كانت ملك تتحدث فى الهاتف: ممكن افهم ايه اللى اخرك كده ؟ يعنى يرضيك وقفتى فى الشارع كده!
امجد: والله موضوع العربية دا طول اوى و مرزوع عند الميكانيكى من ساعتها ومش عارف هيخلص امتى. انا اصلا بفكر اطلع على عيد الميلاد وارجع اخدها منه وانا مروح. وبعدين انتى ايه اللى نزلك اصلا قبل مااكلمك؟
ملك: مافيش شديت مع ماما شوية فقلت انزل قبل مالموضوع يكبر
امجد: خير؟
ملك: متشغلش بالك انت دا موضوع قديم و تافه
امجد: ماشى. هتعملى ايه دلوقتى ؟
ملك: لو مكنتش شديت مع ماما كنت طلعت بس انا بصراحة مليش مزاج اطلع البيت. بقولك....ابعتلى العنوان وانا هاخد تاكسى واسبقك
امجد: اوك هقفل و ابعتهولك
ملك: ماشى. سلام
- وصلت ملك منزل اياد وقابلتها ياسمين بالترحاب و قامت بتعريفها على افراد العائلة
ياسمين: منورانا يا ملك. تعالى بقه اعرفك على افراد عائلتنا الكريمة🙂
أخذتها متوجهة نحو اخيها رامى
ياسمين: روميو تعالى اعرفك على مهندسة ملك احدث عضو عندنا فى الشركة وقررت اتخاذها رفيقة عمرى 😂ثم وجهت حديثها الى ملك: دا بقه يا ستى دكتور رامى اخويا وتوأمى و مكمن أسرارى دكتور جراحة شاطر اوى و يعجبك😉
ملك: اهلا يا دكتور. تشرفت بحضرتك
رامى: ايه دا دكتور و حضرتك الاتنين فى جملة واحدة!!! لالالالا انا مبحبش الرسميات بتخنق منها كفاية عليه رسميات المستشفى طول النهار. احنا نمشيها رامى بس
ثم توجه بالحديث الى ياسمين قائلا: بس تعالى هنا قوليلى....مهندسة فى الشركة ازاى و من انهى اتجاه!!! هو اياد ساب رئاسة مجلس الادارة من ورايا ولا الموازين اتقلبت ولا ايه اللى حصل بالظبط؟
لتجيبه ملك ضاحكة: دا شكله فعلا كان مكهرب الشركة وانا جيت عملت انقلاب.
كان اياد الواقف خلفهم يستمع الى حديثهم مستعدا للرد على رامى ولكن سحرته ضحكة ملك فعجز عن الحركة و الكلام
أفاقه من شروده خبطة على كتفه من امجد و هو يحدثه: ايه يا عم. واقف مبلم كده ليه و سرحان فى ايه؟
اياد ناظرا له بطرف عينه: انت اد الحركة دى ؟
امجد مصطنعا الخوف ومقبلا كتفه: انا اسف يا باشا دى كانت وزة شيطان وراحت لحالها
اياد: ماشى لقد عفونا عنك. اتأخرت كده ليه؟
امجد: العربية عملتها معايا و ملطوع عند الميكانيكى بقالى ساعتين على امل انه يخلصها بس لقيت الموضوع مطول سبتها وجيت. اه صحيح مشفتش ملك اصل معرفتش اروح اجيبها فبعتلها العنوان تيجى هى
اياد مشيرا برأسه: واقفة هناك مع رامى و ياسمين
توجهو ناحيتهم ووجه اياد حديثه لرامى: لو سمحت
يا رامى شوف دادة عزيزة عشان تعبانة شوية
رامى: حاضر. عن اذنك يا ملك.
اياد محدثا ملك: منورة يا بشمهندسة. واضح ان حضورك طاغى واى مكان موجودة فيه بتبقى محبوبة من اصحابه
ملك: مش واضح. بدليل ان حضرتك مش طايقنى
قاطعهم امجد: واضح كده ان فيه خناقة هتحصل وانا جعان وعايز اروح اطمن عالبوفيه. ماتيجى يا ياسو تعشينى
ياسمين: طب ماتستنى نحجز ياعم بدل مالليلة تتضرب
اياد : روحى يا ياسمين متخافيش. انا هتكلم مع مهندسة ملك كلمتين بمنتهى الهدوء
ياسمين: حاضر ربنا يستر
اياد لملك: مين بقه قال انى مش طايقك! انا مش فاكر انى قلت حاجة زى دى. احنا بس ممكن نكون مختلفين فى الافكار ووجهات النظر بس دا طبعا مش عداوة شخصية معاكى اطلاقا. وعشان اثبتلك حسن نيتى انا مستعد افتح معاكى صفحة جديدة و نعتبر نفسنا اول مرة نتقابل النهاردة. ها موافقة؟
ملك ببلاهة: هو حضرتك مهندس اياد ولا حد شبهه؟
انفجر اياد ضاحكا لتقول ملك: الله ماحنا بنعرف نضحك اهو و عندنا سنان كمان حلوة وبيضة!!!!
