القاعة
سندس ارتبكت:كيف وشن بنحكي
سراج:انتي بس باني طبيعية وقولي مافيش شي وانا اللي حنحكي وانتي قولي صح علي كلامي كله
سندس مرتبكة:باهي
سراج:تهيالي قتلك باني طبيعية
سندس:كيف انبان طبيعية وانا بنكذب تحسابني زيك متعودة عالافلام انا ماعمريش كذبت
سراج ضحك ضحكة هزوة:باهي صدقتك خلاص هي انزلي
سندس:تمام وجت بتنزل
سراج;اصبري وهيتي يدك
سندس فنصت عيونها:شنوووووو
سراج;مش ميت علي مسكتها لكن قدامهم بس عشان ايحسو ان الوضع عادي ونحن حلينا المشكلة
سندس:ويعني ماانبانوش ان حلينا المشكلة الا بمسكة اليد
سراج كر يدها:اها ونزل بيها وهي غامتلها بكل من لقطة سراج ونزلو لوطة
سراج يحكيلها بشويش:ابتسمي
سندس ابتسمت بلا نية
عفاف لما شافتهم نازلين وماسكين ايدين بعضهم قعدت اتزغرت
عفاف:لووولوولووي هذا النهار المبروك
محمد فنص في عفاف يبيها تسكت
محمد:صباح الخير يابنيتي كيف حالك اليوم
سندس ابتسمت:الحمدلله ياعمو كويسة كيف حالك انت
محمد:بخير الحمدلله انا جاي بنعرف الموضوع اللي صار وبنسمع منك قبل ماانكلم باتك ايجي
سنس شافت السراج وبعدها ردت عليه
سندس:لا ياعمو خلاص مش داعي اتكلم بابا مشكلة بسيطة وحليناها خلاص
محمد:كيف مشكلة بسيطة علي خبر عفاف قريب قتلتو بعضكم فهموني شن صاير بينكم وانتو كيف عرفتو بعضكم
سراج:القصة ومافيها ان تلاقينا كم مرة وفي كل مرة انتعاركو وكل واحد كان كاره لاخر ولما شفنا بعضنا امس انصدمنا عشان ماحدش فينا توقع ان هذا ايكون نصيبه بس بعد روحنا وحكينا حلينا القصة وطلع سبب مشاكلنا كل ماانتلاقو هو ان معجبين ببعضنا وشاف السندس وابتسم سندس كانت مبلمة عيونها فيه ومصدومة كيف يحكي بكل هالثقة وكانه ماصار شي
محمد:صح بنتي الكلام اللي يحكي فيه عشان انا ماانصدقش في سراج واجد
سندس في عقلها;من حقك مااتصدقش ولدك اكبر كذاب في العالم
سندس ابتسمت ابتسامة مجاملة:اها عمو صح اللي حكاه سراج خلاص حلينا المشكلة
محمد:يعني الجو تمام بينكم توا ومعش انكلم باتك
سراج:ماقالتلك الجو تمام خلاص عاد
محمد:انت مادخلكش بنسمع منها
سندس ضحكت وعجبتها هزيبة باته له:لا عمو خلاص المشكلة انحلت مش داعي اتكلم بابا
سراج غمتله من ضحكتها عليه ومسكها وضمها الصدره بالمكر وبالقوه
سراج:ها شفتو كيف متفاهمين وكيف مراتي اتهبل وقرصها في يدها
سندس:حستها وماقدرتش تحكي وفنصت فيه
عفاف ناضت اتزغرت وفرحانة
عفاف:الحمدلله اللي حليتو المشكلة والله من اول ماشفتها وانا قلت لايقين علي بعضهم شوف يامحمد كيف عصافير الحب مع بعضهم
محمد:الحمدلله اهم شي توا متفاهمين ومتريحين وبالك تطلع شاطرة واتعقل سراج
سندس حكت بشويش:مستحيل يعقل ولا ايصير منه اصلا
سراح بشويش:راه سمعتك
سندس:اصلا نبيك تسمع
سراج ابتسم:احسابك معايا غير يطلعو
سراج:ها بتفطرو معانا ولا اتروحو ظني اتروحو خير صح
محمد:مروحين ياللي مااتحشم علي وجك
