#مـنـحـرف_وأحـبـبـتـه
الـحـلـقـة (25)
گـتـابـتـي #Koka_Saleh
""""""""""""""""""""""""""""""""""""
رؤوف:يبقى حناخذها غصبن عنكم وغصبن عن اي واحد ايوقف في طريق وجا بيطلع
عصام بصوت عالي;والله ماانخليك تاخذها البنت هذي مش الحد فينا لا تاخذها انت ولا انا ولو اصريت علي قرارك حتلقاني في طريقك نمنع فيك
رؤوف لف عليه:وانا واخذها واخذها ولو القيتك في طريقي والله نقتلك ياعصام وطلع
ركب في سيارته وهو مقرر بيمشي البات رانيا ويحكيله كل اللي صار وان بيسيب هله وكل حاجة اهم حاجة ياخذ رانيا عشان ايحبها
طلع بسيارته ووصل الحوش هل رانيا نزل ورن الجرس وفتحت الباب رنا وانصدمت لما شافاته رؤوف
رانيا:انت شن جابك هنا
رؤوف:نبي عمي خشي كلميه ليا
رنا:بابا لو ايشوفك هنا حيضربك والله
رؤوف:أنا راضي باللي بيديره انتي بس كلميه
رنا مازال بتحكي طلع باتها
بات رانيا:مع من تحكي من اللي عالباب
رنا بتردد:هذا رؤوف يابابا قال يبيك
بات رانيا بعصبية;هو مازال عنده وجه ايجي هنا بعد كل اللي صار
رنا بعد باتها عصب خشت تجري
رؤوف دف الباب:معاك حق في اي حاجة وحتى لو بتضربني انا راضي بس عطيني فرصة انفهمك
بات رانيا بعصبية:شن بتفهمني خلاص امك جت وحكت كل حاجة
(رنا طبعا خشت تجري وحكت للبنات ان رؤوف برا وطلعن وقعدن يسمعن فيه وهو يحكي مع بات رانيا بس من غير ماايشوفوهن)
رؤوف:معناها هكي حنحكو عالمكشوف وكل حاجة واضحة انا ياعمي خوي ظلمني وقهرني وطعني في ظهري وفرقني عالانسانة الوحيدة اللي قلبي اختارها
بات رانيا:مافيش داعي التكثير الكلام واحكي بإختصار وقول المطلوب توا
رؤوف:انا جاي طالب بنتك والله حنصونها وانحطها في عيوني انا راجل مستقبلي مضمون ونقدر نسعدها ارجوك ماتحرمني منها ووافق انا روحي متعلقة فيها
بات رانيا:وشن بدير في هلك الرافضين وخوك اللي يبي نفس البنت اللي انت توا جاي تطلب فيها
رؤوف:انا مش هامني حد سوا وافقو او رفضو انا المهم اني شاريها ونبيها وكان علي عصام مستحيل انخليه ايحقها حتى من بعيد اصلا هكي هكي هلي لا بنسكن معاهم ولا بنجيهم انا مانبيش مالدنيا الا رانيا
بات رانيا:غلط اللي تحكي فيه مافيش واحد يقدر ايعيش من غير هله
رؤوف:بعد يقعدو هلك ضالمينك ومايبوش ايصبو معاك وابسط حاجة اتصير ماايصدقوكش يبقى ليش نقعد معاهم انا ظلموني هلي وماوقفوش معايا ولعند توا مازال بيضلموني عشان مايبونيش ناخذ البنت اللي اخترتها فارجوك ياعمي ماتظلمنيش زيهم ومااتفرقش بينا وعطيها ليا ونوعدك انحطها في عيوني من جوا وماانخليش اي حاجة اتمسها او اتزعلها
بات رانيا:أنا مستحيل انوافق نعطي بنتي الواحد هله مايبوهش وفوق هكي خوه يبيها هذا شيئ حرام وانا مانرضش الحرام
رؤوف;والله ماانخليه ايحقها ولو علي هلي مصيرهم راضيين اصلا هما ايحبو رانيا ويبوها لولا بس اللي داره عصام
بات رانيا:وانا كنت غالي عليا وانعزك وباتك من قبل حكيلي ان يبي رانيا لكي بس انا زيهم مش حنرضى باللي ايصير انتو مش عارفين عواقب خوت يبو نفس البنت وانا لو نعطيها لكي نقعد راجل مانعرفش في الاصول وماعنديش شرف
رؤوف:حشاك ياعمي انا عارفك كويس انت شنو ووالله والله بنتك ماايجيها ضر معايا نفديها بروحي بس ماتحرمونش من بعضنا وانا اهو قدامك وجيتك مالباب وناوي الحلال
بات رانيا:انا اب ومانرضش البنتي هكي اربح يارؤوف ماعندكش نصيب عندنا
رؤوف دمعو عيونه:ارجوك ياعمي ارجوك ماتحرمني منها انت مش عارف شن حيصير فيا لو ماخذيتها
بات رانيا:كلها فترة وتنسى وتلقى البنت اللي اتحبها وتاخذها وهلك موافقين ويفرحو بيك وتفرح بيها لكن رانيا مش من نصيبك وهذا شيئ لازم ترضى بيه وتوا تفضل من هنا وكان يارؤوف اتعد في الصحبة والعشرة اللي كانت بيني وبينكم ردبالك اتعرض الرانيا حتلقاني قدامك وصدقني مش حنرحمك
رؤوف:حرام عليكم ليش بتحرقو قلوبنا هكي ليش ماعندكمش احساس ومااتقدروش في الحب
بات رانيا:لما تقعد اب توا تفهم انا ليش رفضتك وحتعرف ان بنتك اهم عندك من حب حيضيعها وايضيع مستقبلها
