#مـنـحـرف_وأحـبـبـتـه
الـحـلـقـة (22)
گـتـابـتـي #Koka_Saleh
""""""""""""""""""""""""""""""""""""
صباح ثاني يوم وكان يوم جمعة وعطلة عند سندس ناضت بدري وصلت الصبح وفطرت كالعادة بروحها وبعدها برمت عالحوش ولماته وخشت تلبس عشان بتمشي للفيلا واتغدى مع عمها وعمتها لبست(بلوزة طويلة بيضة وجينز ازرق وكاويش ابيض ووشاح ليكرا كحلي) وجت بتطلع سمعت صوت جاي من دار سراج وعرفاته يحكي بالفون جاها فضول تعرف مع من يحكي ومن اللي وعاه قربت مالباب وقعدت تصنت
سراج:يعني هو موافق وماتكلمش
سراج:والعيل موافق
سراج:يعني ماخافش وقنعته بالموضوع وانها حاجة ساهلة مش واعرة
سراج:تمااام بكل خلاص لازم انجي توا عشان يعرفني وانتعرف عليه عشان بكرا لما ناخذه ماايخفش مني
سراج:لالا لازم انجي انا بنكون معاه بكرا اصلا العيل بيحق حاجات ماعمرش حقهن بس المهم وري باته الفلوس عشان ماايقولش نكذبو عليه
سراج:سلام توا يادوبك نلبس عشان انلحق انجيك هالمرة متلهف عالموضوع اكثر من كل مرة
سراج:لالا المرة هذي تفرق والطغل صغير
سندس كانت مصبية عند الباب ومصدومة مالكلام
سندس:اكثر واحد حقير في الدنيا معقولة للدرجة هذي معش ايخاف من ربه بنات وقال يجرن في دمي شن ذنب العيال الصغار انا لازم انخش وانهزبة وانوقفه عند حده وجت بتفتح الباب واتخش بس في لحظة وقفت وقعدت اتفكر
سندس:لو واجهته حينكر ويطلع من الموضوع بكل برود بس انا لازم نكبسه بالجرم المشهود وانفضح بيه قدام باته وامه وانبين حقيقته امس عشان قعدت عند صاحبتي اشوية دارني مش محترمة توا حنعرفو من اللي مش محترم ياسراج الكلب وخشت الدارها ورنت علي عمو عدنان
عدنان:صباح الخير
سندس:صباح النور عمو عدنان شن اخبارك
عدنان:منيح بنتي شو اخبارك انتي
سندس:الحمدلله عمو نبي منك خدمة
عدنان:ان شاءلله خير عمو شو هي الخدمة اللي مخليتك داقتيلي مالصبح ويوم الجمعة كمان شكله شغلة مهمة
سندس:مهمة بكل
عدنان:وشو هي
سندس:نبيك اتشيلني المكان
عدنان:ووين هيدا المكان
سندس:مازال مش عارفة عشان نحن بلحقو واحد وانشوفوه وين ماشي
عدنان:اي فهمت يعني مهمة بوليسية
سندس:بزبط
عدنان:تامري امر بنتي ايمتى مابدك بيجيكي
سندس:توا وبسرعة ودرس بعيد مالفيلا مانبيش حد ايشوفك
عدنان:مسافة الطريق بكون عندك وماتعتلي هم ماراح خلي حدى يشتلئ عليي
سندس:تمام عمو سلام وسكرت
وقعدت في دارها تستنى في طلعة سراج مالدار
سراج دوش وغير ادبشه ولبس(جينز ازرق وعليه تيشرت سحابي هادي وعليه كاويش ابيض)وبخ عطر وطلع مالدار سندس كانت اتراقب فيه من ورا باب دارها وشافاته لما طلع ونزل تحت نزلت تتسحب وراه بالشوية وهو خش للمطبخ شرب قهوة عالسريع وطلع وطلعت سندس وراه بس من دون مايفطنلها ركب سراج في سيارته وطلع وهي طلعت السيارة عمو عدنان لقاته مدرسها بعيد اشوية مالفيلا ركبت معاه وقالتله يلحق سيارة سراج وفعلا عمو عدنان الحقه من دون سراج مايفطنله ومشى سراج طريق طويلة وخش المنطقة غريبة الحواشين فيها متبهدلات وباين الفقر علي أهل المنطقة سندس في السيارة تحرق في اعصابها واتهزب علي سراج وعمو عدنان ماكان فاهم شيئ وسندس ماحبتش تحكي لين تمسكه مسك اليد