سراج:تي عرسان نحن حتى انتو مافيكمش جو جايين العرسان في الصبح ماكنتش عريس من قبل ياحودة وغمزله😉
عفاف ضرباته;تحشم ياسراج
محمد يضحك:خليه هذا مش متربي يبي ترباية من جديد يصبر علي اشوي وتوا انربيه من جديد
سراج يضحك:باهي هوينا توا وتوا اتربيني بعدين
محمد يضحك;طالعين غير ماادفش واسمعو راكم تنسو الاسبوع بعدين راهو عشاء
سراج:كان اتفكونا منه
محمد:لالا ضروري منه هذا جدك يبيه وهو اللي دايرة راهو في حوش جدك عشان سندس اتعرف عالعيلة كلها
سراج:باهي تمام توا انجو
عفاف:دوسة توا اندزلك الكوافيرة بعدين اتلبسك واتمكيجك هنا
سندس;تمام اعميمة
طلعو محمد وعفاف وسندس دفت سراج وبعداته منها
سندس بعصبية:اخرلك مرة تلمسني
سراج:اسمعي مش ميت عليها لمستك راك مازلتي ماتعرفينيش انا احلى البنات واللي اسمح منك بمليون مرة بإشارة بس من صبعي اتكون عندي واندير اللي نبيها معاها فما اتشوفيش روحك عشان اخر وحدة انفكر فيها هي انتي ولو كنتي اخر وحدة مستحيل اندير معاك اي حاجة انا حطيت يدي بس عشان انبانو عرسان طبيعين قدام هلي
سندس:وحتى انا انت اخر واحد انفكر انكون معاه او يلمسني وعلي فكرة مانعرفكش ومانبيش نعرفك لاني مش حنعرف الا الحاجات المقززة والمقرفة بالله عليك فيه واحد طبيعي يحكي مع هله بالاسلوب اللي انت حكيت بيه توا
سراج:بيني وبين هلي ماتدخليش هذا اسلوبي وهو عاجبهم وانتي عنه ماعجبك
سندس:وبالك تحساب نبيه يعجبني انت كلك علي بعضك اصلا مش عاجبني ومشت وسيباته
سراج غمتله:مريضة متخلفة كيف بتمشي السنة معاها بس
"'"
مر الوقت وكل واحد قاعد في داره ومسكر علي روحه ومافيهمش حد رقد عالساعة 2رن الجرس ولما طلع سراج لقاها الخدامه اللي في فيلتهم جايبتلهم غداء سراج كان جيعان بكل ونفسه سندس لانهم ماكلوش شي من بعد امس حط الصفرة عالطاولة في المطبخ ورقي دق عالباب
سندس:كنك ادق شن تبي
سراج:هلي دزو غداء كان بتاكلي
سندس كانت ميتة مالجوع وطبعا الوكال كان عشقها فما قدرتش اتقول لا وفتحت الباب لقاته نازل ونزلت وراه قمعز سراج وبدا ياكل وهي قمعزت وبدت بتاكل وكان هذي اول مرة تجمعهم صفرة وكال كمل سراج وكاله وصبى فتح التلاجة طلع منها شيشة بيبسي وقعد يشرب وماعبرش سندس بكل ولا طلعلها معاه
سندس فطنتله ولفت وجها:حقيير
سراج سمعها:من بعدك وطلع وسيبها
سندس غمتلها وصبت طلعت حتى هي شيشة بيبيسي وشربتها ولمت الصفرة ورقت الدارها فوق وقعدت فيها
""
(عشان ماتسالوش ليش ماحد رن عليها سندس لما طلعت نست تاخذ فونها من رانيا)
""
عند الساعة 4 جتها الكوافيرة ومكيجتها ولبستها عربي وطلعت اتهبل😍
""
اما سراج عمره مالبس عربي جاه فيصل جابله البدله(كان لونها دمي) ولبسها وطلع فيها طرف اطلع طول😍كمل لبس وبخ عطر وفيصل روح (وطبعا قبل ماايروح سراج حكاله اللي صار كله وعالاتفاق اللي بينهم وفيصل اكدله ان اللي داره هو اللي صح )
"
عند سندس كملت لبس وروحت الكوافيرة سراج بعد شاف الكوافيرة روحت دق عليها وهي فتحتله