زاد اياد فى ضحكه قائلا: لا بجد انتى فظيعة. بجد مضحكتش كده من زمان. اعتبر دا عربون صلح؟
ملك: اوك موافقة. هى ياسمين وامجد راحو فين
اياد: امجد اكيد معروف مكانه مش محتاجة تسألى 🍽
ملك: معاك حق😀
اياد: تعالى اعرفك على بابا
ملك: اوك
ذهب اياد تجاه والده الواقف مع مجموعة من اصدقاءه محدثا اياه فى اذنه: تسمح حضرتك تيجى ثوانى اعرفك على حد مهم بالنسبة لى
وليد: حد مين؟
اياد: المهندسة الجديدة اللى حكيت لحضرتك عنها
وليد: اوك هى فين. اشار اياد لملك فذهبت تجاهه
اياد: اقدملك بابا وليد السيوفى ودى مهندسة ملك
ملك: اهلا وسهلا. اتشرفت بحضرتك يافندم
وليد: اهلا يابنتى نورتينا. اياد ملوش سيرة غيرك واد ايه انتى بتحبى شغلك ومهندسة شاطرة
ملك بخجل: ميرسى يا فندم هو بس بيكبر المواضيع شوية
وليد: اتمنى نتقابل مرة تانية. عن اذنك هسلم على ضيوفى
ملك: اكيد يا فندم اتفضل. ثم وجهت حديثها الى اياد : بقى انت جايب فى سيرتى و بتشكر فيا!!!!! انت متأكد انك انت نفسه مهندس اياد اللى بنشوفه الصبح ؟!!!!
اياد: خلاص بقه مااحنا قلنا هنفتح صفحة جديدة
اما عند ياسمين فذهبت لاخبار والدتها بتواجد ملك
حنان: هى فين
ياسمين: هى اللى واقفة مع اياد هناك دى. تعالى اعرفك عليها
اخذتها ياسمين وتوجهو الى ملك
ياسمين: ملوكة اعرفك على ماما
نظرت اليها حنان ولكنها شردت فى ملامح ملك وصبت جام تركيزها عليها
حنان: اهلا يا حبيبتى منورانا
ملك: الله يخليكى يا طنط. البيت منور باصحابه
حنان: هو احنا اتقابلنا قبل كده ؟
ملك: لا للاسف ياطنط. جايز حد شبهى
حنان: جايز. سبحان الله يخلق من الشبه اربعين
هنا لمحت ياسمين فريدة واقفة مع احدى صديقاتها فنادتها: فيرى. تعالى اعرفك على ملك. دى يا ملك فريدة برنسيس الحفلة
ملك وهى تناولها هديتها: كل سنة وانتى طيبة
فريدة: وانتى طيبة. مكنش فيه داعى تتعبى نفسك
ملك: مافيش تعب ولا حاجة انا حبيتك اصلا من قبل مااشوفك من كلام ياسمين عنك
فريدة: ميرسى يا ملك.
ملك: طيب انا هستأذن لانى مينفعش اتأخر اكتر من كده
حنان: خليكى شوية احنا لسه ملحقناش نتعرف ولا شبعنا منك لسه
ملك: ربنا يخليكى يا طنط بس عشان ماما لوحدها فى البيت
حنان: ماشى بس خلينا نشوفك تانى
ملك: اكيد ان شاء الله. هو امجد فين؟
ياسمين: الميكانيكى كلمه عشان يروح ياخد العربية. استنيه لما ييجى يوصلك
ملك: لا خلاص انا هاخد تاكسى لانى مش ضمناه الصراحة
اياد: طب اتفضلى وانا اوصلك
ملك: مافيش داعى تتعب نفسك
اياد: ولاتعب ولا حاجة وبعدين اعتبريه من ضمن معاهدة الصلح
ملك بابتسامة: اوك
بعد مغادرتهم توجهت حنان بالحديث الى ياسمين: الا قوليلى يا ياسمين. هو مين اللى جاب الشغل لملك فى الشركة؟
ياسمين: امجد. ماهى تبقى بنت خالته. المهم ايه رأيك فيها عجبتك؟
حنان: عجبتنى جدا. دى حتى شبه حد اعرفه الخالق الناطق
ياسمين: ماانتى قلتى يخلق من الشبه اربعين
حنان: عزيزة عاملة ايه دلوقتى ؟
ياسمين: احسن الحمد لله. رامى عطاها علاج اخدته و نامت. هى فريدة راحت فين؟
حنان: مع بابا بيعطيها هديتها
فى الغرفة عند فريدة
وليد: اتفضلى ياستى هديتك بس يارب تعجبك
اخذتها فريدة وقامت بفتحها لتترقرق فى عينيها الدموع فالهدية كانت عبارة عن صورة فى اطار لطفلتين صغيرتين
فريدة ببكاء: جميلة جدا يا بابا. لقيتها فين ؟
وليد بحب: لقيتها فى البوم صور قديم. اوعدك يا فريدة انى ابذل كل جهدى عشان تبقى معانا قريب ان شاء الله
اما عند ملك و اياد فى السيارة، كان يسود الصمت بينهم الى ان قطعه اياد قائلا: تحبى تسمعى حاجة؟
ملك: والله دى مش عربيتى عشان اختار. المفروض صاحب العربية يسمع على مزاجه
اياد: خلاص بقه خلى قلبك ابيض
ملك: خلاص حصل خير. بس بردو سمعنى على ذوقك ثم اكملت بخجل عشان بصراحة كان حلو المرة اللى فاتت
اياد: اوك
وقام بتشغيل الكاسيت على اغنية " اغار عليها" لعبدالرحمن محمد وينظر الى ملك نظرة خاصة
ملك: مش قلتلك ذوقك حلو
اياد: ولسه قريب اوى هتتأكدى من دا
أنت تقرأ
جمعتنا صدفة
Romanceجمعتني بك أجمل وأروع صدفه،كنت تنتظرنى، تريد أن تحتمي بى كلما تعاظمت همومك، يوجد بداخلك رابط قوي يؤمن بوجودى، كنت علي يقين انك سترانى ثانيه اما عنى انا، فلم اكن اعلم عنك شيئا، كنت اعتقد ان احبتى تخلو عنى، الى ان جاءت صدفة اثبتت لى خطأى وسوء ظنى، واجت...