رؤوف:والله حنحطها في عيوني وانحافظ عليها مش حيضيع مستقبلها معايا انت بس اسألها انا متاكد انها حتوافق
بات رانيا:لا نسألها لاشيئ وبعدين هي ماعندهش كلمة معايا وانا رافض وبنتي مش حتطلع من تحت امري وانت توكل عالله وعدي الهلك وخليك مع خوك ماعندكش غيره مهما صار بينكم وكان علي رانيا الايام اينسنك اللي صار كله
رؤوف:ارجوك ياعمي ماتكسر قلبي ارجوك ماتحرمني منها
رانيا كانت تسمع في رؤوف وهو يحكي وحاظنة سندس وتبكي
بات رانيا:خلاص يارؤوف لازم تفهم ان نصيب مافيش وان الكلام كمل ومعش فيه مانحكو توا وردبالك انشوفك مقرب من رانيا او محاول اتكلمها بأي وسيلة وتوا تفضل
رؤوف كانو عيونه معبيات دموع وطلع وقلبه مكسور بس عقب عقله وروحه مع رانيا
بات رانيا خش ولقاها حاظنة سندس وجنبها امها ورنا
بات رانيا:اكيدة سمعتي ان رؤوف طلبك مني وانا رفضت
رانيا هزت براسها
بات رانيا:وانتي شن رايك في اللي انا درته
رانيا تبكي:اللي اتشوفه يابابا ديره
بات رانيا:انا عارف انك تبيه وعارف ان رؤوف كويس وشاريك بس مانبيكش اتحسي من رفضي له اني ظالم مانبيكش اتفكري هكي انا يارانيا راجل كبير وعارف الدنيا أكثر منك واللي درته في مصلحتك انا مانقدرش نعطيك الواحد هله مايبوكش وخوه يبيك هذا حرام صح رؤوف قال بيسيب هله عشانك بس صدقيني اللي مافيش خير في هله مافيش خير فيك
رانيا:انا عارفة يابابا وانا مستحيل نطلع من تحت طوعك او نكسر كلمتك وانا معاك في اللي اديره عشان عارفة اتهمك مصلحتي قبل كل شيئ
بات رانيا:يعني راضية عاللي درته وماايجيش يوم واتلوميني
رانيا:راضية يابابا واصلا حتى لو انت وافقت انا كنت حنرفض
بات رانيا:هكي ريحتيني وياريت ماايكونش عندك اتصال باي واحد منهم
رانيا:بس يابابا رويدة صاحبتي وانا مانبيش نخسرها
بات رانيا:امها جت لعند هنا وقالت ماتبيش صحبتكن ونحن عمرنا ماتعودنا نقعدو بلا كرامة وكان انتي بتريحي وتفتكي مالمشاكل كلهن واتريحي مالعيلة هذي يبقى لازم تقطعي اي صلة تجمعك باي واحد منهم حتى لو صاحبتك
سندس:صح رنوشة عمو معاه حق حتى رويدة لازم تقطعي علاقتك بيها وحتى انا بعد اللي داروه فيك معش بنعرفها
رانيا شافتلها زين ومصدومة
سمية:أحسن مااديرن وبعدين اصلا امها قالت بيحولو من هنا بكل
سندس:احسن وخلاص هيا رنوشة خلينا انخشو جوا وخشن جوا للدار وخشت معاهن رنا وسكرن
رانيا:انتي شن تقصدي بالكلام اللي حكيتيه معقولة بنسيبو رويدة ومعش بنصاحبوها
سندس:ياغبية انا حكيت هكي قدام هلك عشان لما يعرفو ان حتى انا قاطعتها ماايحسوش انك بتواصلي معاها عن طريقي
رانيا:اوكي فهمتك قبل فجعتيني
رنا:بصراحة ماعمره مرت عليا وحدة بذكاك كيف خطرت عليك بس
سندس:نعجبكن بس قوليلي رنوشة مقتنعة بكلام باتك ورأيه
رانيا تنهدت:اصلا معش فيه حل الا هكي وهذا نصيب ولازم نرضو بيه وبعدين اللي داره عصام مستحيل ينتسى وحتى لو خذيت رؤوف عصام حيقعد حاجز بينا حتى من ناحية رؤوف مش حيقدر ايتعايش مع فكرة خوه ايحب مراته حتقعد ديما قدامه
سندس:والله معاك حق حتى لو خذيتيه مش حتهني معاه
رنا:حتى انا نفس راي رانيا صح وجعني رؤوف بس هذا احسن حل
رانيا:ربي ايقدرني وننساه
سندس:حتقدري صدقيني بس توا لازم اتردي زي قبل وتمشي للجامعة خلاص الامتحانات والمشروع قريب معش فيه وقت
رانيا:ان شاءلله حنبدى مالأسبوع الجاي
سندس:ان شاءلله مع رنت فونها طلعاته مالشنطة لقاته سراج وردت
سندس:ايوا سراج
سراج:كملتي انجيك
سندس:اها تعال
سراج:باهي وتي روحك علي ماجيتك
سندس:تمام وسكرت
رانيا:بتروحي
سندس:اها
رانيا:باهي تكي علي رويدة وقوليلها اللي اتفقنا عليه قبل
سندس:حاظر
بعد اشوي جاها سراج وطلعتله وركبت معاه في السيارة
سندس:ماتطلعش عالفيلا دغري
سراج:تبي هلك
سندس:لالا نبي نمشي الرويدة صاحبتي
سراج شافلها زين:قالولك عليا شوفيرك الخاص
سندس:ماتبيش اتشيلني عادي توا انرن علي عمو عدنان ايشيلني
سراج:عمو عدنان بتمشي معاه عالمغرب عادي هكي تي هو وظيفته في الصبح ايشيلك وايجيبك للجامعة بس