سندس:عمو انا نبيك تشهد معايا عاللي بنشوفوه
عدنان:حاظر بشهد بس يابنتي قوليلي شو عم بيصير
سندس:اشوية وتفهم كل حاجة وكلكم تعرفو حقيقة سراج ال وسكتت
خش سراج الشارع غريب حواشين فيه اللي مافيهنش صقف وفيه اللي ساس فيه طايح وعويلة صغار قدام الحواشين دبشهم امبين فقرهم ودرس سراج علي حوش كان افقر حوش ممكن حد ايشوفه كان جاي وسط مكب كناسة(حشاكم)حتى باب برا ماكان فيه حوش كان حالته يرثى لها خش سراج للحوش وسندس نزلت هي وعمو عدنا وصبو قدام الباب وتسمع في سراج يحكي
سراج:وينه خليني انشوفه وانطمنه انها مش واعرة
بات الطفل:من امس فهمته بس هو خايف بكل
سراج:عليش بيخاف ان شاءلله كل شيئ حيمشي تمام
بات الطفل:ان شاءلله لكن بالنسبة للفلوس
سراج:مااتشيلش همهن وكون هاني ومطمن من ناحيتهن وانا جيت اليوم عشان انطمنك وانطمنه هو بس وينه بنشوفه قبل مع جيت الوليد وكان عمره قريب 5سنوات وكاين يبكي سندس كانت اتشوف بالسرقة مالباب بس لما شافت الوليد وهو يبكي معش تحملت
سندس خشت عليه هي وعمو عدنان
سندس بعصبية:انت انسان حقير وتافه واستغلالي معقوله تستغل في الناس وفي فقرهم وتاخد في عيال صغار عشان نزواتك القذرة انت مستحيل اتكون انسان
سراج بعصبية:انتي شن جابك هنا
سندس:جيت بنكشفك علي حقيقتك معقولة ادير هكي في اطفال
بات الطفل:يااختي انتي من وشنو الكلام اللي تحكي فيه
سندس بعصبية:انت عندك وجه اتكلم وانت اتبيع في ولدك
سراج بصوت عالي:سكري فمك واطلعي قدامي انتي مش فاهمة شي
سندس:لا انا فهمت وفهمت كل حاجة خلاص بنت علي حقيقتك وحنطلعها الهم كلهم
بات الطفل:الباين فيه سوء تفاهم يااختي
سندس:اي سوء تفاهم كل شيئ واضح حظرتك اتبيع في ولدك للكائن اللي قدامك
بات الطفل:اي بيع تحكي عليه انا ولدي عنده سرطان في الدم والاخ سراج بيخخشه مستشفى خاص وايديرله عملية علي حسابه
سندس بصدمة:شنو
بات الطفل:اللي سمعتيه يااختي انا ظروفي تعبانه ومش قادر انديرله العملية المطلوبة عشان مكلفة واجد والاخ سراج ربي ايجازيه خير تكلف بالعملية كلها
سندس مصدومة ومبلمة عيونها
مع خشت الراجل اللي كلمه سراج وناض عشانه واسمه صلاح
صلاح:معليش تاخرت في الوصله ها طمني اتفقتو عشان الدكتور اتفقت معاه ان بكرا العملية واليوم لازم ان يدخل للمستشفى
سراج كان معصب:اها اتفقنا وتوا بنروح
صلاح:والطفل الثاني اللي بنمشوله حتى هو حالته تاعبه
سراج:خليها في العشية توا عندي موضوع اهم
صلاح:تمام
سندس طلعت بسرعة وعمو عدنان طلع وراها
سراج سلم علي بات الطفل;انا توا بنمشي والعشية حيجيك صلاح وياخذه للمستشفى وحاجزين معاه حتى مكان مرافق لو انت او امه حابين اتكونو معاه وبالنسبة للفلوس خلاص مدفوعات وان شاءلله في موعد العملية حنجيكم
بات الطفل:مشكور خيي في ميزان حسناتك
سراج:ان شاءلله وسامحني علي سوء الغهم اللي صار
بات الطفل:حصل خير
سراج طلع ولقى سندس راكبة مع عمو عدنا وبتطلع جاها وكان معصب بكل وفتح عليها الباب
سراج بعصبية:انزلي
