#مـنـحـرف_وأحـبـبـتـه
الـحـلـقـة (12)
گـتـابـتـي #Koka_Saleh
""""""""""""""""""""""""""""""""""""
وبعدها وتن الفطور وفطرو كلهم مع بعضهم وخرفو وبعد الفطور هل سراج روحو وقعدن معاها صاحباتها وهلهن
""
كمل اليوم عادي من دون احداث تذكر وفي الليل روحن صحبات سندس وهلهن وكل حد الحوشه واتفقن طبعا ان بكرا يمشن للجامعة لان الهن ثلاث ايام زيهن زي سندس مامشنش للجامعة
""
في الليل عند هل سراج وتحديدا الساعة 12 طبعا هو طالع يسهر وباته وامه خشو بيرقدو طلعت عفاف مالحمام لابسة بيجامة نوم ولافة شعرها فوق وخشت السريرها
عفاف:احميدة الساعة كم انوعيك بكرا
محمد ماايردش
عفاف بإستغراب:محمد محمد
محمد:نعم
عفاف:مشاءلله في من سارح في هاليل
محمد تنهد;من غيره ولدك سراج
عفاف بقلة حيله:حيجيه يوم ويسقم شن بنديرو
محمد:هاليوم معش جا
عفاف:والله حتى انا خاطري انحقه متحمل مسؤولية ومتجوز وعنده عويلة كيفه كيف الناس لخرى نحن ماطلعنا مالدنيا الا بيه هو وهو معند ومسكر راسه
محمد:تعرفي باتي شن قالي اليوم
عفاف:شن قال
محمد:قالي لازم انجوزوه وحدة اتكون عكس شحصيته وحدة مش زي البنات اللي عرفهن انتي عارفة سراج كيف ايفكر وديما ايقول كلهن زي بعضهن بنجوزوه وحدة مش زي باقي البنات وحدة اتعبه ويتعب معاها
عفاف;وهذي وين بنلقوها
محمد;قاعدة باتي عاجبته سندس بنت فرج ومن اول ماحقها قالي هذي مرات سراج اللي حتعقله وبعد فكرت صح البنت عكس شخصية سراج وهذا المطلوب
عفاف بفرحة:صح كلامك وانا عاجبتني بكل ومن اول ماشفتها تمنيتها اتكون كنتي بس هو معند تخيل يرفض انت عارف مسكر علي فكرة الزواج بكل
محمد:هذي مقدور عليها حيكلمه جده اول واحد ويحكيله ولو رفض انا عندي معاه كلام اخرى
عفاف:باهي افرض هل البنت يرفضو انت عارف سراج طايش ومستهتر من بيعطي بنته الواحد هكي وبذات بنته الوحيدة
محمد:اول حاجة فرج صاحبي واجد ومش حيرفض نسبتي له وثاني حاجة بعد وقفتي معاه ونقذته مالفلس مااعتقدش حيرفض
عفاف بصدمة:قصدك انت عطيته الفلوس عشان لما تطلب بنته يعطيها لكي بدون ماايتكلم
محمد:لا والله ماصارت انا صبيت معاه لان صاحبي مش اكثر من هكي لكن انا انطمن فيك ان حيوافق
عفاف:باهي افرض هو فكر هكي ويحسابك هذا ليش عطيته الفلوس
محمد:لالا مش حيفكر هكي اصلا باتي ملمحله عالموضوع من فترة قبل القصة اللي صارت بكل
عفاف:اذا هكي تمام ربي يجعلها من نصيبه
محمد:ان شاءلله طفيلنا الضي اللي جنبك وخلينا انرقدو
عفاف طفت الضي:تصبح علي خير
محمد:وانتي بألف خير ورقدو
""
سراج وفيصل قاعدين هياجة في الشقة
سراج مهيج مع البنات ويرقص معاهن وبعدها جا قمعز جنب فيصل
فيصل:اليوم شكلك عاجبك الجو
سراج:البنات اليوم اطلع طول
فيصل بغرور:هذينا مجايبي انا
سراج بغرور:تربيتي عارفك اتهني
فيصل:عليك ثقاله حتى بنشوف روحي عليك اشوية مانقدرش لازم اتبان احسن مني
سراج يضحك;هذا الحق والحق ماينزعل منه
فيصل يضحك:وااااطي انت
سراج:طالعلك 😂
فيصل:خطرها شن اخبار صاحب باتك اللي ضيعولك نص السهرة عشانه شن صار فيه
سراج:قال باتي طلع مالمستشفى وتوا كويس وطلعت الجلطة جايته عشان فلس وعمك محمد واخذ دور الكريم وعطيه مليون جنيه عشان ايسلك ديونه
فيصل:اووف مليون مرة وحدة وعليش هذا كله باتك من امتى يعرفه لين الصحبة قعدت قوية هكي
سراج:انا حكالي القصة جدي ولنقني تعقدت لما سمعت المبلغ قالي جدي هذا صاحبه من طفولته وبعد سافر باتك انقطعن الاخبار تلاقو مرة برا وبعد روح فرج انقطعن الاخبار اخرى وباتك كان يعتبر فيه خوه وهذا عليش ماصدق لقاه اخرى قتله حتى وكان صاحبه مش الدرجة يعطيه مبلغ كبير هكي وعطاني مثال وبعدها اقتنعت
فيصل:كيف عطاك مثال
سراج:قالي تخيل فيصل ايفلس ويقعد يبي مبلغ ايسدد بيه ديونه وانت عندك المبلغ شن ادير قتله دغري نعطيه له قالي هي نفسها خلاص وبعدها سكتت