سندس:عادي هو راجل كبير من عمر بابا وانا غالية عليه وماايقوليش لا علي اي مكان
سراج:اها غالية عليه المهم وين حوش صاحبتك
سندس:وصفاته له وسراج مشاله ودرسو عند الحوش
سراج:بطولي نمشي وانرد عليك
سندس:لالا 10دقايق ربع ساعة بالكثير ونطلع
سراج:خلاص نرجاك هنا
سندس نزلت مع طلعت بات رويدة سلمت عليه وخشت وهو سلم علي سراج وحلف عليه ايخش جوا وسراج خش
سندس خشت ولقت ام رويدة وسلمت عليها وبعدها جتها رويدة واول ماشافتها حظنتها وقعدت تبكي
عالية:خلاص عليش تبكن توا شن صاير عاد وبعدتهن من بعضهن وقمعزن في الصالة
سندس:سامحيني ماقدرتش انجيك الا اليوم صارت معايا كم قصة منعتني
رويدة:لا عادي دوسة عارفتك جت امك امس تكفي
سندس:صح ماما جتكم من قاللها انا ماحكيتلهش
عالية:قالت باتك سامعها من اصحابه
سندس:اها تمام باهي قوليلي شن اخبارك دودي وشن دايرة
رويدة:اهو ماشية اتحقي في الحال بروحك
سندس:وسعي بالك وكل حاجة والها حل
رويدة:اي حل وماما مشت الهل رنوشة وقالتلهم معش تبيها اتصاحبني عليك لقطة واعرة مستحيل عاد اتكلمني ولا هلها ايخلوها اتكلمني مرة اخرى
عالية;ريتيها كيف مش فاهمة ان نحن درنا هكي المصلحتها ومصلحة خوتها رانيا كان قعدت اتجينا ورويدة تمشيلها هكي خوتها مش حينسوها وحيتكرر اللي صار هالمرة ربي نجاهم مرة اخرى مرات نخسرهم هما الاثنين
سندس:امك معاها حق خلاص صحبتك برانيا لازم تنتهى عشان ماتخصريش خوتك
رويدة بعصبية:حتى انتي تحكي هكي
سندس:لازم تعرفي ان حتي رانيا بتنهي صحبتها معاك ومش هكي وبس وكلمتني حتي انا وقالتلي معش تبي صحبة معايا وحتى امها كلمت ماما وقالتلها هكي
رويدة تبكي:مستحيل مستحيل رانيا ادير هكي
سندس:لا ياحنة دارتها ونص ومعش تبي صحبتنا حتى نحن معش نبو صحبتها
عالية:ها شفتي هذي اللي متمسكة بصحبتها اهي باعتكن انتن الاثنين
رويدة:فيه حاجة غلط رانيا مااديرش هكي
عالية صبت;الله ايربحك يادوسة عقليها وفهميها ان رانيا معش تبي الصحبة علي مادرتلكن قهوة ومشت
رويدة تبكي:معقولة رانيا ادير هكي واتسيب صحبتنا والعشرة اللي بينا
سندس تحكي بشويش:رنوشة ماقالتش هكي
رويدة:امالا شنو قالت
سندس:انا قلت هكي بلعاني عشان هلك مايعرفوش ان انا جاية انواصل بينكن
رويدة:باهي قوليلي رنوشة شن قالت
سندس:رانيا ماعطتش فيك طريق بكل وماتبيش تخسرك زي ماانتي ماتبيش تخسريها بس لازم الفترة هذي اتواصلن بالسر وانا قدام هل رانيا درت روحي قطعت علاقتي بيك وقدام امك درت نفس الحاجة عشان مايعرفوش ان انا انوصل بينكن
رويدة بفرحة:الحمدلله طمنتيني وحق ربي نفسيتي كانت تاعبة وبذات لما عرفت ان ماما مشت الهلها قلت خلاص صحبتنا انتهت
سندس:تي نحن خوات ان شاءلله ايديرو شنو ماانسيبوش صحبتنا السمحة اتضيع الاي سبب
رويدة:هذا وين تريحت بس قوليلي شن بدير في موضوع رؤوف هو لعند اليوم تعارك مع هلي وسيب الحوش عشانها وتبي الحق انا واجعني وواقفة معاه ولو تبي انكون الوصل بينهم
سندس:لالا خلاص رنوشة قررت ان تنسى موضوع رؤوف بكل ماتقدرش تقعد معاه بعد ماعرفت ان عصام يبيها وبعدين اليوم رؤوف جا غادي وطلبها من باتها وهو رفض وحتى رانيا رافضة عشان عارفة انها حتى لو خذاته مش حتريح معاه
رويدة:والله وجعوني عصام الحقير فرق بينهم بأنانيته
سندس:خوكي هذا كان انحقه نقتله الواطي معقولة فيه واحد ايدير فيه خوه هكي تعرفي سراج المنحرف اللي لاعنده احساس ولا ضمير لما حكيتله القصة انصدم وماصدقش ان ممكن في حد ايدير في خوه هكي
رويدة:هذا واحد حقير مليان بحقد وكره وانانية ماواجعني الا رؤوف عشان طيب واهو سيب الحوش والله واعلم وين قاعد توا
سندس:ربي ايجيبه لكم طيب
رويدة:ان شاءلله
مع جيت امها جايبة القهوة
عالية:ها فهمتيها وقنعتيها يادوسة
سندس:لا ماعليك خلاص حكيتلها واقتنعت
شربن القوة وبعد القهوة سراج دز عليها عشان ايروحو طلع سراج وطلع معاه بات رويدة لعند برا اما سندس سلمت علي رويدة وامها وطلعت رويدة اتوصل فيها برا تلاقت مع عصام طالع من باب المربوعه اللي برا وبيخش للحوش شافاته سندس ومابتش اتعدل عليه ولا بت اتسلم عليه عشان كانت كارهته بعد اللي داره