سراج:كان كملتي بنمشو
سندس;كملت ناخذ شنطتي بس
سراج:جيبيها والحقيني
سندس غمتلها مااتحبش الاوامر بكل:شن قصة الحقيني هذي والاوامر اللي تعطي فيهن من امس
سراج لف عليها وبكل برود:اصلا انا الراجل ونزل
سندس تعقدت:مغرووور 😡 وخذت شنطتها ونزلت وركبت معاه في السيارة وطبعا تفاديا الاي مشاكل ونقاشات بينهم علو صوت المسجل عالاخر وكل واحد فيهم كمية الكره اللي في قلبه للاخر تكفي بلاد وصلو الفيلة جده وخشو وبدو العيلة ايسلمو عليهم وقعدت عفاف اتعرف في سندس علي صبايا العيلة وهو طبعا قاعد مع ضنى عمه والرجالة برا ومش عاجبه الجو بكل بعد اشوي جو هلها وصحباتها وحظنتهن سندس وهي تبكي وواجعها فراقهم سالتها امها شن جوكم بس سندس كذبت عليها وقالت انهم تمام بس طبعا ماقدرت تكذب علي صحباتها وحكتلهن الحقيقة اللي صارت بس من غير ماامها تسمعهن وهنا ماكنش قدامهن الا ايوافقنها الراي لان عارفات لو اطلقت شن حيصير وشن حيحكو الناس عطتها رانيا فونها وبعدها جا العشا وتعشو وبعد العشاء هلها قعدو بيروحو وكلمها باتها برا وسلم عليها وسالها علي اخبارها وقالتله نفس ماقالت الامها ودعت هلها وصحباتها بدموعها وبعدها ردت قمعزت جوا مع صبايا العيلة
سراج طبعا كان مال بكل وماصدق العشاء كمل ودز علي امه عشان اتقول السندس هيا وخشت امه وقالتلها هي وهما طالعين وبيركبو في السيارة جاهم محمد وجد سراج سلم جد سراج علي سندس وطبعا سندس باست علي يده وراسه
جد سراج:الف مبروك ان شاءلله بهناكم
سراج وسندس:الله ايبارك فيك
جد سراج مد السندس كيس:هذي هدية بسيطة يابنتي علي زواجكم
سراج;وانا ياجدي ماعنديش هدية ولا كيف
جد سراج ضحك:انت هديتك بروحها توا تعرفها بعدين
سراج:اهم حاجة اتكون هدية سمحة بس
جد سراج:متاكد حتعجبك
محمد:عليك اللي مااتحشم حتى انت
سراج:عاد ايجيبلها هي هدية وانا اللي حفيدة ماايجيبلي شي ماايصيرش منها بكل
جد سراج:جوزناك نبوك تعقل زدت اهبال
سراج:امس كيف اجوزت ماحلنيش عقلت
محمد يضحك:المهم خوذ هذينا
سراج:اوووو هذي هدية من باتي الله اكبر شن بيصير في البلاد انت بذات خاطي هزايب ماعمري خذيت منك حاجة
جد سراج يضحك عليه
محمد يضحك:باهي باهي ياسراج صار انا ماعمري عطيتك شي المهم هذينا مش عشانك عشان سندس
سراج:حتي انا قلتها وبحت في سندس
سراج: جت امس وخذت كل حاجة
محمد:افتح العلبة واعرف شن فيها
سراج فتحها:هذينا تذاكر التركيا
محمد:هذي هديتي لكم اتقضو شهر عسل في تركيا
سندس:بس ياعمو انا عندي جامعة ومانقدرش نقعد شهر ومانحظرش تهيالي بلاش منها خير
محمد:لا عاد هذي هدية وماينفعش اتردوها عشان نزعل منكم وبعدين ياستي ماتقعدوش شهر اقعدو اسبوعين بس وروحو وكان علي جامعتك محلولة
سندس:بس انا عندي جامعة ومشروع بنشتغل عليه يعني صعب انسافر توا