سندس كانت محروجة:بنروح وتوا انتفاهمو في الحوش سراج:قتلك انزلي وكرها من يدها ونزلها وركبها في السيارة وخبط الباب بالقوة وركب وطلع بسرعة سندس كانت ساكته ومنحرجة ماللي صار ومش عارفة شن تحكي وسراج طول الطريق وهو ايدخن وماحكش ولا كلمة وكان ايسوق بسرعه غريبة ووصلو للحوش ونزلو واول ماخشو سندسقربت من سراج
سندس:اسفة عاللي صار والله كنت فاهمة غلط
سراج بعصبية:انتي حرجتيني قدام الناس انتي كنتي تسمعي في كلامك
سندس:مش عارفة كيف فهمت هكي والله اسفة بجد
سراج بعصبية:بعد شنو اتأسفي وبعدين كيف عقلك المريض هذا ايجيبلك فكرة زي هذي
سندس:والله لما سمعتك تحكي بالفون كلامك كان مافيش قصة عملية كان كله ايدل علي هكي
سراج بعصبية:انتي شن تحسابيني صح انا منحل وصح صايع بس مش للدرجة هذي انكون حقير انا نشرب نسهر مع بنات بس انا انسان ومستحيل اندير هكي او نسمح الحد ايدير حاجة زي هذي انتي كيف فكرتي فيا هكي كيف للدرجة هذي حقير في نظرك
سندس:اسفة أسفة والله مش عارفة كيف فكرت هكي
سراج:بعد شنو اسفك بعد حرجتيني قدامهم كيف بنحط وجي في وجه الراجل بعد كلامك المريض هذا
سندس:قتلك اسفة ماكنتش فاهمة اصلا فكرة انك انت اتساعد الناس عمرها ماخطرت عليا
سراج بعصبية:ليش مش انسان يعني ايكون في علمك الشي هذا ليا قريب سنتين اندير فيه بعد انتبهت النسبة سرطان الاطفال اللي زادت وان في ناس مش قادرة حتى انها تشري جرعات الكيماوي ومش قادرة ادير عمليات الاطفالهم قررت انساعدهم وقدرت انساعد عيلات واجد واندير العيالهم عمليات علي احسابي واللي كانو مش محتاجيين العمليات كنت نشريلهم في جرعات الكيماوي والموضوع هذا مش عالم بيه حد الا انا وصلاح اللي شفتيه مبدري هذا رئيس جمعية خيرية وهو اللي ايجيبلي في العيلات المحتاجة
سندس:عمري ماتوقعت يطلع منك هذا كله
سراج:عشان مش حابة اتشوفي الا اللي راسمتيه عليا في خيالك المريض
سندس:خلاص عاد قتلك ماكانش قصدي انا فهمت غلط وتأسفتلك
سراج:ولا تقصدي ماايهمنيش وبجديات انا تعبت منك ومن السانك وعنادك وقلة ادبك وعدم احترامك ليا عشان هكي انا معش بنكمل معاك
سندس:شن قصدك
سراج:يعني الغي الاتفاق لاني بصدق مش حنقدر انتحملك سنة مازال ماكملنا شهرين وشوفي كيف مشاكلنا كل يوم وانا تقيدت حريتي وانا مش متعود علي هكي عشان هكي يابنت الناس اليوم بنروح مانبيش انشوفك هنا عدي الهلك وقولي الباتك ماتفاهمتيش معايا وتبي تطلقي ولما اتجي منك باتي حيوافق عليها عشان لما انا نحكي مش حيقتنع
سندس:يعني هذا رايك
سراج:هذا الراي الصح
سندس:زي مااتحب اول مااتروح مش حتلقاني هنا ومرة ثانية اسفة عاللي صار ورقت الدارها وسراج طلع مالحوش
سندس خشت للدار وقمعزت عالسرير وهي اتفكر في كلام سراج واتفكر في اللي داراته له كانت عارفة روحها غلطانة وان من حقه سراج يزعل بس مش الدرجة ان ايقوللها يطلقو بس الطلاق ماكانش شاغل بالها بقد ماكان شاغل بالها سراج واللي ايدير فيه ومساعدته للناس لأول مرة اتحس ان راجل لاول مرة اتحس ان انسان عمرها ماتوقعت ان سراج المستهتر يطلع منه هذا كله حست ان سراج كبر في عينها باللي قاعد ايدير فيه واكتشفت الجانب الحلو في سراج اللي ماحد مكتشفه