عصام:كيف ماتبيش اتقولي الحمدلله عالسلامة
سندس:مع السلامة دودي وبتطلع وماعدلتش عليه
عصام عصب من حركة سندس
عصام:تهيالي نحكي معاك مانحكيش للساس عليش ماتبيش اتردي
سندس لفت عليه:بعد يقعد انسان يستحق انرد عليه توا انرد
رويدة:عصام خلي البنت اتروح مادخلكش بيها
عصام بعصبية;حتى انتي مقتنعة ان اللي درته غلط
سندس:وشن رايك واحد ايدير هكي في خوه تبينا انصفقوله وانقولوله صح
عصام:مش عارف شن دايرلكم رؤوف لين كلكم اتحبوه
سندس:كلهم ايحبوه عشان مش داير الحد شيئ يعني عشان طيب
عصام بعصبية:قصدك انا خبيث
رويدة:عصام اسكت دوسة عدي فكك منه هذا ايدور في واحد ايدير معاه مشكلة وخلاص
سندس:كان لازمته ايدير مشكلة ايعدي ايدور وين ايديرها ما ايدورهش عندي وبعدين انحب انقولك انت مش بس خبيث انت واحد معبى كره وأنانية ولعند لما اتموت بتقعد هكي
عصام بصوت عالي:اطلعي من حوشنا ومعش نبي انحقك مرة اخرى هنا
رويدة بعصبية;انت ماتدخلش هذي صاحبتي وهذا حوش بابا مش حوشك واتجيني في الوقت اللي ايريحها
عالية جت تجري:كنكم شن فيه
سندس:تريح مش حنجي مرة اخرى هنا ودودي لما تبيني انتي اللي حتجيني في حوشي
عالية:كنك يادوسة شن صاير
رويدة بعصبية:هذا الحقير عصام لز دوسة
عالية بعصبية:هذا مش حوشك عشان اتلز ضيوفنا منه انت اللي تطلع من هنا
عصام بصوت عالي:انا خوها الكبير وايحقلي لما انحق انها مصاحبة وحدة قليلة ادب ومش محترمة انلزها ومعش انخليها اتصاحبها
سندس بعصبية:قليلة ادب في عينك اصلا انت اخر واحد تحكي عالادب
عالية:الله ايربحك امسحيها في وجي وهذا احسابه مع باته
رويدة تبكي:وراس دوسه اتسامحيني هو اللي قليل ادب
بات رويدة وسراج برا وسمعو الهرجة بات رويدة خش يجري وسراج قعد عند الباب وماقدرش ايخش
بات رويدة:شن فيه شن صاير عليش صوتكم عالي
عصام بعصبية:دايرات قصة عشان خايف علي رويدة لزيت وحدة قليلة ادب وجالطة من حوشنا
سندس بعصبية:لا انت زودتها بكل وسكتتلك واجد تحسابني خايفة منك راه مازال محترمة هلك اللي قدامك
عصام:شن مازال بتقولي بصراحة وحدة صايعة زيك انتوقع منها اي حاجة
سراج سمع الكلمة ومعش تحمل دف الباب وخش ودغري عطا عصام بوكس سمح لين طاح وقعد ايتحزز عليه بات رويدة حزها بينهم وسراج خذا سندس وهو غامتله بكل وركبو في السيارة وطلع سراج بسرعة رهيبة وطول الطريق وسندس تحكي اتحاول اتهديه لين وصلو للحوش سراج كان متضايق ومابش ايخش للحوش وقمعز في الجنان
سندس:كنك قعدت هنا
سراج معصب:فوتيني ماعنديش جو لا نحكي لاشيئ بنقعد هنا بروحي
سندس:مش فايتك وبعدين انت عليش داير موضوع ومعصب توا
سراج:كيف عليش معصب ماسمعتيش شن قالك ولا شنو
سندس:سمعته وهزبته وانت ضربته مع ان غلط ضربتك له
سراج بعصبية:كيف غلط تبيني نسمعه ايعلي في صوته عليك وايسب فيك ونسكتله تي انا قاعد مقهور عشان ماعطيتش طريحة سمحة
سندس:حتى انا ماسكتتلش وهزبته وبعدين انا طول عمري متعودة ناخذ في حقي بروحي ماكانش لازم ادخل روحك في مشكلة عشاني
سراج:من جدك تحكي هكي انتي ناسية انك علي ذمتي وان اللي ايهينك ايهني يعني لما كلب زي هذا ايقول المراتي هكي وانا نسكت يبقى انا مش راجل عارفك بتقولي جوازنا علي ورق لكن هذا مش معناها ان انشوف حد هانك ونسكتله هذي حطيها في بالك كويس
سندس:عارفة بس هذا واحد حقير مانبيكش اتخش معاه في مشاكل
سراج:وانا احقر منه شكلك مش عارفتيني انتي انا سراج اللي ماعمرش حد تحداني
سندس:ياساتر عالثقة
سراج بعصبية:كان عاجبك
سندس:لا مش عاجبني
سراج:سندس خطيني راه مش جوك
سندس صبت:حتى انا بنخطاك بس وهي ماشية حقت في الجنان التوبو اللي ايصبو بيه في المية عالورد اللي في الجنان فكرت في فكرة وابتسمت ابتسامه خبيثة ومسكاته وقربت من سراج وصبت عليه مية
سراج انفجع ودبشه انبل;والله انوريك يامطرشقة وصبالها