فيصل:جدك هذا اصلي يقنع الساس اتصدق حتى انا اقتنعت
سراج:بس تعرف فيه حاجة شفتها في المستشفى مازال حاير فيها
فيصل:شنو
سراج:تذكر لما شفنا ام السان في المصيف وكانو معاها راجلين كبار واحد منهن القيته في المستشفى معش عرفت شن قرابته بيهم
فيصل:الراجلين اللي كانو معاها ولا واحد فيهم كان باتها راه
سراج:عارف امك تعرفت عليهم وقالت صحبات وهلهن جايين مع بعضهم
فيصل:خلاص اكيدة هذا بات واحد من صاحبتها وصاحب باتك هذا يقربله
سراج:ممكن
فيصل:خطرها شن صار معاك فيها تلاقيت معاها زي ماقتلي يومتها
سراج:لا ماصارش منه الموعد لغاته قالت مش قادرة تطلع ومازال نحكو عالتليفون لكن مااتخفش اللي في راسي بنديره وقريب بكل اخرى
فيصل:المهم لما بدير حاجة قولي بالنص يانصي
سراج ابتسم:اكيدة يانصي(وزي مالاحظتو سراج كذب وماحكش الصدق)
""
جا صباح ثاني يوم عند سندس وعت صلت الصبح ولبست وطلعت لقت باتها وامها واعيين فطرت معاهم وهي فرحانه برجوع باتها وبعدها طلعت مع السواق عشان ايشيلها في سيارة باتها لان باتها الايام هذينا مايقدرش ايسوق ووصلت للجامعة وتلاقت مع صحباتها صبحن علي بعضهن وكل وحدة خشت المحاظرتها
""
رويدة بتخش للقاعة وجا حد وراها
معاذ:صباحو ياحلو
رويدة لفت عليه وابتسمت:صباحو فل
معاذ:اتصدقي اليوم احلى يوم من اول ماقريت
رويدة ضحكت:وعليش
معاذ:عشان اليوم اول يوم انتلاقو ونحن معترفين بحبنا الكبير اللي كان مدسوس
رويدة ابتسمت:مجنون
معاذ:انتي جننتيني
رويدة:خلاص المحاضرة بتبدى خلينا انخشو
معاذ:باهي توا انخشو بس مش قلتيلي بعد انروحو الحوشنا اتجيب هلك واهو روحتو معناها انجوكم اليوم
رويدة:لا ماايصيرش منها اليوم
معاذ عقد حواجبة;انتي كنك اتهربي مالخطبة
رويدة:والله ماانتهرب بس امس روحنا في الليل وماحكيت الماما اليوم نحكيلها وبكرا اتجو
معاذ:لالا معش فيه تأخير انا بنجيب هلي اليوم
رويدة:بس انا مازال ماحكيت الماما
معاذ:شنو بتحكي مثلا قوليلها طالب يقرا معايا وقالي بنجيب هلي اليوم وفضت
رويدة:بس يامعاذ
معاذ:مافيش بس اليوم بنجيب هلي انا راجل واتي وماناقصني شي وانا انحبك وانتي اتحبيني وانا طالب الحلال والتخريف والكلام الفاضي بدون حاجة رسمية ماانحبش لو رفضتي وتحججتي بحاجات عالفاضي نزعل منك
رويدة بقلة حيله:خلاص حنحكي الماما اليوم وانتو تعالو في العشية
معاذ ابتسم:باهي تمام واخيرا هي خلاص خشي قدامي وخشت رويدة وخش وراها معاذ وقمعزو جنب بعضهم كالعادة
""
بعد ساعتين سندس ورانيا كملن محاضرتهن طلعن ومشن للكفتيريا وبعد اشوي جتهن رويدة وقمعزت تفطر معاهن
رانيا:شن اخبار اول يوم حب معاك
رويدة:جو ايهبل بس معاذ قالي اليوم بيجيب هله ومستعجل عالخطبة
رانيا:صحة له هذا راجل وشاريك وانتي شن تبي اكثر من خطبة ياحنة
رويدة:مش هكي بس انا مازال ماحكيت الماما شن بنقوللها
رانيا:قوليلها طالب معايا قالي اليوم بنجيب هلي وخلاص
رويدة:وتخيلي اتقولي لا
رانيا:مش حتقول لا هنا صبايا بيجن تخريفة عشية وبعدها تحكي الباتك الموضوع وهو ايقرر
سندس:توا انتي عليش دايرة موضوع مش هذا اللي قبل متي عليه قاعد له كم يوم يحكيلك عالخطبة وانتي اتهربي فكينا مالقصة واحكي الامك وخليه ايجيب هله اليوم وكان خايفة من امك تو انكلمها انا ونحكيلها
رويدة:مش خايفة
سندس:امالا شنو
رويدة:خلاص توا نحكيلها اليوم بس اسمعن بتجني انتن الاثنين
سندس:عليش بنجوك
رويدة:انا ماعنديش خوات وانتن خواتي المفروض اتصبلي في يوم زي هذا انا كان ايجو ويطلبو بندوخ قدامهم
رانيا تضحك:ساد دوختك قدامه هو خلاص توا انجوك
سندس تضحك:خلاص توا انجوك ماادوخي واتفضحي بينا قدامهم
وقعدن ايخرفن وجن بيصبن ايروحن وجتهن هدى
هدى:خيرات بنات