"
عند هل رويدة روح باتها مالمستشفى لان ارتفع عنده الضغط والدكتور قال لازم ايروح ايتريح واول ماخش جاته رويدة وامها يجرن
ام رويدة تبكي:شن صار في عصام طمني عليه
بات رويدة وكان تاعب بكل:مازال في غيبوبة
رويدة:والدكتور ماقالش امتى يوعى منها
بات رويدة:لا قال ادعوله بس لان حالته خطيرة والضربة في القلب
ام رويدة تبكي:ياناري ياوليدي ورؤوف شن صار فيه ليش اتوافق علي حبسته اولدك هكي حيضيع
بات رويدة:رؤوف اعترف وكان لازم تاخذه الشرطة عشان كان ماخذتش وعصام ناض حيحسابنا لان مش معدلين عليه وحيزيد يكره خوه اخرى
ام رويدة تبكي واتخبط علي وجها:حي عليا يعني هكي عيالي الاثنين ضاعو مني كله منك يارانيا عنك لاقيتها
رويدة بعصبية:شن دخلها رانيا كله من ولدك عصام الاناني وحنين الحقيرة عصام بأنانيته ضيع روحه وضيع رؤوف معاه
ام رويدة:لا هي السبب اعيالي تقاتلو عشانها عشان هما الاثنين حبوها
رويدة:قلتيها بروحك هما حبوها هي شن ذنبها
أم رويدة بعصبية:بطلي دفاع عليها والبنت هذي معش نبيها اتخش الحوشي بكل ولا عاد نبي حد فيكم يعرفها ساد اللي جانا من وراها
رويدة بعصبية وتبكي:هذي صاحبتي وماحد يمنعني منها واتجيني ونمشيلها غصبن عنكم كلكم وخشت الدارها
ام رويدة بعصبية:غير احلمي كان عاد خليتك تعرفيها مايبقى اسمي عالية
""
الساعة 2 الظهر سندس في دارها واتلم في دبشها
عفاف رنت علي سندس وسراج واجد تبيهم ايجو ايتغدو امعاهم بس ماكانوش ايردو جت الحوشهم لقت الباب مفتوح خشت ورقت فوق ودقت عالدار
سندس:من
عفاف:انا عفاف
سندس فتحت الباب:خير اعميمة خشي
عفاف:معليش عاد علي جيتي لعند هنا غير من بدري انرن عليكم نبيكم اتغدو معانا مااتردوش انشغلت وجيت هنا والقيت الباب مفتوح ومافيش حد انفجعت عليكم
سندس:عادي اعميمة بس والله مافطنتش الفوني في الشنطة والشنطة لوطة قاعدة
عفاف فطنت للشناطي:كيف انتو مسافرين ولا شنو
سندس:لالا مش مسافرين لا شيئ
عفاف:امالا شن قصة الشناطي هذينا
سندس:هذا ادبشي بنمشي الحوش هلي
عفاف انفجعت:عليش بتمشي كنك شن صاير
سندس:مش صاير شيئ بس انا وسراج ماقدرنش انتفاهمو مع بعضنا وقررنا ننفصلو
عفاف بصدمة:شنو معقولة هكي انتو مازلتو عرسان والمشاكل في بداية الحياة الزوجية لازم منهن بس مش معناها الواحد دغري ايفكر في الانفصال
سندس:هذا قرار سراج وفي نفس الوقت انا مقتنعة بقراره عشان هو القرار الصح
عفاف قمعزت ومسكت سندس من يدها وقمعزتها
عفاف:تعرفي ياسندوسة سراج عمره في حياته ماخذا قرار صح الا قرار الزواج منك حتى وهو داره بدون قناعة بس موافقته كانت قرار صح وبعدها قراره انكم اتكملو مع بعضكم وانتو فيه مشاكل بينكم وقعدتو اتمثلو قدامنا انكم حابين بعضكم ومتريحين
سندس بصدمة:انتي شن اتقولي اعميمة
عفاف:انا ام ياسندس وعارفة وحافظة ولدي كويس وتمثيلكم مامشش عليا وبذات اني شفت اللي درتوه في القاعة بس تعرفي ليش درت روحي مصدكتكم
سندس:ليش