سندس عزقت التوبو وراحت تجري وسراج مسك التوبو وقعد يجري في جرتها وايبخ عليها في المية لين حول وشاحها ووبينما وهي تجري واتشوف السراج وراها طاحت في حوض السباحة أو البيسين زي ماايقولو في المسلسلات😂
سراج قعد يضحك عليها:تستاهليها هذا اللي اينابشني
سندس:ياصامط بلاش ضحك وتعال طلعني
سراج جاها ومدلها يده وسندس مدتله يدها وكراته وطاح معاها
سراج يضحك:يامجنونة توا اتشوفي
سندس قعدت اتعوم بسرعة عشان مايمسكهش وتطلع قبله وسراج كان ايعوم ويلحق فيها ولان كان يعرف ايعوم احسن منها مسكها ولف ايديه عليها بالقوة
سراج ايشوفلها:شن اندير فيكي توا
سندس بخوف:بلا صماطة خليني نطلع المية مصقعة
سراج:مافيش طلوع لين انعاقبك
سندس:بلا صماطة اطلقني
سراج حول شعرها من علي وجهها وقعد ايحرك في يده علي خدها وايشوفلها بنظرة حلوة
سندس كان قلبها ايدق بسرعة وحاسة بشعور غريب أول مرة اتحسه
سندس زاد نفسها:سراج خليني نطلع
سراج كان ايشوف الشفايفها وايقرب منها وسندس معش قدرت تمنعه ولا اتبعده بس الغريب انها ماعيطت ولا غمضت عيونها زي كل مرة
سراج كان بيوصل الشفايف سندس وطب عليهم واحد مالامن امتاع الفيلا اسمه صفيان
صفيان:معليش استاذ سراج
سراج بعد من سندس وحطها وراه
سراج بعصبية:من سمحلك اتخش هنا
صفيان:معليش بس فيه ناس يبوكم برا
سراج بعصبية:باهي اقلب وجك وتوا انجي انشوفهم واحسابك بعدين عاللي درته
صفيان طلع وسراج لف علي سندس وهو غامتله
سراج:هالحقير والله ماعاد قاعد فيها
سندس:خلاص خلينا نطلعو عشان اتغير ادبشك واتشوف من جا عشان عمو واعميمة شكلهم مازال ماروحو
سراج:هيا وطلعو مالمية وركبو للدار سراج خذا دبشه ومشى الداره غير ولبس(تيشرت أسود علي جينز ازرق باهت وكاويش أسود)ونزل وسندس طلعت دبش وسلحت دبشها ونشفت روحها ولبست(استرتش أبيض وبدي طويل علي نص الفخذ سحابي هادي)وقعدت اتنشف في شعرها وبتمشطه عالمراية وبعدها قعدت اتشوف الروحها وتذكر في اللي داره سراج
سندس:انا شن صارلي ليش جمدت ومابعدتش ليش كنت مش رافضة فكرة قربه مني معقوله ايكون سراج عاجبني وباهي ليش لا مااهو طلعن فيه حاجات كويسة واجد يعني مش زي ماكنت متخيلته زمان وبعدها فطنت الروحها
سندس بعصبية:انا في شنو انقول وعلي من نحكي علي هالمنحرف الصايع ساد ان عايش حياته كلها حرام وبعدين شنو الاعجاب انا عمري مااقتنعت بشيئ زي هذا وبالعقل مانبي نعجب الا بسراج خلاص معش فيه رجالة في الدنيا وهي اتهزب سراج دق الباب وخش عليها
سندس بعصبية:كنك
سراج:تي انتي اللي كنك الباب ودقيته عليش اتعيطي
سندس:سراج شن تبي
سراج:بات صاحبتك وامها جايين ورانا وخششتهم الدار الضيوف برا وجيت بنقوللك انزلي يبوك
سندس:قصدك هل رويدة
سراج:اها قالو جايين ايتأسفو عاللي صار
سندس:خلاص هيا ننزلولهم توا
ونزلو سندس وسراج عليهم تحت
بات رويدة:اسمحيلنا يابنتي عاللي صار والله هزبته ومسحت بيه الوطى
عالية:عصام معش ايتحشم وحرجنا معاكم
سراج:بس راه عيب اللي داره وانا لو ماتحشمت منكم كنت اصرفت تصرف اخرى معاه
بات رويدة:معاك حق سندس مراتك واي حاجة اديرها من حقكك وبعدين سندس بنتنا ومن هي صغيرة صاحبة رويدة واللي ايزعلها ايزعلنا حتى لو ولدنا ووالله ماعاد يقدر ايتعرضلها مرة اخرى
سراج بعصبية:وبالك يقدر بعدها ايشوف شنو انديرله
سندس:خلاص سراج وحصل خير يكفي جيتهم لعند هنا صح ولا لا سراج
سراج:صح
عالية:ماتزعليش سلم بنيتي واعتبريه خوك وتعارك معاك وباته والله ماعقب عليه حاجة ورويدة سيبناها في الحوش تبكي وحالتها حالة ماللي صار
سندس:ليش ماجبتوها معاكم
بات رويدة:نوعدك بكرا انجيبها لكي
سندس:خلاص جيبوها ليا بكرا وانا ننسى اللي صار كله
عالية:خلاص بكرا رويدة اتجيك واهو عمك وعدك
سندس:خلاص نرجى فيها وصبت بدير عصير وخلتهم ايخرفو مع سراج وبعد شوي جابت العصير شربوه وروحو
بعد روحو سندس خذت كاسات العصير وخشت للمطبخ وسراج خش وراها
سراج:نغسلهن عنك
سندس:لالا شكرا
سراج:كنك قالبة وجك
سندس;وجي في مكانه وين اتحق فيه مقلوب
