بناء على طلب الكثيرين جدا في الرسائل عن ضوابط الخطوبة !!! 💚
1) قبل الخطوبة في حاجة اسمها رؤية شرعية .. يعني المأسوف على شبابه العريس بيروح للمسكينة العروسة .. يشوفها و تشوفه .. يتكلموا .. يفهموا بعض .. يشوفوا في قبول ولا لأ .. كدا ..
2) الزيارة بتتكرر لحد ما هو يطمئن ليها و العكس .. أول ما يحسم أمره و يوافق هو و هي .. لازم يغض بصره عنها لحد الجواز و هي كمان .. ( إيه يا د. التشدد دا ؟ ) .. مش تشدد اصبر و هتفهم أهو ..
3) الخطوبة وعد بالجواز .. خطيبك راجل أجنبي عنك ( مش مِن بلاد برة لأ ) أجنبي يعني مش مَحرم .. و دا يترتب عليه حاجات كتير جدا .. مش حب و دباديب و باقة .. و رغي تحت البطانية ..
4) ما ينفعش تلمسها .. لا تقولي بقى ألبسها الدبلة .. و لا أربطلها السلسلة .. أمك هي اللي تعمل الكلام دا .. أنت لسة غريب عنها .. حرام دلوقتي .. لما تتجوز ابقى اعمل اللي أنت عايزه بالحلال ..
5) غض البصر واجب . فيما دون الوجه والكفين . ربنا سمحلك تشوفها قبل الخطوبة بس بعد ما عجبتك و وافقت عليها لازم تغض بصرك تاني .. يعني لما تروح تزورها .. عينك في الأرض أنت و هي .. مش تقضوها تسبيل ..
6) ما ينفعش تقعدوا لوحدكم .. لازم مَحرم .. عشان ما يحصلش خلوة .. و مفيش حاجة اسمها نخلي لهم الجو عشان يبقوا على راحتهم .. ياما سمعنا مصايب و بلاوي بتحصل بسبب الكلام دا ..
7) الخطوبة مش عشان تتفسحوا و تخرجوا و ترغوا في الفاضي و المليان .. لو عايزين تخرجوا لازم حد محرم يخرج معاكم .. الكلام يكون بفايدة و لضرورة تخص الجواز .. انتوا أجانب عن بعض ..
8) ما بقولش ما تعرفيش شخصيته .. لأ اعرفيها و كل حاجة بس بضوابط .. كلام الحب و الدلع و ترقيق الصوت و الخلوة و الرغي بالليل و القلوب و الإيموشنز الكيوت .. كل دا حرام و ما ينفعش ..
9) ما ينفعش صورك تبقى مع خطيبك .. نهائي .. و لا حتى ترفعوها ع الفيس سوا .. والفستان الضيق دا ما ينفعش تلبسيه .. لا قدامه و لا قدام الناس .. ربنا ما نزلش استثناء للمخطوبين في القرآن ..
10) أبوك و عمك و أخوك أجانب عن خطيبتك .. إذا كان النبي قال عن أخو الزوج و عمه و ابن عمه و كدا .. ( الحَمو الموت ) .. يعني دول أكتر ناس ما ينفعش يدخلوا على زوجتك .. فما بالك أنت لسه خطيبها ..
11) حفل الخطوبة مش واجب و لو اتعمل ما ينفعش يكون فيه اختلاط بين الرجال و النساء و لا مزيكا .. يعني ربنا أنعم عليكم بالخطوبة تقوموا تشكروه بالمعاصي دي كلها ؟ .. عيب يعني .. و قراية الفاتحة بدعة ..
12) جو لمة العيلة و الاختلاط دا .. و كله يضحك و يهزر مع كله .. مش صح .. حتى لو المجتمع ماشي غلط و الناس بتعاملكم أنكم متجوزين .. انتوا قدام ربنا مخطوبين .. في ضوابط أقسم بالله ..
13) الخطوبة مش معمولة عشان كل طرف يتجمَّل قدام الطرف التاني و يظهر أحسن ما عنده فا يتجوزوا و يتصدموا .. لأ .. خليك صريح معاها .. كوني تلقائية ( بضوابط من غير دلع أو سهوكة ) ..
14) ربنا وضع ضوابط عشان هو أعلم بينا من أنفسنا .. كام خطوبة حصل فيها تجاوزات و اتفركشت ؟ .. كام بنت عاشت قصة حب و عشمت نفسها و اتكسرت في الآخر ؟ .. عشان تخطينا الحدود ..
15) طَب كام بنت مش بنت أصلا عشان أهلها تساهلوا و سلمت نفسها لخطيبها عشان ( دا خطيبي مش حد غريب يعني ) و في الآخر استرخصها .. و سابها محطمة .. مكسورة .. و مشي ..
16) قولي احنا ما بنعملش كدا .. هقولك دي خطوات شيطان .. ربنا اللي قال كدا عشان يعلَم فطرتنا .. فا نحترم ضعفنا كبشر أحسن ما نقع .. كل ما تتقي ربنا في خطوبتك هيبارك لك بعدين فِـ حياتك ..
17) بتحبها و مش قادر ؟ .. اصبر .. و اكتب مشاعرك في أي حاجة و يوم كتب الكتاب اديها تقراه .. خلوا العلاقة بينكم نقية بالحلال .. ما تفتحوش باب للشهوات .. و ممنوع تماما « انتي لابسة إيه » و انتوا فاهمين ..
18) الكلام اللي أنا بقوله دا مش كل حاجة عن الخطوبة .. دي بس مقتطفات سريعة .. عارف أن في ناس هتتصدم و في ناس مش هيعجبها الكلام .. شئتم أم أبيتم .. هذا ديننا .. " سمعنا و أطعنا " ..💔
19) ابحثوا عن ضوابط الخطوبة ع المواقع الموثوق فيها و شوفوا سيرة النبي و الصحابة و اعرفوا كانوا بيعملوا إيه و اتقوا الرحمن عشان يكرمكم .. و لو حصل حاجات من دي .. صححوها و توبوا ..💙
20) لو خلاص اتجوزت و خلفت و كدا .. اقعد مع مراتك و قول لها أن دي كانت ذنوب و غلط و ممكن تكون سبب في الضنك و النكد و كدا .. فا لازم نتوب منها دلوقتي ..
توبة جديدة = صفحة جديدة = حياة سعيدة