عفاف:انا كنت مقررة بعد اتروحو من تركيا انصارحكم اني عارفة انكم اتمثلو بس اللي وقفني اللمعة اللي في عيون سراج أول مرة انشوفها ولمعة العيون معناها ان الشخص فرحان باللي معاه
سندس:اي لمعة مازال مافهمت عليك
عفاف:العيون عندهن لغة يحكن بيها واللغة هذي صعبة مش اي واحد يفهمها مايفهمهش الا اللي ايحبك وانا قريت عيون سراج لاني انحبه ممكن انتي مش مركزة علي سراج بس انا فاطنتله وشفت نظرته لكي بعد تقعدي تحكي ونظرته لكي وهو يحكي معاك ونظرته بعد اتصبي من جنبه وشفت حبه في ان اينرفزك شفت كيف واخذ راحته وهو يحكي قدامك وكأنك شخص يعرفه من سنين هذا ابدا مش طبع سراج وهذا دليل علي حاجة وحدة مانقدرش انقول حبك بس ممكن معجب بيك والاعجاب هو اول طريق للحب تعرفي حاجة سراج عمره في حياته ماحب ولا مقتنع بيه بس انا حاسه ان دخولك الحياته بيغير فكرته هذي كلها وممكن اتغيريه هو بروحه
سندس:مستحيل سراج ايتغير ومستحيل يطلع معجب بيا انا وهو نكرهو بعضنا للموت وقعدتنا مع بعضنا كل واحد المصلحته مش اكثر وبعدين انا وهو مختلفين علي بعضنا اختلاف كبير هذا عليش مهما صار مانقدروش انكلمو مع بعضنا
عفاف:بالعكس الاختلاف اللي بينكن هو اللي حيقربكم وهو اللي خيغير سراج صدقيني سراج بحاجة وحدة زيك زي طبعك واخلاقك عشان ايتغير سراج محتاج المساعدتك انا متاكدة ان هو خاطرة ايتغير بس مش عارف كيف انتي الوحيدة اللي تقدري اتساعديه واتوريه الطريق الصح
سندس:كيف ايتغير وسراج حاب الطريق اللي ماشي فيها
عفاف:سراج مش حابها سراج انفرضت عليه وتعود عليها وصعب ان الواحد ايسيب حاجة كبر وتعود عليها انا حاولت معاه واجد بس ماقدرتش بس انتي تقدري انا متأكدة
سندس:انا يااعميمة ديما انحب مساعدة الناس اللي بحاجتي بس سراج مش بحاجتي سراج هكي متريح وقالها ليا كم مرة انا بجد خاطري انساعده بس هو مايبيش
عفاف:عمرك ماتاخذي بكلام سراج لان غروره وكبريائه يمنعه ان يطلب مساعدة من حد حتى وهو واثق ان يقدر ايساعده بس هو اكثر شخص بحاجتك
سندس:باهي كيف نقدر انساعده
عفاف:اول شيئ لازم انتي تقتنعي بيه وماتقدريش تقتنعي بيه الا لما تكتشفي الجانب الكويس في سراج تعرفي سراج فيه حاجات واجد كويسة بس هو ماايحبش ايبينهن سراج فيه حنية الدنيا كلها وفيه طيبة ماعندش حد بس هو ماايحبش ايبينهن عشان يعتبر فيهن ضعف سراج فيه طبع ان مستحيل ايبرر الشخص اي حاجة مهما كان الشخص هذا شايفه اهم حاجة عنده هو كيف شايف روحه بس لما في يوم ايدير حاجة وايبررلك اعرفي انك مهمة عنده
سندس سكتت وقعدت اتفكر كيف سراج قبل اشوي كان ايبررلها وكيف فعلا لمسة حنيته في كم موقف وكيف لمسة خوفه عليها امس
سندس:باهي انا كيف نقدر انساعده وهو طلب ان لما ايروح مايلقنيش في الحوش
عفاف:اول حاجة المشكلة اللي درتوها واللي عليها خذيتو القرار هذا بصدق من كان غلطان فيها
سندس طبست راسها:انا كنت غلطانة وتأسفت منه بس هو ماقبلش الأسف
عفاف:معناها ماتمشيش ولو احساسي صح لما ايجي ويلقاك حيفرح وحيحترمك اكثر انك زعلتيه وقعدتي عشان اتراضيه