البنات كانن مستغربات جيتها لانها الها فترة اطنش عليهن وردن عليها:اهلا
هدى;معليش سندس نبيك اشوية بروحك
كلهن استغربن وقعدن ايبحتن فيها
سندس:عادي البنات مش غريبات احكي شن فيه
هدى:انا نبيك في كلمتين بروحك لو سمحتي
سندس:خلاص بنات خليكن عند الباب اشوي وانجيكن
رانيا ورويدة:تمام بس مااطوليش وعدن
سندس قمعزت عالكرس:تفضلي هدى
هدى قمعزت:شن اخبارك سندس
سندس:الحمدلله بخير شن فيه ان شاءلله خير
هدى:اول حاجة انا بنعتذر منك علي اخر كلام صار بينا
سندس:لا عادي لا تعتذري مني لا شيء اصلا انا ماعدلتش عالموضوع انتي بس قعدتي تستكردي فيا انا والبنات
هدى:عارفة ومعليش سامحيني
سندس:عادي اعتبري ماصار شيئ
هدى:باهي طمنتيني
سندس:هذا الموضوع اللي بتحكيلي عليه
هدى:الحق مش هذا الموضوع
سندس:شنو فيه احكي
هدى:بصراحة مش عارفة كيف نبدى الموضوع صح صارت بينا مشكلة الفترة اللي فاتت بس بجد انا عارفة انك طيبة وانك اتحبي اتساعدي الناس وفي نفس الوقت عارفة ان لو حد حكالك سر مستحيل يطلع اكثر من بنت حكنلي الشي هذا وانك مساعدتيهن وماحد سمع شيئ
سندس:شن فيه هدى شغلتيني احكي
هدى:كلامك عالعلاقات وعالرجالة ديما نهزى عليه بس فعلا طلع صح ياريتني تبعت كلامك مالاول وقعدت تبكي
سندس بخوف:بطلي بكى واحكي شن صاير معاك وان شاءلله حنقدر انساعدك
هدى تبكي:من فترة تعرفت علي شاب وحبيته واجد وقعد ايقولي بندز هلي ويخطبوك ووعدني بالزواج وانا وثقت فيه وخلاص بنيت احلامي معاه وفي مرة طلب مني صور ودزيتهن له ومن بعدها قعدت ايهدد فيا بيهن وايقولي لو ماتعطيني فلوس انجي الهلك وانوريهن الهم وانا بابا واعر وخايفة واجد والمبلغ اللي طلبه معايا بس نصه وماعرفتش منين انجيب الباقي خفت نحكي الاي حد من صحباتي يشمتن فيا ويحكنها في الجامعة كلها ومافكرتش الا فيك انتي وقعدت تبكي
سندس وجعتها هدى:كم المبلغ
هدى تبكي:4الاف جنيه ووبعت ذهبي وجابلي 2000
سندس:مااتخافيش حنساعدك بس نبيك اتعلمي من خطأك وتعرفي ان الرجالة مافيهش ثقة لو تبي تجوزي ارجي ونصيبك حيجيك لعندك من دون ماادوري
هدى تبكي:معاك حق في كل كلمة حكيتيها انا غلطت ونادمة ومستحيل عاد انكرر خطئي بس المشكلة عطيني مهلة معينة وبكرا في الليل كان ماعطيته الفلوس فالصبح ايدز الصور البابا
سندس:اليوم انأمنلك المبلغ وبكرا في الصبح نعطيهن لكي في الجامعة
هدى:بكرا مش جاية للجامعة بنمشي مع ماما ادير تحليل
سندس:خلاص بكرا نطلع مالجامعة عالساعة 12وانجيك في حوشكم ونعطيهن لكي
هدى:باهي تمام وشكرا شكرا واجد والله ماننسالك وقفتك معايا بكل
سندس:عادي نحن بنات زي بعضنا وكان ماساعدنا بعضنا من بيساعدنا
هدى:جميلك هذا فوق راسي بس قوليلي انت عارفة عنوان عمارتنا
سندس:توا كنت بنقولك عطيني عنوان حوشكم
هدى:نحن شقة مش حوش وتوا نعطيك العنوان وقالاته الها(وطبعا العنوان عنوان شقة سراج)
سندس:خلاص باذن الله بكرا انجيبهن لكي
هدى:شكرا واجد واسفة عاللي صار مني كله
سندس:حصل خير سوء تفاهم وفضت وانا مش زاعلة منك
هدى:خلاص تمام عدي الصحباتك اكيدة يرجن فيك وياريت الكلام اللي حكيته لكي يقعد سر وحتى الهن ماتحكيش
سندس:سرك في بير والله مانحكيه الحد حتى بيني وبين نفسي معش انعاوده وسلام توا انتلاقو بكرا ومشت
هدى ضحكت وبخبث:اتلاقي قضاك ياحلوة بكرا واخيرا اللي نبيه بنوصله
""
سندس جت الصاحباتها ولقتهن مازال عند الباب
سندس:مازال ماروحتن
رانيا:بصراحة الفضول بيقتلنا بنشوفو هالباردة شن تبي منك
سندس:شي قالت بتعتذر عاللي صار بينا يومتها
رانيا:اصلا نحن ماعدلنش عليها هي قعدت اطنش بروحها
رويدة:وبعدين كان بتعتذر المفروض تعتذر منه كلنا لانها قعدت اطنش علينا كلنا
سندس:هذا اللي حكاته وين نندري عليها انا
