رواية : نَفسـي عَـزِيـزة مَـن جَفانـي جَفِّـيته لـو صَـعب عَلـى القَلـب فَرقـاه

13

مر اليوم الثاني و الثالث بهدوء رغم فقدان البنات لاخواتهم الثلاث لكن التزموا الصمت
روابي لسا ما صحت بسبب المخدر و غاطه بعيده عن العالم و الهموم و الناس
نقلوها بجناح خاص و رافقوها اخواتها شموخ و منى
شموخ تحس بسعادة للمهمه اللي أنجزتها و تبتسم بخبث كل ما تتخيل شكل فهد لما يبحث عن الصفقة
و مع هذا كله خايفه على روابي و تبي تعرف وش السبب اللي خلاها تتألم و تتأزم حالتها
منى سهرانه عند روابي و ما تركتها رغم عدم وعيها للدنيا اختها الصغيره اللي تعبت بحياتها بسبب المها ما تبي تبعد عنها و تتركها و رافقتها هي و شموخ معها

...

الصباح
الساعه ٧:٠٨

تحس بفراغ داخلي بمكان يملأه البيــاض لابسة فستان
ابيض تصارخ و تسمع صوتها وهو يتردد بهالمكان الواسع

وقفت و مشت وهي تحس بالوحدة لحالها بهالمكان تسمع احد يناديها بحزن

و صوت واحد يبكي بقوة و تسمع صوت شهقات متتالية
قالت بصراخ : انــا هــنــا..

بس باقي المنادي يناديها تقطعت أوتارها الصوتيه من كثر الصياح و وقفت بيأس و عجز و تهاوت على الارض على ركبها

وهي تناظر أمامها بلا هدف غمضت عيونها و فتحتها بشويش وهي تشوف كل شي مشوش

سمعت صوت اختها منى اللي تبكي و تقول : روابي تكفين ردي علي روابي

سمعت صوت اختها شموخ
تقول بهدوء: منى خلاص ازعجتيها

فتحت عيونها وغمضتها بسرعه من هالنور اللي أعماها رجعت فتحتها

شموخ بصوت عالي وهي تخرج من الغرفه :
دكتووووووور ..

بكت منى بفرح وهي تضم راس اختها لصدرها و تحمد ربي الف مره على سلامتها
قالت روابي بهمس مبحوح : ابـ ـي مـ ـاء ..
قامت منى وهي تجيب ماء لأختها بفرح

شربت شوي من المويه
و رفضت تكمل تنهدت و سندت ظهرها على المخده و حطت يدها على مكان الخياطه بآلم

رجعت شموخ
و بعدها دخل الدكتور بهاللحظة
و معه ممرضة

و هو يقول بلهجته: الحمدلله على سلامتس اخت روابي انتهت العملية بنجاح و بتقعدين هنا اسبوعين نتطمن عليتس و ترجعين لأهلتس بإذن الله و لعاد تضغطين على نفستس كثير لان هذا بيضرتس قبل ما يضر محل العمليه و بتؤدي الى مضاعفات عشان كذا ابعدي عن الضغوطات و اللحين اتركتس مع الممرضة تفحصتس بعد العمليه عن اذنكم..

طلع الدكتور و راحت شموخ لروابي و شالت الطرحه من وجهها و هي تقول بهمس: الحمدلله على سلامتك ي نظر عيني ..
ورجعت قالت بهمس حاد : بس السبب ماني بأعديه كذا
طالعت فيها روابي بهدوء و لفت وجهها متغاضيه عن تلميحات اختها