سندس:وافرضي مافرحش ودارلي قصة وتعاركنا من جديد
عفاف:هذك الساعة تقعدي درتي بأصلك ودرتي اللي عليك وهو اللي خاسر
سندس:باهي شن اندير توا
عفاف:ردي ادبشك في مكانه وتعالي انتغدو مع بعضنا وهو متاكدة دبينه طلع زاعل حيطول ماايروح وفي الليل انخلي باته ايكلمه ايتعشى معانا واصلا محمد يبيه في موضوع مهم وهو حيجي وانتي استغلي الفرصة وصالحيه
سندس:تعرفي اعميمة انا عمري مادرت الشخص هكي بس عشانك وعشان حا ان سراج ايتغير حنديرها
عفاف ابتسمت:ربي ايخليك ليا وانحقك انتي وسراج اتحبو بعضكم بجنون
سندس ضحكت:لا هذي مستحيلة عمر القطوس والفار ماحبو بعضهم
عفاف:ولا عمرهم استغنو علي بعضهم انتو زيهم
(سندس وافقت لانها كانت حابة بكل فكرة ان سراج ايتغير علي ايديها ولان فعلا حابه اتساعده)
سندس صبت:خلاص انلم الدبش بسرعة عشان جيعانة بكل
عفاف صبت:وانا حنساعدك وبدن ايلمن وكملن ومشن للفيلا وتغدو مع بعضهم وبعدها قعدت اتخرف هي
وعمها وعمتها في الجنان برا
""
الساعة 7المغرب رويدة مقمعزة في الصالة مع بنات عمها وعماتها مع رنت فونها ولما شافت لقاته رقم رنا اخت رانيا ورويدة ردت
رويدة:خيرات رنوشة شن اخبارك اليوم
رانيا:تمام اكويسة طمنيني شن اخبار عصام
رويدة:والله مازال في غيبوبة وماحد عارف امتى يوعى
وحدة من بنات عم رويدة اللي كانن جنبها لما سمعت رويدة تحكي مع رانيا جت قالتها الامها لانهم كلهم عرفو القصة وعرفو اللي صار وام رويدة نبهتهن لو سمعن رويدة تحكي مع رانيا ايجن ايقوللها واول ماقالتلها جتها تجري
رويدة:ان شاءلله رنوشة انتي ادعيله بس
ام رويدة:انا شن قتلك عالبنت هذي مش قتلك فيكيني من سريبها ساد كل حاجة جتنا من وراها
رويدة:رنوشة سكري اشوية انشوف شن صاير وانرن عليك وسكرت عشان ماتبيش اتحسس رانيا بشي
رويدة بعصبية:انتي ليش حكيتي هكي افرضي سمعاتك
ام رويدة:وانا نبيها تسمعني البنت هذي معش نبيك تختلطي بيها ولا اتكلميها خلاص لازم تقطعي علاقتك بيها نهائي عشان خوتك ينسوها لان انتي اللي جبتيها لنا هنا
رويدة:قلتلكم الف مرة رانيا صاحبتي ومستحيل انتخلى علي صحبتنا عشانكم ورانيا مادارت شيئ ذنبها الوحيد انها حبت رؤوف ورؤوف عنده اخ اناني زي عصام
ام رويدة:افهمي خوتك تقاتلو عشانها لو قعدت اتجي وبينا وبينها علاقة الله واعلم شن حيصير اخرى البنت هذي حتحرم عالاثنين عشان خلاص معش ينفع اتكون الحد فيهم واللاخر يبيها والحل الوحيد عشان تطلع من حياتنا وحياة خوتك هو انك انتي تقطعي علاقتك بيها
عمت رويدة:كلام امك صح البنت هذي جابت المشاكل بين الخوت ولو قعدت علاقتك مستمرة بيها الله واعلم شن بيصير اخرى
رويدة بعصبية:مستحيل مستحيل هذي اختي مانقدرش ننهي علاقتي بيها حتى لو متت موت وخشت الدارها
ام رويدة:شفتيها مسكرة راسها انها ماتقطعش علاقتها بيها والبنت هذي معش ينفع تقعد صاحبتها عشان خوتها الاثنين ايحبوها عارفة شن معنى خوت ايحبو نفس البنت هذا شيئ حرام حرام وقعدت تبكي
عمة رويدة:مافيش الا حل واحد تمشي للبنت بروحها وتحكيلها وتحكي الهلها واتقوليلها اتبعد عليك وعلي عيالك
