نفسي ألبس النقاب بس خايفة ":(
خايفة من كلام الناس .. خايفة أقلعه ومثبتش .. خايفة أكون أقل منه ومستحقوش أصلا
خايفة ديني يقل بعده وأتفتن .. مخاوف كتيرة جوايا
= طيب وحدة وحدة ياست البنات 🌸✋
- أولا رضا الناس غاية لا تُدرك .. ورضا الله غاية لا تُترك
لو هنبص لكلام الناس يبقا مش هنعمل ولا هنتقدم خطوة في حياتنا .. خلي ربنا مقياسك مش كلام الناس .. وكوني من الغرباء زي م الرسول عليه الصلاة والسلام قال
- لو خايفة تقلعيه فدا شئ طبيعي .. خوفنا من القرارات المصيرية ف حياتنا طبيعي جدا
زي البنوتة الـ بتلاقيها قبل قرار الزواج خايفة ، مع ان كل المقدمات في الخاطب كويسة
زي الشاب اللي قبل استلامه لوظيفة في بلد بعيدة وسفر ومصاريف بيقلق ويتوتر ويخاف
بس لازم أقولك انك هنا وضعك مختلف .. لانك بتختاري طاعة والطاعة بتقربك من ربنا
ومع ربنا مينفعش نخاف 💙
- هل تعتقدي ان المنتقبه دي خاتمه القرآن وحافظه كل الاحاديث .. وان المنتقبة دي ملاك نازل من السما ومبتغلطش وأخدت صك الإلتزام وميثاق التدين ووثيقة العفة قبل ما تلبسه ؟!
اكيد لأ .. المنتقبة دي بتعمل طاعة وبتجاهد اوقات وبتخطئ اوقات وبتستغفر وعادي
لاننا بشر وبنجاهد وعمرنا ما هنوصل لدرجة نحس فيها اننا وصلنا خلاص لأ اهم حاجة اننا على الصراط لحد م نموت 💛
- متخافيش من حاجة وقولي يارب ثبتني .. ربنا قال أنا عند ظن عبدي بي فليظن بي ما شاء ان كان خيراً فخير 🌸🌸
#هقولك_حدوتة " )
وحدة صحبتي في مرة كانت عاوزة تلبسه وبتحكي معايا مخاوفها .. حكتلها كتير بس ختمت كلامي ليها بمثال صغير هي الـ فكرتني بيه بعد م لبسته ...
قلتلها النقاب دا شبه الخيمة الكبيرة ..
احنا المنتقبات قاعدين جواها .. والناس التانية بتبص علينا من بره ..
احنا جوا الخيمة تكييف بقا وبلالين بنضحك ونهيص وساقع وجاتوه وربنا راضي عنا ومرضينا
وهما بره فاكرين اننا مخنوقين منها ونفسنا نخرج ونعيش حياتنا بره
مع ان الحياة جوا احلى ..💜🌹🌷
فهمتيني يا غالية ..؟!
#رمضان_قرب_يلا_نقرب