رانيا:دوسة ردي بالك منها هذي وحدة خبيثة
سندس:لا خبيثة لا شيء هذي يوم اطنش ويوم تعتذر خلاص فكنا من موضوعها خلنا انروحو عشان انلحقو انتغدو ونلبسو وانجو الدودي اليوم
رانيا:صح صدقتي العقبالي خوك ايتحرك واتجني كيف اليوم هكي
سندس:انا بس انجيك دودي اتجي مع هلها يخطبو
رانيا:اتجي مع هلها اتسلم واتخش معانا جوا شن بديرلي جو البرانية واتقمعز مع الصباية انخش انكرها من شعرها
سندس:عارفتك هبلة واديريها
رويدة:عليك بخت الواحد حتي في خطبة خوه ماايتهنى في خبطة عصام بنات عمي كلمني معاهن وقاللي مانكش برانية وفي خطبتك انتي اتقوليلي مش برانية
سندس ورانيا قعدن يضحكن عليها وبعد اشوي سندس جاها السواق وروحت وخذت رانيا وصلتها معاها ورويدة جاها رؤوف وروحت
""
عند رويدة جت الحوشهم الساعة11:30غيرت دبشها وخشت اتساعد في امها عالغداء
رويدة ساكتة واتفكر كيف تفتح الامها الموضوع
عالية;كنك ساكته مش من عوايدك حتى شن درتن اليوم في الجامعة ماحكيتيش
رويدة:مادرنا شيئ زي كل يوم خذينا محاظراتنا وقمعزنا نفطرو
عالية:لازم منها عاد انتن الفطرة لكن قوليلي شن اخبار بات دوسة اليوم
رويدة:قالت كويس وفرحانة عشان اليوم فطرو مع بعضهم زي الايام اللي فاتن
عالية:باهي الحمدلله
رويدة:ماما فيه موضوع بنحكيه لكي
عالية:ايوا من بدري حاسة فيه حاجة كم تبي بسرعة
رويدة:مش فلوس ياماما
عالية بإستغراب:امالا شنو
رويدة:فيه اوليد يقرا معانا امبدري قالي هلي بيجوكم اليوم
عالية:وشن يبو هله عليش جايين
رويدة:بيخطبو يعني عليش جايين
عالية بحتت فيها زين:كيف بيخطبو ليش ماقلتيله انك مخطوبة
رويدة:ياماما انتي عارفة انا مش موافقة علي سند
عالية;يعني هذا موافقة عليه
رويدة سكتت ونزلت راسها
عالية قرصتها:راك تطلعي دايرة معاه علاقة
رويدة:اي ياماما والله مادايرة معاه علاقة لاشيئ هو مجرد اعجاب من بعيد
عالية:لا انا مش راضية ايجو وبعدين شن بنحكي الباتك وهو عاطيك السند
رويدة;وراس ماما اتوافقي هنا صبايا بيجن في العشية وكانهن جايات ايخرفن وبعدها احكيها البابا وعارفة بابا مش حيقول لا لان عارف مانبيش سند
عالية;كان تبيني انوافق تحكيلي قصة الشاب هذا معاك مالاول ومهما كانت القصة موافقة ايجو في العشية
رويدة:حاظر وقعدت تحكيلها في قصتها مع معاذ
عالية:معقولة هذا كله ساير وماتحكيلي اخسارة ماديما انقولك اعتبريني صديقتك
رويدة:ياماما ماكانتش فيه قصة هو اعجاب من بعيد وخلاص ومانحسابه حتى هو معجب فيا وبعد صار اللي حكيته لكي توا طلع معجب بيا وماطلبش علاقة لا شيء دغري قالي بنجي نخطبك
عالية:خلاص باهي خلينا انكملو الغداء وانوتو الجيتهم وتوا انكلم الولية اللي ادير في موالح نقطع عندها لان معش انلحقو انديرو شيئ
رويدة بفرحة:تمام وقعدت اتوتي هي وامها في الغداء
""
سندس ورانيا خذن الاذن من هلهن ومشن الرويدة في العشية وجنها قبل جية هل معاذ وقعدن ايوتن معاها واختارلها لبستها(ولبست قونة ليكرا سودة تحت الركبة يعني لاهي قصيرة ولا طويلة اكيدة وصلكن الوصف وعليها بدي دمي حلو ربع كم وكانت لبسة حلوة ودارتلها رانيا مكياج خفيف وكان شعرها طويل لفاته من لاورة لفة سمحة ودارتله ربطة حلوة وكانت طالعه اتهبل)
وهي وصحباتها في دارها مسكت سندس العطر وقعدت اتبخلها في عطر رن فون رويدة
رويدة بخوف:هذا معاذ
رانيا:وردي عليش ترعشي
رويدة ردت:ايوا معاذ
معاذ:خلاص وتيتي
رويدة:اها واتية
معاذ;ونحن قريب منكم
رويدة:حي بتجو توا
معاذ وطا صوته:حبيبي ماترتبكيش وماتركبيش علي روحك كله حيقعد تمام
رويدة سكرت من غير ولا كلمة وقمعزت عالوطا
سندس بخوف:كنك شن فيه
رانيا بخوف:دودي شن قالك
رويدة حطت يدها علي قلبها:قالي حبيبي
سندس قرصتها:عن مرض نحسابه صايرة معاه حاجة ولا مش جاي
رانيا:خزي ياباردة حتى انا فجعتيني