ام رويدة تبكي:قولك هكي
عمة رويدة:هذا الحل الوحيد رويدة مسكرة راسها بكل لكن لما تحكي للبنت بروحها حتبعد عليها وحتقاطعها وحتى لو هي رفضت زي رويدة هلها يجبروها وانتو هنا اجبرو رويدة
ام رويدة سكتت وقعدت اتفكر
""
الساعة 8 م بات سراج رن عليه وقاله يبيه في موضوع ضروري ولازم ايتعشى معاهم وسراج روح عشان باته واول ماخش الفيلا لقى سندس مقمعزة وغمتله اول ماشافها وجاها وهي مقمعزة
سراج بعصبية:مش انا قتلك مانبيش انشوفك ليش مامشيتي الهلك
سندس:مانبيش نمشي عشان مش بجوك نحن بينا اتفاق ولازم يكمل
سراج:وانا مانبيش يكمل مش قادر انتحمل وجودك معايا
سندس شافتله:عشان بديت تعجب فيا صح
سراج ضحك:انا نعجب بيك انتي شكلك تحلمي
سندس:لو صح مش معجب بيا خلينا انكملو الاتفاق
سراج:اها وليش ماانتي اتكوني حبيتيني ومعش تقدري اتعيشي بلايا هذا ليش ماتبيش تمشي
سندس ضحكت:انت عارف كيف نكرهك واني مستحيل انحبك بس اللي اليوم صار مأنبلي ضميري ولاني انا الغلطانة مانبيش نمشي وبنتأسفلك مرة اخرى وياريت تقبل اسفي لان بجد اللي درته شيئ عظيم
سراج:مانبيش رايك فاللي اندير فيه اهم شيئ انا مقتنع فيه وعاجبني
سندس:يعني مش متقبل اسفي
سراج بعصبية وصوت عالي:تحرجيني قدام الناس وتبيني نقبل اسفك علي اي اساس مع جيت امه
عفاف:بسم الله كنه صوتكم طالع
سراج شاف السندس زين وبخبث;عارفة كنتك قاعدة اتقولي بنروح مانبيش انتعشى عندهم وانا انهزب فيها عشان تقعد
سندس بصدمة:انا قلت هكي
سراج:واتقولي امك هرجتها واجدة ودوتها واجدة وصدعت راسي وانا ماتحملتش الكلام عليك
عفاف:عادي هي حرة في رايها
سندس:اعميمة والله يكذب والله ماقلته الكلام اللي قاله
سراج:فيه وحدة محترمة اتقول علي راجلها يكذب
سندس بتهزبه عفاف بحتت فيها وسندس سكتت
سندس:ماشي ياسراج انتواجهو بعدين وعدت وسيباته
بعد اشوي العشاء وتى وقمعزو ايتعشو مع بعضهم وبعد العشاء قمعزو في الجنان وقعدو ايخرفو
سراج:ها ياباتي شنو الموضوع الضروري اللي تبيني فيه
محمد:بنحكيلك عالشغل
سراج:اي شغل
محمد:شغلك في الشركة ولا انسيت
سراج فهمه يحكي عالاتفاق:ماانسيتش بس انا مازال عريس
محمد:توا قريب شهر ونص لكي متجوز خلاص خذيت فترتك وبزيادة وتريحت واجد توا وقت الشغل
سراج:بس ياباتي
محمد:مافيش بس نحن حكينا من قبل في الموضوع هذا واتفقنا ولا بترد في كلامك ونلغو الموضوع
سراج:لا مارديتش في شيئ
محمد:خلاص معناها من بكرا بتبدى معايا في الشركة
سراج بقلة حيلة:باهي
محمد:يبقى فكني مالسهور برا عشان تقعد ترقد بدري وتوعى بدري
سراج:لا ياباتي من ناحية السهور كون هاني من اول مااجوزت سيبته اسأل حتى سندس وغمزلها
محمد:صح ياسندس معش طلع سهر مع اصحابه
سندس جت بترد بلا بس اذكرت كذبته عليها قدام عمتها وحبت اتردها له
سندس:بصدق ياعمو له يومين يطلع ما11ماايروحش الا في الصبح
سراج فنص عيونه:بلاش كذب
سندس ببراءة:والله مانكذب ياعمو وحتى اني انخاف في الليل بروحي
محمد بعصبية:البنت ماعندهش عليش تكذب عليك تقدر اتقولي مع من كنت تسهر