سراج:مش عارف حاسك تحكي بلا نية
سندس:سراج راسي مصدع كان بدير مشكلة راه عنديش لكي جو وجت بتطلع مالمطبخ
سراج مسك يدها:سندس كنك
سندس فكت يدها منه:ارجوك خلي فيه حدود بينا ومافيش داعي الحركاتك اللي ادير فيهن
سراج:هي هكي
سندس:اها هكي
سراج:تمام فهمت
سندس:باهي اللي فهمت
سراج:انقولك حاجة انا ماشي ساهر مع اصحابي ومسيبها لكي وطلع
سندس:احسن بالك ميته عليك وطلعت الدارها وطلعت شيتاتها وقعدت تقرا
""
سراج مشى شور فيصل وخذاه وعدو للشقة
""
أما معاذ من يوم اللي حكت معاه أسيل وطلع مالحوش معش روح وقعد في المصيف وقافل فونه
""
رويدة طبعا روحو هلها طمنوها ان سندس مش زاعلة وان بكرا بيشيلوها الها فتريحت عشان صحبتها هي وصحباتها بتقعد زي ماهي فتحت فونها وهذا وين فقدت معاذ عشان هذا وين نفسيتها تريحت قعدت اترن عليه مقفل ورنت علي مروة اخته قالتلها ان قاللهم زارد كم يوم
""
عند سراج وفيصل في الشقة
فيصل:انزيدك كاس اخرى
سراج:فكنا بكرا بنوعى بدري ونمشي للشركة مانبيش راسي يقعد صداع
فيصل:اوووو قعدنا انفكرو في الشغل من زينا عاد
سراج بعصبية:مش حظرتك ديما ادير فيها ماتشربش واجد عشان عندك شغل شن فيها كان درت زيك وبعدين انا محطوط في امر واقع ولازم نرضى بيه ماعنديش حل غيره
فيصل:خلاص سامحني والله انبصر معاك بس غير انت شكلك متعقد بروحك
سراج:عارفك اتبصر غير بصارتك كيف وجك😒
فيصل:مقبوله منك يانصي
سراج:قولي من جايبهن الطروف هذينا
فيصل:معتز بنات ايطاليات أطلع طول قال جايات سياحة معاه كانن في مصر واليوم وصلو هنا
سراج:وشن جو الصحة معاهن
فيصل:معاهن شهادات صحية وامورهن متستفة
سراج:يعني انتوكل
فيصل:زيط وهيج يانصي مضمونات
سراج صبى:تمام ومشى شور البنات خذا أحلى وحدة فيهن ورقص وهيج معاها وبعدها خذاها للدار والباقي معروف طبعا(للاسف الطبع يغلب التطبع😔)
""
الساعة 3 سندس كانت في الدار ومش جايها نوم طلعت ونزلت تحت دارت كباية نسكافيه وخذت طرف شكولاطة وخشت للدار اللي فيها التلفزيون وولعاته وقمعزت قعدت اتفرج بعد حوالي 10 دقايق سراج روح للحوش جا بيرقى الداره بس سمع صوت التلفزيون وجا شور الدار ولقى سندس مقمعزة واتفرج
سراج:خير
سندس:خيرات
سراج قمعز:في شنو اديري واعية لعند توا
سندس:ماجانيش نوم جيت انتفرج
سراج:غريبة ماجاكش نوم مع انك واعية بدري اعترفي شنو اللي مسهرك
سندس:نفس اللي مسهرك
سراج بصدمة:شنووو
سندس شافتله;كنك انصدمت
سراج:وانتي عارفة اللي مسهرني
سندس:لا مش عارفته
سراج: معناها عليش اتقولي هكي
سندس:عموما انا كنت واعية عشان كنت نقرا وبعدها معش جاني نوم
سراج:اها تمام بكرا عندك جامعة
سندس صبت:اها وبنرقد توا وحتى انت ارقد عشان عندك عمل بكرا
سراج صبى;حتى انا بنخش نرقد توا
سندس:قبل ماترقد امسح ارقبتك
سراج:عليش كنها
سندس:شوف في المراية حتعرف ومشت وركبت الدارها
سراج ركب بسرعة وخش للدار وشاف للمراية لقى ارقبته فيها روج👄
سراج غمتله:عليك قصة ليش مافطنتلها قبل ماانخش
سراج الخبيث😈;اوووي سيرجو انت كنك وكان حقتها شن بيصير يعني انا طول عمري هكي وهي عارفة وهذا طبعي ومش حيتغير نهائي وبعدين هي كلها سنة بس قاعدة معايا وبعدها كل واحد في حاله وانا وافقت علي هذا كله عشان ماننحرمش مالسهور مش بعد هذا كله هي اتقيدني
سراج الطيب😇:باهي هي شن قالت ماحكت شيئ كل القصة انها فطنتني يعني لا تحكمت فيا ولادارت قصة عاللي شافاته
سراج الخبيث😈:في البداية ادير الطروح هذينا لين اتحاول اتعلقك فيها وبعدها تقعد اتحكم واتقول ماتسهرش ومش عارف شنو لكن تحلم انا مافيش حاجة تمنعني عالسهور والبنات لا هي ولا عشرة زيها
وبعدها خذا دبشه وخش دوش وطلع وتمدد علي سريره ورقد
""
صباح ثاني يوم وعت سندس وغسلت وصلت ونزلت وتت الفطور وبعدها رقت وعت سراج وخشت الدارها ولبست وطلعت لقت سراج كيف نازل فطرو مع بعضهم بس من غير ماحد يحكي اي حاجة مع اللاخر وبعدها طلعت هي مع عمو عدنان ومشت للجامعة وهو طلع شور الشركة
""
وصلت سندس للجامعة وخشت المحاضرتها
