فجرَة

(الموسم الاول ) الحلقة الاولى

#فجرة ❤( قصة من الواقع )

🌷كتابة : ندى أحمد 🌷

.
.

الجزء الأول : -

أذن الفجر " الله أكبر " ناضت فجرة دارت عليها الوضوء ونوضت بوها
فجرة : بوي .. يا بوي ..نوض صلي ، الفجر أذن ..
ابراهيم فاق : باهي ..
وتوكل ابراهيم للجامع ..

-فجرة تقلي في الدحي حاطة براد الشاهي على النار ..
محمد "عمره 6 سنين " : فجرة  ..

-تلفتت فجرة لخوها لقاته مبلل تحته ،
خداته من ايده بدون ما حتى تكشخ عليه او تهينه : تعالا خش للحمام ..
- وهي تغيرله في ملابسه شافت المية لقتها مقطوعة 
فجرة : استنا نلفك بالفوطا تو تمرض ، نمشي نسخنلك من ماء الشراب وخلاص ..
محمد : ذذذذذذ فجرة صقعان ..

جت تجري بالميا الدافية و غسلتله ولفاته بالفوطا ..
فجرة : شني حبيبي دفيت توا ..
محمد هز براسه " اي "

بدلتله ..
ورجعت للمطبخ وتت سفرة الفطور ..

ومشت بتنوض خوتها الزوز الباقيين للمدرسة

فجرة : علي .. زهرة نوضوا افطروا وبدلوا ..

ناضوا وكلهم صحصحوا ملمومين على السفرة وحدة

على خشة ابراهيم : السلااام عليكم ، صباح الخير ..
فجرة : هي بوي زود افطر ..
ابراهيم : هي ..
وقعمزوا ..

ابراهيم وهو طالع : هي بنتي ما تبي شي ؟
فجرة : لا سلامتك بوي ..
ابراهيم مد عشرة دينار : هاك بنتي بالك تستحقوا حاجة غدوة الظهر مروح  ..

فجرة باست على راس بوها : ربي يحفظك تمشي وتجي على خير ..

طلع ابراهيم ..
وبعتت خوتها للمدرسة

روحوا خوتها وغذتهم ..
وهي تقري فيهم ب قلب وفي خاطرها تبيهم ينجحوا ويوصلوا لاعلى المراتب ، .. لانها هي وقفت قرايتها رغم انها شاطرة ..بس على خاطر خوتها

مع العشيات  بعد اذان العصر خدت المكنسة والسياقة وفوطة التنشيف والصابون والبخور (مواد التنظيف)
فجرة : اسمعوا انا طالعة لجامع ماحد يطلع وما تفتحوا لحد اكتبوا واجباتكم واللي ماعرفتوشي انروح ونشوفه  ..
زهرة : جيبيلنا معاك حلوى ..
فجرة : حاضر ..

تعودت فجرة على انها يوميا او يوم بعد يوم تنظف الجامع وتعطره بدون اي مقابل ،فقط لله !

وصلت فجرة وخشت للجامع بعد ما طلعوا المصلين ..
وبدت تكنس وتلمع وتمسح كملت مكان المصلين وولعت البخور وعطراته
فجرة : " الله قداش ارتحت ، مزال خلوة النساء " ومشت خشت لقت الطالبات يقروا ..

وهي تكنس وتلمع ووذانها في المحاضرة على سيرة الرسول عليه الصلاة والسلام

طلعوا الطالبات وقعدت تنظف ..كملت فجرة الشغل ..
شافت المكتبة تتفقد فيها لقت كتاب "الفوائد" تتصفح فيه وتقرا ..
فجأة سمعت صوت تسكيرة باب ..