سراج:نسهر انا وفيصل وشابين اخرى نلعبو في كارطة وياخذ فينا الوقت وزي ماقالت يومين بس
محمد:متأكد انت وشباب وتلعبو في كارطة
سراج:اسأل فيصل لو مش مصدقني
محمد:مش سائل حد ومن يوم وغادي معش فيه سهور لا مع شباب لا شيئ وانا حنركز عليك وعندي عليك كبسات في الحوش لو مانلقاك ياسراج حيكونلي معاك تصرف اخرى وحنتفق مع الامن لما ايشوفوك تطلع دغري ايقولولي
سراج بعصبية:ليش انا في حبس
محمد:اها حبس وانت اللي ارضيت بالحبس هذا اذكر كويس
سراج:ياريت ماارضيت وقعد مقمعز غامتله
بعد حوالي ساعة روحو الحوشهم بس سراج كان حاس سندس انتصرت عليه قدام باته وكان متضايق منها بكل وخشو للحوش وماحد حكا مع اللاخر وكل واحد خش الداره
سندس غيرت دبشها ولبست بيجامة وطلعت شيتاتها وقعدت تقرا
أما سراج دوش ولبس كت وشورت راب وقعد في داره ويبرم وكان ايفكر وكل تفكيره في سندس
سراج:امتى تطلعي من راسي حتى وانا متضايق منك انفكر فيك انا شن صايرلي بس عمري ماكنت هكي واذكر اللي دراته فيه سندس واضايق
سراج بعصبية:بس انا مش ناسيلها اللي داراته فيا الصبح واللي داراته قدام باتي وحننتقم منها وتوا وحنشوفو من حينتصر ياام السان وطلع من داره وبعد اشوي خش علي سندس وهي تقرا وجايب في يده فنجال قهوة
سراج فتح الباب:عادي انخش
سندس:ماانت خشيت وفضت
سراج ابتسم:انتي ديما هكي كل كلمة عندك الها رد واتي
سندس:اها
سراج جاها:باهي هاكي
سندس:شنو
سراج:مكرونة😒 مااتحقي فيها قهوة
سندس:مش قصدي بس من كثر الصدمة لان هذي مش من عوايدك
سراج:حسيت راسي مصدع وراشقتلي فيها نزلت درت وانا نازل سمعتك تقري قلت نحسبك معايا فيها حاجة ولو ماتبيش اسف وغلطان وحنرد بيها للمطبخ
سندس:لالا جت في وقتها حتى انا راسي مصدع وخذتها منه وبدت تشرب
سراج:شن رايك فيها عمايل ايديا وحياة عنيا 😂
سندس:لا سمحة زي ماانحبها بالزبط
سراج:صحة وطلع وسندس كملت شرب قهوتها
""
صباح ثاني يوم وتحديدا الساعة 8
سندس وعت وراسها مصدع وجت بتحرك وفتحت عيونها وانصدمت لما لقت روحها في حظن سراج قمعزت وهي مفجوعة بحتت في روحها ولقت روحها بالملابس اللي تحت بس بحتت في سراج كان متغطي بس من فوق ماعليه شيئ
سندس بعصبية وصوت عاااالي:سرااااااج 😡
#يتبع
قولكن سراج شن دار زعمه هذا انتقامه اللي انتقمه منها وزعما شن رد سندس بعد تعرف اللي صار فيها وبذات ان كان مش برضاها ولا كان غصبن عنها لان الباين ماكانت حاسة بشيئ 😳
باهي قولكن شن حيصير مع رانيا هل ام رويدة حتمشيلها وتحكيلها باهي شن حيكون رد رانيا باللي حتسمعه وهل حتوافق تقطع علاقتها بصاحبة عمرها ولا حترفض زي رويدة وشن موقف سندس مااللي صار هذا كله وهل حدير الصحباتها حل زي كل مرة💔
أما عصام وروؤف مش معروف شن بيصير معاهم لان مصيرهم مازال مجهول وربكم يستر فاللي جاي😔
كله حنعرفوه في الحلقة الجاية 😊
نزلت الحلقة زي ماوعدتكن صح تأخرت بيها لكن المهم نزلتها 😘
أسفة عالتأخير وأسفة لو فيه لخبطة في الأسماء وأكيد رأيكم ايهمني 😉
گـتـابـتـي Koka Saleh
أنت تقرأ
منحرف واحببته
Romanceكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