ونفس القصة رويدة بعد اللي صار كله اليوم كيف مشت للجامعة وجابها باتها وخشت للمحاضرة دغزي وقمعزت بعد 5دقايق من بدية المحاضرة خش معاذ للقاعة وقمعز جنب رويدة وماحكوش بكل لانهم كانو مركزين عالشرح وبعد ساعتين طلعت رويدة مالقاعة هي ومعاذ
رويدة:شن اخبارك
معاذ:بخير شن اخبارك انتي
رويدة:الحمدلله بخير وينك امس مقفل
معاذ:ليا كم يوم مقفل شكلك امس غير رنيتي
رويدة:معليش حبيبي انت عارف اللي كان صايرلي ونفسيتي تاعبة
معاذ:بس انا مادخلنيش في اللي صاير معاك كله
رويدة:عارفة بس انا حسيت ان كل مرة نحكو نقعد نبكي وانكد عليك قلت مانحكيش معاك لين نقعد كويسة
معاذ:بس المفروض نحن انشاركو بعضنا في احزانا وافراحنا
رويدة:عارفة والله واسفة سامحني هذا اللي جا في بالي
معاذ:انا عمري ماتعودت علي هكي لينا زمان لما تزعل كانت اول واحد اتجيه وتحكيليه اللي صاير انا
رويدة بصدمة:انت سمعت روحك شن قلت انت عارف انك توا قارنت صح
معاذ:مش قصدي انا
رويدة;شنو انت معاذ انت لما حكيتلي عليها قتلي انا ماانسيتهش بس هي ماضي وعساس مش حتذكرها قدامي بس توا انت قاعد اتقارن بينا
معاذ:والله ماكان قصدي طلعت من غير ماانفكر
رويدة:عشان شكلك اتفكر فيها وانت مازال اتحبها ليش اعترفتلي بحبك بعد ماايست منك ليش خطبتني وخليت عندي امل وحلم سمح
معاذ:حبيبي اسف والله ماكان قصدي انقول هكي
رويدة نزلو دموعها:ولا قصدك معش تفرق وومشت وسيباته معاذ لحقها ووقف قدامها
معاذ:حبيبي اسف والله اسف سامحيني انتي عارفة اني انحبك بس قلت هكي عشان زاعل منك
رويدة:المهم انك قلتها والشيئ هذا ايدل انك مازال اتحبها ومازال متأثر بيها وكلام اسيل صح انت خطبتني عشان تنساها حول معاذ من قدامي بابا ايرن اكيدة قاعد برا نبيش انتاخر عليه معاذ حول من قدامها وهي طلعت ومشت الباتها وروح بيها
""
سندس حتى هي طلعت من محاضرتها وروحت الحوشها دغري عشان كانت بتجيها رويدة وقررت بدير خطة واتكلم رانيا واديرلهن مفاجئة وتجمعهن مع بعضهن ويلتمن زي زمان
المهم رنت علي ام رانيا وقنعتها انهم ايجيبولها رانيا في حوشها عشان اتشوفه وعشان رانيا اتغير جوها ووافقت ام رانيا ووافقت رانيا عشان فعلا كانت تبي اتغير جوها اشوي
""
روح سراج وهو جايب معاه غداء جاهز وتغدو هو وسندس بس كانو ايتفادو الدوة مع بعضهم وكانت دوتهم بسيطة بكل
سندس:قتلك بيجني صحباتي هنا كان بترقد عدي للفيلا وارقد غادي
سراج:اتلزي فيا من حوشي
سندس:مش لز بس بناخذ راحتي مع صحباتي
سراج:باهي توا نمشي تبي حاجة انجيبها لكي قبل مانمشي نرقد
سندس:لالا نبيش شيئ كل حاجة عندي
سراج صبى;معناها انا بنمشي نرقد في الفيلا غادي
سندس:تمام باهي
طلع سراج وسندس لمت حوسة الغداء وقعدت تبرم علي حوشها من هنا ومن هنا واتوتي الجية صحباتها
سراج خش للفيلا وقعد ايدور في امه لقاها في المطبخ
سراج:خير عفوفة
عفاف تضحك;لزاتك سندس
سراج:لا انا جاي بنرقد هنا بروحي انتي عارفة مايقدر حد ايلزني
عفاف:انا قلتلها اتقولك اتجي ترقد هنا عشان تاخذ راحتها هي وصحباتها
سراج:وعليش قلتيلها هكي بطمعيها فيا
عفاف:انا عارفتك ماتقدرش اتشوف بنات وتسيبهن في حالهن خفتك تحرجها قدام صحباتها
سراج:هابا منكن بعد اتحطن واحد في روسكن بس تعرفي شن واجعني عفوفة
عفاف:شنو اللي واجعك ياحساس
سراج:نسمع في اغلب الشباب يشكو من ان امه ومراته مش متفاهمات الا انا عليك حظ متفاهمات الدرجة يتفقن ايلزني من حوشني وانا مروح مالشغل تاعب
عفاف:اي شغل يابو شغل قالي باتك ماادير في شيئ بكل غير مقمعز ورا هالمكتب عافاضي وبعدين بدل ماتفرح عشان انا ومرانك انحبو بعضنا ومتفاهمين
سراج:عليش بنفرح وتفاهمكن جا علي راسي انا
عفاف:طول عمرك بيقعد عقلك صغير
سراج:باهي تقدري اتقوليلي عليش اتحبيها للدرجة هذي
عفاف:اول حاجة عشان مراتك ثاني حاجة عشان سندس بنية طيبة وحنونة وعسل ومن اول مااتشوفها اتحبها واهم حاجة انها اتعامل فيا وفي باتك كأنه باتها وامها
سراج ابتسم:باهي بنخش نرقد كان تميتو تبو حاجة مااتوعونيش😑
