الجزء الثاني
عاد رامي من عمله ليجد سلمى تستلقى بإجهاد فوق أحد الارائك اقترب منها بقلق نزل على ركبتيه يمسح عن وجهها حبات العرق: سلمى مالك يا حبيبتي ؟؟
سلمى بوهن: تعبانة يا رامى هأقع من طولى المطبخ سخن نار
رامى بعتاب رقيق: شوفتى بقى ما انت غلطانة يا سلمى حامل وتعبانة واول يوم صيام تعملى عزومة؟
سلمى: انا قلت هيجو من بدرى يساعدونى محدش جه والأكل لازم يخلص
رامى: طب قومى ارتاحى وانا هأكلم عم سيد البواب يطلع مراته تساعدك وأبقى راضيها من
الاكل وانا هأراضيهم برضو
وقفت سلمى تستند إلى ذراعه وما أن وقفت حتى سقطت مغشياً عليها ،اعادها رامى إلى
الأريكة واسرع بأحضار كوب من الماء ينثر بعض حباته على وجهها حركت رأسها بوهن وهى تأن بخفوت مد ذراعه اسفل رأسها ليرفعه قليلا وهو يقول: اشربى يا سلمى
سلمى بضعف: لا يا رامى هأكمل صيام
رامى: يا حبيبتي انت حامل وتعبانة وربنا اداكى رخصة انك تفطرى اشربى يا سلمى
سلمى بعند: لا يا رامى انا كويسة
رامى: على فكرة كدة مش هتاخدى ثواب الصيام لانك عذبتى نفسك وابنك اللى فى بطنك بالصيام ،الصيام مش عند يا سلمى انا هأطلع فطارك وأبقى صومى لما تقومى بالسلامة
سلمى وهى على وشك البكاء: سبنى اكمل صيام علشان خاطرى
رامى بصبر: يا حبيبتي ربنا يكرمك اسمعى الكلام عاجبك حالتك وانت كل ما تقفى تقعى افطرى النهاردة واليوم اللى تقدرى تكمليه من غير ما تأذى نفسك او الجنين كمليه
تجرعت سلمى رشفة من الماء تحت إصرار رامى ثم اسندها لغرفتها وحضر لها كوبا من الليمون قبل أن يحضر من يساعدها بإعداد الطعام
قبل آذان العصر بنصف ساعة وقد شعرت سلمى بالتحسن وتوجهت للمطبخ
رامى : سلمى انا نازل اصلى العصر فى المسجد ومش هأجى غير لما أصلى المغرب
سلمى : ازاى يا رامى واخواتى اللى جايين دول مين يقعد معاهم
رامى : لا إله إلا الله قلت لك من الصبح متستنيش انى اضيع اليوم فى القعدة معاهم
دق جرس الباب فصمتا وتوجه رامى لفتح الباب وكان القادم أشقاء سلمى ايهاب وحسام وزوجتيهما وشقيقتها وسام وزوجها
رامى بترحيب: اهلا نورتونا والله اتفضلوا
حسام: انت نازل يا رامى ولا ايه؟
رامى : كنت رايح اصلى العصر فى المسجد
ايهاب: طب يلا ننزل نصلى هنقعد نعمل ايه ؟
رامى : بس انا بقعد فى المسجد لصلاة المغرب
حسام: عين العقل يلا ناخد ثواب ربنا يجزيك خير يا رامى ناخد اجر اعتكاف
نظروا جميعا لاحمد زوج وسام الذى قال: بتبصوا لى كدة ليه؟ يلا بينا
نظر رامى لسلمى نظرة ذات معنى وقال: سلام عليكم
وتوجهوا جميعا لصلاة العصر
*******
عاد الجميع بعد صلاة المغرب وصدم رامى من كم الأطعمة التى رصت على المائدة إلا أنه ابتلع كلماته ليتحدث أخيها إيهاب بلوم : ايه ده يا سلمى كل ده اكل ليه يا بنتى ؟؟
حسام: اه صحيح ايه يا سلمى دا انتو هتقعدوا تاكلوا باقى الاكل اسبوع قدام
سلمى: يا سلام دا انتو اول مرة تيجوا عندي ده اقل واجب
رامى : اتفضلوا يا جماعة هتقضوها كلام ولا ايه ؟
جلسوا جميعا لتناول الطعام الذى لم ينته منه إلا القدر اليسير
احمد: رامى هو انت كل يوم بتصلى العصر فى المسجد ده ؟
رامى: ايوه يا احمد الامام بيقول كلمة بعد الصلاة صغيرة كدة وبعدين أقرأ فى المصحف للمغرب
إيهاب: خلاص انا هأجى كل يوم اصلى معاك
احمد: وانا كمان اصلا القعده فى البيت بعد العصر فى رمضان ملهاش لازمة ناخد ثواب احسن
حسام: خلاص ايه رأيكم نتنافس فى ختمة القرآن بالتجويد
رامى : طيب ايه رأيكم ما دمنا هنتقابل كل يوم اللى. تقف قدامه آية ميفهمهاش يقولها ونتدبرها سوا وناخد اجر جلسة العلم
سلمى: انتو هتمشوا ورا رامى يبقى هتعقدوا الدنيا زيه
شعر رامي بالحرج فتنحنح وقال : انا شبعت عن اذنكم اغسل ايدى البيت بيتكم مش عاوزين عزومة
ونهض عن المائدة فإلتفت ايهاب لسلمى: ايه اللى هببتيه ده؟
سلمى: الله انا قلت ايه يعنى هو معقد وعارف كدة
حسام: وأما انتى شيفاه معقد اتجوزتيه ليه هو مخباش عليكى حاجة وعارفة من الأول أنه راجل ملتزم
ايهاب : مراتى اهيه قدامك اسأليها دى عزومة تعمليها !! خربتى بيت الراجل فى عزومة ورغم كدة قابلنا وقعد معانا وجزاته تحرجيه قدامنا دا انت لو مراتى كنت نكدت عليكى
رنا زوجة ايهاب: ايهاب معاه حق يا سلمى لو بتحترمى جوزك قيراط قدام الناس يبقى أربعة وعشرين ده غير انك لازم تراعيه فى ماله كل حاجة بالعقل الاكل كتير اوى أغلب ده هترميه
سلمى بغضب: يعنى الحق عليا انى بعمل لكم عزومة تليق بقيمتكم عندى
حسام: يا سلمى احنا عارفين قيمتنا عندك كويس مش الاكل اللى هيعرفنا
وسام: وانت يا قلبى حامل وتعبانة تعملى كل دة وانت صايمة ؟
سلمى بخجل: انا دوخت ووقعت ورامى فطرنى وقالى هيطلع لى الفطار وأبقى أصوم لما أولد
ايهاب بغضب: كمان يعنى الراجل مموت نفسه على راحة سيادتك وانتى ببساطة تقولى عليه معقد وتحرجيه قدامنا ،انا قايم اغسل ايدى بدل ما ازعلك وانت حامل
نهض إيهاب عن المائدة ولحق به احمد بينما قال حسام: سلمى يا حبيبتي جوزك ده نعمة من ربنا حافظى على حبه ليكى بلاش بعزقة فلوس ده تعبه وشقاه واياكى تحرجيه كدة قدام حد تانى بدل ما تتريقى عليه قلديه يمكن ربنا يهديكى