اشوي ورن الجرس وفتح رؤوف( طبعا قاعد عشان الكبيدة عندهم😂)استقبلتهم ام رويدة استقبال سمح وخششتهم الدار الضيوف وكانن جايات امه واخته الكبيرة وعمته (وجايبين معاهم طبق تورته كبيرة وحلوة ومعاها صندوق عصير مغلف تغليفة حلوة وحافظة شكولاطة مالنوع الراقي والحلو ) خشن وبعد اشوي خشت رويدة جابتلهن النسكافيه ومعاه نوعين حلو وسلمت عليهن وطلعت طبعا صحباتها في المطبخ وهي تاخذ واتمد منهن وكل اشوي اتمد حاجة اتقمعز امعاهن اشوي وتطلع ولما جا وقت بيطلبوها طلعت وطلبتها ام معاذ وعالية قالتلها انشاور باتها ونعطوكم الرد وقبل المغرب بشوي روحو هل معاذ وقعدت هي وصاحباتها ايلمن في الحوسة
"'
عند سراج رانه عليه هدى في الصبح ماردش لان كان راقد ولما ناض في العشية رن عليها وحكتله اللي صار معاها كله وفرح بكل لان اليوم اللي يرجى فيه واخيرا بيجي بكرا
عالمغرب سراج يلبس وايأنق في روحه بيطلع رن عليه جده
سراج:اوو حويج توا انا انوتي في روحي بنجيك
جد سراج:باهي تمام حتى انا ران عليك بنقولك خطم علي نبيك في موضوع
سراج:خير شن فيه
جد سراج:لما اتجي توا تعرف
سراج:خلاص مسافة الطريق وانكون عندك وكمل لبسه ومشى الجده واول ماخش من برا وهو ايشفط وايبصر مع لمياء مرات عمه الصغير اللي عايش مع جده (اسمه بدر عمره 40 سنة ومراته كانت صغيرة من عمر سراج وعندهم عيلين وبنت وكانو صغار)
جد سراج:شنو الهرجة اللي دايرها برا
سراج:نحكي مع لمياء والله مرات ولدك هذي فيها جو كيف عفوفة بزبط كلا ضناك مش عارف المن طالعين معصيين بكل بدر ماعمري حقيت سنونه لا هو ولا باتي
جد سراج:الله غالب عايشين حياتهم جدية لانهن ماعرفوش يفصلو بين الشغل والحوش
سراج;ليش ماطلعولك مش عارفة
جد سراج:بيني وبينك طالعين الحياة حنك حتى هي ديما لاوية وجها
سراج قعد يضحك
جد سراج:بلا سهوكة مش جايبك تضحك خلينا في الجد توا
سراج:شن فيه ياجدي
جد سراج:فيه موضوع شاغل بالي وليا فترة انفكر فيه وقلت لازم ماانقولك عليه
سراج ابتسم:عارفك ياجدي اكيدة اتحب قولي من ومن بكرا نمشي نخطبها لكي
جد سراج:تحشم ينعن شكلك فيه واحد من عمري ايفكر يجوز توا
سراج:والله ياعليوة مازال صغير مدادك مازال مااجوزو مافيها شي كمل نص دينك بالك اتجيب اعيال فيهم جو
جد سراج بعصبية:سراج بتسكت واتخليني انكمل كلامي ولا انصبيلك
سراج:خلاص سكتت كمل
جد سراج:توا دبينك عارف ان الزواج نص الدين كنك مااتكمل انت نص دينك
سراج:اوكي فهمت يعني توا جايبني بتفتحلي نفس موضوع باتي واتقولي اجوز
جد سراج:اها وتوا مانبوش نقنعوك نحن خلاص القينا عروس وبناخذوها لكي
سراج:ومن هذي اللي خلتكم تاخذو قرار بروحكم هكي
جد سراج:بنت فرج صاحب باتك
سراج;اللي عطيتوه المليون هذا عليش ساعدتوه
جد سراج بعصبية:لا مش هكي البنت كويسة ومحترمة وسمحة وفيها كل مواصفات الزوجة الصالحة واللي اتليق بينا
سراج;مافيش بنت محترمة امتى بتفهمو ان كلهن زي بعضهن
جد سراج:لا فيه وواجد محترمات وبنات ناس وهذي من ضمنهن بنت أدب واخلاق وشطارة يعني كاملة
سراج:انا متعرف علي بنات بعدد شعر راسي وكلهن كيف بعضهن وكان عاجبتك خوذها انت ولا باتي
جد سراج صبى وبعصبية;والله مااتحشم علي وجك نحن نبو مصلحتك وانت تحكي هكي طول عمري انعزك وانحبك اكثر من احفادي كلهم لكن شكلك بتخليني انغير رايي
سراج:مش هكي ياجدي انت عارف حتى انا انحبك واكثر حتى من باتي لكن انا مانبيش نجوز افهموني انا هكي متريح
جد سراج:بس انا وباتك مش متريحين وقررنا وفضت واليوم خطبناها لكي
سراج عصب وصبى:مش انا اللي ننحط في امر واقع دورو من يجوزها وطلع
جد سراج:لا حول ولا قوة الا بالله العيل هذا امتى يعقل بس
سراج طلع وهو غامتله بكل من جده وباته وكيف ايحطوه في امر واقع وهما عارفين رأيه في الموضوع