جد سراج:كان عالمشروع مااتخافيش انا انساعدك فيه وانا المسؤول عليه انأجله لين انتو اتروحو وعالجامعة والحظور ماعليك نعرف دكاترتك كلهم حنخليهم يعتبروك حاظرة ولما اتروحي حيعاودولك اللي فاتك وكان زي ماقالولي انتي شاطرة وماينخافش عليك
محمد:خلاص هكي معش عندك عذر بتقبلي هديتي وتمشي ولا نزعل منك
سندس ابتسمت:لا عمي الا زعلك حاظر حنمشي
سراج مبلم عيونه زين وشايف سندس كيف تحكي معاهم بأدب يعني طلع هو بس اتقل في ادبها عليه
جد سراج:خلاص عطلناكم هي اركبو وامشو وبكرا وتو روحكم للسفر طيارتكم الساعة 11
سراج:تمام تصبحو علي خير وركبو وطلعو بالسيارة
سراج;عليك ادب نزل عليك قدامهم المشكلة مخدوعين فيك ويحسابوك مؤودبة مش حاقين السانك الحقيقي
سندس:انا مؤدبة مع الناس المحترمة اللي تستحق الادب اما الناس اللي مش محترمين ماايحقوش مني الا قلة الاحترام
سراج:قصدك قلة الادب
سندس بتحكي سراج علا المسجل عالاخر عشان مايسمعهش وهي غامتلها بكل من الحركة اللي دارها وصلو للفيلا ونزلو الجناحهم ورقو فوق وخش كل واحد الداره وسكر
سندس دارت دوش ولبست بيجامة خفيفة وخذت الكيس فتحاته ولقت فيه طاقم ايهبل ابتسمت لانها حبت جد سراج وهله بكل وحست ان سراج مش الهم ولا ماشي معاهم كيف هو بشكل وهما بشكل اخرى
وبعدها عدلت المنبه عالساعة 8 وامتدت في فراشها من غير مااتفكر في شي لانها كانت تاعبة بكل والها يومين مارقدتش
اما سراج خش خذا دوش ولبس شورت نص ومن فوق مش لابس شيئ وطلع حق التذاكر عالكنبة خذا فونه وعدله عالساعة 8 ورقد لان حتى هو كان تاعب بكل ومن امس مارقدش
(فيه حاجة مافطنتولهش سراج لعند توا مازال فونه مقفل مافتحش شفرته بكل)
""
عند حنين كانت مقمعزة في سريرها واتفكر في كلام عصام وان صح معاه حق هي اتحب رؤوف والمفروض ماتستسلمش واتخليه الغيرها والمفروض ادير اي حاجة اهم شيئ ايكون الها فكرت واجد ومالقتش الا ان انسب حل انها اتكون جنبه وقريب منه عشان تقدر ادير اللي في راسها وقررت ان لازم تمشيلهم اتكسد عندهم ايام وفي نفس الوقت تطلب مساعدة عصام وتاخذ رايه لانها حست ان حاب ايساعدها طلعت برا الهلها واتفقت معاهم انها بكرا بتمشي الحوش عمتها وتقعد عندهم ايام بحجة انها بتقعد مع رويدة قبل ماتجوز واترايف عليها وهما وافقو
#يتبع
بكرا يوم مهم للكل اول وحدين سراج وسندس حيكون بالنسبة الهم اول يوم في حياتهم الزوجية التعيسة من بدايتها زعمك كيف حتكون رحلتهم وشن حيصير فيها هل حتقربهم من بعضهم او اتبعدهم اكثر من هكي 😏
ويوم مهم بالنسبة الحياة رانيا ورؤوف الهادية جدا والرومانسية هل حيقدرو حنين وعصام ايفرقوهم وحينجحن خطط حنين اللي في راسها او حبهم حيكون اقوى منها😧
اما بالنسبة الحياة رويدة ومعاذ لعند توا طبيعية بس زعمك ان هذا هو اللي ايسمو فيه هدوء ماقبل العاصفة😱
كله حنعرفوه في الحلقة الجاية 😊
أسفة لو فيه لخبطة في الأسماء وأكيد رأيكم ايهمتي 😉
گـتـابـتـي Koka Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