عفاف تضحك:والله مطرشق خش ارقد حتى نحن مانبو منك شيئ
سراج خش الداره القديمة وتمدد علي سريره رن كم مرة علي فيصل لقاه مقفل ودزله رساله(بعد توعى تعالي في الفيلا نطلعو انهيجو لنا فترة ماطلعنا) وحط فونه عالكوميدينو ورقد
""
الساعة 4 وصلت رانيا للفيلا واستقبلتها سندس وعمتها وخشن خرفن مع رانيا اشوي وبعدها عمتها مشت للفيلا ودزتلها وحدة مالخدامات اللي عندها عشان اتقوم بالضيافة الصحبات سندس وكانت موتية نوعين موالح دزتهن الها مع الخدامة
رانيا:عمتك عسل اتهبل
سندس:مش غير اتهبل وحق الله اتعامل فيا زي بنتها بزبط تخيلي هي وعمي ايهزبو في سراج عشاني كأني انا بنتهم مش هو وهو قريب ايموت مالتفرقة
رانيا تضحك:عطك الخير كلا انتو عايشين مع بعضكم زي القطوس والفار
سندس:مانحكيلك بكل
رانيا:هيا فرجيني علي حوشك
سندس:هي وقعدت اتفرج فيها في الحوش لين وصلن الاخر حاجة الجنان طلعنله وقعدن ايتفرجن علي انواع الورد اللي فيه
مع رنت رويدة علي سندس طلعت من جنب رانيا من غير مااتقوللها من واستقبلت رويدة وجابتها للجنان
سندس:رنوشة بحتي من وراك
رانيا بفرحة:دودي وحظنن بعضهن وقعدن يبكن وطولن وهنا حاظنات بعضهن وبعدها بعدتهن سندس من بعضهن
رويدة:نجك ليا يادوسة احلى مفاجئة درتيها لنا
رانيا;والله كنت انقول في عقلي ياريت دودي معانا لكن الكلبة اللي جنبك ماقالتليش بتجي
سندس:كلبة ياحيوانة هذا جزاتي دايرتلكن جو ودايرتلكن مفاجئة
رانيا:ياستي معليش انتي عارفة اسلوبي بعد نقعد فرحانة
رويدة تضحك:لنقنه عارفينك
سندس:اسلوب بيئة ياريتني مافرحتها
رانيا:بيئة قالتلها المؤدبة ولا بعد اجوزتي تأدبتي
رويدة:هذي مستحيل اتأدب انفكر في سراج شن دايرة فيه مسكين
رانيا تضحك:لا انتي المسكينة حتى هو شر منها امبهدلها هو الوحيد اللي عرف ايقدها
رويدة: شن فيه احكنلي
سندس:توا انجيبو نسكافيه ونحكو براحتنا تبن تشربن هنا ولا جوا
رانيا:خلينا هنا جو سمح
سندس:خلاص انشوف الخدامه كان جهزاته انجيبه وانجي
رويدة:خوذينا معاك انشوفو حوشك
رانيا:انتي شوفيه انا توا غير شفته انا خلوني مع الورد السمح هذا
سندس:تعالي خلي هالمطرشقة بروحها وخشت هي وريدة ورانيا قعدت اتفرج عالورد اللي في الجنان
""
فيصل وعى وفتح فونه ولقى الرسالة من سراج غسل وجه ولبس ادبشه وطلع من حوشهم وجا للفيلا قعد ايرن عليه سراج ماايردش طبعا ماكانش عنده علم ان راقد في فيلتهم يحسابه في حوشه نزل مالسيارة وجا شور جنان سراج عساس بيدق عليه
""
رانيا في الجنان واتفرج عالورد واتشم فيه
فيصل:خير
رانيا لفت:خيرات
فيصل بصدمة:رانيا شن اخبارك
رانيا:الحمدلله شن اخبارك انت
فيصل:وينك ليا فترة انرن عليك مقفل
رانيا:صايرة معايا قصة وسكرت رقمي بكل
فيصل:كيف صار ان شاءلله خير
رانيا:لا انشاءلله خير المهم انابنخش خير ماايشوفنا حد مع بعضنا
فيصل:باهي ولازم اتكلميني اطمنيني عليك
رانيا:ان شاءلله
فيصل:قولي السندس فيه حد برا يبي سراج
رانيا:باهي
خشت رانيا السندس وقالتلها ان فيه واحد فجعها وقال يبي سراج وسندس طلعتله وقالتله ان قاعد في الفيلا
#يتبع
قولكن رانيا وفيصل كيف عرفو بعضهم وشكلها علاقة قوية اللي ارقامهم عند بعضهم رغم ان اللاقائات اللي بينهم كانن معدودة وولا مرة حكو فيها مع بعضهم 😕
سندس بدت تعجب بسراج حتى هي 😍بس سراج شكله مش ناوي ايبطل اللي ايدير فيه برغم اعجابة بسندس بس قولكن من يكتشف اعجاب لاخر قبل وهل سراج حيتغير ولا لا 😮
أما معاذ تأثره بكلام أسيل واضح وبان من كلامه مع رويدة هل ياترى رويدة حتمشيها له واتسامحة ولا فكرة ان خطبها عشان ينسى لينا حتبعدها منه وتنجح اسيل في فراقهم💔
طبعا انا اكثر حاجة مفرحتني في حلقة اليوم ان واخيرا الصحبات ردن اجمعن زي قبل ومتشوقه الباقي جمعتهن وهدرزتهن 😍
طبعا كل اللي حكيناه حنعرفوه في الحلقة الجاية 😊
أسفة لو فيه لخبطة في الأسماء وأكيد رأيكم ايهمني😉
گـتـابـتـي Koka Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