""
عند سندس ورويدة جن بيروحن ومسكتهن ام رويدة للعشاء وقعدن معاهم وقعدن في المطبخ ايوتن معاها في العشاء رويدة جت من برا
رويدة:رنوشة فونك ايرن
رانيا:وينه
رويدة:مبدري خذيته ننقل منك في الصور والقيت مافيش شحن حطيته لكي في داري
رانيا:تمام توا انشوفه هذي اكيدة ماما
عالية:اسمعي كان قالتلك روحي ولا حاجة عطيني توا انكلمها انا
رانيا:حاظر وطلعت وفعلا لقتها امها
رانيا:ايوا ماما
سمية:وينك معش جيتي
رانيا:مسكتنا اعميمة عالية للعشاء انا وسندس
سمية:باهي اسمعي مااطوليش بعد العشاء دغري روحي
رانيا:حاظر
سمية:ولما بتروحي رني علي باتك خليه ايروح بيك
رانيا:حاظر ياماما وسكرت وحطت يدها عالباب بتفتح وتطلع فتح الباب رؤوف
رانيا بصدمة:شنو ادير انت هنا
رؤوف خش وسكر الباب:من بدري وانا نرجا في الفرصة هذي معقولة حبيبتي عندنا ومش قادر انشوفها
رانيا:بلا صماطة اطلع توا حد ايشوفنا
رؤوف:باهي توا نطلع غير جايبلك حاجة اتحبيها
رانيا:شنو
رؤوف طلع من جيبه طرفين شكولاطة مااللي اتحبهن رانيا
رؤوف:جبتلك الشكولاطة اللي اتحبيها
رانيا ابتسمت: اممم شكرا حبي
رؤوف:اصبري مازال في حاجة اخرى
رانيا:شن اخرى حبيبي
رؤوف طلع وردة وحطها الها جنب وذنها:انحبك رنوشة
رانيا:وانا انموت فيك
رؤوف تنهد:امتى بس ناخذك
رانيا:كمل بسرعه عشان تاخذني
رؤوف:والله حبيبي علي هالقراية وقاعد شاد روحي كله عشان انكمل بسرعه
رانيا:خلاص هانت كلها سنة واتكمل وتقعد احسن دكتور في الدنيا بس اسمع راه بنكتبو علي عيادتك للرجال فقط
رؤوف:ياساتر وعليش هذا كله
رانيا:هكي انغار مانبيش حبيبي ايتعامل مع اي بنت
رؤوف:مجنونة انا لكي انتي بس
رانيا:الاحتياط واجب
رؤوف;حاظر ياقلبي اللي تبيها انتي اتسير
رانيا ابتسمت وجت بتطلع
رؤوف:مش ناسية شيء وايأشر علي خده
رانيا ابتسمت وجت بتبوسه علي خده ولف بلعاني وجت البوسه علي شفايفه رانيا انحرجت وقعدن خدودها حمر
رؤوف حط يده علي خدودها:معقولة حبيبي هذا كله علي بوسه امالا بعد نجوزو شن اديري
رانيا بعدت ايديه وطلعت تجري
رؤوف ابتسم وطلع وراها
""
عند سراج طلع من جده ومشى الحوش فيصل وهو غامتله ورن عليه وفيصل خششه جوا واول ماحقه عرفه متضايق
فيصل:تي كنك شن فيه احكي يانصي شغلتني
سراج حكا القصة الفيصل
فيصل:باهي انت شن خاسر جرب بالك البنت كويسة صح
سراج:افهموني انا اكثر واحد معاشر البنات كلهن مش تمام
فيصل:سراج كلامك غلط اللي نعرفوهن نحن شكل وبنات الناس شكل والبنت اللي عاجبة امك وباتك وجدك يبقى كويسة
سراج:تي حتى اللي نعرفوهن عندهن هل ومايندرو عليهن فيش ايديرن ايزيطن توا وين مايبن يجوزن اول دكتور ايديرلهن عملية
سراج:الكلام هذا غلط نحن في مجتمع مازال ايخافو من ربي وايتحشمو وفيه بنات واجد كويسات اللي نعرفوهن اغلبهن يامش ليبيات ياعندهن قصص صايرات معاهن وخلننهن ينحرفن ياامهاتهن اجنبيات يااصلا هلها مش تمام وهذينا هنا الاشكال ماتقعدش اتقارن هذينا ببنات الناس اللي متربيات فيه واجدات متربيات ومحترمات وايخافن وايتحشمن وبنات اوصول
سراج:كان انت مقتنع بالكلام هذا انا مش مقتنع بيه
فيصل:ياراجل بالك تطلع كويسة واتوب علي يدها و اتجيبلك اعويلة وادير عيلة وتنسجم
سراج;وكنك مااتوب انت
فيصل:انا قاعد انكون في روحي واول مانجوز معش فيه لا سهر لا بنات مراتي وعيالي وهلي وشغلي وبس
سراج:متاكد تقدر ادير هكي
فيصل:متاكد مية في المية انا نسهر وانهيج فوق جو يعني تغيرة جو وانت اكثر واحد عارف البنات اللي انتلاقو بيهن حدي نشرب معاهن كاس نرقص معاهن بس عمري مالمست وحدة فيهن لاني الحاجة هذي مش دايرها الا مع وحدة تقعد حلالي
سراج;بس انا مش كيفك انا تعودت عالشيء هذا من انا عمري 15سنة مانقدرش ناخذ وحدة اتقيدني ويقعد وجي في وجها 24ساعة
فيصل:انا من رايي اتفكر باتك وجدك يبو مصلحتك وباتك بذات قعد يكبر في العمر يبيك اتصبي معاه في الشغل وتمسك مكانه
سراج بعصبية:تعرف حتى انا فاضي اللي جاي نحكي معاك قعد كلامك كيفهم بزبط كافيش حد فاهمني وطلع ومشى وقعد ايدور بالسيارة
""
عند هل رويدة صحباتها روحن وامها خشت علي باتها في الدار تبي تحكيله علي هل معاذ ورويدة قعدت قدام الدار تبي تسمع شن ايقول
عالية;فيه موضوع بنحكيه لكي
بات رويدة:شنو ان شاءلله خير
عالية:اليوم جونا وقعدت تحكيله في الموضوع
بات رويدة بعصبية:كيف اتخليهم يحكو في موضوع الخطبة وانتي عارفة ان البنت طالبها ولد عمها
عالية:بس انت مازال ماوافقت علي سند واصلا رويدة مش موافقة
بات رويدة:قولي هكي قولي ان بنتك تعرفه
عالية بعصبية;انت شن تحكي انت عارف رويدة كويس مش امتاعت الحركات هذينا
بات رويدة:امالا عليش رافضة ولد سيدها وموافقة علي هذا
عالية:طول عمرها وهي اتقوللنا سند كيف خوها وبعدين هذا شاب يقرا معاها وقالت محترم وهله مشاءلله عليهم وامه حكت عليه قالت ولدها الوحيد ومتحمل المسؤولية كلها من ميتت باته وشايل شغل باته كله يعني راجل قد روحة وتقدر تعتمد عليه وهذا هو الراجل الكويس
بات رويدة;وكنه سند حتى هو راجل وقد المسؤولية ورايدها
عالية;اكيدة وانا ماقلتش عكس هكي سند كويس وانا اكثر وحدة كنت نبيها تاخذه بس انا ام وعارفة احساس بنتي رويدة معتبره سند كيف خوها كيف بتعيش معاه وحسيتها مقتنعه بالشاب هذا
بات رويدة:اسمعي البنت الولد عمها وكلام اخرى في الموضوع هذا معش نبي والعرب كان طلبو الرد قوليلهم مافيش نصيب
عالية:بس ياراجل
بات رويدة:لا بس لا شيء وطفي الضي خليني نرقد
رويدة طبعا سمعت الكلام هذا وخشت الدارها وقعدت تبكي يعني حرام بعد طلعو ايحبو بعضهم يفترقو رن عليها معاذ ماقدرتش اترد معش عرفت شن تحكيله ورقدت وهي دمعتها علي خدها
""
عند سندس روحت وغيرت دبشها ومسكت شيتاتها اتراجع في اللي خذاته
باتها وامها في الصالة
فرج:عارفة امبدري محمد وعمي علي عليش جايين
سعاد;عليش
فرج:يخطبو في سندس الولده سراج
سعاد:وكنك ماقلتها ليا وليش امه ماجت معاهم
فرج:شوفت عينك كل اشوي واحد جاي ماقدرتش نحكيلك وقالي جيت انا وباتي عشان ناخذو رايك انت قبل وتعرف راي البنت وبعدها انجو في خطبة رسمية وانجيبو كبار العيلة كلهم وهي الحق جية عمي علي بروحها اتسد
سعاد:وولدهم كويس حسيتهم كيف الي ايزرو فينا طلبو الطلب هذا بعد ما دفعو الفلوس راه يطلع مش كويس
فرج:تبي الحق عمي علي ملمحلي عالموضوع هذا من قبل وقالي عندك حاجة رايدينها وتوا نطلبوها لما انجو الحوشك وعرفته يحكي علي سندس لكن بعدها معش جا وقت وانا قعدت كل مرة في مكان وهما معش جو لكن ان ولدهم مانعرفش لكن ايقولو هلي وجوها تشرب لبنها شوفي باته وجده كيف ناس كويسة ومحترمة وانا نعرفهم من قبل ونعرف خوت محمد كلهم رجالة مشاءلله عليهم متاعين شغل وقد المسؤولية ومتعلمين كلهم وناس كويسة وتعرف ربي كويس يعنس سراج اكيدة زيهم
سعاد;باهي هكي طمنتني معناها حتوافق
فرج:انا حنوافق اصلا نقعد قليل خير كان رفضت بعد تصبايتهم معايا الدوة في سندس خايفها ترفض وانا والله شايفها عيلة كويسة وناس مسقمة
سعاد:بنتك معنده اكيدة حترفض
فرج;حتى انا عارفها لكن والله ماعندي وجه نرفضهم
سعاد:شن رايك انجسلك نبضها وانشوفها بالك ربي يهديها
فرج:ترا شوفيها
سعاد:انعدي انحط فواكه وانشيلهن الها وانجس نبضها
فرج:تمام
""
عند هل معاذ
مروة بفرحة:باهي اللي بتي عندنا يااعميمة
عمة معاذ:معاذ سكر راسه يبيني انبات
ام معاذ:ها شن رايك في رويدة
عمة معاذ:لا مشاءلله عليها اتهبل وشكلها كويسة وعاقلة وحتى امها كويسة عرف يختار
ام معاذ;حتى انا عجبوني
مروة:رويدة اتهبل ودمها خفيف هي ومعاذ خايلين علي بعضهم
عمة معاذ:من قال معاذ ايوافق يجوز بعد هذك القصة
ام معاذ:صدقتي كان مسكر راسه بكل ومعش يبي طاري الزواج نهائي وقعد وقته كله لنا وللشغل
عمة معاذ:شكله حبها اللي خلاته يقتنع
ام معاذ;قصة لينا اثرت فيه واجد وخايفة ايكون مازال مانساها
مروة:اكيدة نساها لو مانساها راه ماطلب يجوز بعد كل هالسنين
ام معاذ:مش عارفة خايفة تطلع نزوة هكي عشان ينسى ويظلم بنت الناس معاه
عمة معاذ:ان شاءلله خير
""
عند سندس وتحديدا في دارها خشت عليها امها جايبتلها فواكه
سندس:حي حي نبع الحنان راضية عليا اليوم
سعاد:سمعتك تقري قلت انجيبلك حاجة تسلي عليها
سندس:سلمك جيابه عارفتيني غالي عليا وانا نقرا ناكل
سعاد تضحك:انتي في اي وقت اتحبي تاكلي
سندس قعدت تضحك
سندس:ماما بنطلب منك طلب
سعاد:شنو
سندس:فيه بنية فقيرة تقرا معايا وطايحة في مشكلة وهلها مديننين فلوس وماقدروش ايردوهن عندهم بس نص المبلغ ومش عارفين من من يدينو مسكينة اليوم تحكيلي وتبكي وجعتني وانا حابة انساعدها
سعاد:وعليهم مبلغ كبير
سندس:اها وانا بنعطيها مبلغ انساعدها بيه
سعاد;كان اتفكيني من سريب المساعدات هذينا
سندس;مانقدرش ياماما انشوف وحدة تبي مساعدة وماانساعدهش انتي بروحك شفتي شن صار معانا المرة اللي فاتت وحتى نحن كن محتاجين حد ايساعدني وربي جابلنا من ايساعدنا
سعاد;والله صدقتي اكيدة ربي جابلنا من ايساعدنا عشان مساعدتك للناس قوليلي كم تبي وانا ناخذهن من باتك
سندس:2000جنيه وماتتقوليش البابا القصة مانبيش عمل الخير ينتش معش ينحسب اجره
سعاد;حاظر توا انقوله نبيهن انا
سندس:تمام
سعاد:دوسة بنحكيلك موضوع
سندس:شنو ماما
سعاد:شن رايك في عمك محمد وجدك علي وعمتك عفاف
سندس باستغراب:كويسين بكل بس غريب سؤالك عليش تسالي مع اني شامة وراك موضوع حيعقدني
سعاد ضحكت:من يوم يومك ذكية وتلقطيها عالطاير
سندس:اها يعني موضوع خطبة
سعاد:عمك محمد طالبك الولده وباتك قال مشاءلله عليك عيلة وكويسين وانتي شفتي كيف صبو معانا
سندس:يعني هذا عليش دفعولنا الفلوس عشان بابا ينحرج ومعش يقدر ايقول لا
سعاد:لا والله باتك قالي طالبينك من قبل غير معش جت فرصة ايجو
سندس:ماما انتي عارفة رايي في الموضوع انا مش متجوووووزة
سعاد:بس يابنتي اهي اليوم رويدة صاحبتك انخطبت بكرا تجوز وهدي رانيا غير ايكمل رؤوف بتجوز وتقعدي غير انتي حتى انا وباتك من حقنا نفرحو بيك
سندس بعصبية:انا قلتلكم مش متجوزة انتو مليتو مني ولا شنو
سعاد:معقولة انملو منك نحن ماعندنا الا انتي وربي ماعطانا اعيال اخرى نبوك تجوزي واتجيبيلنا احفاد ايفرحونا وايغيرو حياتنا ماتحرمينا مالفرحة هذي
سندس بعصبية:خلاص الموضوع انتهى وانا بكرا عندي جامعة بدري وانا بنرقد وخشت في سريرها وتغطت
سعاد:لا حولا ولا قوة الا بالله ربي يهديك وطفت الضي وطلعت وحكت اللي صار الباتها
""
صباح ثاني يوم ناضت سندس خذت الفلوس من امها ومشت الجامعتها وعابية بعد تطلع مالجامعة تمشي الهدى وتعطيها الفلوس
""
#يتبع
زعمك شن حيصير بكرا مع سندس هل حتنجح خطة هدى وسراج ويقدر ايدير سراج اللي يبيها وكان صار هكي كيف حيعرف سراج ان هي هذي البنت اللي بياخذها وسندس كيف حتعرف ان هذا هو الشخص
ورويدة شن حدير بعد رفض باتها الحبها الوحيد هل حتستسلم او حتحارب عشان حبها
ومعاذ شن قصة لينا اللي طلعت في حياتها ومن هي اصلا وهل فعلا نساها ولا يبي ينساها برويدة كله حنعرفوه
الحلقة الجاية 😊
أسفة لو فيه لخبطة في الاسماء وأكيد رايكم ايهمني 😉
ولا وحدة اتقول قصيرة هذي اطول حلقة كتبتها 😎😂
گـتـابـتـي Koka Saleh
أنت تقرأ
منحرف واحببته
Romansaكانت تلك الإختلافات سبب جمعنا لنكمل قلوب بعضنا💗 These differences are the reason why we gathered to complement each other's hearts
